Lagɔ a yuë ‑a glɩnɩɛ ‑tiamö
3
Na yuënyɩ,
sɛɛ Lagɔ ‑wanyɩɛ,
‑sɩbhä 'nɩɛ ‑sɩbhä a sɛ ‑wʋ.
Nza ɔ laanyɩɛ ɔnyɩ a 'yuë.
‑Tiamö,
ɔ yuë ‑a glɩnɩɛ.
‑Maa mä'ä 'pɩwʋ a nɩkpaa,
sɛɛ wa'aa Lagɔ ‑yi a za,
wa 'niɛ ‑sɩbhä ‑yi.
2 Na dlɩsɛkäwanyɩ,
‑sɩkaa a dɔ'wʋ Lagɔ a yuë ‑a glɩnɩɛ,
‑maa 'saa Lagɔ ‑kanyɩɛ zɩla'a 'wʋ 'zʋaa,
wʋ'ʋä ‑bhlɛ sasɛ 'yli 'wlʋnɩ.
‑Sɩbhä yɩ ‑wʋ 'mö,
‑maa ‑a ‑yi sɛ nɩɩ,
‑zlɩ Zezwii 'a 'ghïlinɔɔ ‑kä 'yli 'wlʋnɩɩ,
sɛ ɔ ‑wʋä,
‑sɩbhä ‑a 'kää ‑wʋmö.
‑Lɛ a 'tɛnyɩ 'la 'mö,
sɛ ɔ ‑wʋä 'tɩɩ,
‑sɩbhä ‑a 'kɔɔ gbëaa 'ylɩmö.
3 Wɛlɩ 'la,
‑ɔ ‑kɩɩ dlɩ 'wʋ ‑kä nɩɩ yɩ yi 'yli 'wlʋnɩɩ,
ɔ yi 'ɔ ‑lizokuu 'kwädlɩ kɛ'mö ‑sɛ 'yize,
sɛɛ Zezwii Kliisɩ nɛnɩɛ Lagɔ dlɩ yɔwʋ,
ɔ 'kä ‑sɩbhä Lagɔ dlɩ yɔwʋ nɛnɩ.
4 ‑Ɔ nʋä 'nyinylolii,
Lagɔ 'mö ɔ sɛɛ 'klʋkpamö.
Ɛ'ɛ ‑bhö nyɩasɛ,
‑maa 'nyinylolinʋnwɛ,
Lagɔ a 'klʋkpamösɛsʋä.
5 A'bhï a ‑yi sɛɛ nɩɩ,
Zezwii ɔbhlɩ,
ɔ'ɔɔ 'nyinyloli 'mö ‑kä 'lɩlɩlɩ,
‑maa ɔ 'kä nɩkpa 'wa 'nyinylolii a gbʋ ‑gömö ‑sɛ wa 'kɩ kɛ'mö ‑sɛ a za,
nza ɔ yiɛ mä'ä dʋdʋ 'wʋ.
6 ‑Sɩbhä a za,
nɩkpɛ a ‑mɔɔ ‑glɛɛ 'kwädlɩ Zezwii 'wʋʋ,
'ɔ 'nyinylolii 'mö ɔ sɛɛ kɛ'mö.
‑Maa ‑ɔ 'nɩ 'yɩbhä ɔ 'kɩ kɛ'mö ‑sɛɛ,
ɔ'ɔɔ ‑bhlɛ Zezwii ghlɩ,
ɔ 'nɔɔ ‑yi.
7 Na 'yuënyɩ,
‑bɛ nɩ tanyɩa 'wlumö nyima.
‑Maa nɩkpɛ a ‑mɔɔ nʋä 'saa nɛnɩɛ Lagɔ dlɩ yɔwʋʋ,
sɛɛ Zezwii nɛnɩɛ Lagɔ dlɩ yɔwʋʋ,
‑sɩbhä ɔ nɛnɩɛ Lagɔ dlɩ yɔwʋ.
8 ‑Maa 'pɩwʋ a tɛɛnɩdɛ ‑këë zɩ'ɛ,
Sataa,
'nyinyloli a 'yize ɔ nʋä.
