संसार में जीत लेणो
5
1 झिको कोई ओ बिस्वास करै है कै यीसू मसी परमेसर गो बेटो है अर झिको पिता परमेसर ऊं प्रेम करै है बो बिंगी उळाद ऊं बी प्रेम करेगो।
2 जे आपां परमेसर गी आग्या गो पालण करां तो आपां जाण लेवां कै आपां परमेसर गी उळाद ऊं प्रेम करां।
3 जे आपां बिंगी आग्या गो पालण करां अर माना तो आपां परमेसर ऊं प्रेम करां।a बिंगी आग्या ओखी कोनी है।
4 क्यूंकै हर झिको कोई परमेसर गो बेटो संसार गै उपर जीत पा लेवै है अर संसार गै उपर आपां नै झिका ऊं जीत मिली है, बो है आपणो बिस्वास।
5 जे ओ बिस्वास करै है कै यीसू परमेसर गो बेटो है, बो ई संसार नै जीत सकै है।
यीसू मसी गै बारै में गवाई
6 बो यीसू मसी ई है झिको आपणै कनै आयो अर बतिस्मो लियो अर खून बहायो। एकलो बतिस्मो कोनी, पण बतिस्मो लियो अर खून बी बहायो हो। अर बा पवितर आत्मा है झिकी बिंगी गवाई देवै है क्यूंकै आत्मा ई सच्चाई है।
7 गवाई देण आळा तीन है।
8 आत्मा, पाणी अर खून अर ऐ तीनूं एक ई गवाई देवै है।
9 आपां आदमी गै द्वारा देएड़ी गवाई नै माना, पण परमेसर गी गवाई बिंऊं मोटी है। आपगै बेटै यीसू गै बारै में गवाई बण दी है।
10 बो झिको परमेसर गै बेटै पर बिस्वास राखै है, बो आपगै मां गवाई राखै। बि पर झिको बिस्वास कोनी राखै, बो परमेसर नै झूठो मानै है। क्यूंकै बो परमेसर आपगै बेटै गै बारै में देएड़ी बातां में बिस्वास कोनी राखै है।
11 अर बा गवाई आ है: परमेसर आपां नै अनन्त जीवन दियो है अर बो जीवन बिंगै बेटै यीसू गै द्वारा मिल्यो है।
12 झिको बिंगै बेटै नै मानै है, बिंगै कनै अनन्त जीवन है। पण झिको परमेसर गै बेटै नै कोनी मानै है, बो परमेसर गै सागै अनन्त जीवन कोनी जी सकै है।
अनन्त जीवन
13 परमेसर में बिस्वास राखण आळो, थानै ऐ बातां ईंखातर लिखण लागरयो हूं झिकै ऊं थे ओ जाणल्यो कै अनन्त जीवन थारो है।
14 आपणो परमेसर में पूरो भरोसो है कै जे आपां बिंगी इच्छा गै अनुसार बिंऊं बिनती करां तो बो आपणी सुणै है
15 जद आपां जाणा कै झिको कीं आपां मांगा बो आपणी सुणै है तो आपां ओ बी जाणा कै झिको आपां मांगयो है, बो आपां नै दियो है।
16 जे कोई देखे है कै बिंगा भाई अर भेन कोई हिस्यो पाप करण लागरया है झिका गो फळ मोत कोनी है, तो बांगै खातर परमेसर ऊं पराथना करणी चईयै अर परमेसर बानै जीवन देवैगो। मैं बांगै खातर जीवन गै बारै में बात करण लागरयो हूं, झिका हिस्यै पाप में लागेड़ा है, झिको बानै मोत तांई कोनी लेगे जावैगो। हिस्यो पाप बी होवै है झिकै गो फळ मोत है। इंगै बारै में बिनती करण खातर कोनी केण लागरया हूं।
17 सारा बुरा काम पाप है। पण हिस्यो पाप बी होवै है झिको मोत कानी कोनी ले जावै।
18 आपां जाणा कै झिको कोई परमेसर गो बेटो बणग्यो, बो पाप कोनी करै। परमेसर गो बेटो बिंगी रक्सा करै। बो दुस्ट बिंगो कीं कोनी बिगाड़ सकै।
19 आपां जाणा कै आपां परमेसर गा हां। पण ओ सारो संसार बि दुस्ट गै बस में है।
20 पण आपां नै ठा है कै परमेसर गो बेटो, यीसू मसी आ'ग्यो है अर बण आपां नै ग्यान दियो है कै आपां बि सच्चै परमेसर नै जाणल्या। अर आपां बिमै हां, झिकी सच्चाई है, क्यूंकै आपां बिंगै बेटै यीसू मसी में पक्का हा। बो ई सच्चो परमेसर है अर बो ई अनन्त जीवन है।
21 हे बच्चों, अपणै आपनै झूठै देवतावां ऊं दूर राखो।