13
सबू लोक शासकीय अधिकारी मनर लगे राहा, काय काजे बलले कोनी अधिकार असन नुआय जोन महा परभुर बाटले नुआय; आवरी जोन अधिकार आय, आंय महा परभुर बाटले तेबाय ला बीती आय | 2 एइकाजे जोन कोनी अधिकारी विरुद करुआय, हांय महा परभुर विरुद सामना करू आय, आवरी सामना करबा लोक दंड पाऊ आत | 3 काय काजे बलले मुख्या अच्छा काम काजे नुआय, मातर अडरा काम काजे डरर कारन आय; असनी अगर तुई मुख्यार निडर बनबार चायबी आस, तेबे अच्छा काम कर, आवरी हान्तार बाटले तोके सहरायसी; 4 काय काजे बलले हांय तोर भलाई काजे महा परभुर सेवक आय | मातर अगर तुई अडरा करबिस, तेबे डर काय काजे बलले आंय कंडा के पकाहा ना दरला आचे; आवरी महा परभुर सेवक आय की हान्तार रिस अनुसार अडरा काम करबा लोक के दंड देओ | 5 एइकाजे लगे रबार ना आंय रीसर डर ले जरुरी आय, मातर विवेक पने गवाही देऊ आय | 6 एइकाजे लागा पने दियास काय काजे बलले शासन करबा लोक महा परभुर सेवक आत आवरी कड़की दाय काम ने लगी रहू आत | 7 एइकाजे सबू लोकर हक चुकाहा; जोन लागा मान्गसी आचे हांके लागा दियास; जाके उसिल मांगू आत त्तिके उसिल दियास; जोन के तमके डर बार चायिए, त्तिके डरा; जाहार आदर करबार चायिए, तिकर आदर करा | 8 आपसर मया के छाड़ी आवरी कोनी गोट ने कहारी करजदार ना हुआ; काय काजे बलले जोन दूसरा संगे मया सोंगाऊ आय, हांय बेवस्ता के पूरा करला | 9 "काय काजे बलले ये की "" बेविचार ना करा, हत्या ना करा, चोरी ना करा लालच ना करा,'' आवरी ये सबू के छाड़ी कोनी पने आगेया आय तेबे सबुर कावनी पाऊ आत की, '' अपनार पोड़ोसी संगे अपनार असन मया सोंगाहा|""" 10 मया पोड़ोसिर कांई अडरा ना करे आई काजे मया सोंगाय बार बेवस्ता के पूरा करबाटा आय | 11 समय के चिताय करी असनी करा, कसन बलले की हेबर तमर काजे जुमरा ले उटबा समय आयला आचे; काय काजे बलले जोन समय ने हामी विश्वास करी रऊँ, आंय समयर विचार ने अबर हामर मुक्ति लगे आचे | 12 राती खुबे भितला आचे, आवरी दिन निकरू आयबे; एइकाजे हामी अन्दारर काम के छाड़ी करी उजरर हत्यार के बांदू | 13 जसन दिन के सोभा देऊ आय, असनी हामी सीदा चाल चलू, लीला कीड़ा; आवरी पियाय्बाटाने, ना बेविचार ने आवरी लुचपन ने आवरी ना झगड़ा आवरी डाह ने | 14 मातर परभू यीशु मसीह के फिदा, देहर अभिलाषा के पूरा करबा उपाय ना करा |