Ci lɛɛkarɛ hɔ kʊ Pol a ba
KORƐNTƖ ZANNƆ
ma
Pol ɩ yaa dam Korɛntɩ kristagʊɔɔ m
1
Mɔɔ mɩŋŋa Pol,
Woso ɩ mɔɔ bir a hɔɔnhɔ nɔ ʊ kʊ m yɩ Krista Yeezuu zibəəzaa,
mɔɔ m kan wɔɔ danyɩ Sɔstɛn kɩ m nɩ ci bɩ bam.
2 A ba wɔɔ nawʊm Woso gʊɔɔ sokʊma k'a nɩ Korɛntɩ ʊ bɩ ma,
gʊɔɔ kʊ Woso ŋ bɔ ʊ a hɔ Krista Yeezuu zɛkʊra nɔ ʊ rɔ wɔɔ,
an ŋ bir kʊ ŋ nɩ mɩsɩrbaa mɩŋŋa ba rɔ wɔɔ,
kan gʊɔɔ kʊ ŋ nɩ lɛɛ haay ʊ,
ŋnɩ yaa dam wɔɔ Zuuba Yeezuu Krista m nɔ wɔɔ kɩ,
Yeezuu mɩŋŋa m brɔɔ Zuuba,
a m wɔɔ Zuuba sɔ.
3 A yɛ wɔɔ nawʊm kʊ wɔɔ Zɩ Woso,
kan wɔɔ Zuuba Yeezuu Krista kɩ m barka kan laafɩɩ kɩ ka awɔɔ ʊ.
4 Mɔɔ ɩ yaa dam Woso m barka dɔmɩm haay awɔɔ tɔ ma,
barka k'a ka awɔɔ ʊ Krista Yeezuu nɔ ʊ bɩ minto.
5 Bala,
a tɔ ma bɩ,
awɔɔ Woso ganwʊrɛrɔ do haay yɩ,
an lɛ da bɩ,
awɔɔ ɩ lemim,
kan hɔdɔrɛ kɩ ganwʊrɛrɔ m.
6 A n ta ʊ sɔ bɩ,
Krista kasɛtɩ bɩ paŋŋa yɩ awɔɔ zi,
7 bɩ n a ka *Sɛnt-Ɛspri ganwʊrɛ sɩ n jɩra awɔɔ ma y,
awɔɔ k'a nɩ dɔm wɔɔ Zuuba Yeezuu Krista hɩnkarɛ dɔmɩm ma rɔ wɔɔ.
8 A mɩŋŋa n nɩ paŋŋa karɛ awɔɔ ʊ k'an ta an dɔmɩnnɔ nyarɛ ku,
k'an bɩr yɩrɛ ɩ ʊ,
hinni kʊ wɔɔ Zuuba Yeezuu Krista n nɩ zɛŋ ʊ bɩ,
kʊ hɔsɩ minsi bɩ nyɩnta awɔɔ gʊr zi y.
9 Woso k'a awɔɔ bir,
k'awɔɔ m zɛkʊra yɩ kan a Nyɩ Yeezuu Krista kʊ wɔɔ Zuuba m bɩ kɩ bɩ,
taalɛrazaa m.
Gʊngʊrɛ k'a nɩ Korɛntɩ kristagʊɔɔ sokʊma nɔ ʊ
10 M danyɩnɔ,
a yɛ mɔɔ nawʊrɛ awɔɔ han,
wɔɔ Zuuba Yeezuu Krista tɔ ma,
k'a kʊ ma,
a b'a ka gʊngʊrɛ n nyɩnta awɔɔ bire ʊ y,
k'a zɛ kʊ ra a bɩr hɔɔn deem m,
kan hɔɔndarɛ deem kɩ m.
11 Bala,
m danyɩnɔ,
Kolowe gʊɔɔ a dɩnda mɔɔ m,
ŋ ʊ,
awɔɔ bɩr kʊ marɛ y.
12 Hɔ kʊ mɔɔ ʊ kʊ m a hɩ bɩ ba n nɩ:
Awɔɔ gʊaa biyəə y'a hɩrɛ a ʊ:
«Pol gʊaa n mɔɔ m,
naa zaa a ʊ,
Apolɔs gʊaa n mɔɔ m,
naa ʊ,
Sefas gʊaa n mɔɔ m.
Naa a ya,
a ʊ,
Krista gʊaa n mɔɔ m.»
13 Krista a gʊngʊ ra?
Pol n y'a wɔ gɔdarkʊra ma awɔɔ minto ra?
Pol tɔ minto m n nɩ batɛm ka awɔɔ ʊ ra?
14 Mɔɔ ɩ yaa dam Woso m barka,
bala mɔɔ n batɛm ka awɔɔ gɔsɩ ʊ,
kʊ Krispus kan Gayus kɩ bɛɛ y.
15 Ncɩnaaʊ bɩ,
awɔɔ gɔsɩ b'a dam ma an a hɩ a ʊ,
mɔɔ batɛm ka a ʊ,
m tɔ ra y.
16 Mɔɔ batɛm ka Stefanas har gʊɔɔ ʊ sɔ,
kʊ naa bɛɛ y,
mɔɔ n batɛm ka gʊaa vanta ʊ m a dɔ y.
17 Bala,
Krista n mɔɔ nyɔɔ kʊ m bɩ batɛm ka y,
mɔɔ nyɔɔ a ʊ kʊ m bɩ lemim nyɩnta pa da.
