Nʋnʋlii 23

'N ɔ yuëë ‑gömö yɩlɩ ‑pölɩɩ,

ɔ lɛ naa:

«‑A'bhɩanyɩ,

Lagɔ a 'yila 'klʋ a dɔ'wʋ,

'na sɛ n nɛmöä ‑këë zɩ'ɛ,

n'n‑ä nglipälɩli nʋ zaa,

na dlɩ zɛmö ‑wʋ ‑pälɛpälɛ.»

2 Pɔɔlʋ gbää sa'aa,

Lagɔbʋbɔnyɔ 'kɔdɔɔ Ananiasɩ,

'n ɔ yiɛ ‑wa 'nɩgböä Pɔɔlʋ yɔwʋ 'dɩ 'nyɛ,

ɔ lɛ wa nɩ 'pä ɔ nuëa kɛ.

3 ‑Maa Pɔɔlʋ lɛ naa:

«'Kwlɩsɔkänyɔ nɩmä n ‑tɔnɩ a na a ‑n ‑kaa 'mözlɔnɩsɛ ‑zijle tu,

nza ‑n glɩ da'a.

‑Na'bhë 'saa 'nɩɛ 'mö zlɔnɩ mö ‑n nʋä,

‑n nɛ wa nɩ lɩbhaa 'fʋ.

‑Na'bhë ‑nmö Lagɔ 'kää 'lɩbhä.»

4 Pɔɔlʋ gbää sa'aa,

‑wa 'nigboo yɔwʋʋ,

wa lɛ naa:

«Lagɔbʋbɔnyɔ 'kɔdɔɔ Lagɔ ‑sɛɛ ‑lɛ mö ‑n bhïlanɩ bhä wɛlɩɩ ‑a?»

5 Pɔɔlʋ lɛ:

«N'n!

‑Aa,

Lagɔbʋbɔnyɔ 'kɔdɔɔ mɔ bhä?

Zaa,

n'n‑ä sɛ ‑yi.

‑Maa sɛ'ɛ yɩ'ɩɛ bhä'ɛ ‑mä Lagɔ 'a 'bɔgʋʋ 'mö cɛlɩ nɩɩ:

Nɩkpɛɛ ‑ɔ ‑gänɩɛ Lagɔ 'a ngëyii ɔ ‑sɛɛ ‑lɛ 'yukuu,

to wɛlɩzoku bhïlanɩ.^a

Zaa ‑A'bhɩanyɩ,

n'n‑ä sɛ ‑yi,

nza n gbää ‑sɩbhä.»

6‑8 ‑Maa Pɔɔlʋ ‑yi sɛ nɩɩ,

nɩkpa 'la 'wuë ‑wa yɩbhää da'a 'wluu,

wa gla'mö,

Sadwisɩɛwa ‑wʋ ‑mä 'n Falizɩɛwa ‑wʋä ‑mä.

Sadwisɩɛwaa,

sɛ'ɛ wa 'cɩa nɩkpaa nɩɩ,

nɩkpɛ ‑ka 'ku 'wëë,

Lagɔ 'naa 'kɔa'a glu ‑sɛ,

wa lɛ Lagɔzuzukwë 'nɩɛ ‑bhölɩ,

wa lɛ zuzukwë a'bhë 'nɩɛ ‑bhölɩ 'lɩlɩlɩ.

‑Maa Falizɩɛwaa wabhlɩ,

wa kɩ dlɩ wʋ nɩɩ,

nɩkpɛ ‑kä 'ku 'wë Lagɔ yo glu ‑sɛ.

Wa kɩɛ'ɛ dlɩ 'wʋ nɩɩ,

zuzuku ‑bhölɩ.

Pɔɔlʋ ‑yii ‑sɩbhä zaa,

wa 'wuë a 'yila 'klʋ,

'n ɔ yiɛ wɛlɩ ghäyɩ 'pä,

ɔ lɛ:

«‑A'bhɩanyɩ,

Falizɩɛyi a 'yu n glɩnɩɛ,

na'bhë Falizɩɛyi n glɩnɩ.

‑Maa Lagɔ 'a wɛlɩɩ ‑yɩ nʋä nɩɩ,

Lagɔ yi 'kuduwaa glu ‑sɛɛ,

'mä n kää dlɩ 'wʋ,

yɩ za n 'nɩgböä dɛ'ɛ ‑zijle 'mö.»

