Yeezuu a hɩnka a karɩndanyɩnɔ m Tiberiyaadɩ ʊ
21
Bɩ jɛ ʊ bɩ,
Yeezuu a ya,
an a hɩnka a karɩndanyɩnɔ m Tiberiyaadɩ kɔ lɛ ra.
A hɩnkarɛ bɩ ba n nɩ.
2 Sɩmɔɔn Pɩyɛɛr kan Toma kʊ n n'a birm Didim bɩ kɩ,
Galilee kʊ Kanaa gʊaa Natanayɛl kɩ,
Zebedee nyɩnɔ kɩ,
kan karɩndanyɩnɔ gɔsɩnnɔ kɩ hɩɩya,
ŋn'a zɛ kʊ ra.
3 Sɩmɔɔn Pɩyɛɛr n a hɩ ŋ nɩ,
a ʊ:
«Ta mɔɔ nawʊm kʊ m aa zɔnɔ ba.»
Ŋ n a hɩ m,
ŋ ʊ:
«Wɔɔ tam kan ɩbɩɩ kɩ.»
Ŋ n bɔ,
ŋnɩ gasʊ kɔɔlʊʊ b'ʊ,
bɩ gum bɩ do ʊ,
ŋ n hɔsɩ nyasʊ y.
4 Bɩ ma bɩ,
dɔ mɛ.
Yeezuu n jɩm kɔ lɛ ra b'ʊ,
bɩ karɩndanyɩnɔ wɔɔ n a dɔ ŋ ʊ,
Yeezuu nɩ y.
5 A n a hɩ ŋ nɩ,
a ʊ:
«Hey!
Nyɩnɔ,
zɔnɔ b'awɔɔ ʊ ra?»
Ŋ n a nyɩ bɔ nʊ,
ŋ ʊ:
«Ayy…»
6 Yeezuu n a hɩ ŋ nɩ,
a ʊ:
«K'a zaŋŋa bɩ zo kɔɔlʊʊ bɩ bɩsɩ ra,
awɔɔ y'a yɩrɛ.»
Ŋ n zaŋŋa bɩ zo,
an zɔ gʊr gʊta,
bɩ ŋ b'a dam ma,
ŋn'a gaa y.
7 Karɩndanyɩ kʊ Yeezuu a ŋʊa bɩ n a hɩ Pɩyɛɛr m,
a ʊ:
«Zuuba m!»
Sɩmɔɔn Pɩyɛɛr k'a a ma,
n ʊ,
Zuuba m bɩ,
a huu sa,
an a du a ma,
nyɩnta a ʊ dɩgɩ,
an a da hi b'ʊ.
8 Karɩndanyɩnɔ gɔsɩnnɔ wɔɔ a bɔ,
ŋnɩ bʊr kɔɔlʊʊ bɩ m,
ŋn'ɩ zaŋŋa bɩ gaam,
zɔnɔ n a han,
ŋ bɩ laatʊ kɔ bɩ lezi ma y.
A gakʊ ʊ a ba kan mɛtɩr zɔrɔ kɩ.
9 Kʊ ŋ zer tara ʊ bɩ,
ŋ sɛcɩna yɩ zɔ n ta ra kan bur kɩ.
10 Yeezuu n a hɩ ŋ nɩ,
a ʊ:
«K'a bʊr zɔnɔ k'awɔɔ ŋ gʊr dɩɩtaa rɔ wɔɔ m.»
11 Sɩmɔɔn Pɩyɛɛr n a bɔ,
an gasʊ kɔɔlʊʊ b'ʊ,
an zaŋŋa bɩ gaa tara ʊ,
zɔ gʊta-gʊta n a han zɔrɔ busoor yaa kaakʊ,
bɩ kan bɩ kɩ haay zaŋŋa bɩ n kaansʊ y.
12 Yeezuu n a hɩ ŋ nɩ,
a ʊ:
«K'a bʊr a hɔ bɩ.»
Bɩ karɩndanyɩ deem taan… n laaka da han,
a ʊ:
«Nka n'ɩbɩɩ m gɛ y?»
Ŋ y'a dɔ mɩŋŋa,
ŋ ʊ,
Zuuba m.
13 Yeezuu n a zɔ kɛɛrɛ,
an bur bɩ sa,
an a ka ŋ ʊ.
A n a ba zɔ bɩ m maam sɔ.
14 Yeezuu k'a mɩm bɔ ʊ gəəno bire ʊ bɩ,
a gallɛm kaakʊ hɔ a hɩnka a karɩndanyɩnɔ wɔɔ m naa.
Yeezuu kan Pɩyɛɛr kɩ
15 Hɔbɩrɛ bɩ kur bɩ,
Yeezuu a hɩ Sɩmɔɔn Pɩyɛɛr m,
a ʊ:
«Sɩmɔɔn,
Zaan nyɩnnɩ,
ɩbɩɩ mɔɔ ŋʊa an lɛ da nawɔnnɔ ra ra?»
