Galatii a ‑nʋa 5

‑Lu ‑bhlʋ a'bhë nɩ tanyɩ gasɛ 'wlumö ‑känɩ

‑Atʋayuënyɩ,

‑a tɩa'a göwa glɩnɩ 'lɩlɩlɩ nza Kliisɩ ‑sanyɩɛ galɛ 'mö.

Zaa,

dɛ a kää sɛ a nɩ nyɔnʋ ‑lɛ kɛ,

‑maa wa 'kanyɩ 'wʋ 'sɔ gasɛ 'wlumö ‑känɩ a dɔ'wʋ,

a nɩ tɩ 'wʋ nglu.

2 ‑Amö Pɔɔlʋ,

‑amöö nyanyɩɛ dɛ'ɛ 'dɩ nɩɩ:

A ‑kä 'wʋ nglu wa ‑kaanyɩ 'wʋ ‑dɩɩ,

mɩɩ sɛɛ zɛmö nɩɩ,

a dɔ'wʋ,

Kliisɩ,

ɔ'ɔa'a ‑lu glɩnɩ.

3 A gla'mö a ‑muëë yɩbhää,

sɛɛ Moyizɩ 'a Gböö gbää wa nɩ ‑duë ‑sɩbhä 'wʋʋ,

'mö n 'nyɛnɩɛ dɛ'ɛ 'wʋ 'sɔ 'dɩ nɩɩ,

‑ɔ ‑kä ‑sɩbhä 'zʋʋ,

ɔ kä ɔ 'kä Moyizɩ 'a Gböö 'wuë 'gämö 'klʋkpamö 'zʋnɩ klɩpaa.

4 Abhʋaa pää dlɩ nɩɩ,

Moyizɩ 'a Gböö a 'klʋkpamözʋzwɛ mɛɛ 'kää 'nglɩ ‑kä a 'kä 'mö zlɔmanɩ Lagɔ a 'yila 'klʋ a dɔ'wʋʋ,

a yɛ anyɩ Kliisɩ 'mö ‑sɛ,

Lagɔ 'a ngäzɩdlɩɩ,

a kɛ anyɩ 'mö bɔa.

5 ‑Abhʋa ‑abhlɩ,

‑a'a dilaa 'tɛɛ 'wʋ nɩɩ,

Lagɔ,

'ɔ 'Wugɔmʋʋ a 'nglɩ 'mö,

ɔ ‑yinyɩ 'mö zlɔmanɩ ɔ 'yila 'klʋ a dɔ'wʋ,

sɛ ‑a 'tɛɛnɩɛ Zezwii Kliisɩ dlɩ a za.

6 Nza n gbää nɩɩ,

‑n ‑kä Zezwii Kliisɩ 'wʋ ‑glɛɛ,

‑na dɔ'wʋ,

‑n yi 'wʋ dɩ‑ɩ oo,

‑n 'nɩ 'wʋ dɩ‑ɩ oo,

mɩɩ 'nɩɛ dɛsɛ ‑kä,

‑maa Kliisɩ a dlɩtɛɛnɩtɛnɛ ‑ɛ ‑glɛɛ nɩkpa a ‑wawʋ gwëë,

mɛɛ kää dɛsɛ.

7 ‑Atʋayuënyɩ,

Kliisɩ a dlɩtɛɛnɩ dɔ'wʋ,

a mö a yɩ 'yukusɛ 'tɩɩ nɩɩ,

‑ɔ 'kuënaanyɩ bhä swɩ yɔwʋ 'n a yi bhä nimï yinɩ,

'n a 'nɩ 'zʋ bhäa'a ‑sɩkaa Lagɔ 'a ‑tiamö a wɛlɩɩ 'klʋkpamö 'nɩ?

8 ‑Wa yɩbhää da'a wa 'kanyɩ 'mö 'nua klɩpaa a 'kä 'wa wɛlɩɩ ‑gänɩɩ,

Lagɔ ‑ɔ ‑saanyɩɛ ‑lɛ,

mɔɔ 'nuëë tie.

9 ‑A'a bhä sɛ ‑yi nɩɩ,

levii ‑bhʋbhʋ a 'tikïyie 'n wʋ 'pulaa falinɩkwë 'käda ‑a?

