Galatii a ‑nʋa 2

Pɔɔlʋ ‑nyɛ Zezwii 'a tietiewa ‑muë'la 'sɔ wa yɛ 'mö 'nʋnʋnɩ

'Ylʋbö kʋgbä‑mʋäna 'plɩɛ,

'n n yi'ɛɛ ‑mä Zeluzalɛɛmö mö,

n ‑nyɛ Banabasɩ 'sɔ.

‑Aa ‑daayu ‑bhlʋ wa laa Tiitɩ,

n ‑soo 'bɩwʋ a‑a yiɛ mö.

2 Lagɔ a'bhë mɔɔ nyɩaaa 'dɩ nɩɩ,

n nɩ mö ‑mä,

nza n möä ‑mä.

N ghlɛɛ ‑mä,

n ‑nyɛ 'wa 'yukugänɩwaa a 'yize 'sɔ,

a‑a yiɛ 'wlu 'yɩbhä.

'Na sɛ n biaa Zezwii 'a 'Mänatɩtɩɩ ‑mä ‑waaa Zwiiföwa glɩnɩ jijo'wʋʋ,

'n n yuëë ‑sɩbhä a 'tɩtɩ ‑sɛnɩ,

nzɩɩ n ‑nyʋä 'sɔ,

‑a 'kä 'mö 'nʋnʋnɩ,

libhoo n yɛɛ nʋ 'n ‑muu n ‑wʋä nʋ dɔ'wʋ,

wʋ tɩa 'fʋ a ‑lu glɩnɩ.

3 N ‑nyʋä 'sɔ a‑a yiɛ sasɛ 'mö 'nʋnʋnɩ.

‑Sɩbhä a za,

Tiitɩ n ‑nyɛɛ ‑bhlinɩɛ 'wʋ,

‑ɔɔɔ Zwiiföyi glɩnɩɩ,

wa 'nɔɔ 'wlumö köbhänɩ nɩɩ,

wa nɩ ‑doo 'wʋ klɩpaa.

4 ‑Maa yiowaa,

wa gbää ‑aa ‑daayuë wa glɩnɩ,

wa pälanyɩɛ jijo'wʋʋ,

wa 'yize mʋa gbää wa nɩ ‑doo 'wʋ klɩpaa.

Nɩkpa 'la 'fʋ wa'aa ‑mä ‑aa jijo'wʋ plɛ,

‑maa ‑abhʋaa nʋä nɩɩ Zezwii Kliisɩ a za,

Moyizɩ 'a Gböö 'naa ‑kanyɩa'a gasɛ ‑gömö 'kämanɩɩ,

wa ‑kanyɩ kä'mö yɩlɩ,

‑a'a nɛmönɛmösaa wa 'kä ‑sɩbhä 'ylɩmö,

nza wa 'zʋä ‑sɩbhä.

Wa yɩbhä a nyɩasɛ wa ‑kanyɩ 'wʋ 'sɔ Moyizɩ 'a Gböö a göwa 'wʋ 'zʋa.

5 ‑Maa ‑aaa 'wuë 'wʋ nglu 'lɩlɩlɩ.

Ɛ'ɛ ‑bhö fʋ,

‑maa a za ‑a 'zʋä sɩbhä,

nzɩɩ Zezwii 'a 'Mänatɩtɩɩ ‑nyɛ widɩ tɩa 'mëdionɩ.

6 ‑Wa glɩnɩɛ wa gla'mö a dɛsɛkäwaa,

sɛ'ɛ n gbää wa dɛ nɩɩ,

'wa 'saa wa glɩnɩ a‑a nɩkpɛsɛ a dɔ'wʋʋ,

yɩ ‑nɩɩɛ 'wʋ yɩlɩ.

N ‑yi sɛ nɩɩ,

Lagɔ ‑kä ‑lɛ nɩkpɛ ‑sɛɛ yii,

'ɔ 'saa ɔ glɩnɩɛ 'mö ɔ 'nɩɛ 'klʋ yɩlɩ.

'Kädɩ 'la,

wa ‑nɩɩɛ 'wlumö köbhänɩ nɩɩ,

'na Lagɔwɛlɩɩ n bhïlaa 'kwädlɩ,

n nɩ 'zwi kïbhë ‑mämaa ‑gömö,

wa'aa ‑sɩbhä nʋ.

7 ‑Maa sɛ wa yɩbhlɩmanɩɛ cuu nɩɩ,

sɛɛ Lagɔ tiee Piɛlɩ Zwiiföwaa 'wʋ,

ɔ 'kʋä Zezwii 'a 'Mänatɩtɩɩ 'nyɛɛ,

‑sɩbhä ɔ tieaa 'yɛɛ na a ‑waaa Zwiiföwa glɩnɩ 'wʋ,

n 'kʋänyɩ 'nyɛmö.

8 Sɛɛ Lagɔ tiee Piɛlɩ Zwiiföwaa 'wʋʋ,

‑sɩbhä ɔ tieaaa ‑waaa Zwiiföwa glɩnɩ 'wʋ.

