Yeezuu gʊaa k'a yɩ kan bʊʊbaa kɩ waa
9
Yeezuu k'a nɩ cenim bɩ,
a gʊaa yɩ,
an yɩ kan bʊʊbaa kɩ.
2 A *karɩndanyɩnɔ wɔɔ n laaka naa do da han,
ŋ ʊ:
«Karɩnsaamba,
nka ɩ mimbʊnyaa ba an yɩ kan bʊʊbaa kɩ?
A y'a ba gɛɛ,
a zɩrɔ nɩ?»
3 Yeezuu n a nyɩ bɔ ʊ,
a ʊ:
«A mɩŋŋa bɛɛ y,
b'a zɩrɔ bɛɛ sɔ y.
Bɩ lɛ taa k'a hɩ,
a ʊ,
kʊ Woso zibəə bɩ n a hɩnka a gʊr zi!
4 A a ga m,
k'ʊ Zɩ k'a mɔɔ nyɔɔ bɩ zi ba,
kʊ woso lɛ n gɔɔta an bɩr ta ʊ.
Kʊ gum da,
gʊaa b'a dam ma an zi ba y.
5 Kʊ mɔɔ nɩ durnya nɔ ʊ bɩ,
durnya lɛɛgure m mɔɔ m.»
6 Kʊ Yeezuu meer ba maam bɩ,
a lihi da tara ʊ,
an taa bɩ yɔɔ lihi bɩ m,
an a gʊr,
an a nɔ bʊʊ bɩ mɩnyaa bɩ ma,
7 A n a hɩ m,
a ʊ:
«Ta ɩ yaa hi da ɩ meer ʊ Silowee bɔrkɔ ʊ.»
Tɔ naa do lɛ taa k'a hɩ,
a ʊ:
nyɔɔdarɛ.
Bʊʊ bɩ n ta,
an aa hi bɩ da a meer ʊ.
K'a wusigə an nɩ doom bɩ,
a mɩm ɩ lɛɛ yɩm.
8 A cɩsɔnnɔ kan gʊɔɔ kʊ ŋ lɛɛ ka ŋn'a yɩ biisi an nɩ hɔ yɩnyɛm nɔ wɔɔ kɩ a hɩ,
ŋ ʊ:
«Naa bɛɛ tɩr nyɩnta an bɩr hɔ yɩnyɛm bɩ ra?»
9 Gɔsɩnnɔ n'a hɩrɛ,
ŋ ʊ:
«A mɩŋŋa m!»
Gɔsɩnnɔ ʊ:
«A bɛɛ y,
a bɔkʊʊrɛzaa m.»
Bʊʊ bɩ n a hɩ,
a ʊ:
«Mɔɔ mɩŋŋa m.»
10 Ŋ n a hɩ m,
ŋ ʊ:
«Ɩbɩɩ mɩnyaa b'a ba lɔ,
an nɩ lɛɛ yɩrɛ?»
11 A n a nyɩ bɔ ʊ,
a ʊ:
«Gʊaa kʊ n n'a birm Yeezuu b'ɩ taa yɔɔ,
an a nɔ mɔɔ mɩnyaa bɩ ma,
an a hɩ mɔɔ m,
a ʊ:
Ta ɩ yaa hi da ɩ meer ʊ Silowee bɔrkɔ ʊ.
Mɔɔ n ta,
m aa hi da m meer ʊ,
mɔɔ mɩm nɩ lɛɛ yɩm.»
12 Ŋ n a hɩ m,
ŋ ʊ:
«Gʊaa b'ɩ ka?»
A n a nyɩ bɔ ʊ,
a ʊ:
«Mɔɔ n a dɔ y.»
13 Ŋ n gʊaa k'a nyɩnta bʊʊ bɩ gaa,
ŋnɩ ta m *farizɛɛnrɔ zi.
14 Yeezuu k'a taa bɩ yɔɔ an a mɩm bɩ gʊm bɩ,
a ba a ʊ *sabaa hinni ʊ.
15 Farizɛɛnrɔ wɔɔ n a lar sɔ,
k'a ba a ʊ lɔ,
a mɩm nɩ lɛɛ yɩm gɛ?
A n a hɩ ŋ nɩ,
a ʊ:
«Taa a yɔɔ,
an a nɔ mɔɔ mɩm ma,
mɔɔ m hi da m meer ʊ,
m nɩ lɛɛ yɩm.»
