4
ई काचे हे मोर भाई मन, जोन ने मोर जीव लागी रऊ आय, आवरी जोन मोर हरिक आवरे मुकूट होयसी, हे अच्छा भाई मन, परभु ने असनी ची मंडी राहा | 2 मूय युओदिया मनके बले समझायबी आची आवरी सुनतुखे के बले, की हांय परभु ने गोटक मन ने रोअत | 3 हे सतर संगे काम करू, मूय तोके बले बिन्ती करबी आची की तूय हांय बायले मनर सायता कर, कसन की हांय मन मोर संगे सुसमाचार फयलायबा ने, क्लेमेस आवरी मोर दूसरा संगे काम करू मन संगे काम करलाय, जोन मनर नाव जीवना र पुस्तक ने लिकलार आचे | 4 परभु ने सबू दाय हरिक ने राहा; मूय आवरी बलबी आची, हरिक राहा | 5 तोमर अच्छाई सबू मुनूक उपरे आसो |परभु लगे आचे | 6 कोनी बले गोटर चिंता ना करा; मातर सबू गोटक गोट ने तोमर गूहार, पारतना आवरी बिन्ती र बाटले धनेबाद संगे माहा परभु र लगे आनोत | 7 तेबे माहा परभु र शान्ति, जोन सबू समझ ले अलगे बाहरे आय, तोमर मन आवरी तोमर बिचार मनके मसीह यीशु ने अच्छा ले सोंगायसी | 8 ई काचे ये भाई मन, जोन जोन गोट मन सत आय, आवरी जोन जोन गोट समानर लाईग आय, आवरी जोन जोन गोट मन अच्छा आय, आवरी जोन जोन गोट मन पबितर आय, आवरी जोन जोन गोट मन मनके अच्छा लागू आय, आवरी जोन जोन गोट मन मन के भाऊ आय, माने जोन बले अच्छा गुन आवरी हरिक र गोट मन आचे हांय मन उपरे धियान दीयास | 9 जोन गोट मन के मोर ले सिकला आस, आवरी आपनाय लास, आवरी सुनलास, आवरी मोर उपरे दकलास, हाई मनर माना करा, तेबे माहा परभु जोन शान्ति र सोता आय तोमर संगे रयसी | 10 मूय परभु ने खूबे हरिक आची की अबर अतक दीनर पाचे तोमर चिंता मोर बारे ने आवरी चेतला; जरुर तोमके सुरु ने बले एतार बिचार रये, मातर तोमके मौका ना मिरला | 11 ये नाई की मूय आपना घाटा र लागी ये बलबी आची; कसन की मूय ये सिकली आची की जोन हाल ने आची; हाई ने ची हरिक रबी | 12 मूय सुरू होयके बले जानी आवरी बाड़के बले जानी; सबू गोट आवरी सबू हाल मन ने मूय खायबार,भूके रबार, आवरी बाड़बार घटबार सिकली आची | 13 जोन मोके सामरत देऊ आय हायती मूय सब बानी करके सकी | 14 तेबे बले तोमि अच्छा करलास की मोर दुःख ने मोर भागी होयलास | 15 हे फिलिप्पियों, तोमि खुद बले जानास की सुसमाचार परचार र सुरु ने, जड़ दाय मूय मकिदुनिया ले बिदा होयली, तेबे तोमके छाड़ी आवरी कोनी मण्डली ने धरबा देबार बारे ने मोर सायता ना करलास | 16 असनी ची जड़ दाय मूय तिस्लुनीके ने रई, अड़क दाय बले तोमि मोर घटी पूरा करबा काचे गोटक हार काय मातर दूय हार काई पटाय रई | 17 ये नाई की मूय दान चाहउ आय मातर मूय असन फल चायबी आची जोन तोमर लाभ काचे बाड़ते जाओ | 18 मोर लगे सबू बानी आचे, आवरी खूबे बले आचे; जोन तीज मन के तोमि ईपफ्रूदीतुस र संगे पटाय रये हांय मनके पाई करी मूय भोरली आची, हांय तो सुक देबा सुगंध, आपनायबा लाईग बलिदान आय,जोन माहा परभु के भाऊ आय | 19 मोर माहा परभु बले आपना हांय धनर असन जोन महिमा र संगे मसीह यीशु ने आचे, तोमर सबू घटी के पूरा करसी | 20 हामर माहा परभु आवरी बुआ र महिमा जूग जूग होयते रओं |आमिन | 21 सबू गोटक पबितर लोक मनके, जोन यीशु मसीह ने आचेत जूहार करा | जोन भाई मोर संगे आचेत, तोमके जूहार बलबा आत | 22 सबू पबितर लोक, ख़ास करी जोन कैसर र घरर आत, तोमके जूहार बलबा आत | 23 हामर परभु यीशु मसीह अनुग्रह तोमर आतमा र संगे रओं |