प्रभु गै आण गो दिन
3
1 हे मेरा भाईयो अर भेनों, मैं थानै एक खत पेला लिख्यो अर अब दूसरो खत लिखण लागरयो हूं। आ दोनां खतां में मैं थानै होसलो देगे याद कराऊं कै झिको कीं केयो है बिनै ठीक तरियां ऊं मानता रेवो।
2 परमेसर गी बात बताण आळा गी बात अर म्हारै मुकती देण आळा यीसू मसी गै खास चेला गै द्वारा केयेड़ी बातां नै बी मैं थानै याद करवाऊं।
3 सारा ऊं पेला ओ जाण लेणो चईयै कै अंत गै दिनां में सच्चाई गी मजाक उड़ाण आळो आवैगो अर आपगी इच्छा पूरी करण खातर गळत काम करता रेवैगा।
4 अर बे लोग इंया केवेगा कै बिंगो के होयो झिकै नै थे उडीकण लागरया हा? क्यूंकै थारा बडेरा तो चाल बसया पण सरसटी बणाण ऊं लेगे सारी चिजां बिंया है जियां आज।
5 पण जद बे भूल जावै कै परमेसर गै बचन द्वारा आसमान बणाएड़ो है अर धरती पाणी ऊं बणी अर पाणी में टिकेड़ी है।
6 अर इऊं परमेसर जल प्रळय गै द्वारा पेला गै संसार नै खत्म करयो।
7 पण ओ आकास अर धरती झिकी आज है परमेसर गी बि आदेस गै द्वारा आग ऊं नास होण खातर राखेड़ी है झिकै दिन परमेसर नै ना मानण आळा नै नास करया जावेगा।
8 प्यारा बेलियों, ई बात नै भूल ना जाईयो। प्रभु गो एक दिन एक हजार सालां गा बराबर है अर एक हजार साल एक दिन बराबर है।
9 केई लोग इंया सोचै है कै परमेसर आपगै करेड़ा वायदे में देर लगावै। पण बो आपणै पर धीरज राखै। अर बो कोई बी आदमी नै नास कोनी होण देणो चावै पण चावै है कै सारा मन बदळै।
10 पण प्रभु गो दिन होळे'सी चोर गी तरियां आवैगो। बि दिन भयंकर गरजनां गै सागै आसमान अर झिको कीं बिंगै मां है सारी विलीन हो जावैगो। अर धरती अर धरती पर झिकी चीजा बळ ज्यगी।
11 जद ओ ईं तरियां सारो कीं नास हो'सी। ईंखातर थे लोग सोचो कै आपणो जीवन हिस्यो होणो चईयै अर आपणो जीवन परमेसर गी इच्छा गै अनुसार पवितर होणो चईयै।
12 अर थानै परमेसर गै न्याय गै दिन गी उडीक करणी चईयै। बि दिन नै ल्याण खातर कोसिस बी करो। बो दिन आण तांई आकास आग गी लपटा में बळगे नास हो जावैगो। अर आकास गै मां झिको कीं है आग ऊं बळगे पिंगळ जावैगो।
13 पण आपां परमेसर गै बचन गै अनुसार नुए आकास अर नुई धरती गी उडीक करण लागरया हां जठै धरमी लोग वास करेगा।
जागता अर तैयार रेवो
14 ईंखातर हे प्यारा बेलियों, थे आ बातां गी उडीक करण लागरयो हो अर पूरी कोसिस करो कै प्रभु गी नजर में सांती ऊं अर बिना दोस अर कोई बी पाप आपणै में ना पायो जावै।
15 आपणै प्रभु गै धीरज नै थे इंया समझो कै बो सारां नै पाप ऊं माफी गो मोको देणो चावै। ऐ बाता आपणै प्यारै पौलुस परमेसर गी द्वारा देएड़ै ग्यान ऊं लिखेड़ी है।
16 पौलुस आपगै सारै खता में आ बात लिखी है। पण केई बातां समझण में ओखी है। जिंया बिस्वास में कमजोर लोग अर अणपढ लोग पवितर सासतर गी दूसरी किताबा सागै करै है बिंया ईं ई किताब गै बारे में अरथ गळत बतावै है। इऊं बे आपगै पगां पर आप खुल्हाडी मारै है।
17 हे प्यारा बेलियों, थानै ऐ बातां पेला ऊं ई पतो है कै थे बुराई अर गळत लोगां गै द्वारा भटक गै आपगी जिग्यां ऊं पड़ ना जाईओ। इऊं सावधान रेवो।
18 पण आपणै प्रभु अर मुकती देण आळै यीसू मसी गी किरपा अर ग्यान में आ'गे बढता जाओ। अर आखरी टेम तांई आपां सारा बिंगी मेमा करता रेवा। आमीन।