Pɔɔlʋ gbää sa'a cuu,

Sadwisɩɛwaa ‑nyɛ Falizɩɛwaa 'sɔ 'n wa yiɛ 'mö donɩ,

‑Zijlea 'wuë a'bhë,

'n a yiɛ 'ylimö dlinɩ ‑zɩkpö 'sɔ 'mö.

9 ‑Gëbëa 'nɩa'a ‑sɩbhä a sɛ ‑wʋ.

Sa'a ‑këë,

Moyizɩ 'a Gböö a 'cɩawa ‑mumuë ‑wa glɩnɩmöä Falizɩɛwa,

'n wa yiɛ 'wʋ ‑sɔ,

'n wa yiɛ tenyii Pɔɔlʋ a dɛ bhïla.

Wa lɛ naa:

«Nɩkpɛ nɩ,

ɔ'ɔɔ gbʋ ‑gömö ‑kä.

‑Maa zuzukwë oo,

Lagɔzuzukwëë oo,

a kɔɔ ‑kamö bhïlanɩ.»

10 Kpɛnɩkpɛnɛ sumanɩɛ 'mö tenyii,

'n 'kämanɩnyɔ 'kɔdɔ 'la nganɔ yoo 'lɩbhä,

wa tɩa Pɔɔlʋ 'wʋ 'titli a za,

'n ɔ yiɛ 'ɔ 'slʋjaa 'dɩ 'nyɛ nɩɩ,

wa nɩ mö wa 'kɔ ‑mä ‑zijle 'mö ‑glasɛ ‑sɛ.

'N wa yoo ‑mä ‑sɛɛ mö,

'n wa yoo ‑mä 'slʋjaligbë 'mö 'bɩwʋ kwä.

11 Zlɩ ‑mɛ'la a sabʋ,

'n ‑Alowli yiɛ Pɔɔlʋ 'ylimö ghlɛ,

ɔ lɛ naa:

«Pɔɔlʋ,

'tɛmanɩ 'yli yɔwʋ,

‑maa sɛ ‑n bhïlaa na dɛ nɩkpabhë a 'yila 'klʋ mä'ä Zeluzalɛɛmöö,

‑sɩbhä ‑n 'kä'ɛɛ ‑mä Ghlɔɔmö na dɛ bhïlamö.»

Zwiiföwa ‑mumuë yɛ Pɔɔlʋ a 'dɩ zʋ

12 ‑Maa Zwiiföwaa wabhlɩ,

zlɩ zɩɛ,

wa gla'mö a ‑mumuë 'n wa yiɛ 'dɩ 'zʋ,

zligo wa zligoo nɩɩ,

wa 'nɩ Pɔɔlʋ 'lɩbhä ɔ 'kä 'ku 'wëë,

wa 'naa 'kä du ‑sɛ.

13 Nɩkpa 'la ‑wa zligoo,

wa bhlɩ nɩkpa a gwɩ 'sɔ yɛ'mö.

14 Lagɔbʋbɔwaa a 'kifiea ‑nyɛ Zwiiföwaa 'a 'nɛɛnɩwa 'kädɩ 'sɔ,

'mö wa ghlɩɛ ‑mä,

wa lɛ naa:

«‑A yɛ zligo nɩɩ,

a‑a 'nɩ Pɔɔlʋ 'lɩbhä ɔ 'kä 'ku 'wëë,

‑a 'naa 'kä du ‑sɛ.

15 Zaa,

abhʋa abhlɩ,

a ‑nyɛ ‑zijlituwa ‑muë'la 'wuë 'sɔ,

a nɩ ghlɩ ‑mä 'slʋjaa 'a 'kämanɩnyɔ 'kɔdɔɔ,

a 'kɔ 'dɩ 'nyɛ nɩɩ,

ɔ nɩ ‑lɛmanyɩ 'wʋ 'sɔ Pɔɔlʋ,

a 'kä sasɛ 'ɔ wɛlɩɩ 'ylɩmö.

‑Maa ‑abhʋa ‑abhlɩ,

wa ‑nyɔɔ ‑kä mä'ä yi dɔ'wʋ ‑wʋʋ,

‑mä 'yio 'wʋ ‑mä ‑a 'kɔɔ köbhänɩ,

‑a 'kɔ 'lɩbhä.»

16 ‑Maa ‑lɛ a wɛlɩ 'la,

Pɔɔlʋ a nglʋdaayu a 'yu mɔɔ 'nwiɛ,

'n ɔ yiɛ ‑mä 'slʋjagbë 'mö mö,

'n ɔ yiɛ ‑sɩbhä Pɔɔlʋ 'dɩ 'nyɛ.

