11
मरियम आवरी हातार बहिन मारथा र गाँव बैतनिय्याह र लाजर नाव र गोटोक मुनुक बीमार रये | 2 ये हाई मरियम रये जोन परबू उपरे इतर डालीकरी हातर गोड के आपना बाल ले फुची रए, एतारी भाई लाजर बीमार रए | 3 इ काजे हातार बहिन मन हाके बोली पटायलाय, “हे परबू ,दक, जहार ले तुय मया सोनगाउआस ,हाय बीमार आचे |” 4 ये सुनिकरी येशु बलला, “ये बिमारी मिरतु र नाई; मातर महापरबू र महिमा काजे आय, की हातार बाटले महापरबुर बेटा र महिमा हो |” 5 येशु मारथा आवरी हातार बहिन आवरी लाजर ले मया सोंगायते रये | 6 फेर बले जड़ दाय हाय सुनला की हाय बीमार आचे, तेबे जोन जगा ने हाय रये, हाय थाने दुय दिन आवरी ठेबला | 7 "एतार पाचे हाय चेला मन के बलला, ""आसा, हामी यहूदिया ने जाऊ |”" 8 चेला मन हाके बललाय, “हे रब्बी, एबे तो यहूदी मन तोर उपरे पकना पोकायबार चाहायते रओत, आवरी काय तुय फेर बले हाय थाने जाऊआस?” 9 येशु जवाब देला, “काय दिन र बार घंटा ना होए ?अगर कोनी दिन ने हिनडले तेबे ठठाय ना होए, कसन बलले इ सोवसार र उजर के दकुआय | 10 मातर कोनी राती बेरा हिनडले ठठाय होऊआत,कसन बलले हातार ने उजर निआय |” 11 हाय इ गोट मन बलला,आवरी एतार पाचे हायमन ले बलके मुरायला, “हामर मित लाजर सोयला आचे,मातर मुय हाके चेताय के जिबिआची |” 12 तेबे चेला मन हाके बललाय, “हे परबू,अगर हाय सोयला आचे,तेबे अच्छा होई जायसी |” 13 येशु तो हातार मिरतु र विषय ने बली रये, मातर हायमन सम्झलाय की हाय झुमरा ले सोयबार विषय ने बलला | 14 "तेबे येशु हाय मन ले सीदा सीदा बली देला,""लाजर मरला आचे ;" 15 आवरी मुय तमर कारन हरिक ने आची की मुय हाय थाने ना रई जहार ले तमि बिस्वास करा | मातर एबे आसा,हामी हातार लगे जो |” 16 तेबे थोमा जोन दिदमुस बोला जाऊआय, अपना संग र चेला मन ले बलला, “आसा,हामी बले हातर संगे मोरबा काजे जो |” 17 हाय थाने पहुचलार पाचे येशु के ये जान पोडला की लाजर के मोड़ाभाटी ने सोंगायलार चार दिन होयला आचे | 18 बैत्निय्याह येरुसलेम लगे खिनडिक दुय मिल र दूरिया ने रए | 19 खुबे असन यहूदी मारथा आवरी मरियम लगे तिकर भाई र मिरतु उपरे शान्ति देबा काजे आई रओत | 20 जड़ दाय मारथा येशु र आयबा समाचार सुनला तेबे हातार संगे मिसबा काजे गला, मातर मरियम घर ने बोसी रये | 21 "मारथा येशु के बलला, ""हे परबू, अगर तुय एथाने रयतिस तेबे मोर भाई केबी ना मोरता |" 22 आवरी एबे बले मुय जनि की जोन काई तुय महापरबू ले मानगबिस,महापरबू तोके देसी |” 23 येशु हाके बलला, “तोर भाई फेर जीव उठसी |” 24 मारथा हाके बलला, “मुय जानी की आखरी दिन ने दुसरा जीवन र समया ने हाय जीव उठसी |” 25 येशु तिके बलला, “दूसरा जीवन आवरी जीवन मुय ची आय ; जोन कोनी मोर उपरे बिसवास करुआय हाय अगर मोरी बले गले तेबे बले जीयसी, 26 आवरी जोन कोनी जीव आचे आवरी मोरउपरेबिसवासकरुआय,हाय जग जग ले ना मोरसी | काय तुय ये गोट उपरे बिसवास करुआस ?” 27 हाय ताके बलला, “हव हे परभू ,मुय बिसवास करुआय की महापरबू र बेटा मसि जोन सोवसार ने आयबार रये हाय तुय ची आस |” 28 ये बोलिकरी हाय जायते गला, आवरी आपना बहिन मरियम के हाग देई करी धीरे ले बलला, “गुरु इ ची आय आवरी तोके हाग देसी आचे |” 29 ये सुनी ची करी हाय तुरते उठिकरी हातार लगे आयला | 30 येशु एबे गाँव ने ना पहुची रये मातर हाई जगा ने रये जोन थाने मारथा हातार संगे मिसी रये | 31 तेबे जोन यहूदी हातर संगे घर ने रयेत आवरी हाके शान्ति देते रयेत,ये दकिकरी की मरियम तुरते उठी करी बाहरे गला आचे ये समझलाय की हाय मोड़ाभाटी ने कानदबा काजे जायसी आचे,तेबे हातार पीटी