'Ylimötulanɩlii
a 'bɔgʋʋ
1
'Bɔgʋ nɩ 'mö,
‑lii ‑yɩ ziza‑a a‑a,
Zezwii Kliisɩ kälɩɛ 'klʋʋ,
mɩɩ ‑wʋä ‑mä.
Lagɔ mɔɔ 'nyɔnyɩɛ nzɩɩ ɔ 'kɩ 'ɔ 'yliwʋwaa kɛ 'klʋ kälɩnɩ.
Nzɩɩ ‑lii ‑yɩ 'kää ‑pa 'yli 'wlʋnɩɩ,
wa 'kɩ ‑yi.
Lagɔzuzukwë ‑bhlʋ 'mö Zezwii tie ɔ 'yliwʋnyɔ Zaa 'wʋ 'n a yoo ‑li 'la 'ylimö tulanɩ.
2 ‑Li 'la 'wuë Zaa 'yɩɛ 'ylɩmöö,
yɩ dɛ ɔ bhïlaa.
Lagɔ a'bhë a ngli a wɛlɩɛ 'n Zezwii Kliisɩ yiɛ 'klʋ kälɩ zaa,
‑tiawɛlɩɛ.
3 ‑Ɔ ‑kä 'bɔgʋ nɩ 'mö zɛlɩɩ,
'ɔ ‑jɔlʋ!
Wɛlɩɩ ‑yɩ 'bhöönɩɛ Lagɔ ngli,
‑yɩ 'cɛlɩɛ 'bɔgʋ nɩ 'mö,
‑wa ‑kɩɩ 'yukwli ‑pʋnɩ,
‑wa ‑kɩɩ 'klʋkpamö 'zʋʋ,
'wa ‑jɔlʋ 'yɛ.
Ɛ'ɛ ‑bhö nyɩasɛ,
‑maa yɩ 'yliwlʋnɩdaa yɛ 'dio.
Zezwii a ‑nʋa a ‑zɩkpö ngbi'sɔ 'mö Zaa bhälɩɛ
4 ‑Amö Zaa,
Zezwii a ‑nʋa a ‑zɩkpöö ngbi'sɔ ‑kpɔ ‑yɩ ‑wʋä ‑mä Azii‑bhölɩɩ 'möö,
'mö n cɛlɩɛ dɛ'ɛ 'wʋ:
Lagɔ ‑ɔ ‑bhölɩ,
‑ɔ ‑bhölɩ a,
'n ‑ɔ 'kä yi,
ɔ nɩ 'panyɩ 'nyu,
ɔ nɩ 'nyanyɩ 'tɩɩglɩglɛ.
'Ɔ 'wugɔmɩɩ ngbi'sɔ ‑kpɔ ‑yɩ 'nɩgböä ‑lɛ 'ɔ 'nglɩmöklikpëa a 'yila 'klʋʋ,
yɩ nɩ 'panyɩ'ɛ 'nyu,
yɩ nɩ 'nyanyɩ'ɛ 'tɩɩglɩglɛ.
5 Zezwii Kliisɩ,
sɛɛ Lagɔ 'a wɛlɩɩ ‑wʋä,
‑ɔ bhïliɛ ‑sɩbhä 'tɩɩ,
ɔ nɩ 'panyɩ'ɛ 'nyu,
ɔ nɩ 'nyanyɩ'ɛ 'tɩɩglɩglɛ.
Mɔɔ glɩnɩɛ 'kuduwaa gla'mö a tɛkänɔɔ Lagɔ gälaa ɔ ‑sɛɛ gluu.
Mɔɔ glɩnɩɛ mä'ä dʋdʋ 'wʋ a 'bhlɩlowliwa 'kädɩɩ jijo'wʋ a 'bhlɩlowli 'kɔdɔɔ.
Mɔɔ ‑wanyɩɛ,
‑aa za 'ɔ dluu kwliɛ.