Zaa,
nɩkpɛ a ‑mɔɔ 'nɩ 'ɔ 'nyinylolii kɛ'mö ‑sɛɛ,
Sataa a ‑nɔ ɔ glɩnɩɛ.
‑Maa Lagɔ 'a Yuu,
ɔ 'kä Sataa 'a nʋnʋlii 'yli bhɩa a za,
nza ɔ yiɛ mä'ä dʋdʋ 'wʋ.
9 Zaa,
nɩkpɛ a ‑mɔɔ 'zʋä Lagɔ a 'yuu,
sɛɛ Lagɔ 'pïlanɔɔ 'ɔ ‑wʋwʋsaa a za,
ɔ ‑nyɛ 'nyinylolii yɛ 'ylimö ‑sɛnɩ.
Sɛɛ Lagɔ yɛɛ ɔ dɩba 'zʋ a za,
ɔ'ɔa'a 'nyinylolinʋlibho ‑kä.
10 ‑Maa nɩkpɛ a ‑mɔɔ nʋä 'saa 'nɩɛ Lagɔ dlɩ yɔwʋ nɛnɩ,
‑ɔɔɔ ɔ 'li ‑waa,
ɔ'ɔ ‑bhö Lagɔ a ‑nɔ.
Sa'a ‑sɩbhä wa 'kää Lagɔ 'a yuëa yɩbhlɩnɩ,
'n wa 'kä'ɛɛ Sataa a ‑nʋa yɩbhlɩnɩ.
‑A kä ‑a 'kä ‑wawanɩ
11 Sɛ'ɛ n gbää nɩɩ,
Lagɔ 'a wɛlɩɩ a 'nʋ a‑a tɛkädɔ'wʋ ‑këë zɩ'ɛɛ,
sɛ'ɛ yɩ nʋä nɩɩ,
‑a kä ‑a 'kä ‑wawanɩ.
12 Nɩkpɛɛ wa laa Kayɛɛ,
sɛ ɔ ‑wʋ a‑a,
a‑a nɩ tɩ ‑sɩbhä ‑wʋ.
‑Maa nɩkpɛ 'la,
Sataa a ‑nɔ ɔ glɩnɩ a‑a,
'n ɔ yi a‑a ɔ ‑daayu 'lɩbhä 'n ɔ yi a‑a 'ku.
Nyɩasɛ ɔ'ɔɔ a sa'a zʋ,
‑maa 'ɔ nʋnʋlii,
'zoku a 'yize yɩ glɩnɩ a‑a 'n ɔ ‑daayu a ‑nɩɩ nɛnɩ a‑a Lagɔ dlɩ yɔwʋ.
13 ‑Sɩbhä a za,
‑atʋayuënyɩ,
mä'ä 'pɩwʋ a 'yize a ‑nʋa,
wa ‑kaanyɩ ‑gblɩɩ,
yɩ nɩ tanyɩ ngli yɩa.
14 ‑Maa ‑abhʋa ‑abhlɩ,
‑a ‑yi sɛ nɩɩ,
‑a yɛ 'kwie a 'mötɛɛnɔ ngli 'pʋ,
‑a yɛ Lagɔ 'a 'pɩwʋlelea 'wʋ a ‑nʋä 'zʋ.
'Saa tulanɩɛ 'ylimö nɩɩ ‑a yɛ ‑tiamö ‑mä a ‑nʋä 'zʋʋ,
muä nɩɩ:
‑A kä ‑a 'liewa a ‑wawʋʋ dlɩ zɛmö.
‑Maa nɩkpɛ a ‑mɔɔ 'nɩ ɔ 'li a ‑wawʋ dlɩ zɛmö ‑kä,
'kwie a 'mötɛɛnɔ ngli,
‑mä ɔ ‑wʋä 'yize.
15 ‑Ɔ ‑gblɩɛ ɔ 'lilɛ,
'kulɩbhänyɔ ɔ glɩnɩɛ.
'N a ‑yi sɛ nɩɩ,
'kulɩbhänyɔ,
'pɩwʋ mää 'naa 'kää 'yli bhɩɛɛ,
ɔ 'bhle 'nɩɛ ‑mä ‑wʋ.
