Tiitɩ 3

Zezwii a ‑nʋa nɩ tɩ wɛlɩ nɩ 'wʋ dlʋ

Zezwii a ‑nʋa,

ligbuuë nɩɩ,

wa nɩ 'zʋ ‑wa 'kämanɩɛ bhlɩɩ ‑gömö 'klʋkpamö.

Sɛ wa ‑kʋä 'dɩ 'nyɛɛ,

wa nɩ 'zʋ ‑sɩbhä.

‑Lii 'wuë 'mö a dɔ'wʋ,

'saa kää nɩkpa a ‑li a ‑li 'möö,

yɩ gbʋʋ mʋʋ nɩ plɛnuë.

2 Wa nɩ tɩ nɩkpɛ a 'nglɩ nyima.

Wa ‑nyɛ nɩkpɛ nɩ tɩ 'lʋ,

‑maa wa nɩ tɛlɩ ‑wanɩwanɛ sɛ.

'Wa dilaa nɩ ‑wʋ 'kwädlɩ ‑pälɛpälɛ nɩkpa 'wuë ‑gömö.

3 Bhla'mö a dɔ'wʋ,

‑a'bhï,

‑ɔɔ'nɛɛnɩwa a sɛ ‑a nɛmö a‑a,

'klʋkpamösɛwa ‑a glɩnɩ a‑a,

Lagɔ a dɔ'wʋ,

‑dlʋ ‑a ‑dlʋ a‑a.

‑Li a kii 'wuë a 'tʋzokwëa ma‑a suunyɩ a‑a dlɩ zɛmö,

ma‑a ‑sunɩnyɩ a‑a 'wlumö.

'Kpʋkpʋwa ‑a glɩnɩ a‑a,

'yli ‑a kälɩkälɩnɩ a‑a,

‑aaa a ‑wawasɛ ‑wʋ,

‑gblɩgblɩnɩ ‑a ‑gblɩgblɩnɩ a‑a.

4 ‑Maa ‑aa Puënyɔ Lagɔ,

sɛ ɔ nɛnɩɛ dlɩ zɛmö,

sɛ ɔ ‑waa tenyii nɩkpa 'wuë,

‑sɩbhä bhliɛ gbëdanguu,

5 'n ɔ ‑yinyɩɛ puë.

‑A'bhï,

ɛ'ɛ ‑bhö sɛɛ ‑a'a nʋnʋlii zlɔnɩ 'mö a za,

‑maa 'ɔ ngäzɩdlɩɩ a 'yize a za‑a.

Mɔɔ wɔlʋnyɩɛ a‑a yiɛ 'wlɩlɩ plɛ.

'Wugɔmʋʋ 'Wlɩlɩ 'mö ɔ zʋʋnyɩɛ ‑gömö,

'ɔ 'mötɛnɔɔ 'mö,

a‑a yiɛ 'sɔ gwëlionɩ,

a‑a yiɛ zɩkpalele ghlɩ.

6 ‑Aa PuënyɔZezwii Kliisɩ a bɔɔmö a za,

Lagɔ,

'ɔ 'Wugɔmʋʋ 'mö ɔ zʋʋnyɩɛ ‑gömö tenyii.

7 Sa'a ‑sɩbhä Lagɔ 'pää ‑aa ngäzɩdlɩ

'n ɔ ‑yinyɩɛ ɔnyɩ dlɩ yɔwʋ nɛmanɩ,

nzɩɩ 'pɩwʋ mää 'naa 'kää 'yli bhɩɛ,

mä ‑a ‑kʋnɩɛ,

‑a 'kä ‑tiamö ‑mä ghlɩ.

8 Wɛlɩ nɩ,

‑tiawɛlɩɛ,

nɩkpa 'wuë kä wa 'kɩ dlɩ 'wʋ ‑kä.