Sa'a ɔ ‑sanyɩɛ ‑a'a 'nyinylolii a gbʋʋ ‑gömö,
6 'n ɔ ‑yinyɩɛ ngëyi a ‑mɛ ɔ 'kämanɩɛ ‑gömö 'wʋ 'zʋa,
'n ɔ ‑yinyɩ'ɛɛ ɔ bʋbɔbʋbɔwa 'wʋ 'zʋa ‑a 'kä ɔ dɩba Lagɔ 'yli ‑wʋ.
'Ɔ 'nglɩɩ,
mɩɩ möä,
mɔɔ 'tɛɛ 'mö 'kwädlɩkwädlɩnɩ.
‑Amɛɛa!
7 A ‑pʋnɩ 'yukwli,
Zezwii,
ɔ yi yi.
Zlɩɩ,
mɛɛ 'kää nuë do ɔ 'kä ‑mä 'bhöö ɔ 'kä yi.
Nɩkpaa 'wuë yo 'ylɩmö.
‑Wa 'fïto a‑a,
wa yo 'ylɩmömö.
Mä'ä dʋdʋ 'wʋ a ngäyaa 'wuë,
ɔ za,
yɩ yi 'wi.b
Nn,
‑amɛɛ!
8 ‑Alowli Lagɔ lɛ naa:
‑Amöä Tɛkänɔ,
‑amöä 'Gbëbhlenɩnɔ,
‑ɔ ‑bhölɩ,
‑ɔ ‑bhölɩ a,
'n ‑ɔ 'kä yi.
Zezwii yɛ ɔnyɩ Zaa 'ylɩmö tulanɩ
9 ‑Amö a ‑daayu Zaa,
sɛ a ziɛ da'a 'zwɩ,
‑sɩbhä n zimöä 'zwɩ.
'Pɩwʋ mää Lagɔ 'kämanɩɛ,
‑mä ‑a ‑wʋnɩɛ 'gämö.
Zezwii mö ‑a ‑glɛnɩɛ 'gämö 'wʋ zaa,
swɩ 'naa ‑kanyɩ 'kwädlɩ yɔwʋ 'kunɩ.
Sɛ n bhïlaa Lagɔ 'a wɛlɩɩ 'n n yiɛ nɩkpabhë a 'yila 'klʋ Zezwii a dɛ bhïla a za,
gïnyɛlekpë 'käda ‑bhlʋ wa laa Patɩmɔsɩ 'klʋ,
‑mä wa 'zʋnɩɩɛ ‑jie 'mö.
10 N ‑wʋ ‑mä,
‑Alowli a zlɩ 'möc 'n Lagɔ 'a 'Wugɔmʋʋ ‑yiiɛ ‑gömö yi.
‑Mä na nimï,
'n n yiɛ ‑mä 'mötɛɛnɩwɛlɩ 'nʋ,
yɩ 'kä ‑bhɩɛ lɛglɛɛ gbä.
11 Wɛlɩ 'la,
sɛɛ yɩ nʋä nɩɩ:
«'Saa ‑n yɩlɩɛ dɛ'ɛ 'wʋʋ,
'celi 'bɔgʋ 'mö.
'Bɔgʋ 'la,
'pʋ Zezwii a ‑nʋa a ‑zɩkpö ngbi'sɔ ‑kpɔ nɩ 'wʋ.
‑Mä Efɛɛzɩ a ‑zɩkpaa ma,
Simiinɩ a ‑naa ma,
Pɛgamö a ‑naa ma,
Tiatii a ‑naa ma,
Saadɩ a ‑naa ma,
Filadɛfii a ‑naa ma,
'n ‑mä Laodisee a ‑naa,
'pʋänyɩ 'wʋ.»
12 Wɛlɩɩ nʋä sa'aa,
'n n yiɛ 'mö 'bhɛlɔ,
n 'kä ‑ɔ bhïlaa 'ylɩmö.
N 'bhɛlɔɔ 'möö,
'n n yiɛ ‑sikawapö 'kädɩ ngbi'sɔ 'ylɩmö.
