Dundor kan a seero kɩ
10
«Sɩra paan… mɔɔ n'a hɩrɛ awɔɔ m,
gʊaa k'a n gasʊ seero bakʊ lɛ nɩ y,
an bɔkarɛ an bɔɔra m,
an gasʊ,
bɩ zaa bɩ,
koor m,
hɔyɔrɛzaa m sɔ.
2 Bɩ,
gʊaa k'a gasʊ bakʊ bɩ lɛ m bɩ,
bɩ zaa m seero wɔɔ dundor.
3 Gʊaa k'a nɩ dɔm cɛlɛ ma bɩ n'a gʊm dundor bɩ m,
seero wɔɔ n a tʊr ka a leer ma.
A n a seero wɔɔ bir deem-deem ŋ tɔ ma,
an bɔ ŋ nɩ garga ra.
4 K'a bɔ ŋ nɩ haay,
ka an nawʊrɛ ŋ lɛɛ,
seero wɔɔ n zu a jɛ ʊ,
kʊ ŋ y'a leer dɔ bɩ minto.
5 Ŋ bɩ yɛrɛ,
ŋnɩ zu saana jɛ ʊ y.
A si ŋ nawʊm,
ŋn'a gʊ saana bɩ ma,
bala,
ŋ n saanarɔ leer dɔ y.»
6 Yeezuu n *hɔbɔkʊrɛnoom naa do da ŋ nɩ,
bɩ ŋ n hɔ kʊ Yeezuu a hɩ bɩ jɩ dɔ y.
Yeezuu m cɛlɛ paan…
7 Yeezuu n a ya,
an a hɩ,
a ʊ:
«Sɩra paan… mɔɔ n'a hɩrɛ awɔɔ m,
mɔɔ m bakʊ bɩ lɛ.
8 Gʊɔɔ kʊ ŋ lɛɛ ka mɔɔ lɛɛ ŋnɩ bʊr lɔ wɔɔ,
konno m,
hɔyɔrɛzannɔ m sɔ.
Bɩ,
seero wɔɔ n a tʊr ka ŋ ma y.
9 Mɔɔ m bakʊ bɩ lɛ.
Kʊ gʊaa gasʊ mɔɔ m,
a bʊmbɔrɛ yɩm.
A gasʊrɛ,
an bɔ,
an bʊr,
an hɔbɩrɛ yɩ an a bɩ.
10 Koor bɩr zɛm k'a hɩ bɛɛ a ʊ,
k'a koor ba,
k'a gər zɛ,
k'a hɔ zar y.
Bʊr mɔɔ ʊ kʊ gʊɔɔ m mɩsɩrbaa yɩ,
kʊ ŋ n'a yɩ an bʊr bɔ.»
Yeezuu m dundor mɩŋŋa
11 «Mɔɔ m dundor mɩŋŋa.
Bɩ dundor mɩŋŋa bɩ,
a mɩsɩrbaa an n'a kam a seero wɔɔ minto.
12 Gʊaa k'a nɩ zi bam busoo minto bɩ,
seero wɔɔ dundor bɛɛ nɩ y,
bɩ ŋ zaa bɛɛ sɔ y.
K'a tampa yɩ an nɩ zɛrɛ,
a si an nawʊrɛ,
an n'a gʊm seero wɔɔ ma.
Tampa bɩ n a da ŋ bir,
ŋn'a hɩsɩga.
13 Kʊ gʊaa bɩ,
a ka an nawʊm busoo ma bɩ,
a leer ba seero wɔɔ mim ma y.
14 Dundor mɩŋŋa m mɔɔ m.
Mɔɔ m seero wɔɔ dɔ,
bɩ mɔɔ seero wɔɔ mɔɔ dɔ sɔ,
15 amba mɔɔ Zɩ mɔɔ dɔ,
mɔɔ nɩ m Zɩ dɔ bɩ m.
Bɩ,
m mɩsɩrbaa mɔɔ n'a karɛ m seero wɔɔ minto.
16 Seero gɔsɩnnɔ ta ʊ,
ŋ ba bakʊ naa do ʊ y,
bɩ mɔɔ brɔɔ gaam,
m bʊr ŋ nɩ.
Ŋ zɛm b'a tʊr ka mɔɔ leer ma.
Bɩ,
seero bakʊ nyɩntam deem a dundor deem.
17 Mɔɔ Zɩ ɩ mɔɔ ŋʊarɛ,
bala,
mɔɔ yɩ m mɩsɩrbaa karɛ,
kʊ m m ya,
m b'a si.
18 Gʊaa bɛɛ nɩ mɔɔ mɩsɩrbaa bɩ sire y,
mɔɔ mɩŋŋa n'a kam.
Mɔɔ m da ma,
m a ka,
mɔɔ m da ma,
m a si.
Mɔɔ Zɩ ɩ lɛ naa do ka mɔɔ ʊ.»
19 Minno nɔɔn duro a ya,
an zɩɩfʊrɔ wɔɔ gʊngʊ kʊ ma.
20 Gʊɔɔ gʊta yɩ ŋ barla,
ŋn'a hɩrɛ,
ŋ ʊ:
«Zinə nɩ kan kɩ,
hɔɔzaa m,
bɔ minto m,
a n'a tʊr karɛ a meerbaa ma?»
21 Bɩ,
gɔsɩnnɔ y'a hɩrɛ,
ŋ ʊ:
«Gʊaa kʊ zinə n nɩ kan kɩ meerbaarɔ bɛɛ m naa y.
