1 Kolɛɛtɩ a ‑nʋa 1

Tɛkäbɔgʋʋ Pɔɔlʋ 'cɛlɩɛ ‑mä

Kolɛɛtɩ a ‑nʋa

'wʋʋ

Bhälɩwɛlɩɩ

1‑2 ‑Amö Pɔɔlʋ,

‑amö Lagɔ ‑sɛɛ ‑lɛ n 'kä Zezwii Kliisɩ a tietienyɔ glɩnɩɩ,

n ‑nyɛ ‑aa ‑daayu Sɔsɩtɛɛnɩ 'sɔ,

abhʋa Lagɔ a ‑nʋa 'wuë,

abhʋaa ‑wʋä ‑mä Kolɛɛtɩ glɔ 'möö,

abhʋa Lagɔ ‑sɛɛ ‑lɛ 'n a yiɛ Zezwii Kliisɩ a bɔɔmö a za ɔ 'yize a ‑nʋä 'zʋʋ,

abhʋa ‑a pää 'bɔgʋ nɩ 'wʋ.

Saa 'wuë a nɩkpaa,

‑wa kää ‑a 'wuë a ‑lowli Zezwii Kliisɩ a 'nglɩ ‑gömöö,

mö ‑a 'pämö'ɛɛ 'bɔgʋ nɩ 'wʋ.

3 ‑Aa dɩba Lagɔ ‑nyɛ ‑Alowli Zezwii Kliisɩ 'sɔ,

'tɩɩglɩglɛɛ ‑nyɛ 'nyupälɩ 'sɔ ‑yɩ 'bhöönuëë 'möö,

yɩ nɩ ghlanyɩ 'wʋ.

Pɔɔlʋ yɛ Lagɔ bhälɩ

4 Na dɩba Lagɔ,

sɛ ɔ 'pää Zezwii Kliisɩ a bɔɔmö a za a ngäzɩdlɩ 'n ɔ yeanyɩɛ 'nyu 'pä a za,

bhälɩ n bhälɔɔ 'kwädlɩ 'yize.

5 ‑Tiamö,

sɛ a ‑glɛɛ Zezwii Kliisɩ 'wʋ a za,

'ɔ 'nyupälɩɩ a kii 'wuë 'mö ɔ ghälaanyɩɛ 'wʋ.

Miɛ nɩɩ,

Lagɔ 'a wɛlɩɩ 'wuë sɛ yɩ ‑wʋä 'tɩɩ,

a bhɛnɩ a 'kä ‑sɩbhä yɩbhlɩnɩ.

6 Wɛlɩɩ ‑yɩ bhïlaa Zezwii Kliisɩ a dɛ n 'nyanyɩɛ,

mɩɩ glɩnɩɛ 'a dlɩtɛɛnɩtɛnɛ a kwëlea ma.

7 Yɩ za,

'ɔ 'Wugɔmʋʋ a 'nyupälɩɩ 'wuë,

yɩ 'ke ‑bhlʋ a'bhë ‑a 'nanyɩɛ ‑gömö ‑wʋʋ,

a'aa ‑bhölɩ,

'n a ‑kʋnɩɛ ‑Alowli Zezwii Kliisɩ 'a yiyizlɩɩ.

8 Ɔ'bhë mɔɔ 'kanyɩɛ ‑su,

dɛ a kää sɛ a 'kä ‑lɛ kɛ nyɔnʋ ‑këë a 'kä ‑mä 'gbë 'wʋ ghlɛ,

nzɩɩ 'ɔ zlɩ 'kädɛ 'la 'mö,

ɔ tanyɩa ‑maa yɔwʋ ghlɩ.

9 Lagɔ a'bhë mɔɔ ‑saanyɩɛ ‑lɛ,

nzɩɩ ɔ Yowli Zezwii Kliisɩ ‑ɔ glɩnɩɛ ‑a 'wuë a ‑lowlii,

a ‑nyɔɔ 'sɔ a 'kä 'kwädlɩ 'wʋ ‑wʋnɩ.