9 Zaakö mɔ,

Piɛlɩ mɔ,

'n Zaa,

wa ta ‑kpɔ ‑wa glɩnɩɛ ‑mä a ‑nʋa a ‑zɩkpaa a 'yukugänɩwa 'kädɩɩ,

wa'bhï wa yɩbhlɩnɩ sɛ nɩɩ,

Lagɔ mɔɔ nyɩaaa 'na libhoo.

‑Sɩbhä a za,

Banabasɩ mɔ 'n ‑amö,

‑a ‑nyʋä 'sɔ a‑a yiɛ 'mö 'nʋnʋnɩ.

‑A 'wuë ‑a lɛ nɩɩ:

‑Mä Zwiiföwaa jijo'wʋ ‑mä wa 'kää wabhlɩ libho nʋ,

‑maa ‑abhʋa ‑abhlɩ,

‑mä ‑waaa Zwiiföwa glɩnɩ jijo'wʋ,

‑mä ‑a 'kää mönɩ.

10 ‑Lu ‑bhlʋ cuu 'mö wa 'yɩbhänɩnyɩɛ,

wa lɛ naa,

Zezwii a ‑nʋa,

‑wa ‑wʋä ‑mä ‑waaa Zwiiföwa glɩnɩ a bhlɩɩ ‑gömöö,

wa nɩ tɩ ‑mä Zeluzalɛɛmö a ‑nʋa a gla'mö a 'pʋäwa 'wʋ dlʋ.

Wɛlɩ 'la,

n 'zʋni ‑tiamö 'yli 'tɩɩ.

Pɔɔlʋ yɛ Piɛlɩ 'lʋnɩ

11 ‑Maa 'ylɩ ‑bhlʋ 'mö,

n ‑wʋ ‑mä Atiɔsɩ,

'n Piɛlɩ yiɛ ‑mä yi.

‑A ‑wʋ ‑mä,

'kïbhë ‑bhlʋ ɔ nʋä,

a'aa nɛnɩ zaa Zezwii a ‑nʋa 'wuë a 'yila 'klʋʋ,

'n n yoo 'lʋnɩ,

n 'nɔɔ wɛlɩ 'yli zizanɩ 'lɩlɩlɩ.

12 Sɛ ɔ 'zʋä,

‑sɩbhä ma‑a nɩɩ:

Zaakö mɔɔ tiee ‑mä Atiɔsɩ nɩkpa.

Dɛ wa'aa ‑bhlɛ yi a dɔ'wʋ,

Zezwii a ‑nʋa ‑waaa Zwiiföwa glɩnɩɩ,

Piɛlɩ ‑nyʋä linɩ a 'wʋ,

‑maa ‑muë'la yiɛ cuu,

'n ɔ yuëë gla'mö 'bhöö,

ɔ ‑nyʋä 'nɩa'a 'wʋ linɩ.

'Fʋ ɔ'ɔɔ ‑sɩbhä 'zʋ,

‑maa Zwiiföwaa 'a sɛ wa nʋä nɩɩ,

nɩkpɛ 'nɩ 'wʋ dɩ‑ɩ,

Zwiiföyi ‑nyɔɔ nɩ tɩ 'wʋ linɩɩ,

'mö ɔ ‑guä nza ɔ 'zʋä ‑sɩbhä.

13 Piɛlɩ nʋä sa'a 'kwlɩsɔkänyɔ a ‑lii,

Zezwii a ‑nʋä ‑muë'la ‑wa glɩnɩɛ Zwiiföwaa,

‑sɩbhä wa 'zʋmöä.

Banabasɩ a'bhë 'n wa yoo 'pïlanɩmö.

14 N 'yɩɛ 'ylɩmö nɩɩ,

'wa 'zʋzʋsaa ‑nyɛ Zezwii 'a ‑tiamö a 'Mänatɩtɩɩ 'sɔ 'nɩɛ yɔwʋ mönɩɩ,

'n n yiɛ nɩkpabhë a 'yila 'klʋ Piɛlɩ gbëaa 'dɩ 'nyɛ nɩɩ:

«‑Na'bhë ‑nmöö glɩnɩɛ Zwiiföyi ‑n yɛ Zwiiföwaa 'a nɛmönɛmösaa kɛ'mö ‑sɛ,

n‑n ‑nyɛ ‑waaa Zwiiföwa glɩnɩ 'sɔ 'n a yiɛ mä'ä 'wʋ linɩ.

Sɛ yɩ ‑wʋ yɩa'a ‑sɩkaa 'mö n‑n yɩbhä bhä ‑n 'kä ‑waaa Zwiiföwa glɩnɩ 'wlumö köbhänɩ,

wa 'kä Zwiiföwaa 'a saa Moyizɩ 'a Gböö 'klʋkpamö zʋ klɩpaa 'nɩ?»

