Mɔ́kànɔ̀ kà
tóabàà
Kúnjìɗì ɓwɛ́ ɓɛ̀ Dòlà Mɔtómò ŋgɔ̀
Li ɓɛ̀ wì kà tóà ɓɛ̀ Mɔ̀kànɔ à Lukasi, tóabàà kàà Dɛ̀ɛ̀ mɔ ɓò ɓwɛ́ mɔtómɔ̀ Yésùsì. À jàà mɔ́kànɔ̀ wàà ɓɛ̀, Lúkàsì weli mɔ nɛ̀ ɓɛ̀ kilisɛni nɔ̀ɔ̀ kà bò ma Zuifi à nàà, kà bò à wélà nu Glɛki à. Kima ɓò ɓɛ̀ɛ̀ i bò mà Zuifi à nà, à ɓɛ̀ ŋgɔ̀ɔ̀ mbúnù yele nɛ̀ siki yele bò nɛ̀ i nɛ̀ nɛ̀náǎ, Yésùsì bò Naa kpasisi yóà.
Dòlà Mɔtómò Lúkàsì nɛ̀ni kinɔ ma wáátà dòlà mɔtómɔ̀, Mɔ̀ɔ̀wɛ̀, mɔ́kanɔ; Wè ɗyakisi wè na ŋganɔ Yésùsì kúnjìɗì nàà Galilé ɔ nɛ̀ nàà Yélúzàlɛ̀mì (9.51 à 19.28). À jàà ɓɛ̀ na ŋganɔ mɔ ɛli nàà Yélúzàlɛ̀mì à, à ɓɛ̀ soko kà Yésùsì lɛɛsinibàà à fe ɔ à, Lúkàsì boa nɛ́ɛ́ɗà, ɓɛ̀ mɔnɔ kà pélabàà, nɛ̀ yɛlɛ kà bò ma à jàà ma tóà mɔ na. Bò mɛ, Yésùsì à ɛ́là wɛ à sɛɓa Mata yɔ́ɔ̀ Malia (10.28-42), yɛlɛ dòlà Samalitɛ (10.29-37), tɛ kùù mɔ ɗibafa kà jio jii kpà bè wàà kà yɔ́à (15. 11-32).
Mwâ tóó nɛ̀ mbo ɓɛ̀ mɔ kà bò nɛ̀ à mgbàà wɛ à jàà yɛlɛ kpasi Yésùsì:
Njámbe pɛ́sabàà Yésùsì mɔ poki ɓɛ̀ wì nɔ̀ɔ̀ yele i boa i ba à. Yésùsì ɛ́sì sɛ́à súlòwɛ̀ à tɛ́ ɓɛ̀ wì nɔ kà wì jààji à: Yeɓò njɛmbi, bè, ɓò sa, ɓò tíndòmɔ̀ mɔ tɛ ku ŋgɛnɛ.
Ye kilisɛni nɔ̀ɔ̀ bàà kà Lúkàsì boa à wélà wè yóà boabàà tɛkilimɔ nɛ̀ limɔ. Lúkàsì nɛ̀ɛ̀ɗí súlò yɛlɛ kà Yésùsì wélabàà à wè mwâ nja, mɛ à jàà 12.16-21 à ɗɛ̀ŋgáɗà mɔ́kànɔ̀ 16. Ɓwɛ̀ ɓò yàmìwè Yésùsì nɛ̀náǎ, yóà à kùù limɔ dɛ nɛ̀ tô Njámbe, tɛ kùù dɛ nɛ̀ tô wì.
Yésùsì yɔ́ɔ̀ ɓò yàmìwè wàà boa gbo, yóà bò kumini nɛ̀ lufono kpasi, yóà je Njámbe bò dòlà wɛ, gwéé wì yele. À ɓɛ̀ nja nɔ kà ɓò Loma bò hɔ̀ wì ɓwɛ́ nɛ̀náǎ: «Mgbàà mɔ́kònjì yóà bò Mgbáámɔ́njá.» Mɔ̀ɔ̀wɛ̀, kilisɛni ɓwɛ́ nɛ̀náǎ: «Yésùsì à bò Mgbáámɔ́njá.» Tɛ́kìlìmɔ̀, Njámbe túúso Yésùsì à fio kà hà à ɔ à tɛ mɔ yele. À jàà mɔ́kànɔ̀ Lúkàsì, Yésùsì bò ɓeeɗa wɛ è Mgbáámɔ́njá péle à ma kwala Dòlà mɔtómɔ̀.
Mɔ́kànɔ̀ Dòlà mótòmɔ̀ Lúkàsì sɔni nàà Yélúzàlɛ̀mì (ɗɛ̀ŋgáɗà wɛ 24), à ɓɛ̀ soko kà kúnjóɗobàà (ɗɛ̀ŋgáɗà wɛ 1 yɔ́ɔ̀ 2). Yésùsì boa à mùù wàà tɔtɔ à ɓò yàmìwè wàà, yóà bò nɛ̀ mɛŋgalamɔ súlòwɛ̀. À kúnjìɗì kpasi à li wì, Yésùsì bóbàà done nɛ̀ Gɛ́lɛ́lɛ́ Lííndì kà toli nàà Njámbe à (Ɗɛ̀ŋgáɗà wè 3 yɔ́ɔ̀ 4). Yeɓò yàmìwè Yésùsì bò ba kàa gɛnɛ wàà (24.29). Mɛ Yésùsì, yóà bò nɛ̀ sakwuli mɔ nɛ̀ béà gema dɛmɔ Njámbe.