Ɔ 'naa 'kanyɩ 'kwädlɩ kɛ'mö ‑sɛ.

A nɩ tɩ 'ylimö ‑dlinɩ

10 ‑Atʋayuënyɩ,

‑Alowli Zezwii Kliisɩ a 'nglɩ 'mö,

'dɩ 'mö n zʋanyɩɛ dɛ'ɛ nɩɩ,

a nɩ ‑wanɩ,

‑maa a nɩ tɩ 'ylimö ‑dlinɩ.

A nɩ kä 'cɛla ‑bhʋlʋ,

‑mä 'a nʋnʋlii 'wuë 'mö a nɩ kä dlɩ ‑bhʋlʋ.

11 Nyɩasɛ n 'nanyɩɛ ‑sɩbhä 'dɩ 'mö zʋ,

‑maa ‑aa ‑daayu Klowee a 'ligbë 'mö a ‑nʋa,

mʋa nyɩaaa 'dɩ nɩɩ,

‑mä a jijo'wʋ 'lʋlwɛɛ ‑wʋä ‑mä.

12 'A 'ylimö‑dlinɩdlinɛ 'mö n gaaa.

'N ‑mɔ nʋä nɩɩ:

«Pɔɔlʋ a ‑nɔ n glɩnɩɛ.»

‑Mɔmɔɔ nʋä nɩɩ:

«Apɔlɔsɩ a ‑nɔ n glɩnɩɛ na a.»

‑Mɔmɔɔ lɛ:

«Piɛlɩ a ‑nɔ n glɩnɩɛ.»

‑Mɔmɔɔ lɛ:

«‑Amö na a,

Kliisɩ a ‑nɔ n glɩnɩɛ.»

13 Zaa,

nimï n 'kanyɩɛ dɛ'ɛ 'yɩbhä nɩɩ,

Zezwii Kliisɩ 'mö ɔ ‑dlinɩ bhä ‑a?

‑Maa ‑amöö 'kunɩ bhä ‑lɛ su 'klʋ a 'wlumö ‑a?

‑Zlɩ wa wɔlʋanyɩɛ 'wluu,

na 'nglɩ 'mö wa wɔlʋanyɩ bhä 'wlu ‑a?

14 N bhälɩ Lagɔ sɛɛ n'n‑ä a gla'mö a nɩkpɛ ‑bhlʋ a'bhë 'wlu wɔlʋ 'n ɛ 'nɩ ‑bhö Klipusɩ ‑nyɛ Gayusɩ 'sɔ muëë.

15 ‑Lɛ a dɔ'wʋ ‑bɛ 'naa 'kä nɩɩ,

na 'nglɩ 'mö ɔ ‑wɔlʋä 'wlu nʋ.

16 A 'nɩgbö,

na dlɩ yɛ ‑lɛ bhlinɩ,

n wɔlʋmö'ɛ Sefanasɩ 'a ‑kosu yɔwʋ a ‑nʋa 'wlu.

‑Maa n ‑yi sɛ nɩɩ,

'n ɛ 'nɩ ‑bhö nɩkpa 'la a 'yize muëë,

n'n‑a'a nɩkpɛ ‑mɔmɔɔ 'wlu wɔlʋ.

17 ‑Amö na a,

n 'kä nɩkpa 'wlu wɔlʋ a za,

nza Zezwii Kliisɩ ‑nɩɩɛ tie.

‑Maa n 'kä 'ɔ 'Mänatɩtɩɩ bia,

nza ɔ tieaaa.

N ‑kɩɩ bhïla dɔ'wʋ ‑wʋʋ,

'nɛɛnɔɔ nɩkpa sɛɛ wanyɩgäsɛ 'wlumöö,

'mö n 'niɛ 'mëdianɩ,

nzɩɩ sɛɛ Zezwii ‑ɔ 'kunɩɛ ‑lɛ su 'klʋ a wɛlɩɩ sɛɛ zɛmöö,

‑sɩbhä tɩa flɩ 'wʋ bhli.