Mɔɔ n yo mindɔrɛ ma m n'a pa bɩ darɛ y.
A ba mɔɔ ʊ maam kʊ Krista gɔdarkʊra bɩ bɩ bɔ vam y.
Mindɔrɛ kan hɔɔzaabaa kɩ
18 Gʊɔɔ kʊ ŋ nɩ nyaanɩm nɔ wɔɔ ɩ dɩgam lemim kʊ wɔɔ n'a pa dam,
ʊ n'a hɩm,
ʊ ʊ,
Krista ga gɔdarkʊra ma bɩ ma hɔɔzaabaa lemim.
Bɩ,
kʊ wɔɔ kʊ wɔɔ bʊmbɔrɛ yɩ rɔ wɔɔ nɩ,
Woso paŋŋa m gɔdarkʊra lemim bɩ m.
19 Bala,
n y'a gʊrsɩra ba Wosoci ʊ,
n ʊ:
«Mɔɔ mindɔrɛzannɔ mindɔrɛ zaar bam,
m hɔɔntaʊrɛzannɔ hɔɔn zaar ba.»
20 Mindɔrɛzaa ɩ ka?
Lɛrɔ karɩnsaamba ɩ ka?
Her durnya naa do meerbaawaasɩzaa ɩ ka?
Woso a ka durnya mindɔrɛ n a ba hɔɔzaabaa mim.
21 Bala,
Woso hɔɔn bɔ ʊ a mɩŋŋa mindɔrɛ nɔ ʊ,
kʊ durnya b'a da ma an a dɔ durnya mindɔrɛ nɩ y,
bɩ,
k'a gʊɔɔ kʊ ŋ nɩ sɩra kam nɔ wɔɔ bʊmbɔ hɔɔzaabaa lemim padarɛ bɩ m.
22 Zɩɩfʊrɔ wɔɔ,
a ka brɔɔ n nawʊm hoserlo ma,
grɛkkɩrɔ wɔɔ n'a kam mindɔrɛ ma,
23 bɩ wɔɔ,
Krista kʊ n y'a wɔ gɔdarkʊra ma bɩ wɔɔ n'a pa dam,
zɩɩfʊrɔ ɩ dɩgam naa ma nyannɩ,
do vantɔɔ gʊɔɔ nɩ dɩgam ma hɔɔzaabaa.
24 Bɩ,
kʊ gʊɔɔ kʊ Woso ŋ bir lɔ wɔɔ nɩ,
kʊ zɩɩfʊrɔ m,
gɛɛ grɛkkɩrɔ nɩ,
Krista kʊ wɔɔ n'a pa dam b'ɩ yɩrɛ ɩ ʊ,
Woso paŋŋa m,
bɩ Woso mindɔrɛ m sɔ.
25 Bala,
hɔ k'a bɔ kʊ ʊ,
ɩ ʊ,
Woso hɔɔzaabaa m bɩ,
hɔ bɩ do hɔɔntaʊrɛ lɛ da gʊɔɔ mindɔrɛ m,
sɔ bɩ,
hɔ k'a bɔ kʊ ʊ,
ɩ ʊ,
Woso paŋŋawar m bɩ,
a paŋŋa lɛ da gʊɔɔ paŋŋa m.
26 M danyɩnɔ,
k'a dɩga a mɩŋŋɔɔ ma mɩŋŋa k'a dɔ a ʊ,
awɔɔ kʊ Woso a bir lɔ wɔɔ,
awɔɔ barla,
gʊɔɔ ba ʊ gʊta ŋnɩ mindɔrɛzannɔ durnya mɩm ʊ y,
ŋnɩ paŋŋazannɔ sɔ y,
ŋnɩ har wɩsɩ gʊɔɔ y.
27 Bɩ,
hɔ kʊ hɔɔzaabaa m durnya ʊ bɩ,
Woso bɩ sa,
k'a nyannɩ da mindɔrɛzannɔ ma,
hɔ kʊ paŋŋawar m durnya nɔ ʊ bɩ,
Woso bɩ sa,
k'a nyannɩ da hɔ k'a nɩ paŋŋa m bɩ ma.
28 Hɔ k'a bɩ zore an yaarsɩ durnya ʊ bɩ,
hɔ k'a nyɔɔdʊ ba ʊ bɩ,
Woso hɔ bɩ do sa,
k'a nyaam hɔ kʊ gʊɔɔ nɩ dɩgam ma hɔ bɩ m,
29 kʊ gɔsɩ b'a da ma an a mɩŋŋa busu Woso lɛɛ y.
30 Woso mɩŋŋa tɔ ma m,
awɔɔ m zɛkʊra yɩ kan Krista Yeezuu kɩ,
a mɩŋŋa y'a ba wɔɔ mindɔrɛ k'a a to Woso zi,
a ɩ wɔɔ ba tɩrga Woso mɩm ʊ,
an n'a kam wɔɔ nɩ mɩsɩrbaa bam Woso tɔ ma,
an nɩ wɔɔ bʊmbɔm mimbʊnyaa nɔ ʊ.
31 Kʊ hɔ kʊ n y'a gʊrsɩra ba Wosoci b'ʊ bɩ n kʊ yɩ,
n ʊ:
«Gʊaa k'a ʊ,
k'a lɛ bɔ a mɩŋŋa ʊ,
a b'a lɛ bɔ a mɩŋŋa ʊ y,
an a lɛ bɔ hɔ kʊ Zuuba a ba b'ʊ.