16 Wa ‑kä ‑wawʋ nʋʋ,
sɛ yɩ sɛɛ ‑tiamö zɛmöö,
Zezwii mɔɔ tulanɩnyɩɛ ‑sɩbhä 'ylimö.
Miɛ nɩɩ,
‑aa za,
'ɔ pɩwʋʋ 'mö ɔ 'wlʋä 'mö.
Sɛ ‑bhʋlʋ ‑kpɔ 'la,
‑sɩbhä ‑a kää ‑a 'kä ‑a 'liewa a za ‑a'a pɩwʋʋ 'mö 'wlʋ.
17 ‑Sɩbhä a za,
‑n ‑kä lɩ ‑kä 'n ‑na 'lilɛ ‑bhlʋ 'nɩ ‑lu kä'mö ‑kä,
n‑n 'nɩ ɔ ngäzɩdlɩ 'pä ‑n 'kɔ ‑lu 'nyɛɛ,
n‑n ‑kä nɩɩ Lagɔ a ‑wawʋʋ ‑n kä dlɩ zɛmö nʋʋ,
‑tiamö bhä ‑a?
18 Na 'yuënyɩ,
a‑a nɩ tɩ nyɩasɛ nɩkpa gla 'klʋ ‑wanɩ,
‑maa ‑a'a nʋnʋlii nɩ tulanɩ 'ylimö nɩɩ,
‑a ‑wʋä ‑tiamö.
‑Ɔ ‑waa ɔ 'lii mɔɔ glɩnɩɛ ‑tiamö Lagɔ a ‑nɔ
19 ‑A ‑kä nɩkpaa ‑waa,
mɩɩ tulanɩɛ 'ylimö nɩɩ,
gbëaa a ‑nʋä ‑a glɩnɩɛ.
Zaa,
Lagɔ a 'yila 'klʋ,
‑a'a dila zɛmö yi ‑pälɛpälɛ ‑wʋ.
20 'N ‑a'a dilaa ‑kanyɩ gbʋ köbhaa,
‑a ‑yi sɛ nɩɩ,
Lagɔ mɔɔ 'ghïliɛ mɔɔ ziɛ ‑a'a dilaa 'wʋ,
zaa,
ɔ yi ‑lii 'wuë.
21 Na dlɩsɛkäwanyɩ,
sɛ'ɛ n gbää nɩɩ,
'n ‑a'a dilaa ‑nɩnyɩa'a gbʋ köbhaa,
nganɔ ‑nɩnyɩɛ dlɩ zɛmö ‑wʋ a‑a yiɛ ‑lɛ ɔ 'yila 'klʋ,
a‑a bhibheoo.
22 ‑A ‑kɔɔ bhibhee,
'saa ‑a ‑kɔɔ 'yɩbhänɩ ‑kë,
ɔ ‑yinyu 'nyɛ.
Ɛ'ɛ ‑bhö nyɩasɛ,
‑maa 'ɔ wɛlɩɩ mö ‑a zʋä 'klʋkpamö,
'saa nɛnɔɔ dlɩ yɔwʋ mö ‑a nʋä.
23 'Ɔ wɛlɩɩ,
sɛ'ɛ yɩ nʋä nɩɩ,
‑a nɩ 'tɛɛnɩ 'ɔ Yuu Zezwii Kliisɩ dlɩ,
sɛɛ Zezwii nyɩanyɩɛ 'dɩɩ,
‑a nɩ ‑wawanɩ ‑sɩbhä.
24 ‑Ɔ ‑kɩɩ ‑sɩbhä 'klʋkpamö zʋʋ,
mɔɔ ‑glɛɛ sasɛ Lagɔ 'wʋ,
'mö Lagɔ ‑wʋä ‑gömö.
Sɛɛ Lagɔ zʋʋnyɩɛ 'ɔ 'Wugɔmʋʋ ‑gömö a za,
nza ‑a ‑yiɛ sɛ nɩɩ,
ɔ'bhë,
mɔɔ ‑wʋnyɩɛ ‑gömö.