Zinə y'a dam ma,
an bʊʊ mɩm gʊ ra?»
Gʊɔɔ gʊta kaanm Yeezuu m
22 N ɩ Zerizalɛm *Wosocɛ bankarɛ tɔdaanɔʊ cibsa bam.
Nyɩnta a ʊ nyɛɛm dɔmɩm.
23 Yeezuu nɩ bɩmbɩrm Wosocɛ ʊ b'ʊ Salomɔɔn laŋŋa gʊta kʊ n y'a dɔ jaa m bɩ taa b'ʊ.
24 Zɩɩfʊrɔ wɔɔ n bɩ bɩr ma,
ŋn'a hɩ m,
ŋ ʊ:
«Kʊ *Krista n'ɩbɩɩ nɩ,
ɩbɩɩ wɔɔ tore ʊ hɔɔndarɛ nɔ ʊ,
an ta,
an dɔmɩm kara ku?
A hɩ wɔɔ m paan…!»
25 Yeezuu n a hɩ ŋ nɩ,
a ʊ:
«Mɔɔ hɩ awɔɔ m,
b'awɔɔ n a si y,
ziro kʊ mɔɔ n nɩ barɛ m Zɩ tɔ ma rɔ wɔɔ ɩ mɔɔ kasɛtɩ kam.
26 Bɩ,
mɔɔ y'a hɩrɛ awɔɔ m,
b'awɔɔ bɩr a sire y,
kʊ mɔɔ seero bɛɛ n'awɔɔ m bɩ minto.
27 Mɔɔ seero wɔɔ y'a tʊr kam mɔɔ leer ma,
bɩ mɔɔ ŋ dɔ sɔ,
ŋn'ɩ zum mɔɔ jɛ ʊ.
28 Bɩ mɔɔ *mɩsɩrbaa k'a nyarɛ ba ʊ bɩ karɛ ŋ ʊ.
Ŋ bɩ gam fɩɩga y.
Bɩ,
gʊaa b'a dam ma,
an ŋ bɔ mɔɔ wɔ ʊ y.
29 Mɔɔ Zɩ k'a ŋ ka mɔɔ ʊ bɩ lɛ da hɔ haay ra,
bɩ gʊaa ba ʊ an b'a dam ma,
an hɔ bɔ Zɩ bɩ wɔ ʊ y.
30 Mɔɔ kan Zɩ bɩ kɩ,
wɔɔ deem.»
31 Zɩɩfʊrɔ wɔɔ n a ya,
ŋnɩ jaarɔ gʊr k'a gʊngʊɛɛn.
32 Yeezuu n a hɩ ŋ nɩ,
a ʊ:
«Mɔɔ ka awɔɔ m zibəəro mɩŋŋɔɔ kʊ ŋ y'a to Zɩ zi rɔ wɔɔ yɩ.
Brɔɔ minto y'a ka,
awɔɔ k'a mɔɔ gʊngʊɛɛn ra?»
33 Zɩɩfʊrɔ wɔɔ n a nyɩ bɔ ʊ,
ŋ ʊ:
«Zibəə mɩŋŋa barɛ minto bɛɛ y'a ka,
wɔɔ n'ɩbɩɩ gʊngʊɛɛnrɛ y,
sʊnsɔ k'ɩbɩɩ wʊ,
ɩbɩɩ k'ɩ m gʊaa,
ɩ bɔkarɛ,
ɩ n'ɩ mɩŋŋa bam Woso bɩ minto m.»
34 Yeezuu n a nyɩ bɔ ŋ nʊ,
a ʊ:
«Ŋ n a gʊrsɩra ba ncɩnaaʊ awɔɔ *lɛrɔ ci bɩ nɔ ʊ ra?
‹Mɔɔ hɩ:
wosoro n'awɔɔ m.›
35 Wɔɔ dɔ,
wɔɔ ʊ,
gʊaa b'a dam ma,
an hɔ kʊ n y'a gʊrsɩra ba *Wosoci nɔ ʊ bɩ zar y.
Woso gʊɔɔ kʊ ŋ y'a lemim ma rɔ wɔɔ bir wosoro.
Awɔɔ y'a hɩm gʊaa kʊ Zɩ b'a nyɔɔ bɩ ma,
a ʊ,
sʊnsɔ ɩbɩɩ n'a wʊrɛ,
kʊ mɔɔ hɩ mɔɔ ʊ Woso Nyɩ m mɔɔ m bɩ minto.
36 Gʊaa kʊ Zɩ b'a bɔ ʊ,
an a nyɔɔ durnya ʊ,
b'awɔɔ ʊ,
Woso sʊnsɔ an n'a wʊrɛ.
Bala,
kʊ mɔɔ hɩ mɔɔ ʊ Woso Nyɩ mɔɔ m bɩ minto.
37 Kʊ mɔɔ nɩ m Zɩ zi ba,
a bɩ sɩra ka mɔɔ ʊ y.
38 Bɩ kʊ mɔɔ y'a barɛ,
baa k'awɔɔ n sɩra ka mɔɔ ʊ,
k'a sɩra ka a zibəə bɩ minto,
k'a bɔkarɛ a dɔ mɩŋŋa,
a ʊ,
Zɩ ɩ kan mɔɔ kɩ,
mɔɔ nɩ kan Zɩ kɩ.»
39 Ŋ n a ya,
ŋnɩ wuti,
ŋn'a ŋʊam k'a nyasʊ.
Yeezuu n a yɔ ŋ nɩ.