Zaa,

n 'yɩbhä nɩɩ,

bhïlii gbëaa,

Lagɔgänɩwaa 'wuë yɩ 'kʋä tenyii swɩ nyɛmʋ 'mö 'pä,

'saa nɛnɩɛ Lagɔ dlɩ yɔwʋ a gbʋ a 'yize 'kʋäa plɛnɩ.

‑Sɩbhä ma‑a nɛnɩɛ,

‑sɩbhä ma‑a kää nɩkpaa 'wuë a ‑li a ‑li 'mö.

9 'Fʋ a kpɛnɩkpɛnɛɛ,

sɛɛ ‑aa dɩbawa a dɩbawa gwälɩgwälɩnɩɛ a wɛlɩɩ,

'lʋlwɛɛ,

Moyizɩ 'a Gböö a 'mö kpɛnɩkpɛnɛɛ,

‑li 'la 'wuë,

'dionii gwë.

Yɩ'ɩɛ dɛsɛ ‑kä,

yɩ'ɩɛ nɩkpɛ a ‑li a ‑li 'mö ‑kä.

10 ‑Ɔ dlinɩɛ Zezwii a ‑nʋa 'ylimö sa'a a nyɩasɛwɛlɩ 'la a za‑a,

'nyɔ 'dɩ ɔ nɩ ‑sɩɩ kɛ'mö.

Ɔ 'nɩ 'wʋ ngluu,

'nyɛnɔ 'wʋ 'sɔ 'dɩ.

Ɔ 'nɩ'ɛ 'yukwli ‑pʋnɩɩ,

cɩanɔɔ.

11 Ɛ'ɛ ‑bhö nyɩasɛ,

‑maa nɩkpɛ ‑kä sa'a 'zʋʋ,

ɔ yɛ ‑tiawɛlɩɩ Lagɔ nyɩanyɩɛ ‑gömö panɩ,

ɔ'ɔɔ 'yɩbhä ɔ 'kä 'ɔ ‑lizokuu kɛ'mö ‑sɛ zaa,

ɔnyɩ ɔ köbhaa da'a gbʋ.

Sɛ'ɛ Pɔɔlʋ gbää 'gbëbhlenɩ dɔ'wʋ

12 'N n ‑kamö Atemaa 'wʋ tie,

ɛ ‑kä'ɛ Tisikö mɔ,

'päpanɩ 'wʋ,

‑n ‑kaa mä'ä Nikopolisɩ ghlɩnɩ,

‑maa mä'ä n 'kää glɩ ‑këë,

‑bëbëyitɛnyɩɩ 'wuë 'kä 'plɩ.

13 Avʋkaa Zenasɩ,

ɔ ‑nyɛ Apɔlɔsɩ 'sɔ,

wa ‑kä ‑mä 'a mä'a 'bhööä yii,

'zʋnɩ wa wɛlɩ 'yli,

'saa wa 'kää ‑su,

wa ‑kä mö dɔ'wʋ ‑wʋʋ 'n ‑lu a 'pʋa 'naa 'kʋää 'lɩbhää,

wa 'kʋänyɩ 'nyɛ.

14 Nyɩasɛ n'n‑ä ‑sɩbhä gbä ‑maa,

Zezwii a ‑nʋa,

wa nɩ 'nwi 'mö nɩɩ,

sa'a ‑sɩbhä wa kää wa 'kä 'kwädlɩ ‑li a ‑li nʋ,

wa 'bhɩa 'nɩ ‑lu kä'mö ‑kä,

wa 'kʋä 'wʋ yi.

‑Maa yɩ 'nɩ ‑sɩbhä ‑wʋʋ,

'wa Lagɔgänɩgänɛ,

ɛ'ɛɛ dɛsɛ ‑kä.

15 ‑Muë n ‑nyɛɛ 'sɔ ‑a ‑wʋä mä'ää,

wa lɛ wa bhälɩmö.

‑A'bhɩa Lagɔgänɩwaa 'wuë ‑wa ‑wʋä ‑mä,

n bhäluë.

A 'wuë,

Lagɔ nɩ 'panyɩ 'kwädlɩ 'nyu 'yize!