Lagɔ 'a 'nɛɛnɔɔ ‑nyɛ mä'ä 'pɩwʋ 'a 'nɛɛnɔɔ 'sɔ

18 Sɛ'ɛ n gbää nɩɩ,

Zezwii Kliisɩ 'a sɛ ɔ 'kunɩɛ ‑lɛ su 'klʋ a wɛlɩɩ,

nɩkpaa ‑wa ‑wʋä tʋʋ dɔ'wʋʋ,

‑ɔɔ'nɛɛnɩwɛlɩɩ wa lɩɛ.

‑Maa ‑abhʋaa pʋ‑ʋä a dɔ'wʋ,

Lagɔ a 'mötɛɛnɔ yɩ glɩnɩɛ.

19 ‑Mä Lagɔbɔgʋʋ 'mö sɛ'ɛ yɩ cɛlɩɛ ‑mä nɩɩ,

Lagɔ lɛ naa:

'Nɛɛnɩwaa,

n yi 'wa 'nɛɛnɔɔ sɛ ‑sɛ.

‑Lii 'wuë a ‑yiwaa,

n yi 'wa ‑luyiyee sɛ ‑sɛ.^a

20 Zaa,

dɛɛ 'nɛɛnɩnyɔ ‑wʋ bhä?

Dɛɛ ‑lii 'wuë a ‑yinyɔ ‑wʋ bhä?

Dɛɛ Moyizɩ 'a Gböö a 'cɩanyɔ ‑wʋ bhä?

Lagɔ yɛ a mä'ä 'pɩwʋ 'a 'nɛɛnɔɔ ‑ɔɔ'nɛɛnɔ 'wʋ 'zʋa 'wë.

21 'Lɩlɩlɩ a dɔ'wʋ,

Lagɔ,

sɛ ɔ 'nɛɛ tenyii,

ɔ'bhë ɔ 'nyɛ nɩkpa 'nɛɛnɔ wa 'kä ‑sɩbhä yɩbhlɩnɩ.

‑Maa wa 'nuä 'wʋ 'libhï zaa,

wa'aa ‑sɩbhä yɩbhlɩnɩ.

Nza Lagɔ 'pää slɛlɛ ‑mɛmɛɛ ɔ 'kʋä puë.

Zezwii Kliisɩ 'a sɛ ɔ 'kunɩɛ ‑lɛ su 'klʋ a wɛlɩɩ,

‑yɩ 'kä ‑bhɩɛ ‑ɔɔ'nɛɛnɩwɛlɩɩ,

‑ɔ ‑kɩɩ dlɩ 'tɛɛnɩɩ,

mɔɔ 'kää 'pʋ.

22 Zwiiföwaa,

zɩzɛlii ‑yɩ tulanɩɛ Lagɔ 'a 'mötɛɛnɔɔ 'ylimöö,

'mö wa yɩbhää.

Glɛköwaa wabhlɩ,

'nɛɛnɩwɛlɩ 'mö wa tɛlɩɛ sɛ.

23 ‑Maa ‑abhʋa ‑abhlɩ,

Zezwii Kliisɩ ‑ɔ 'kunɩɛ ‑lɛ su 'klʋʋ,

ɔ dɩ ‑a nyɛɛ nɩkpa nɩɩ,

mɔɔ glɩnɩɛ Puënyɔ.

Wɛlɩ 'la,

'klɛ 'wʋ yɩ ‑bhöä Zwiiföwaa,

‑waaa Zwiiföwa glɩnɩ a dɔ'wʋ,

‑ɔɔ'nɛɛnɩwɛlɩɛ.

24 ‑Maa wa gla'mö a nɩkpaa Lagɔ ‑sɛɛ ‑lɛ,

‑wa 'tɛɛnɩɛ Zezwii Kliisɩ 'a wɛlɩ 'la dlɩɩ,

wa yi Zwiiföwa glɩnɩ oo,

wa 'nɩ Zwiiföwa glɩnɩ oo,

sɛ'ɛ wa yɩbhlɩnɩɛ sɛ nɩɩ,

Lagɔ 'a 'mötɛɛnɔɔ ‑nyɛ 'ɔ 'nɛɛnɔɔ 'sɔ,

‑mä wɛlɩ 'la 'mö,

‑mä yɩ 'wlʋnɩɛ 'yli.