10 Miɛ abhlɩ da'a,

‑maa ‑Alowli Lagɔ a 'nglɩ 'mö n kɩ dlɩ 'wʋ nɩɩ,

a 'naa 'kä sa'a a käböwɛlɩ 'yukwli ‑pʋnɩ.

‑Maa ‑wa nyimanyɩɛ da'a 'wlumöö,

'saa wa yi zɩ'ɛ glɩnɩ ‑kë,

'wa sɛ wa zʋä da'a a za,

Lagɔ yuë gbʋ köbha.

11 ‑Atʋayuënyɩ,

wɛlɩɩ ‑yɩ nʋä nɩɩ,

nɩkpɛ 'kä Lagɔ 'a 'pʋpʋɛ ghlɩ a dɔ'wʋ,

ɔ nɩ 'doo 'wʋ klɩpaa 'mö n ‑kä a biamöö,

Zwiiföwaa 'naa ‑kaa 'klɛ yɔwʋ 'pänɩ,

wa 'naa ‑kaa 'klɩ 'yɩa.

‑Sɩbhä yɩ ‑kä a 'mö ‑wʋʋ,

Kliisɩ ‑ɔ 'kunɩɛ ‑lɛ su 'klʋ a wɛlɩɩ n biaa,

yɩ 'naa 'kä a Zwiiföwaa 'klɛ 'wʋ ‑bhö.

12 Sɛ'ɛ n gbää nɩɩ,

nɩkpaa ‑wa nyimanyɩɛ da'a 'wlumöö,

'n 'wʋdɩdɛ a gbʋʋ mʋʋ nɩ ‑kʋä tenyii plɛnɩɩ,

wa nɩ 'lɛlɩa'a wanyɩ.

A nɩ nglu 'wʋ Lagɔ 'a 'Wugɔmʋʋ 'kanyɩ ‑su

13 'Na Lagɔwɛlɩɩ n 'nyanyɩɛ,

sɛ'ɛ yɩ nʋä nɩɩ,

Lagɔ mɔɔ ‑saanyɩɛ ‑lɛ,

nzɩɩ ‑lu ‑bhlʋ a'bhë tanyɩa gasɛ 'wlumö ‑känɩ.

Miɛ abhlɩ,

‑maa a nɩ tɩ dlɩ 'pä nɩɩ,

sɛ'ɛ yɩ sɛɛ zɛmö nɩɩ,

anyɩgäsɛ,

'a sɛ a yɩbhää,

‑sɩbhä a 'käa'aa zʋ.

Ɛ'ɛ ‑bhö ‑sɩbhä ma,

‑maa a 'bhɩa a ‑wawʋ Lagɔ 'zʋanyɩɛ dlɩ zɛmö a za,

a nɩ ‑wʋwʋnɩ 'yli.

14 Ɛ'ɛ ‑bhö nyɩasɛ,

‑maa Lagɔ lɛ naa:

Sɛ ‑n ‑waa ‑nanyɩ ‑wa ‑sɩbhä ‑na 'lilɛ.^a

‑N ‑kä ‑sɩbhä 'zʋʋ,

'saa Gböö yɩbhää 'wuë,

‑n kɩ da'a nʋ 'wë.

15 ‑Maa abhʋa Galatii a ‑nʋa,

'a sɛ a nimïnimïnɩɛ,

sɛ a lilinɩɛ glanɩma a sɛɛ,

a nɩ 'nɛmanɩ anyɩ 'wʋ,

a tɩa sɛ ‑sɛsɛnɩ.

16 Sɛ'ɛ n gbää nɩɩ,

a nɩ nglu 'wʋ,

Lagɔ 'a 'Wugɔmʋʋ 'kanyɩ ‑su,

‑sɩbhä a dɔ'wʋ,

sɛɛ 'a nɩkpɛglɩnɩsaa yɩbhää,

a 'naa 'kä ‑sɩbhä zʋ.

17 'Fʋ n'n‑ä sa'a gbä,

‑maa ‑abhʋa nɩkpa,

‑a'a nɩkpɛglɩnɩsaa a 'saa a yɩbhää,

‑sɩbhä ‑nyɛ Lagɔ 'a 'Wugɔmʋʋ a 'saa ɔ yɩbhää 'nɩɛ yɔwʋ mönɩ.