17 'N Pɔɔlʋ yiɛ 'slʋjeyi 'kɔdɔ ‑bhlʋ wäzɩ,

ɔ lɛ naa:

«Nyɛgbayu nɩ,

kwɔ ‑mä 'kämanɩnyɔ 'kɔdɔɔ a mä'a,

‑maa ɔ 'kä 'kïbhë 'mlɩ ɔ 'kɔnyɩ 'nyɛ.»

18 'N 'slʋjeyii yoo ‑mä kwä.

Wa ghlɛɛ ‑mää,

ɔ lɛ naa:

«Pɔɔlʋ ‑ɔ ‑wʋä ‑mä ‑jie 'möö,

mɔɔ tieaaa,

ɔ lɛ n nɩ ‑lamö nyɛgbayu nɩ,

‑maa ɔ kä 'kïbhë 'mlɩ ɔ ‑kama 'nyɛ.»

19 Ɔ gbää sa'aa,

'n 'kämanɩnyɔɔ yiɛ nyɛgbayuu sɔ köbhänɩ,

'n ɔ ‑nyɔɔ yiɛ zigbanɩ,

ɔ lɛ naa:

«Wɛlɩ ‑mi ‑n ‑kaa bhä 'nyɛ?»

20 Ɔ lɛ naa:

«Yɩɛ,

Zwiiföwaa,

wa yɛ 'dɩ zʋ,

zlɩ ‑kä zɩɩ,

wa ‑kamö Pɔɔlʋ 'yɩbhänɩɛ yi,

‑mä ‑zijlituwa 'kädɩɩ a 'yila 'klʋ ‑n 'kɔ ‑mä kwä.

Wa lɛ wa ‑kä yii,

sɛ'ɛ wa 'kää nɩɩ,

wa 'kä sasɛ 'ɔ wɛlɩɩ 'ylɩmö nʋ.

21 Wa ‑kä sa'a nʋʋ,

tuëa 'yukwli ‑pʋnɩ,

yio wa käaa.

‑Maa yɩɛ,

wa gla'mö a ‑mumuë,

wa yi nɩkpa a gwlɩ 'sɔ a'bhë yɛ'mö 'plɩ,

mʋa 'kää ‑mä 'yio 'wʋ zizo wa 'kä Pɔɔlʋ köbhä wa 'kɔ 'lɩbhä.

Nɩkpa 'la sɛ'ɛ wa zligoo nɩɩ,

'n wa 'nɩ Pɔɔlʋ 'lɩbhä ɔ 'kä 'ku 'wëë,

wa 'naa 'kä du ‑sɛ.

Wa yɛ 'wlu gïganɩ 'wë,

‑n 'kä 'wʋ nglu,

'mö wa ‑kʋa'aa cuu.»

22 Nyɛgbayuu 'nyɔɔ sa'a 'dɩɩ,

ɔ lɛ naa:

«N 'kɩ 'nʋ,

mö ‑maa tia'a käbödɛ ‑sɛnɩ nɩɩ,

‑n ‑kaa ‑sɩbhä 'dɩ 'nyɛ.»

Wa yɛ Pɔɔlʋ ‑mä Sezalee kwä

23 Nyɛgbayuu möä 'wëë,

'n 'slʋjaa a 'kämanɩnyɔɔ yiɛ 'slʋja 'kädɩ 'sɔ wäzɩ,

'n ɔ yuëë 'dɩ 'nyɛ nɩɩ:

«A nɩ ‑sɛ 'slʋjaa a gwlɩ kʋgbä,

a nɩ ‑sɛ'ɛ 'slʋjaa a gwlɩ ta kʋgbä,

‑wa ‑suä ‑sʋkwiea,

'n gwlɩ kʋgbä'ɛ,

‑wa ‑suä 'liea.

A 'wuë a nɩ gïganɩ 'wlu,

zɩ'ɛ a sabʋgïle ngbï‑mʋäna 'mö a 'kä 'wʋ ‑sɔ ‑mä Sezalee a 'kä ‑mä mö.

24 A nɩ gïganɩmö'ɛ ‑sʋkwie ‑mimii 'wlu,

yɩ 'kä Pɔɔlʋ ‑su 'tɩɩ,

‑mä Sezalee,

'kämanɩnyɔ 'kɔdɔɔ Felisɩ yɔwʋ yɩ 'kɔ ‑mä ghäla ‑pälɛpälɛ.»

