2
तेबे:अगर मसीह ने खिनिक बले शान्ति, आवरी मया ले ढाढस, आवरी आतमा र सहभागी, आवरी खिनिक करुणा आवरी खिनिक दया आय, 2 तो मोर ये हरिक के पूरा करा की गोटक मन राहा, आवरी गोटकी मया, गोटकी चित आवरी गोटकी मन सोंगाहा | 3 बिरोद नोयले झूटर बड़ाई काचे काई ना करा, मातर दीन होई एक दुसर के आपना ले अच्छा समझा | 4 हर गोटक आपनार ची बारे र नाई, मातर दुसरा र बारे ने बले चिंता करा | 5 जसन मसीह यीशु र भाव रये असनी ची तोमर बले भाव होओं; 6 जोन माहा परभु र रूप ने होई करी बले माहा परभु र बरा बर होयबा के आपना बस ने सोंगायबार तीज ना समझला | 7 मातर आपना के असन सुरु करी देला, आवरी दास र असन रूप धरला, आवरी मुनूक मनर असन होयला | 8 आवरी मुनुकर रूप ने आई करी आपना के सुरु बनायला, आवरी ये लगले आगेया कारी रला की मोरना, हव, क्रूसर मोरना के बले सहन करला | 9 ई लागी माहा परभु ताके खूबे माहान बले बनायला,आवरी ताके हांय नाव देला जोन सबू नाव मनले बले अच्छा आय, 10 की जोन सरग ने आवरी धरतनी ने आवरी धरतनी र तले आचे,हांय सबू यीशु र नाव ने मांडी खुटा दीयास; 11 आवरी माहा परभु बुआ र महिमा काचे सबू जीब मानोत की यीशु मसीह ची परभु आय | 12 ई काचे हे मोर अच्छा लोक मन, जोन परकार तोमि सबू दायले आगेया मानते आयला आस, असनी ची अबर बले ना सिरिप मोर संगे रयते मातर ख़ास करी अबर मोर दूर रबा ने बले डरते आवरी थर थरायते आपना आपना उधार र काम पूरा करते जाहा; 13 कसन की माहा परभु ची आय जोन आपना सो इच्छा निमित तोमर मन ने इच्छा आवरी काम, दुनो गोट मन के करबार परभाव सोंगायला आचे | 14 सबू काम के ना कुड़ कुड़ाय करी आवरी ना झगड़ा होई करा, 15 कसन की तोमि निर्दोष आवरी सीधा साधा होई टेड़ा आवरी हटील लोक मनर मंजी माहा परभु र कलंक नोयला बेटा बेटी बनी राहा, जोन मनर मंजी ने तोमि जीवना र बचन धरी करी जगत ने धरबा दीया असन दका देऊ आस 16 की मसीह र दीन ने मोके घमण्ड करबार कारण होओं की ना मोर परायबार आवरी ना मोर काम करबार फोकाहा होयला | 17 अगर मोके तोमर विशवास रूपी बलिदान आवरी सेवा संगे आपना लोऊ के बले निकरायके पड़ो, तेबे बले मूय हरिक आची आवरी तोमि सबू संगे हरिक ने रऊ आय | 18 असनी ची तोमि बले हरिक हुआ आवरी मोर संगे हरिक करा | 19 मोके परभु यीशु ने आशा आचे की मूय तीमुथियुस तोमर लगे झटके पटायबी, की तोमर हाल सूनी करी मोके शान्ति मिरो | 20 कसन की मोर लगे असन भावर कोनी निआत जोन सुध मनले तोमर चिन्ता करसी | 21 कसन की सबू आपना र ची डगरायबा ने रऊ आत,मातर यीशु मसीह के नाई | 22 मातर हाके तो तोमि परकी दकलास आवरी जानी बले गला आस की जसन बेटा बुआ संगे करू आय, असनी ची हांय सुसमाचार के बड़ायबा ने मोर संगे काम करला | 23 हाई काचे मोके आशा आचे की जड़ दाय मोके जान पड़सी की मोर हाल काय होयसी, अड़की ची दाय मूय ताके पटाय देबी | 24 आवरी मोके परभु उपरे भोरसा आचे की मूय खूद बले झटके आयबी | 25 मातर मूय ईपफ्रुदीतुस के जोन मोर भाई आवरी संगे काम करू आवरी संगवारी योधा आवरी तोमर दूत, आवरी जरूरी गोट मन ने मोर सेवा टहल करबा बिता आय, तोमर लगे पटायबार जरूरी समझली | 26 कसन की तार मन तमी सबू उपरे लागी रला, हाई लागी हांय भांय भांय होई रबार आय कसन की तोमि हातार बेमार र हाल सूनी राहास | 27 जरुर हांय बेमार तो होई रये एलगले की मोरबाटा बले रये, मातर माहा परभु तार उपरे दया करला, आवरी सिरिप तार ची उपरे बले मोके दूक ने दूक ना होओं | 28 हाई काचे मूय हाके भोजन र आवरी बले कोशिश करली की तोमि ताके आवरी भेट होई हरिक हुआ आवरी मोर बले दुःख कम होओं | 29 हाई काचे तोमि परभु ने तार संगे खूबे हरिक ले भेट हुआ, आवरी असन मनर आदर करा, 30 कसन की हांय मसीह र काम काचे आपना जीव उपरे खतरा आनी मोरनार लगे आसी रला की जोन कमी तोमर बाटले मोर सेवा ने होयला ताके पूरा करा |