13
धान काटबा परब ले पइले, जड़ दाय येशु जान ला की मोर हाय समया आई पहुचला आचे की सोवसार के छाडी करी बुआ लगे जाऊ आय, तेबे आपना लोक मन ले जोन सोवसार ने रयेत जसन मया हाय सोंगायते रये,सरोत ले असनि ची मया हाय सोंगायते रये | 2 जड़ दाय शैतान समोन र बेटा यहूदा इस्करीयोती र मने ये डाली रये की हाके धराओं, तेबे भात खायबा समया 3 येशु,ये जनि करी की बुआ सबु के मोर हाथ ने करी देला आचे आवरी मुय महापरबू र लग ले आयली आची आवरी महापरबू लगे जीबी आची, 4 भात खायबा थान ले उठीकरी आपना र उपरर फटी के निकराय देला,आवरी अन्गोची धरी करी आपना आटा के बांधला | 5 तेबे बरतन ने पानी भोरिकरी चेला मन र गोड धोय्बार आवरी जोन अन्गोची ले हातार आटा बादी होई रये हातारी ने फुचके मुरायला | 6 जड़ दाय हाय समोन पतरस लगे आयला, तेबे पतरस हाके बल्ला, “हे परबू, काय तुय मोर गोड धोउआस ?” 7 येशु ताके जवाब देला, “जोन मुय करबी आची, तुय एबे हाके ना जानिस मातर एतार पाचे समझबीस |” 8 पतरस हाके बल्ला, “तुय मोर गोड केबी धोय्के ना पय्बिस !” ये सुनी करी येशु हाके बल्ला, “अगर मुय तोके ना धोयी, तेबे मोर संगे तोर काई बले साझा नुआय |” 9 समोन पतरस हाके बल्ला, “हे परभू, तेबे मोर गोड ची नाइ, मातर हाथ आवरी मुंड बले धोयी देस |” 10 येशु हाके बल्ला, “जोन नहाय्ला आचे हाके गोड र सिवा आवरी काई धोय्बार जरुरत निआय, मातर हाय बिलकुल सुध आय ; आवरी तमि सुध आस,मातर सबु र सबु नाइ |” 11 हाय तो आपना धरायबा बिता के जानते रये इ काजे हाय बल्ला, “तमि सबु र सबु सुध नुआस |” 12 जड़ दाय हाय तिकर गोड धोयी सारला, आवरी आपना फटी फिंदी करी फेर बोसला, तेबे तिकर ले बलके मुरायला, “काय तमि समझलाय की मुय तमर संगे काय करली ? 13 तमि मोके गुरु आवरी परबू बोलुआस,आवरी अच्छा ची बोलुआस, कसन की मुय हाई आय | 14 अगर मुय परभू आवरी गुरु होई करी तमर गोड धोय्ली, तेबे तमके बले एक दुसर र गोड धोयबार आय | 15 कसन की मुय तमके नमूना द्काय्ली आची की जसन मुय तमर संगे करली आची,तमि बले असनि ची करा | 16 मुय तमके सत सत बलबी आची, दास आपना मालिक ले बड़े नुआय, आवरी ना पटायबार आपना पटायबा बिता ले | 17 तमि ये गोट मन जानास, आवरी अगर हाय मन उपरे चलबास तेबे धन्य आस | 18 मुय तमि सबु र विषय ने ना बलि ; जोन मन के मुय चुनली आची, तिके मुय जानी ; मातर ये इ काजे आय की पवित्र शास्त्र र ये बचन पूरा हो, 'जोन मोर रोटी खाऊआय हाय मोर उपरे लात उठायला |' 19 एबे मुय हातर होयबा र पयले तमके चेताय देबी आची की जड़ दाय ये होई जायसी तेबे तमि बिसवास करा की मुय हाई आय | 20 मुय तमके सत सत बलबी आची जोन मोर पटायला बिता के अपनाउआय, हाय मोके आपनाउआय ; आवरी जोन मोके आपनाउआय,हाय मोर पटायला बिता के आपनाउआय |” 21 ये गोट मन बोली करी येशी आत्मा ने व्याकुल होयला आवरी य गवाई देला, “मुय तमके सत सत बलबी आची की तमि मन ले गोटोक मोके धरायसी |” 22 चेला मन संदेह ले, की हाय कहार बारे ने बलसी आचे, एक दुसर बाटे द्कके मुरायलाय | 23 हातार चेला मन ने गोटोक जेक येशु मया सोंगायते रए, येशु र छाती बाटे लोई बोसी रए | 24 सामोन पतरस हातार बाटे इशारा करी हाके पुछला, “सांग तो, हाय कहार बारे ने बलसी आचे ?” 25 तेबे हाय असनि ची येशु र छाती बाटे लोई करी हाके पुछला, “हे परभू, हाय कोन आय ?” 26 येशु जवाब देला, “जाके मुय ये रोटी र गोंदा चोब्ड़ीकरी देबी हाई आय |”आवरी हाय गोंदा के चोबडीकरी सामोन इस्करीयोती र बेटा यहूदा के देला | 27 गोंदा धरते ची शैतान हातार उपरे समायला | तेबे येशु हाके बल्ला, “जोन तुय करबीआस, तुरते कर |” 28 मातर बोसला लोक मन ने कोनी ना जानलाय की हाय ये गोट हातार ले काय काजे बलला | 29 यहूदा लगे थैली रबार आय, इकाजे कोनी कोनी समझलाय की येशु हाके बलसी आचे की जोन काई हांके परब काजे जरुरत आय हाके घेन, नोय्ले ये की कंगाल मन के कई दी देस | 30 इ काजे हाय गोंदा धरी करी तुरते बाहारे गला; आवरी ये राती र समया रए | 31 जड़ दद्दी हाय बाहारे गला तेबे येशु बल्ला, “एबर मुनुक र बेटा र महिमा होयला आचे ; 32 [अगर हायथाने महापरबू र महिमा होयला आचे,] तेबे महापरबू बले आपना ने हातार महिमा करसी आवरी तुरते करसी | 33 हे पिला मन, मुय आवरी खिनिक बेर काजे तमर लगे आची :फेर तमि मोके डगराय बास, आवरी जसन मुय यहूदी मन के बल्ली, 'जों थाने मुय जीबी आची हाय थाने तमि ना आसके सकास,' असनि ची मुय एबे तमके बलबी आची | 34 मुय तमके गोटोक नुआ आज्ञा देबी आची एक दुसर ले मया सोंगाहा ;जसन मुय तमर संगे मया सोंगायली आची, असनि ची तमि बले एक दुसर ले मया सोंगाहा | 35 अगर आपस ने मया सोंगात बास, तेबे इ ले सबु जानबाय की तमि मोर चेला मन आस |” 36 सामोन पतरस हाके बल्ला, “हे परभू, तुय कोंती जिबिआस ?” येशु जवाब देला,”जोंती मुय जीबी आची हाय थाने तुय एबे मोर पिटी आयके ना सकिस ; मातर एतार पाचे मोर पिटी आयबीस |” 37 पतरस हाके बल्ला, “हे परबू , एबे मुय तोर पिटी काय काजे ना आसके सकी ? मुय तो तोर काजे आपना जीव बले दी देबी |” 38 येशु जवाब देला, “काय तुय मोर काजे आपना जीव देबिस ? मुय तोके सत सत बलबी आची की कुकड़ा र बांग ना देसी जड़ दाय ले तुय तीन हार मोर इनकार ना करबीस |