16 Farizɛɛnrɔ wɔɔ barla gɔsɩnnɔ y'a hɩrɛ,
ŋ ʊ:
«Gʊaa naa do,
Woso gʊaa bɛɛ y,
a bɩr zum sabaa hinni lɛrɔ wɔɔ ʊ y.»
Gɔsɩnnɔ ʊ:
«Gʊaa mimbʊnyaabər y'a bam lɔ an bɩr hoserlo barɛ ncɩnaaʊ?»
Mim naa do farizɛɛnrɔ wɔɔ gʊngʊ kʊ ma.
17 Ŋ n a ya,
ŋn'a hɩ bʊʊ bɩ m,
ŋ ʊ:
«B'ɩbɩɩ,
bɔ ɩbɩɩ n'a hɩm gʊaa k'a ɩbɩɩ waa bɩ jɛ ʊ?»
A n a nyɩ bɔ ʊ,
a ʊ:
«*Wosolɛsinnɩsorazaa m.»
18 Bɩ,
zɩɩfʊrɔ jɩtannɔ wɔɔ n a si ŋ ʊ,
a nyɩnta bʊʊ,
an mɩm n bɔkarɛ an gʊ y.
Pakra m kʊ ŋ n'a zɩrɔ wɔɔ bir,
ŋnɩ laaka da ŋ han.
19 Ŋ n laaka naa do da ŋ han,
ŋ ʊ:
«Awɔɔ nyɩ m gʊaa naa do m,
awɔɔ n a dɔ,
a ʊ,
yɩ a ʊ kan bʊʊbaa kɩ gɛ?
Bɩ,
a a ba lɔ,
an nɩ lɛɛ yɩm kɛɛrɛ?»
20 A zɩrɔ wɔɔ n a nyɩ bɔ ʊ,
ŋ ʊ,
«Wɔɔ dɔ paan… ʊ ʊ,
wɔɔ nyɩ m,
bɩ yɩ a ʊ bʊʊ.
21 Bɩ,
wɔɔ n a dɔ k'a ba a ʊ lɔ,
a mɩm nɩ lɛɛ yɩm kɛɛrɛ y.
Kʊ nka y'a mɩm bɩ gʊ,
wɔɔ n bɩ zaa dɔ sɔ y.
K'a lar,
nyɩ bɛɛ m dɔ y.
A a da ma,
an a mim dɩnda a zim!»
22 A zɩrɔ wɔɔ ɩ nyi bam zɩɩfʊrɔ jɩtannɔ wɔɔ m.
Bɩ y'a ka,
ŋnɩ meer ba ncɩnaaʊ.
Bala,
jɩtannɔ wɔɔ kʊ ma,
ŋn'a hɩ,
ŋ ʊ:
Kʊ gʊaa a hɩ,
a ʊ:
Yeezuu bɩ,
*Krista m,
k'a bɔ a zi.
23 Bɩ y'a ka,
a zɩrɔ wɔɔ n a hɩ,
ŋ ʊ:
«Nyɩ bɛɛ m dɔ y,
k'a lar.»
24 Farizɛɛnrɔ wɔɔ n a ya,
ŋnɩ gʊaa k'a yɩ bʊʊbaa nɔ ʊ bɩ bir a hɩɩya hɔ ma,
ŋn'a hɩ m,
ŋ ʊ:
«Nyi ba Woso m,
ɩ sɩra hɩ!
Wɔɔ dɔ wɔɔ ʊ,
gʊaa naa do mimbʊnyaabər m.»
25 A n a nyɩ bɔ ŋ nʊ,
a ʊ:
«Mɔɔ n a dɔ kʊ mimbʊnyaabər nɩ y.
Hɔ deem mɔɔ dɔ,
bala,
mɔɔ nyɩnta bʊʊ,
bɩ,
mɔɔ ɩ lɛɛ yɩm kɛɛrɛ.»
26 Ŋ n a hɩ m,
ŋ ʊ:
«Bɔ a a ba ɩbɩɩ nɩ?
A ba a ʊ lɔ an ɩbɩɩ mɩm bɩ gʊ?»