होयलाय | 32 जड़दाय मरियम हाय लगे पहुचला जों थाने येशु रए, तेबे हाके द्की ची करी हातार गोड उपरे घसरी गला आवरी बलला, “हे परभू , अगर तुय एथाने रयतिस तो मोर भाई ना मोरता |” 33 जड़ दाय येशु हाके आवरी हाय यहूदी मन के जोंन हातार संगे आई रयेत, कान्दते द्कला, तेबे आत्मा ने खुबे निरास आवरी व्याकुल होयला, 34 आवरी बलला, “तुय हाके कोन लगे सोंगायली आस ?” हायमन ताके बललाय, “हे परबू, आयिकरी द्की दक |” 35 येशु कांदला | 36 तेबे यहूदी मन बलके मुरायलाय, “दका,हाय हातार संगे कतक मया सोनगाउआय|” 37 मातर हाय मन ले खिनडिक बललाय, “काय ये जोंन काना र आकी उगाडला,ये बले ना करके सकला की ये मुनुक ना मोरता ?” 38 येशु मन ने फेर खुबे निरास होई करी मोड़ाभाटी ने आयला | हाय गोटोक गुडा रए आवरी गोटोक पकना हातार उपरे सोंगायलार रये | 39 येशु बलला, “पकना गुचाहा |” हाय मोरलार बहिन मारथा हाके बलके मुरायला, “हे परबू, हायथानले तो एबे बास आयसी आचे, कसन बल ले हातार मोर्लार चार दिन होयला आचे |” 40 येशु हाके बल ला, “काय मुय तोके ना बोली रई की अगर तुय बिसवास करबीस, तेबे महापरबू र महिमा के दकबिस |” 41 तेबे हाय मन हाय पकना के गुचायलाय | येशु आकी उठाय्करी बलला, “हे बुआ, मुय तोर धनेबाद करबी आची की तुय मोर सुनलिस | 42 मुय जानते रई की तुय हरमेशा मोर सुनुआस, मातर जोन लोक कूड़ा इ कटा कटा ठिया आचोत, तिकर लागी मुय इ बल ली,जहार ले की हाय मन बिसवास स करोत की तुय मोके पटायलिआस |” 43 ये बोलिकरी हाय बड़े सबद ले हागदेला, “हे लाजर, निकरी आव !” 44 जोन मोरी रए हाय मोड़ी ढापला फटी ले हाथ गोड बांदी होय्लार निकरी आयला,आवरी हातार मुह अन्गोची ले लेपटलार रए | येशु तिके बलला, “हाके खोली दियास आवरी जायके दियास |” 45 तेबे जोन यहूदी मरियम लगे आसी रओत आवरी हातार ये काम द्की रयेत,हाय मन ले खुबे लोक मन हातार उपरे बिसवास करलाय | 46 मातर हाय मन ले खिनडिक लोक फरिशी मन लगे जाई करी येशु र काम मन र समाचार देलाय | 47 इ गोट ने परधान याजक मन आवरी फरिशी मन महा सभा हागदेलाय, आवरी बललाय, “हामी काय करबू आचू ? ये मुनुक तो खुबे चीन दकाउआय | 48 अगर हामी हाके असनि छाडी देबू, तो सबू हातार उपरे बिसवास आनबाय,आवरी रोमी आइकरी हामर जगा आवरी जाती दुनो उपरे अधिकार करबाय |” 49 तेबे हाय मन ले काइफा नावर गोटोक माने जोन हाय बरस र महा याजक रए , तिकर ले बल ला, “तमि कई बले ना जानास ; 50 आवरी ना ये समझास की तमर काजे ये अच्छा आय की हामार लोक मन काजे गोटोक मुनुक मोरो,आवरी सबु जाती नास ना हो |” 51 ये गोट हाय आपना बाट ले ना बल ला, मातर हाय बरस र महा याजक होयिकरी भाविस्य्वानी कारला की येशु हाय जाती काजे मोरसी ; 52 आवरी ना खाली हाय जाती काजे, मातर इ काजे बले की महापरबू र तितर बितर बेटाबेटी मन के गोटोक करी देओ | 53 इ काजे हाई दिन ले हाय मन ताके मारी देबार चाल चलके मुरायलाय | 54 इ काजे येशु हाय समया ले यहूदी मन ने परगट होयिकरी ना गला मातर हाय थान ले झार र लगर प्रदेश र इफ्राइम नावर गोटोक नगर ने गला ; आवरी आपना चेला मन संगे हाई थाने रय्के मुरायला | 55 यहूदी मन र धान काटबा र परब लगे रए,आवरी खुबे असन लोक धान काटबा ले पयले देहात ले येरुस्लेम के गलाय की आपना के सुध करोत | 56 इ काजे हाय मन येशु के डगराय के मुरायलाय आवरी मंदिर ने ठिया उठी एक दुसरा के बलके मुरायलाय, “तमि काय सोचबास ? काय हाय परब ने ना आयसी ?” 57 परधान याजक मन आवरी फरिशी मन ये हुकुम दी रओत की अगर कोनी ये जानो की येशु कोन थाने आचे तेबे सांगो की हाय मन ताके धरके सकोत |