25 'Saa 'kä ‑bhɩɛ Lagɔ a dɛ ‑ɔɔ'nɛɛnɔɔ,

wʋ zi nɩkpa a 'nɛɛnɔ 'wʋ.

'Saa 'kä ‑bhɩɛ Lagɔ a dɛ ‑ɔɔ'mötɛɛnɔɔ,

wʋ zi nɩkpa a 'mötɛɛnɔ 'wʋ.

26 ‑Atʋayuënyɩ,

abhʋa Lagɔ ‑sɛɛ ‑lɛ,

a nɩ yɩlɩɛ ‑ka anyɩ 'wʋ.

‑Mä a gla'mö,

nɩkpɛsɛ a dɔ'wʋ,

'nɛɛnɩwa 'kädɩ a ‑bɛ 'nɩɛ ‑mä ‑wʋ,

'nglɩkäwa a ‑bɛ 'nɩɛ ‑mä ‑wʋ,

wʋlʋnɩwa a ‑bɛ 'nɩɛ'ɛ ‑mä ‑wʋ,

‑maa ‑sɩbhä yɩ ‑wʋ 'mö 'n ɔ yeanyɩɛ ‑lɛ ‑sɛ.

27 ‑Maa 'saa mä'ä 'pɩwʋ a nɩkpa laa ‑ɔɔ'nɛɛnɩli,

'mö Lagɔ 'libhïä 'wʋ 'n ɔ yiɛ 'nɛɛnɩwaa zʋ 'lɩbhanɩ,

‑mi yɩ'ɩɛ 'mö 'tɛɛ,

'mö ɔ 'libhïä 'wʋ 'n ɔ yiɛ 'mötɛɛnɩwaa zʋ 'lɩbhanɩ.

28 Wa laa 'fʋ a nɩkpa,

wa flanɩɛ 'ylimö,

‑waaa dɛsɛ ‑kä 'lɩlɩlɩ nɩkpa a 'yila 'klʋ a dɔ'wʋʋ,

'mö Lagɔ ‑sɛɛ ‑lɛ,

nzɩɩ nɩkpaa libhïä 'kädɩ 'mö 'wʋʋ,

ɔ 'kʋä 'ylimö tulanɩ nɩɩ,

ɔ dɔ'wʋ,

'wa 'ghïlinɔɔ 'nɩɛ ‑lu glɩnɩ.

29 ‑Sɩbhä a za,

nɩkpɛ ‑bhlʋ a'bhë ‑ɔ kää ɔ 'kä 'ɔ 'ghïlinɔɔ dlɩ 'tɛɛnɩ nɩɩ,

Lagɔ yo wʋ za 'klʋ yɩlɩɩ,

ɔ'ɔɔ ‑bhölɩ.

30 Lagɔ mɔɔ glanyɩɛ Zezwii Kliisɩ ‑wʋ,

Zezwii Kliisɩ,

mɔɔ glɩnɩɛ ‑tiamö a 'nɛɛnɔɔ ‑wʋ 'bhöönɩɛ Lagɔ 'mö.

Mɔɔ kää 'nglɩ Lagɔ a 'yila 'klʋ a dɔ'wʋ,

a‑a zlɔnɩɛ 'mö.

Mɔɔ kää 'nglɩ a‑a nɛmöä Lagɔ a 'yize a ‑nʋä a sɛ.

Mɔɔ ‑saanyɩɛ 'nyinylolii a galɛ 'mö.

31 Nza Lagɔwɛlɩɩ nʋä nɩɩ:

‑Ɔ ‑kä ɔ 'kä tɛkpɔɔ,

‑Alowli Lagɔ 'mö ɔ nɩ tɛkpɔnɩ 'mö.^b