13 ‑Mä ‑sikawapö 'kädɩ 'la jijo'wʋ,
‑ɔ 'nɩgböä ‑mä,
ɔ ‑bhɩɛ nɩkpɛ.
'Ɔ ‑bäna ɔ ‑plaa 'möö,
a ‑vʋkwa,
'n ɔ ‑bhlɩnɩɛ ‑sikabɛtʋ 'köklɩ 'klʋ.
14 Ɔ 'wlu a nyukwëa ‑wʋ buu,
ɛ 'kä ‑bhɩɛ ‑yɩsɩ,
ɛ 'kä ‑bhɩɛ'ɛ wlipɩpɛ a debïli.
'Ɔ yilaa ‑bhɩɛ ‑kosu ngömɔ.
15 'Ɔ kplɩɩ,
yɩ 'kä ‑bhɩɛ leyi wa yɛ ‑kosu 'mö ngu mɛɛ yɛ zɛlɩ,
mɛɛ lɩ'ɛ 'mö tenyii.
'Ɔ wɛlɩɩ,
yɩ 'kä ‑bhɩɛ 'nyu 'kɔdʋʋ a ‑gbɔkwälɩ a ‑jijii.
16 ‑Mä 'ɔ luukɛkätɩkpa 'mö,
ɔ ‑su ‑mä ‑zɛlɩya ngbi'sɔ.
Ɔ ngli,
‑gbälɛ ‑ɛ 'bhöönɩɛ ‑mä,
ɛ pɩɩ 'sɔ ‑kpɔ nɛ‑ɛ ‑bɛbɛbɛ,
'n 'ɔ klʋʋ lɩɛ 'mötɛɛnɩylʋväla a sɛ 'mö.
17 N 'yoo 'ylɩmöö,
'n n yiɛ ‑lɛ ɔ dlɩ 'mö zɛmö bhli,
ɛ 'kä ‑bhɩɛ 'ku n yɛ 'ku.
'N ɔ ‑yiiɛ 'ɔ luukɛkätɩkpa ‑gömö zʋ.
Ɔ lɛ naa:
«Tɩ ‑gu,
‑maa ‑amöö glɩnɩɛ tɛkänɔɔ,
‑amöö glɩnɩɛ 'gbëbhlenɩnɔɔ.
18 N ‑bhölɩ.
N 'ku a la,
‑maa ‑sɩkaa a dɔ'wʋ,
n ‑bhölɩ 'kwädlɩkwädlɩnɩ.
‑Amöö 'kämanɩɛ 'kwie ‑gömö.
‑Amöö 'kämanɩɛ ‑mä 'kudu 'wʋ ‑gömö.
19 'Saa ‑n yɩlɩɛ 'wʋ,
yɩ 'wuë 'celi,
miɛ nɩɩ,
‑mii ‑wʋä ‑sɩkaa 'wʋ 'plɩ dɔ'wʋ mi,
'n ‑mii 'kää bhäla 'wʋ 'plɩɩ.
20 ‑Zɛlɩya nɩ ngbi'sɔ ‑kpɔ,
n ‑suä dɛ'ɛ ‑mä 'na luukɛkätɩkpa 'möö,
yɩ ‑nyɛ ‑sikayɔlɔkpï ngbi'sɔ ‑kpɔ 'la ‑n yɩlɩɛ dɛ'ɛ 'wʋ 'sɔ,
sɛ yɩ sɛɛ zɛmö ‑sɩbhä n lɛ ‑kamöä sʋlʋnɩ.
‑Zɛlɩya nɩ ngbi'sɔ ‑kpɔ,
na ‑nʋa a ‑zɩkpöö ngbi'sɔ ‑kpɔ a Lagɔzuzukuu miɛ.
‑Sikayɔlɔkpï ngbi'sɔ ‑kpɔ mɩɩ glɩnɩɛ na ‑nʋa a ‑zɩkpöö ngbi'sɔ ‑kpɔ.