‑A'a nɩkpɛglɩnɩsaa ‑nyɛ Lagɔ 'a 'Wugɔmʋʋ 'sɔ,

'ylimö wa ‑känɩɛ,

mɩɩ kää 'nglɩ,

'saa a yɩbhää,

a'aa bhɛnɩ a 'kɩ nʋ.

18 ‑Maa,

Lagɔ 'a 'Wugɔmʋʋ mɔɔ ‑kaanyɩ ‑suu,

‑lɛ a dɔ'wʋ Gböö 'naa 'kanyɩ gasɛ 'wlumö ‑känɩ.

19 Nɩkpɛ a'bhë,

'ɔ nɩkpɛglɩnɩsaa ‑sɩbhä ma‑a ‑kɔɔ ‑suu,

'nyinylolii ‑sɩbhä kwɔɔ 'mö 'nɩɛ ziza‑a,

miɛ nɩɩ:

Nglʋsɛtɛlɩtɛlɛ,

gbɩsɛtɛlɩtɛlɛ,

'väkajɛnɩjɛnɛ,

‑lii a kii 'wuë a 'tʋzokwëa,

20 'fʋ a ‑lagwɩɩ a bʋbɔbʋbʋ,

gukäkʋ,

nɩkpa a ‑gblɩgblɛ,

'lʋlwɛɛ,

nglʋnyinye,

'klɛpäpʋ,

yɔwʋvanɩvanɛ,

'ylimö dlinɩdlinɛ,

kpɛnɩkpɛnɛ,

21 'ylikälɩkälɛ,

nʋnɩmänɩmʋ,

‑gblɔsɛlile 'n ‑sɩbhä a ‑li ‑mimii,

'mö ‑sɩbhä kwɔɔ 'mö.

‑Maa nɩkpɛ a ‑mɔɔ nʋä sa'a a ‑li,

sɛ n 'nyanyɩ a‑a ‑pa 'wʋ 'dɩɩ,

‑sɩbhä n nyanyɩ'ɛɛ dɛ'ɛ 'dɩ nɩɩ:

‑Sɩbhä a nɩkpɛ,

'pɩwʋ mää Lagɔ 'kämanɩɛ,

ɔ'ɔɔ ‑mä 'bhle ‑kä.

22 ‑Maa 'Wugɔmʋʋ 'Wlɩlɩ ‑kä nɩkpɛ ‑suu,

libhoo ɔ nʋnɩɛ ‑mä ɔ dlɩ zɛmöö,

‑li a ‑li a ‑bɛ wʋ ‑glɛɛ gwë.

Mɩɩ glɩnɩɛ ‑wawʋ,

'mäna,

'tɩɩglɩglɛ,

dlɩ'mökpaanɔ,

dlɩwätɛ,

dlɩzɛmönanɔ,

Lagɔ a dlɩtɛɛnɩtɛnɛ,

23 dlɩ'wʋyɔnɩyɔnɛ 'n dlɩ'wʋpɩɛnɩpɩɛnɛ.

Nɩkpɛ a ‑mɔɔ nɛmöä ‑sɩbhää,

'mö Lagɔ 'a Gböö 'naa 'kää gbʋ köbha.

24 Sɛ'ɛ n gbää nɩɩ,

nɩkpa a ‑muëë glɩnɩɛ Zezwii Kliisɩ a ‑nʋä,

wa ‑yi sɛ nɩɩ,

Zezwii Kliisɩ 'kunɩɛ su 'klʋʋ,

'wa ‑wʋwʋsɛzokwëa ‑nyɛ ‑lii a kii 'wuë a 'tʋzokwëa ‑a ‑wʋä ‑mä wa dila zɛmö 'sɔ,

mɩɩ 'kumöä.

25 Lagɔ 'a 'Wugɔmʋʋ mɔɔ nyɩanyɩɛ zɩkpalele.

Nza n gbää nɩɩ,

‑mä ‑a'a nɛmönɛmösaa 'wuë 'mö,

a‑a nɩ nglu 'wʋ ɔ ‑kanyɩ ‑su.

26 ‑Sɩbhä a za n gbä'ɛɛ nɩɩ,

a‑a nɩ tɩ ‑anyɩ a 'nglɩ sɛ tɛlɩ,

a‑a nɩ tɩ gbɩ pälaplanɩ,

a‑a nɩ tɩ 'yli kälɩkälɩnɩ.