Zezwii a ‑nʋa a ‑zɩkpaa ‑a ‑wʋä ‑mä Efɛɛzɩ 'mö Zaa cɛlɩɛ 'wʋ
2
Na ‑nʋa a ‑zɩkpaa ‑a ‑wʋä ‑mä Efɛɛzɩ 'a Lagɔzuzukwëa,
'cɛla 'wʋ nɩɩ,
‑ɔ ‑suä ‑zɛlɩya ngbi'sɔ ‑kpɔ luukɛ 'mö,
‑ɔ ziɛ ‑mä yɔlɔkpï ngbi'sɔ ‑kpɔ jijo'wʋ 'möö,
ɔ lɛ naa:
2 ‑Na'a nʋnʋlii,
n ‑yii.
Sɛ ‑n yɔlɔɔ 'na libhoo a za tenyii,
n‑n nyɔlaa ‑na'a dlɩɩ,
n‑n möä 'yukusɛɛ,
n ‑yi ‑sɩbhä.
'Kpʋkpʋwaa,
‑nn‑ä 'wʋ nglu ‑n ‑nyʋä 'kä 'wʋ ‑wʋnɩ.
‑Wa laa wanyɩ na tietiewa 'n n'n‑ä tiee,
‑n kʋä 'mö 'bɩa,
‑n yɛ sɛ yɩbhlɩmanɩ nɩɩ,
yiowaa wa glɩnɩɛ.
3 ‑N kä ‑tiamö dlɩ'mökpaanɔ,
nza ‑n ziɛ na za 'zwɩ 'n swɩ 'nɩ 'kunɩmöä yɔwʋ.
4 ‑Maa ‑na 'kïbhë ‑bhlʋ ‑a ‑nɩɩɛ dlɩ yɔwʋ nɛnɩɩ,
ma‑a nɩɩ:
Sɛ ‑n kä a‑a bhla'mö na ‑wawʋʋ dlɩ zɛmöö,
‑n 'nua ‑sɩkaa ‑sɩbhä dlɩ zɛmö ‑kä.
5 Dɛ ‑n 'bhöönɩɛ n‑n yiɛ bhli a daa,
‑na'a dlɩɩ nɩ bhlinɩ ‑lɛ.
Zigbonɩ 'mö ‑n 'kä ‑na'a bhla'mö a da nimï yi.
‑Maa n‑n 'nɩa 'mö zigbonɩ,
n yia ‑mä ‑na'a mä'a yi,
‑na'a ‑sikawapɛɛ,
n yea ‑lɛ 'ɛ ‑gbaa 'mö ‑sɛ.
6 Miɛ abhlɩ da'a 'wë,
‑maa 'kïbhë ‑bhlʋ ‑a glɩnɩɛ ‑na dɛ ‑na a ‑naa,
ma‑a nɩɩ:
Nikola a ‑zɩkpa 'mö a ‑nʋa,
'wa 'saa wa nʋä,
sɛ yɩ ‑nyuuä dlɩ yɔwʋʋ,
‑sɩbhä yɩ ‑nyumömöä dlɩ yɔwʋ.
7 'Saa Lagɔ 'a 'Wugɔmʋʋ 'nyɛɛ Zezwii a ‑nʋa a ‑zɩkpöö,
‑ɔ ‑kä 'yukwïla 'wlu ‑kä,
ɔ nɩ 'nwi.
‑Ɔ ‑kä 'mö 'tɛmanɩ ‑ɔ ‑kä 'wlu 'plɩɩ,
‑mä Lagɔ yɔwʋ a suu ‑wʋ nyɛɛ ‑bhölɩbhölɛɛ,
n yo wʋ 'bhë 'nyɛ.a
Zezwii a ‑nʋa a ‑zɩkpaa ‑a ‑wʋä ‑mä Simiinɩ 'mö Zaa cɛlɩɛ 'wʋ
8 Na ‑nʋa a ‑zɩkpaa ‑a ‑wʋä ‑mä Simiinɩ,
'a Lagɔzuzukwëa,
'cɛla 'wʋ nɩɩ,
‑ɔ glɩnɩɛ tɛkänɔɔ,
‑ɔ glɩnɩ'ɛɛ 'gbëbhlenɩnɔɔ,
‑ɔ 'ku a 'yɛ,
Lagɔ gälaa ɔ ‑sɛɛ gluu,
mɔɔ nyʋä dɛ'ɛ 'dɩ nɩɩ:
9 N ‑yi sɛɛ ‑n zi 'zwɩɩ.
N ‑yi'ɛ sɛɛ 'pʋa lɩbhamö,
‑maa na 'yila 'klʋ a dɔ'wʋ,
wʋlʋ ‑n wʋlʋä.
Sɛɛ nɩkpa ‑mumuë nyimaa ‑na'a nglɩɩ,
n ‑yi'ɛ ‑sɩbhä.
Nɩkpa 'la,
wa lɛ Zwiiföwaa wa glɩnɩ,
‑maa wa'a ‑bhö Zwiiföwaa.
Sataa a ‑nʋä a ‑zɩkpa wa glɩnɩɛ.
