Galatii a ‑nʋa 6

A nɩ 'päpänɩ swɩ nyɛmʋ 'mö

‑Atʋayuënyɩ,

a gla'mö a ‑nɔ ‑bhlʋ ‑kä 'nyinyloli nʋ dɔ'wʋ ‑wʋ 'n a ‑kɔɔ 'mö bhuloo,

Lagɔ 'a 'Wugɔmʋʋ mɔɔ ‑soanyɩɛ zaa,

a nɩ to 'klɛsɛ 'dɩ 'nyɛ,

‑maa a nɩ 'zo dlɩwätɛ 'mö 'dɩ 'mö,

nzɩɩ ɔ 'käa ligba.

‑Maa a ‑kä ‑sɩbhä 'zʋ dɔ'wʋ ‑wʋʋ,

a nɩ 'nɛmanɩ anyɩ 'wʋ,

a tɩa 'nyinyloli nʋmö.

2 A nɩ kwänɩkwänɩnɩ ‑mä 'a yɔlɔylʋ 'mö.

A ‑kä ‑sɩbhä 'zʋʋ,

sɛɛ Kliisɩ yɩbhää,

‑sɩbhä a yɛɛ da'a zʋ.

3 'N nɩkpɛ 'nɩ ‑lu glɩnɩ 'wë,

ɔ ‑kä dlɩ 'pä nɩɩ dɛsɛ ɔ kää,

ɔnyɩ ɔ dulaa.

4 A nɩ yɩlɩ bhʋlʋbhlʋ ‑mä 'a nʋnʋlii 'mö.

‑Ɔ ‑kä sɛ ‑yi nɩɩ ɔ ‑nɩɩ nɛnɩ,

ɔ bhɛnɩ ɔ 'kɩ 'mö tɛkpɔnɩ.

‑Maa ɔ nɩ ti ɔ 'bhɩa a ‑nɩ yɔwʋ kwänɩ.

5 Nyɩasɛ n'n‑ä ‑sɩbhä gbä,

‑maa bhʋlʋbhlʋ ‑a 'kää ‑a'a 'gblukuu ‑su.

A nɩ 'päpänɩ dlɩ 'wʋ

6 Nɩkpɛ a ‑mɔ wa sʋlʋnɩɛ Lagɔ 'a wɛlɩɩ,

'ɔ 'saa ɔ kää 'wuë,

ɔ nɩ 'nyɛmu ‑ɔ sʋlʋnɔɔ Lagɔ 'a wɛlɩɩ.

7 A nɩ tɩ anyɩ dula,

‑maa wa'a nyɩɛnɩ Lagɔ.

'Saa nɩkpɛ glʋä 'mö ɔ 'käa ‑dɩ.

8 ‑Na'a ‑wʋwʋsɛzokwëa a sɛ a yɩbhää,

mö ‑n ‑kä glʋʋ,

yɩ 'wuë a 'wlusɛnɩdaa,

'kwiea ma‑a.

‑Maa 'saa 'Wugɔmʋʋ 'Wlɩlɩ yɩbhää mö ‑n ‑kä glʋʋ,

yɩ 'wuë a 'wlusɛnɩdaa a dɔ'wʋ,

'pɩwʋ mää 'naa 'kää 'yli bhɩɛ ‑mä ‑n 'kää ghlɩ.

9 ‑Sɩbhä a za n gbää nɩɩ,

‑li a ‑li a nʋnʋ dɔ'wʋ,

swɩ nɩ ‑tɩnyɩ yɔwʋ 'kunɩ.

'N swɩ ‑nɩnyɩ yɔwʋ 'kunɩɩ,

Lagɔ 'a 'tɛnyɩɩ ‑kä zɩla'a ghlɛɛ,

‑a yi yɩ 'ylimö a ‑lu ghlɩ.

10 ‑Sɩbhä a za,

‑a ‑kä ‑bhlɛ ‑li a ‑li a nʋnʋtɛnyɩ ‑kä,

a‑a nɩ nʋ nɩkpaa 'wuë ‑li a ‑li 'wlu,

‑a'bhɩa Zezwii a ‑nʋa a'bhï,

'mö ‑a nɩ nwi tɛɛ 'wlu.

