SURA YAHYA
MA KA^DUAKAINA
Salam
1-3
1
D̄i ru'u b̄a Ina ra kad̄ale b̄a Allah Ta'ala ro d̄i ru'u b̄a ana-ana b̄a Ita ra meci ro ca'u b̄a mada.a Sura ake ra d̄i mada, mana'ekai ela Ruma ma poda-poda meci ro ca'u ita^doho. Laina mada mpoa, pala sara'a dou ma pata Allah Ta'ala ma poda, mameci ro ca'u ita^doho. 2 B̄ara Allah Ta'ala mangge'e d̄ei ade ndaita ro ^dimawara ncau lab̄o ndaita santoi-ntoina.3 Raho-raho to'i mpa ndai mbeina bareka, rahmat ro taho ro ntai b̄a Allah Ta'ala, Ama ndaita ro Isa Al Masih, Ana b̄a Ama. Raho-raho to'i mpa ndai ngge'e mpa imbi ro ngge'e mpa meci ro ca'u sasama manusia.
Lampa rawi ma poda ro ncihi ro meci ro ca'u
4-11
4 Mada neo poda adeku b̄ade b̄a one wara ana-ana Ina ma mori b̄atu au ra ngoa ro tei b̄a Allah Ta'ala, b̄une ra wa'u parentakai b̄a Allah Ta'ala, Ama ndai d̄i ndaita. 5 B̄ara ndedena, Ina, mada maraho poda-poda loakud̄u ndai sara'ana ta cua meci ro ca'uku angita. Ra nggahi b̄a mada ake laina sab̄ua parenta ma ^bou; parenta ake wa'ura mbei d̄i ndai ra aipu ndai saramba-ramba imbita. 6 Meci ro ca'u aona mori b̄atu parenta-parenta Allah Ta'ala. Ro parenta ra wa'u ringa b̄a itad̄oho ra'aipu saramba wa'una eded̄u b̄a one itad̄oho pab̄uapu mori kai meci ro ca'u sab̄ua lab̄o ma kalaina.
7 Mboto dou matipu wa'ura lampa rero d̄i sara'a dunia. Siad̄oho eded̄u dou-dou ma wati mangaku b̄a one Isa Al Masih maina d̄i dunia ake kai sab̄ua dou manusia. Dou b̄une ede eded̄u dou matipu ro Musu Al Masih. 8 B̄ara ndedena, jagapu, ai to'ina itad̄oho mborakaina au ra wa'u usaha wea b̄a madad̄oho d̄i ru'u b̄a ita^doho.b Usahapu loakud̄u itad̄oho tarima sara'amu ufa ra d̄i Allah Ta'ala.
9 Dou ma wati nenti d̄i au ra ngoa ro tei b̄a Al Masih, malaisi wati ncihi ncaona lab̄o au ra ngoa ro tei b̄a Al Masih, dou ede wati ntauna Allah Ta'ala. Dou ma ngge'e mpa d̄ei ade ngoa ro tei b̄a Al Masih, aona nantau Allah Ta'ala, Ama ndaita ro Isa Al Masih, ana-Na. 10 B̄ara ndedena, nggara warasi dou ma mai ro ngoa ro kahabana d̄i itad̄oho ngoa ro tei ma watira ngoa ro tei b̄a Al Masih, aina tarimamu dou ede d̄i ade umamu atao mbeimu salam d̄i sia. 11 B̄a one dou ma mbei salam d̄i dou ma b̄une ede nakarawi rauku ma dab̄ae sama-sama lab̄o dou ede.
Nggahi ro eli cumpukaina
12-13
12 Mboto podapu d̄ine'e ngoa b̄a mada d̄i ita^doho, pala satahona aina kai sura. D̄i ne'e b̄a mada loa to'i mpa lao lamba itad̄oho ro nuntu ncao tando lab̄o itad̄oho loakud̄u ndai poda-poda neo adeta.
13 Ana-ana ra d̄i sa'e ro ari Ina ra kad̄ale rau b̄a Allah Ta'ala,c nggaduna salam d̄i ru'u b̄a Ita.