A n a nyɩ bɔ ʊ,
a ʊ:
«Ɩɩn… Zuuba,
ɩbɩɩ dɔ,
ɩ ʊ,
mɔɔ y'ɩbɩɩ ŋʊarɛ.»
Yeezuu n a hɩ m,
a ʊ:
«Dɔ mɔɔ sinnyɛɛnnyɩnɔ ma.»
16 Yeezuu n a hɩ m a hɩɩya hɔ ma,
a ʊ:
«Zaan nyɩnnɩ,
ɩbɩɩ ɩ mɔɔ ŋʊam na?»
A n a nyɩ bɔ ʊ,
a ʊ:
«Ɩɩn… Zuuba,
ɩbɩɩ dɔ,
ɩ ʊ,
mɔɔ y'ɩbɩɩ ŋʊarɛ.»
Yeezuu n a hɩ m,
a ʊ:
«Dɔ mɔɔ seero ma.»
17 A kaakʊ hɔ ma bɩ,
a ʊ:
«Sɩmɔɔn,
Zaan nyɩnnɩ,
ɩbɩɩ ɩ mɔɔ ŋʊam na?»
Pɩyɛɛr heer a zar kan hɔ kʊ Yeezuu a hɩ m a kaakʊ hɔ ma bɩ kɩ.
«Ɩ ɩ mɔɔ ŋʊam na?»
A n a nyɩ bɔ ʊ,
a ʊ:
«Zuuba,
ɩbɩɩ k'ɩ hɔ haay dɔ bɩ,
ɩbɩɩ dɔ,
ɩ ʊ,
mɔɔ y'ɩbɩɩ ŋʊarɛ.»
Yeezuu n a hɩ m,
a ʊ:
«Dɔ mɔɔ seero ma.
18 Sɩra paan… mɔɔ n'a hɩrɛ ɩbɩɩ m,
k'ɩbɩɩ nyɩnta nyukumbueere bɩ,
ɩbɩɩ y'ɩ bankam,
ɩ nɩ tarɛ ɩ hɔɔnhɔ bɩncɛ ʊ.
K'ɩbɩɩ bɩ gusi,
ɩbɩɩ y'ɩ zarɔ hʊrm,
gʊaa vanta n n'ɩbɩɩ banka,
an ɩbɩɩ gaa,
an ta ɩbɩɩ m bɩncɛ k'ɩbɩɩ lɛ baa ʊ b'ʊ.»
19 Yeezuu bɩ meer naa do ba a ʊ k'a zɛ niŋŋə k'a nɩ Pɩyɛɛr zɛm,
an a lɛ bɔ Woso ʊ bɩ hɩnka.
K'a meer naa do ba bɩ,
a a hɩ m,
a ʊ:
«Zu mɔɔ ʊ.»
Yeezuu kan a karɩndanyɩ
k'a ŋʊa bɩ kɩ
20 Pɩyɛɛr k'a a bɔ,
an dɩga bɩ,
a karɩndanyɩ kʊ Yeezuu a ŋʊa bɩ yɩ a jɛ ʊ.
A ɩ nyɩnta hɔbɩrɛ bɩrɛ dɔmɩm ʊ,
an zerga Yeezuu cɩ ra,
an a hɩ,
a ʊ:
«Zuuba,
nka n n'ɩbɩɩ nyasʊm,
k'a ɩbɩɩ ka bɩ?»
21 Pɩyɛɛr k'a yɩ bɩ,
a a hɩ Yeezuu m,
a ʊ:
«Bɩ naa,
Zuuba,
bɔ n nɩ zɛm bɩ naa yɩ?»
22 Yeezuu n a nyɩ bɔ nʊ,
a ʊ:
«Kʊ mɔɔ ʊ k'an gɔɔta an ta an mɔɔ wusigəre ku,
kara y'ɩbɩɩ ku?
Ɩbɩɩ,
zu mɔɔ ʊ.»
23 Meerbaa naa do minto y'a ka,
n n so ra danyɩnɔ wɔɔ barla,
ŋ ʊ,
karɩndanyɩ naa do bɩ garɛ y.
Kʊ sɩra nɩ,
Yeezuu n a hɩ,
a ʊ,
a bɩ garɛ y.
A a hɩ,
a ʊ:
«Kʊ mɔɔ lɛ taa k'an gɔɔta,
an ta an mɔɔ wusigəre ku,
kara y'ɩbɩɩ ku?»
24 Karɩndanyɩ bɩ do nɩ minno nɔɔn duro kasɛtɩ kam,
an nɩ ŋ gʊrsɩra barɛ,
bɩ wɔɔ dɔ,
wɔɔ ʊ,
a kasɛtɩ bɩ sɩra m.
25 Yeezuu a ya,
an hɔɔ gʊtɔɔ ba.
K'a gʊrsɩra n n'a bam deem-deem,
mɔɔ hɔɔndarɛ nɔ ʊ,
durnya haay b'a dam ma,
an ciro kʊ ŋ nɩ ŋ gʊrsɩra bam nɔ wɔɔ si y.