1 Zaa 4

‑Wa nʋä Lagɔ a 'möbhïlanɩwaa wa glɩnɩɩ

Na dlɩsɛkäwanyɩ,

nɩkpaa 'wuë ‑wa nʋä Lagɔ 'a 'Wugɔmʋʋ mɔɔ ‑wuëë ‑gömöö,

a nɩ tuë ‑sɩbhä dlɩ 'wʋ kä cuu.

‑Maa,

a nɩ yɩlɩ 'wa bhïlawɛlɩɩ 'mö 'n 'Wugɔmʋʋ ɔ bhïlanuë 'mö ‑kä Lagɔ a ‑nɔ glɩnɩɩ,

a 'kä sɛ ‑yi.

‑Maa yiowa a ‑bɛ,

‑wa nʋä Lagɔ a 'möbhïlanɩwaa wa glɩnɩɩ,

wa yɛ mä'ä 'pɩwʋ mlɩmanɩ.

2 'Saa a 'kää Lagɔ 'a 'Wugɔmʋʋ a wɛlɩɩ 'mö yɩbhlɩnɩɩ,

muä nɩɩ:

‑Ɔ ‑kä nɩɩ Zezwii Kliisɩ,

‑aa sɛ a nɩkpɛ ɔ 'zʋä ‑tiamö nʋʋ,

'mö Lagɔ 'a 'Wugɔmʋʋ ‑wʋä ‑gömö.

3 ‑Maa nɩkpɛ a ‑mɔɔ kpɛnɩɛ ‑lɛ a wɛlɩ 'la 'möö,

Lagɔ 'a 'Wugɔmʋʋ mɔɔ 'nɔɔ ‑gömö ‑wʋ,

‑maa ‑ɔ ‑gblɩ Kliisɩ 'a 'wugɔmʋʋ,

mɔɔ ‑wɔɔɔ ‑gömö.

‑Ɔ ‑gblɩ Kliisɩ,

wa nʋ a‑a ‑ɔ 'kä yii,

mɔɔ yɛɛ da'a yi 'wëë.

4 Na 'yuënyɩ,

abhʋa abhlɩ Lagɔ a ‑nʋä a glɩnɩɛ,

‑sɩbhä a za nɩkpa 'la Lagɔ 'nɩɛ 'mö bhïlanɩɩ,

a kʋä 'wlu 'plɩ.

Ɛ'ɛ ‑bhö nyɩasɛ,

‑maa 'Wugɔmʋʋ ‑ɔ ‑wʋanyɩɛ ‑gömö,

mɔɔ 'tɛɛ 'mö mɔɔ ziɛ ‑ɔ ‑wʋä mä'ä 'pɩwʋ a ‑nʋa ‑gömö 'wʋ.

5 Nɩkpa 'la,

mä'ä 'pɩwʋ a ‑nʋä wa glɩnɩɛ,

mɩɔ ‑bhʋlʋ wa kää ngli.

Nza wa ngluä 'wa wɛlɩɩ 'wʋ.

6 ‑Maa ‑abhʋa ‑abhlɩ,

Lagɔ a ‑nʋä ‑a glɩnɩɛ.

Zaa,

‑a ‑kä 'mö ‑sɛnɩɩ,

‑wa ‑yiɛ Lagɔ,

wa 'yize mʋa ngluä ‑a'a wɛlɩɩ 'wʋ.

‑Maa ‑waaa Lagɔ a ‑nʋä glɩnɩ,

wa'a ngwli 'wʋ.

Zaa,

nɩkpa a ‑muë Lagɔ 'a 'Wugɔmʋʋ bhïlanɩɛ ‑tiawɛlɩɩ 'möö,

wa ‑nyɛ ‑muë zuzukwëzokwëa bhïlanɩɛ yiowɛlɩ 'mö 'sɔ,

sa'a ‑sɩbhä wa 'kʋää yɩbhlɩnɩ.

Lagɔ ‑wawʋ ɔ glɩnɩɛ

7 Na dlɩsɛkäwanyɩ,

a‑a nɩ ‑wawanɩ.

Ɛ'ɛ ‑bhö nyɩasɛ,

‑maa ‑wawʋʋ,

‑mä Lagɔ 'mö ‑mä wʋ 'bhöönɩɛ.

Nza n gbää nɩɩ,

‑ɔ kää ‑wawʋ dlɩ zɛmöö,

Lagɔ a 'yu ɔ glɩnɩɛ.

Mɔɔ ‑yiɛ ‑tiamö Lagɔ.

8 ‑Maa ‑ɔɔɔ ‑wawʋ dlɩ zɛmö ‑kää,

ɔ'ɔɔ Lagɔ ‑yi.

Ɛ'ɛ ‑bhö nyɩasɛ,

‑maa Lagɔ,

‑wawʋ ɔ glɩnɩɛ.

9 Sɛɛ Lagɔ tulanɩnyɩɛ 'ɔ ‑wawʋʋ 'ylimöö,

‑sɩbhä ma‑a nɩɩ:

'Ɔ Yuu ‑bhʋlʋ ‑kpɔ 'mö ɔ tiee mä'ä 'pɩwʋ,

‑a 'kä ɔ za ‑tiamö a ‑bhölɩbhölɛ ghlɩ.

10 'Ɔ ‑wawʋ 'la,

muä nɩɩ,

‑abhʋaa 'nɔɔ ‑wa,

‑maa mɔɔ ‑wanyɩɛ.

