6
जतक दासतार जुयेंर तले आचेत , हांय मन आपना आपना सामी के खुबे मानर लाइक समझू आत , कि महापरभुर नाम आवरी उपदेसर निन्दा ना होओ | 2 जोन मनर सामी बिसबासी आत हांय मन तिके भाई होयबा लागी तूच ना समझोत, मातर तिकर आवरी बले सेवा करोत, कसन कि एतार ले लाभ उठायबा बिसबासी आवरी मया करू मन आचेत | ऐ गोट मनर उपदेस कर आवरी समझायते रा | 3 अगर कोनी दूसरा असन उपदेस देऊ आय आवरी खर गोट मन के, जसन हामर परभु ईशु मसिर गोट मन के आवरी हांय उपदेस के ना माने, जोन भक्तिर असन आय, 4 तो हांय घमडी होयला, आवरी काई ना जाने; मातर हांके झगड़ा आवरी गोट मन ने फरक करबार रोग आचे, हांतारले रिस, आवरी झगड़ा, आवरी निन्दा करबा गोट मन, आवरी गलत बिचार, 5 आवरी हांय मुनुक मनने फोकाहा झगड़ा निकरू आय जाहार बुधि नसला आचे, आवरी हांय सत ले अलग होयला आत, जोन समझू आत कि भक्ति कमानीर बाट आय | 6 मातर धीरज संगे भक्ति बड़े कमानी आय | 7 कसन कि ना हामी सवंसार ने काई आनलू आचू आवरी ना काई नेयके सकू | 8 अगर हामर लगे खायबा आवरी पियबा काजे आचे, तो ई मन ने हरिक रबा राय | 9 मातर जोन धनी होयबार चाहाऊ आत, हांय मन असन परिकछा आवरी फांदा ने आवरी खुबे असन फोखाहा आवरी नुकसान लालच मनने फसू आत, जोन लोक के नसाय देऊ आत आवरी बीनासर समुंद ने बुड़ाय देऊ आय | 10 कसन कि पयसार लालच सबु परकारर गलत कामर चेर आय, जोन के पायबार कोसिस करते करते खुबे लोक मन बिसबास ले भटकी करी आपना खुद के नाना परकारर दुक मन ले मारी होयलाआत | 11 मातर ऐ महापरभुर लोक, तुय ए गोट मन लगले पोराव, आवरी धरम, भक्ति, बिसबास, मया, धिरजा आवरी सुरू होयबारटाके डगराव | 12 बिसबासर अच्छा कुश्ती लड़; आवरी हांय जुग जुगर जीवना के धर, जाहार काजे तुय हागदिआय गलीआस आवरी खुबे असन गवामनर छोमे अच्छा मानी रईस | 13 मुय तोके महापरभु के, जोन सबु के जिव सोंगाऊ आय, आवरी मसी ईशुके गवा सोंगाई जोन पुनतियुस पिलातुसर छोमे अच्छा मानला,* ऐ आगया देबी आची 14 कि तुय हामर परभु ईशु मसिर आओत ले ए आगया के निष्कलंक आवरी बिना दोसर सोंगाव, 15 जोन के हांय सही समया ने दकायसी, जोन खुबे धन्य आवरी गोटक ची अधिपती आवरी राजा मनर राजा आवरी परभु मनर परभु आय, 16 आवरी अमर होयबार सिरिप तारची आय, आवरी हांय अगममय उजर ने रऊ आय, आवरी ना ताके कोनी मुनुक दकलाय आवरी ना केबेई दकके सकेत | हांतार मान आवरी राज जुग जुग रयसी | आमेन | 17 ऐ सोंवसारर धन बिता मन के आगया देस कि हांय मन घमडाहा ना होओत आवरी चंचल धन उपरे आसा ना सोंगाओत, मातर महापरभु उपरे जोन हामर सुक काजे सबु बानी खुबे देऊ आय | 18 हांय मन भला करोत, आवरी भला काम मन ने धनी बनोत, आवरी उदार आवरी सायता देबा काजे छोमे रोओत, 19 आवरी आगे काजे गोटोक अच्छा बीम कोड़ी सोंगाओत कि सतर जीवना के आपना बस ने करोत | 20 ऐ तीमुथियुस, ए धरोहरर राका कर ; आवरी जोन गियान के गियान बलबार ची भूलाकबार आय, तार असुद गोट आवरी बिरुदर गोट ले अलगे रा | 21 कतक लोक ऐ गियान के धरी करी बिसबास ले भटकला आत | तोमोर उपरे अनुगरह होयते रओ |