10 Sɛ ‑n 'kää 'klɩ 'yɩ a za,
tɩ gu.
‑Pʋnɩ 'yukwli,
Sataa yeanyɩa ‑mä 'pä,
ɔ yia a gla'mö a ‑nʋä ‑mumuë ‑jie 'mö 'pä.
Sa'a a 'käaa 'ylɩ kʋgbä 'mö 'klɩ 'yɩnɩ.
A ‑kɩɩ 'mö 'kuë yi ‑kë,
na gbʋ nɩ tanyɩa dlɩ 'wʋ bhɩɛ.
A ‑kä ‑sɩbhä 'yli yɔwʋ 'tɛmanɩɩ,
‑sikawugble a sɛ,
n yeanyɩ 'pɩwʋ mää 'naa 'kää 'yli bhɩɛ 'nyɛ.
11 ‑Ɔ ‑kä 'yukwïla 'wlu ‑kää,
'saa Lagɔ 'a 'Wugɔmʋʋ ‑wʋä Zezwii a ‑nʋa a ‑zɩkpöö a dɛ bhïla dɔ'wʋʋ,
ɔ nɩ ‑pʋni 'yukwli.
‑Ɔ ‑kä 'wlu 'plɩɩ,
'sɔnakwiea 'naa 'kɔa'a ‑gömö bhɛnɩ.
Zezwii a ‑nʋa a ‑zɩkpaa ‑a ‑wʋä ‑mä Pɛgamö 'mö Zaa cɛlɩɛ 'wʋ
12 Na ‑nʋa a ‑zɩkpaa ‑a ‑wʋä ‑mä Pɛgamö,
'a Lagɔzuzukwëa,
'cɛla 'wʋ nɩɩ,
‑ɔ ‑suä ‑gbälɛɛ ‑ɛnyɩ pɩɩ 'sɔ ‑kpɔ nɛ‑ɛ ‑bɛbɛbɛɛ,
mɔɔ nyɩamöä dɛ'ɛ 'dɩ nɩɩ:
13 N ‑yi dɛ ‑n glɩɩ.
Sataa a 'nglɩmöklikpëa,
dɛ a ‑wʋä,
‑lɛ ma‑a.
‑Maa ‑nmö ‑naa,
‑n ‑glaa 'wʋ tenyii 'yize.
'Na dlɩtɛɛnɩtɛnɛɛ,
‑n 'nɛɛ kɛ'mö ‑sɛ.
Atipaasɩ,
‑ɔ bhïlaa nɩkpabhë a 'yila 'klʋ nɩɩ,
na ‑nɔ ɔ glɩnɩɛ,
'tɛnyɩ 'mö wa 'lɩbhänɔɔ ‑mä 'a mä'aa,
mää Sataa glɩɛ,
‑lɛ a 'tɛnyɩ 'la 'mö a'bhë,
‑n ‑nɩɩɛ a cɛlɩ.
14 ‑Sɩbhä yɩ ‑wʋ 'mö,
‑maa n kä ‑na 'kïbhë ‑bhlʋ 'mlɩ.
Ma‑a nɩɩ,
a gla'mö a ‑mumuë,
Balaamö 'a 'cɩawɛlɩɩ 'mö wa ‑gänɩɛ.
Balaamö 'la,
mɔɔ sʋlʋnɩ a‑a Balaakö 'n ɔ yiɛ Yizlaɛlɩ 'a ngëyii 'mö a ‑nʋa ‑gbokwë ‑gba,
nzɩɩ ɔ 'kʋa dula wa 'kä nɩma wa bʋbɔnɩɛ 'fʋ a ‑lagwɩɩ li,
wa 'kä'ɛ ngwlɩ ‑nyɛ nyɩbhɛlɩ 'sɔ ‑sɛsɛnɩ.b
15 Sɛ ‑bhʋlʋ ‑kpɔ 'la,
‑sɩbhä a gla'mö a ‑mumuë ‑gänɩɛ Nikola a ‑zɩkpa 'mö a ‑nʋa a 'cɩawɛlɩɩ.
16 Zaa,
a nɩ ligba a 'kä 'a ‑lizokuu kɛ'mö ‑sɛ.
‑Maa 'n a 'nia kɛ'mö ‑sɛɛ,
n yia ‑pa ‑mä 'a mä'a yi,
nɩkpa 'la,
‑gbälɛɛ ‑ɛ 'bhöönɩɛ ‑mä na ngli 'mö,
n yuë tʋ kwä.
17 'Saa Lagɔ 'a 'Wugɔmʋʋ 'nyɛɛ Zezwii a ‑nʋa a ‑zɩkpöö,
‑ɔ ‑kä 'yukwïla 'wlu ‑kä,
ɔ nɩ 'nwi.
‑Wa ‑kä 'wlu 'plɩɩ,
n yuë lilea ‑a ziza‑a wa laa maanɩ 'nyɛ,
n yuë'ɛ bhʋlʋbhlʋ kpiyi 'pɩpɛ 'nyɛ,
kpiyi 'la 'klʋ a 'nglɩlili ‑yɩ cɛlɩɛ ‑lɛ,
nɩkpɛ ‑mɔmɔɔ 'nia'a ‑yi 'n ɛ 'nɩ ‑bhö ‑mɔ wa 'nyɛɛ mɔɔ.