'Ɔ Yuu 'mö ɔ tiee ɔ 'kɔ ɔnyɩ bʋbɔnɩ,

nzɩɩ,

‑a'a 'nyinylolii a gbʋʋ ‑kanyɩ ‑gömö 'bhöö.

11 Zaa,

na dlɩsɛkäwanyɩ,

sɛɛ Lagɔ ‑wanyɩɛ sa'a tenyii a za,

‑abhʋa'ɛ ‑abhlɩ,

‑a kä ‑a 'kä ‑wawanɩ.

12 Lagɔ,

‑bɛ 'nɔɔ ‑bhlɛ 'ylimö 'ylɩmönɩ.

‑Maa ‑a ‑kä ‑wawanɩɩ,

ɔ ‑wʋnyɩ 'kwädlɩ ‑gömö,

nzɩɩ 'ɔ ‑wawʋʋ ‑kanyɩ dila zɛmö ‑jɩbhɛnɩ.

13 Sɛ'ɛ n gbää nɩɩ,

sɛɛ Lagɔ zʋʋnyɩɛ 'ɔ 'Wugɔmʋʋ ‑gömö a za,

nza ‑a ‑yiɛ sɛ nɩɩ,

‑a ‑nyɔɔ 'sɔ wʋ ‑a ‑wʋnɩɛ 'kwädlɩ,

ɔ'bhë mɔɔ ‑wʋnyɩɛ ‑gömö.

14 Zaa,

‑a'bhï,

'saa ‑a 'yɩɛ 'ylɩmöö,

yɩ dɩɩ,

mö ‑a nyɛɛ nɩkpa 'wuë nɩɩ:

‑Aa dɩba Lagɔ,

'ɔ Yuu 'kä mä'ä 'pɩwʋ a nɩkpa a Puënyɔ 'zʋ a za,

nza ɔ tioo.

15 Zaa,

‑ɔ ‑kɩɩ dlɩ 'wʋ ‑kä nɩɩ Zezwii,

Lagɔ 'a Yuu 'mö ɔ glɩnɩɛ,

mɔɔ ‑nyɛ Lagɔ ‑wʋnɩɛ 'kwädlɩ 'wʋ,

'mö Lagɔ ‑wʋä ‑gömö.

16 ‑Abhʋa ‑abhlɩ,

sɛɛ Lagɔ ‑wanyɩɛ,

‑a ‑yi ‑sɩbhä.

'Ɔ ‑wawʋ 'la mö ‑a 'tɛɛnɩɛ dlɩ.

Sɛ'ɛ n gbää nɩɩ,

Lagɔ,

‑wawʋ ɔ glɩnɩɛ.

Zaa,

‑ɔ kää 'kwädlɩ Lagɔ 'a ‑wawʋʋ dlɩ zɛmöö,

mɔɔ ‑nyɛ Lagɔ ‑wʋnɩɛ 'kwädlɩ 'wʋ,

'mö Lagɔ ‑wʋä ‑gömö.

17 'N Lagɔ 'a ‑wawʋʋ ‑kanyɩ dila zɛmö ‑jɩbhɛnɩɩ,

sɛɛ Zezwii ‑wʋ a‑a mä'ä dʋdʋ 'wʋʋ,

‑a yi ‑sɩbhä ‑wʋmö.

‑Lɛ a dɔ'wʋ,

Lagɔ 'a ‑zijle 'kädaa a zlɩɩ ‑kä ghlɛɛ,

‑a'a dilaa yi 'tɩɩ glɩ.

18 ‑Wawʋ ‑nyɛ nganɔ 'nɩɛ yɔwʋ mönɩ,

miɛ nɩɩ,

nɩkpɛ,

sɛɛ Lagɔ ‑wɔɔɔ tenyii,

'n ɔ ‑kä ‑sɩbhä ‑yii,

‑sɩbhä nganɔ a sɔɔ ku 'mö.

‑Ɔ ngänɩɛ,

gu ɔ guä,

wa toa ‑lu nʋ.

Miɛ nɩɩ,

ɔ'ɔɔ ‑bhlɛ sasɛ ‑wawʋ a zɛmö yɩbhlɩnɩ.

19 ‑Maa ‑abhʋa ‑abhlɩ,

sɛɛ Lagɔ ‑wanyɩɛ tɛɛ a za,

nza ‑wawʋ ‑wʋnyɩɛ dila zɛmö.

20 ‑Maa ‑n ‑kä nɩɩ Lagɔ mö ‑n ‑waa nʋʋ,

n‑n ‑kä'ɛ ‑na 'lilɛ ‑gblɩɩ,

widɩsɛnyɔ ‑n glɩnɩɛ.

Nyɩasɛ n'n‑ä ‑sɩbhä gbä,

‑maa ‑na 'lilɛ ‑n yɩlɩɛ 'wʋ,

n‑n 'nɔ ‑waa,

Lagɔ ‑nn‑ä ‑bhlɛ 'ylɩmöö,

sɛ ‑n 'kɔ bhä 'mö ‑wawanɩ 'nɩ?

21 Sɛɛ Kliisɩ nyɩanyɩɛ 'dɩɩ,

‑sɩbhä ma‑a nɩɩ:

‑Ɔ ‑kä Lagɔ ‑waa,

ɔ kä ɔ 'kä ɔ 'lilɛ ‑wamö.