Sɛ'ɛ Pɔɔlʋ gbää 'gbëbhlenɩ dɔ'wʋ

11 Wɛlɩkïbhë nɩ n 'bhlenɩɛ dɛ'ɛ 'gbëë,

na'bhë 'na kätɩkpaa 'mö n 'cɛlɩnaa 'mö.

'Bɔgʋyʋʋ a cɛlɩnɩɛ 'möö,

sɛ wʋ 'ghïliɛ,

‑sɩbhä ma‑a tulananyɩɛ 'ylimö nɩɩ,

‑amöö 'cɛlaa.

12 Sɛ'ɛ n gbää nɩɩ,

a gla'mö a nɩkpa 'la ‑wa yɩbhää wa 'kanyɩ 'wlumö köbhänɩ wa 'kanyɩ 'wʋ ‑dɩ klɩpaa,

Lagɔ 'a 'Wugɔmʋʋ mɔɔ 'nuëë ‑su.

Wa 'bhɩa Zwiiföwaa 'kä wa 'dɩ a dɩ ‑sɛ a za,

nza wa zʋä ‑sɩbhä.

Kliisɩ ‑ɔ 'kunɩɛ ‑lɛ su 'klʋʋ,

wa'aa 'yɩbhä wa 'kä nɩkpa ɔ 'yize a 'dɩ 'nyɛ,

Zwiiföwaa tuëa 'klɩ 'yɩa nza wa zʋä ‑sɩbhä.

13 Wa bhïla 'wʋdɩgbʋ,

‑maa sɛɛ Lagɔ 'a Gböö gbää,

wa'bhï wa'a nɛmö ‑sɩbhä.

Wa 'kanyɩ 'mö tɛkpɔnɩ nɩɩ,

mʋa 'zʋanyɩɛ Zwiiföwaa a saa yɩbhlɩnɩdɛ,

yɩ 'yize 'mö wa tɛlɩɛ sɛ,

nza wa gbää wa nɩ ‑daanyɩ 'wʋ.

14 ‑Maa ‑amö na a,

Alowli Zezwii Kliisɩ ‑ɔ 'kunɩɛ na 'wlumö ‑lɛ su 'klʋʋ,

ɔ 'yize 'mö n 'kää 'mö tɛkpɔnɩ.

Sɛɛ Zezwii Kliisɩ 'kunɩɛ na 'wlumö ‑lɛ su 'klʋ a za,

mä'ä 'pɩwʋ a ‑lii 'wuë,

yɩ'ɩa'a na dɔ'wʋ ‑lu glɩnɩ.

Yɩ dɔ'wʋ,

n'n‑ä'ɛ na a ‑lu glɩnɩ.

15 ‑Sɩbhä a za n gbää nɩɩ,

‑n yi 'wʋ dɩ‑ɩ oo,

‑n 'nɩ 'wʋ dɩ‑ɩ oo,

mɩɩ 'nɩɛ dɛsɛ ‑kä,

‑maa Lagɔ a'bhë ‑kamö nɩkpɛlolo 'wʋ 'zʋa,

mɩɩ kää dɛsɛ.

16 A gla'mö a ‑nʋa ‑wa ‑gänɩɛ ‑lɛ a wɛlɩ 'laa,

Lagɔ nɩ 'pä wa ngäzɩdlɩ,

'ɔ 'tɩɩglɩglɛɛ ‑nyɛ 'ɔ 'nyupälɩɩ 'sɔ 'kʋä 'wʋ ghlɛ.

‑Wa glɩnɩmöä ‑tiasɛ ngëyii Lagɔ ‑sɛɛ ‑lɛ 'mö a ‑nʋa,

wa 'wuë,

ɔ nɩ 'pʋä ‑sɩbhä 'nyu.

17 ‑Sɩkaa a dɔ'wʋ,

‑bɛ nɩ ‑tɩɩa'a yɔlɔa,

‑maa 'kpakwɩɩ n kää dɛ'ɛ Zezwii 'a libhoo a za yɔwʋʋ,

yɩbhlɩnɩdɛ yɩ glɩnɩɛ,

mɩɩ tulanɩɛ 'ylimö nɩɩ,

ɔ ‑nɔ n glɩnɩɛ.

18 ‑Atʋayuënyɩ,

‑Alowli Zezwii Kliisɩ 'a 'nyupälɩɩ nɩ ghlanyɩ 'wʋ.

Nn,

yɩ nɩ ghlanyɩ 'wʋ.