Zezwii Kliisɩ a dlɩtɛɛnɩtɛnɛ a 'yize mɛɛ 'puëë

15 ‑Tiamö abhlɩ,

‑aa dɩbawa 'wuë Zwiiföwa wa glɩnɩɛ,

zaa ‑waaa Lagɔ 'a Gböö Moyizɩ 'cɛlɩɛ ‑yii,

wa gla'mö a ‑nʋä ‑aaa glɩnɩ.

16 ‑Maa ‑a ‑yi'ɛ sɛ nɩɩ,

nɩkpɛ,

'ɔ sɛ ɔ zʋä Lagɔ 'a Gböö 'klʋkpamöö,

‑sɩbhä ma‑a 'nɩɛ 'nglɩ ‑kä ɔ 'kä 'mö zlɔmanɩ Lagɔ a 'yila 'klʋ a dɔ'wʋ,

‑maa 'ɔ sɛ ɔ 'tɛɛnɩɛ Zezwii Kliisɩ dlɩɩ,

‑sɩbhä a 'yize ma‑a kää 'nglɩ.

‑Abhʋa Zwiiföwaa,

‑abhʋaa 'zʋä Zezwii a ‑nʋä,

‑sɩbhä a za ‑a 'tɛɛnɩmöä Zezwii dlɩ,

a‑a yiɛ ‑sɩbhä a za 'mö zlɔmanɩ.

‑Maa ‑a 'kä 'mö zlɔmanɩ a dɔ'wʋ,

Moyizɩ 'a Gböö a 'klʋkpamözʋzwɛ mö ‑a 'nɩa'a dlɩ 'tɛɛnɩ.

Sɛ'ɛ n gbää nɩɩ,

nɩkpɛ ‑bhlʋ a'bhë ‑ɔ 'kää 'ɔ nʋnʋlii a za Lagɔ a 'yila 'klʋ a dɔ'wʋ 'mö zlɔmanɩɩ,

ɔ'ɔɔ ‑bhölɩ 'lɩlɩlɩ.

17 Zaa,

‑abhʋa Zwiiföwaa,

a‑a ‑kä sɛ tɛlɩ ‑a 'kä 'mö zlɔmanɩ Zezwii 'a dlɩtɛɛnɩtɛnɛɛ a 'yize a za‑a,

sɛ'ɛ ‑sɩbhä sɛɛ zɛmö nɩɩ,

‑a ‑nyɛ ‑waaa Zwiiföwa glɩnɩ 'sɔ,

‑a 'wuë 'nyinylolinʋwa ‑a glɩnɩɛ.

Miɛ abhlɩ da'a 'wë,

‑maa sɛ'ɛ ‑sɩbhä sɛ bhä 'yɛ zɛmö nɩɩ,

Kliisɩ,

'nyinylolinʋwa 'mö ɔ pä swɩ nyɛmʋ 'mö wa 'kɩ nʋ 'yize ‑a?

N'nn,

ɛ'ɛ ‑bhö sa'a ma 'lɩlɩlɩ.

18 ‑Maa Moyizɩ 'a Gböö a 'klʋkpamözʋzwɛ,

n‑n ‑kɛɛ kɛ'mö ‑sɛ 'wë,

‑n ‑kä'ɛ 'wʋ 'sɔ,

‑n ‑kä Gbö 'la a wɛlɩɩ ‑gänɩɩ,

Gbö a 'klʋkpamösɛnyɔɔ ‑n zʋä.

19 ‑Amö na a,

Moyizɩ 'a Gböö a dɔ'wʋ,

‑gäzɛ a sɛ n ‑wʋä.

N ‑nyɛ Kliisɩ 'sɔ,

'gämö wa kʋnɩnyɩɛ ‑lɛ su 'klʋ nzɩɩ n 'käa Lagɔ a 'yize a za ‑bhölɩ.

20 Nanyɩgäsɛ ‑amöö 'nɩa'a ‑bhölɩ,

‑maa Kliisɩ mɔɔ ‑bhölɩnɩɩɛ 'mö.

Miɛ nɩɩ Lagɔ 'a yuu ‑bhʋlʋ ‑kpɔ,

'ɔ sɛ ɔ tulanɩɩɛ 'ɔ ‑wawʋ 'ylimö,

'n ɔ yiɛ na 'wlumö ɔnyɩ 'mö 'wlʋ a za,

'na zɩkpa 'wuë 'mö,

'mö n 'tɛɛnɩɛ dlɩ cuu.

21 Sɛ'ɛ n gbää nɩɩ,

'pʋpʋɛ Lagɔ nyɩaaa 'ɔ ngäzɩdlɩ a za‑a,

n 'nɛɛ kplɩ sɛ tlinɩ.

‑Maa 'n nɩkpɛ,

ɔnyɩgäsɛ 'a sɛ ɔ zʋä Lagɔ 'a Gböö 'klʋkpamöö,

‑sɩbhä ma‑a ‑kä a 'nglɩ ‑kä ɔ 'kä 'mö zlɔmanɩ Lagɔ a 'yila 'klʋ a dɔ'wʋʋ,

Kliisɩ,

'fʋ ɔ 'kunɩ a‑a ‑lɛ su 'klʋ.