27 A n a nyɩ bɔ ŋ nʊ,
a ʊ:
«Mɔɔ lɛɛ ka,
m a dɩnda awɔɔ m,
b'awɔɔ n a tʊr ka ma y,
gɛɛ lɔ?
Bɔ minto m,
a a ya,
an nɩ mɔɔ larlɛ?
A hɩ awɔɔ ʊ k'a ba a karɩndanyɩnɔ sɔ ra?»
28 Farizɛɛnrɔ wɔɔ n a sɩŋŋɩda ba,
ŋn'a sʊnsɔ wʊrɛ,
ŋn'a hɩrɛ,
ŋ ʊ:
«Ɩbɩɩ n a karɩndanyɩ!
*Moyiisi karɩndanyɩnɔ m wɔɔ m.
29 Wɔɔ dɔ,
wɔɔ ʊ,
Woso meer ba kan Moyiisi kɩ,
bɩ naa do naa,
wɔɔ n a dɔ k'a to a ʊ ka y.»
30 Gʊaa bɩ n a nyɩ bɔ ŋ nʊ,
a ʊ:
«Zɛkədə mim n naa!
Awɔɔ n a tojɩ dɔ,
b'a a ka mɔɔ mɩm nɩ lɛɛ yɩm la!
31 Wɔɔ dɔ,
wɔɔ ʊ,
Woso bɩr a tʊr kam mimbʊnyaabənno ma y.
Bɩ kʊ gʊaa ɩ Woso daŋ ʊ,
an n'a hɔɔnhɔ barɛ,
Woso y'a tʊr kam bɩ zaa ma.
32 Gʊaa n a ma cɩna,
ŋ ʊ,
gʊaa ɩ gʊaa k'a yɩ kan bʊʊbaa kɩ bɩ mɩm gʊ y.
33 Gʊaa naa do,
kʊ Woso gʊaa ɩ bɛɛ,
a b'a dam ma,
an hɔsɩ ba y.»
34 Ŋ n a nyɩ bɔ ʊ,
ŋ ʊ:
«Yɩ ɩbɩɩ ʊ mimbʊnyaa nɔ ʊ,
ɩ bʊr,
ɩ nɩ karɩnda dɩndam wɔɔ m na?»
Ŋ n la ra an bɔ,
ŋn'a bɔ a zi.
35 Yeezuu k'a a ma a ʊ,
ŋ la ra bɩ,
a bʊr zi an b'a hɩ m,
a ʊ:
«Ɩbɩɩ ɩ sɩra kam *Gʊaanyɩ b'ʊ ra?»
36 A n a nyɩ bɔ ʊ,
a ʊ:
«Nka nɩ,
Zuuba,
kʊ m sɩra ka ʊ?»
37 Yeezuu n a hɩ m,
a ʊ:
«Ɩbɩɩ yɩ,
an nɩ meer bam kan ɩbɩɩ kɩ naa.»
38 Gʊaa bɩ n a hɩ,
a ʊ:
«Mɔɔ sɩra ka ɩ ʊ,
Zuuba.»
A n kukurə zɛ a taa.
39 Yeezuu n a hɩ,
a ʊ:
«Bʊr mɔɔ ʊ durnya naa nɔ ʊ dʊdɔ minto,
kʊ gʊɔɔ kʊ ŋ mɩm bɩr lɛɛ yɩm nɔ wɔɔ n lɛɛ yɩ,
kʊ gʊɔɔ kʊ ŋ mɩm nɩ lɛɛ yɩm nɔ wɔɔ n a ba bʊʊrɔ.»
40 Farizɛɛnrɔ kʊ ŋ nyɩnta kan kɩ rɔ wɔɔ kʊ ŋ naa ma bɩ,
ŋ y'a hɩ,
ŋ ʊ:
«A hɩ ɩbɩɩ ʊ,
bʊʊrɔ m wɔɔ m sɔ gɛ?»
41 Yeezuu n a nyɩ bɔ ŋ nʊ,
a ʊ:
«Kʊ bʊʊrɔ n'awɔɔ nɩ,
awɔɔ mimbʊnyaa bɩ nyɩntaŋ ʊ y.
Bɩ naa ma bɩ,
k'awɔɔ ʊ,
a mɩm ɩ lɛɛ yɩm bɩ,
awɔɔ mimbʊnyaa bɩ gɔɔta an ta ʊ.»