5
मांतर ये भाई मन एतार प्रयोजन नाई कि समया आउर जुगर विषय ने तोमर लगे काई लिका जाओ। 2 कसन की तोमी आपना अच्छा जानबा आहास कि जसन राती बेरा चोर आउआय, असनी ची परभुर दिन आयबा बीता आय। 3 जड़दाय लोक बोलते रबाय, ”अच्छा आय आउर काई डर नीयाय“ तेबे तिकर उपरे उधापडे़ विनाश आई पड़सी, जोन प्रकार पेटे धरती उपरे डण्ड आउर हांयमन कोनी निति ले ना बाचेत। 4 मांतर ए भाईमन तोमी तो अन्दार ने नी आहास कि हांय दिन तोमर उपरे चोरर असन आई पड़सी। 5 कसन कि तोमी सबु ज्योतिर बेटा आउर दिनर बेटा आहास, 6 दुसर असन सोयते ना रउं मांतर चेता आउर सावधान रउं। 7 कसन कि जोन सोउ आत हांय मन राती ची मनभुल होउआत। 8 मांतर हांमी जो दिनर आंव विश्वास आउर मयार झिलम पिन्दीकरी आउर उद्धारर आशार टोपी पिन्दीकरी सावधान रहा। 9 कसन की माहापरभु हामके तार रिश काजे नाई मांतर इ काजे ठेबायला आच कि हामी आपना परभु यीशु मसीहर बाटले उद्धार पाआहा। 10 हांय हांमर काजे एतार लागी मोरला कि हांमी भायले उठी रउं भायले सोउं, सबु मिसीकरी हांतारी संगे जीउं। 11 एतार लागी गोटक दुसर के शांति दियास आउर गोटर दुसरर उन्नतिर कारन बना जसन की तमी करवा बले आहास। 12 ए भाई मन हांमी तोमके बिनती करबु आचु कि जान तोमी काम बुता करू आहास आउर परभु ने तोमर अगवा आत, आउर तोमके सिकाउआत तिकर गोट के धरा। 13 आउर तिकर गोटक दुसर ले मिसीकरी रहा। 14 ए भाई मन हांमी तोमके समझायबु आचु कि जोन अच्छा चाल ना चलेत तिके समझाहा कायर के बरसक दियास निर्बल के संबाला, सबु बाटले सहनशीलता दकाआ। 15 सावधान ! कोनी काकीह अडरार पलटा अडरा ना करा, मांतार सबु दाय भलाई ची विचार करा। 16 सबुदाय आनन्द रहा 17 निरंतर पारतना करते रहा 18 सबु गोट ने धन्यवाद कराः कसन की तोमर काजे मसीह यीशु ने माहापरभुर ये मान आय 19 आत्मा के ना लिबाहा 20 भविष्यवाणी के छुत ना जाना 21 सबु गोट के परकाः जोन अच्छा आय हांके धरी रहा 22 सबु परकारर अडरा ले बाची रहा 23 शान्तीर माहापरभुर लगे ची तोमके पूरी निति ले पवित्र कराः आउर तोमर आत्मा आउर जीनव आउर गागर हांमर परभु यीशु मसीहर आयबा दाय ले पूरा पूरा आउर निर्दोष सुरक्षित रओ। 24 तोमर हागदेबा बीता सत आय, आउर हांय असनी ची करसी। 25 ए भाई मन हांमर काजे पारतना करा 26 सबु भाई मनर पवित्र चुमा ले जुआर करा। 27 मुंय तोमके परभुर किरिया देबी आची कि ये पत्री सबु भाई मन के पड़ीकरी सुनाते जा 28 हांमर परभु यीशु मसीहर अनुग्रह तोमर उपरे होयते रओ।