याकूब 4

संसार ऊं बेलीचारो

1 थारै बिचाळै में लडाई झगडा क्यूं होवै है? बिंगो कारण थारै आपगै ईं मां कोनी है के? बे बुरे कामां गी इच्छा झिकी थारै मां हमेसा बणी रेवै है कै बिऊं ईं ऐ लडाई झगडा पैदा होवै है। 2 थे लोग चावो हो पण थानै मिलै कोनी। थारै में ईरस्या है अर थे हत्या करो हो फेर मिलै कोनी। ईंखातर थे लडाई झगड़ा करो हो। झिकी थे चिजां चावो, कोनी मिलै क्यूंकै थे बे चिजां परमेसर ऊं कोनी मांगो। 3 अर जद मांगो हो तो पावै कोनी। थारी सोच सई कोनी होवै। क्यूंकै थे बिनै आपगी बुरी इच्छा पूरी करण खातर मांगो हो। 4 हे गंदा लोगो, थे कोनी चाओ के संसार ऊं प्रेम करणो परमेसर ऊं नफरत करण जिसो है? झिको कोई ईं दुनिया ऊं दोसती राखणो चावै है बो अपणै आपनै परमेसर गो दुसमण मणावै है। 5 अर के थे इंया ई सोचो हो कै सासतर इयां गळत केवै है कै परमेसर आपणै मां ईं आत्मा दी है, बा ईरस्य पूर्ण इच्छांवा ऊं भरी रेवै है। 6 पण परमेसर आपणै पर भोत किरपा करी है ईंखातर सासतर में केऐड़ो है परमेसर घमण्डियां गो बिरोधी है जद दीन लोगां पर किरपा करै है।

7 ईंखातर अपणै आपनै परमेसर गै अधीन हो जावो अर सैतान गो सामणो करो तो बो थारै सामणुं भाज जावैगो। 8 परमेसर गै कनै आओ, अर परमेसर बी थारै कनै आवैगो। अरै पापियो, आपगा हात सुद्ध करो, अरै बेम करण आळा, आपगै मन नै पवितर करो। 9 सोक करो, रोवो अर दुखी होवो। हो सकै है थारी खुसी सोक में बदल जावै अर थारी आ खुसी उदासी में बदल जावै। 10 प्रभु गै सामणै दीन बणो अर बो थानै ऊंचो करेगो।

मसी भाईयां पर दोस लगाणो

11 हे मेरा भाईयो अर भेनों, एक दूसरै गै बिरोध में ना बोलो। झिको आपगै भाई गै बिरोध में बोलै है बो नेम नै दोसी मानै है बो नेम गै बिरोध में बोलै है अर नेम नै दोसी ठेरावै है। अर जे थे नेम पर दोस लगावो हो तो नेमा नै कोनी मानो पण बि पर न्याय करण आळा बण जावो। 12 नेम देण आळो अर बिंगो न्याय करण आळो तो एक ईं है। अर बो ई रक्सा अर नास कर सकै है। तो फेर आपगै साथी गो न्याय करण आळा थे कुण होवो।

घमण्ड गै विरुद्ध चेताणो

13 इयां केण आळा सुणो, आज या काल म्हे ईं या बि नगर में जा'गे एक साल बठै व्यापार में धन लगागे भोत सारा रिपिया कमा लेवांगा। 14 पण थे तो इतो बी कोनी जाणो कै काल थारै जीवन के होवैगो? देखो थे तो बि धुंध गै समान हो झिकी थोड़ी सी देर आवै है अर फेर उड़ जावै है। 15 थे तो सदा आ'ईं केणो चईयै, जे प्रभु चायो तो म्हे जीयांगा अर काम करांगा। 16 पण अब तो आ है कै थे आपगै दिखावै पर घमण्ड करो हो। इसा सारा घमण्ड बुरा है।

17 तो फेर ओ जाणता होया बी कै ओ सई है बिनै ना करणो पाप है।