Zezwii a ‑nʋa a ‑Zɩkpaa ‑a ‑wʋä ‑mä Tiatii 'mö Zaa cɛlɩɛ 'wʋ
18 Na ‑nʋa a ‑zɩkpaa ‑a ‑wʋä ‑mä Tiatii,
'a Lagɔzuzukwëa,
'cɛla 'wʋ nɩɩ,
Lagɔ 'a Yuu ‑ɔnyɩ yilaa ‑bhɩɛ ‑kosu ngömɔɔ,
‑ɔnyɩ kplɩɩ lɩɛ 'mö tenyii ɛ 'kä ‑bhɩɛ leyi wa yɛ ‑kosu 'mö ngu mɛɛ yɛ zɛlɩɩ,c
ɔ lɛ naa:
19 ‑Na'a nʋnʋlii,
n ‑yii.
‑Na'a ‑wawʋʋ n ‑yuu,
‑na'a Lagɔ a dlɩtɛɛnɩtɛnɛɛ,
n ‑yee,
‑na'a dlɩnyɔlanylʋʋ,
n ‑yuu.
N ‑yi'ɛ sɛ nɩɩ,
‑na'a ‑li a ‑lii ‑n nʋa'aa ‑sɩkaa,
yɩ ‑zu yɩ zi tɛkänɩɩ 'wʋ.
20 ‑Maa ‑na 'kïbhë ‑bhlʋ n kää 'mlɩɩ,
ma‑a nɩɩ:
Zezabɛlɩ,
nglɔ 'la ‑ɔ laa ɔnyɩ Lagɔ a 'möbhïlanɩnglɔɔ,
'mö ‑n ‑dɩɛ 'yli yɔwʋ,
'n ɔ dula 'na 'yliwʋwaa,
'n ɔ 'cʋʋä nɩɩ,
wa nɩ ‑sɛsɛnɩ 'ngwlɩ ‑nyɛ nyɩbhɛlɩ 'sɔ,
wa nɩ li'ɛ nɩma wa bʋbɔnɩɛ 'fʋ a ‑lagwɩɩ.d
21 N kɔ 'tɛnyɩ 'nyɛ,
ɔ 'kä ligba ɔ 'kä 'ɔ ‑lizoku 'la kɛ'mö ‑sɛ,
‑maa ɔ'ɔɔ 'yɩbhä ɔ 'kä 'ɔ gbɩsɛtɛlɩtɛlɛɛ kɛ'mö ‑sɛ.
22 ‑Sɩbhä a za,
n yi gbä ɔ yi guzubudu plɛ.
‑Wa ‑nyɔɔ pöä sɛɛ,
ɔ ‑nyʋä 'sɔ,
'n wa 'nɩ 'wa ‑lizoku 'la kɛ'mö ‑sɛɛ,
n yuë 'klɩ 'kädɛ 'yɩa.
23 N yi'ɛ gbä 'ɔ yuëa yi 'ku.
‑Lɛ a dɔ'wʋ na ‑nʋa a ‑zɩkpöö 'wuë,
yɩ yi sɛ yɩbhlɩmanɩ nɩɩ,
‑amöö ‑yiɛ nɩkpɛ a dlɩpänɔ ‑nyɛ ɔ 'mlɩ a wɛlɩ 'sɔ.
Zaa,
'saa a nʋä,
‑amöö 'kanyɩɛ bhʋlʋbhlʋ yɩ 'pɛna 'nyɛ.
24 ‑Maa abhʋa ‑muë'la,
abhʋaa ‑wʋä ‑mä Tiatii,
abhʋaa 'nɩɛ wɛlɩzoku 'la ‑gänɩmö,
'saa wa laa Sataa 'a wɛlɩɩ ‑yɩ ziza‑aa,
abhʋaa 'niɛ ‑yii,
abhʋaa n nyɛɛ dɛ'ɛ 'dɩ nɩɩ:
N'n‑ä a käbödɩ 'mlɩ kä.
25 ‑Maa 'saa wa 'cɩanyɩɛ,
a nɩ nyɔnʋ kɛ ‑këë n 'kä yi.
26‑27 ‑Wa ‑kä 'wlu 'plɩɩ,
'saa n yɩbhää,
‑wa ‑kʋʋ nʋ ‑këë 'n wa ‑kä ‑mä 'gbë 'wʋ ghlɛɛ,
'kämanɔɔ na dɩba Lagɔ nyɩaaa,
n yuënyɩ 'nyɛ.
N yi gbä wa yi 'bhlɩbhë ‑gömö 'kämanɩ.
Wa yuë yɔwʋkanɩsɛ ‑su.
28 N yuë'ɛ 'zɔkpɔzeliyi 'nyɛ.
29 'Saa Lagɔ 'a 'Wugɔmʋʋ 'nyɛɛ Zezwii a ‑nʋa a ‑zɩkpöö,
‑ɔ ‑kä 'yukwïla 'wlu ‑kä,
ɔ nɩ 'nwi.