25 'N ɔ yiɛ 'bɔgʋ 'cɛlɩ ɔ 'kʋ Felisɩ 'wʋ 'pä,

ɔ lɛ naa:

26 «‑Amö Klodɩ Liziasɩ,

‑amöö 'cɛlɩɛ 'bɔgʋ nɩ,

‑nmö 'kämanɩnyɔ 'kɔdɔɔ Felisɩ,

‑nmö n pʋä 'wʋ.

27 Nɩkpɛ nɩ n paamöä dɛ'ɛ 'yio 'wʋ,

'ylɩ ‑bhlʋ 'mö Zwiiföwaa mʋa gbuloo 'wʋ,

wa 'kɔ 'lɩbhä ɔ 'kä 'ku.

‑Maa n 'nʋä nɩɩ,

‑lɔ 'mö a dɔ'wʋ,

Ghlʋmɛɛyi ɔ glɩnɩɛ,

'n n yiɛ 'na 'slʋjaa 'wʋ 'libhï,

a‑a yuënyɩɛ ngli ‑sɛɛ mö.

28 ‑Maa ɔ ‑nyɛ Zwiiföwaa 'sɔ,

wɛlɩɩ ‑yɩ ‑wuëë jijo'wʋʋ,

n 'yɩbhä a klɩpaa n 'kɩ yɩbhlɩnɩ zaa,

'n n yiɛ 'wa ‑zijlituwa 'kädɩɩ 'wuë 'wlu 'yɩbha,

'n n yoo ɔ'bhë ‑mä ‑zijle 'mö kwä.

29 ‑Zijle 'la a zlɩ,

‑lɛ n 'yɩɛ 'ylɩmö nɩɩ,

'kïbhë a ‑maa 'kää 'nglɩ ‑kä ɔ 'kä 'lɩbhɔ ɔ 'kä 'kuu,

‑a 'kä'ɛɛ 'nglɩ ‑kä a'bhë ɔ 'kä ‑jie 'mö pɔɔ,

a'aa ‑bhölɩ 'lɩlɩlɩ.

‑Maa 'mö Zwiiföwaa,

'wa gböö 'mö a kïbhï ‑mimii wa lɛ 'mö ɔ ‑sɛɛ 'klʋkpamö,

yɩ za wa yoo 'klɛɛ.

30 ‑Sɩkaa a dɔ'wʋ 'fʋ n ‑nɩmɔa'a dɛ'ɛ 'yio 'wʋ 'pä,

‑maa n yɛ 'nʋ nɩɩ,

Zwiiföwaa yɛ 'dɩ 'zʋ,

wa 'kɔ 'lɩbhä ɔ 'kä 'ku,

nza n 'päpanɩɛ 'wʋ 'n n ‑yimɔɔ 'yio 'wʋ 'pä,

'n n yuëë 'dɩ 'nyɛ nɩɩ,

‑ɔ ‑kä ɔ 'kïbhë 'mlɩ ‑kä,

ɔ nɩ ghölɩmö ‑mä,

ɔ ‑kamɔ yɔwʋ 'klɛnɩ.

Wɛlɩɩ n gbä a‑a n ‑kamö 'nyɛɛ,

miɛ da'a.»

31 'Slʋja 'la,

sɛɛ 'wa 'kämanɩnyɔɔ 'nyʋää 'dɩɩ,

'n wa yiɛ ‑sɩbhä 'wlu gïganɩ,

sabʋ ‑bhʋlʋ ‑kpɔ 'la 'mö 'n wa yiɛ Pɔɔlʋ 'wʋ 'libhï,

'n wa yiɛ 'wʋ ‑sɔ.

Wa möä ‑këë ‑glɔɔ wa laa Atipatlisɩ 'n wa yiɛ ‑mä ghlɛ.

32 Zlɩ zɩ'ɛ,

'slʋjaa ‑waaa ‑sʋkwie ‑suu,

'n wa yiɛ 'wlu sɩbhä wa 'kä Zeluzalɛɛmö 'bɩwʋ mö,

‑maa ‑sukwiesuwaa wabhlɩ,

wa 'bhööä ‑mä Atipatlisɩ,

'n wa yiɛ Pɔɔlʋ ‑mä Sezalee kwä.

33 Wa ghlɛɛ ‑mä,

'n wa yiɛ Pɔɔlʋ ‑gɔmla 'kɔdɔɔ yowʋ 'nyɛ,

'n wa yoo 'bɔgʋʋ yowʋ 'nyɛmö.

34 'N ‑gɔmla yiɛ 'bɔgʋʋ 'mö zɛlɩ.

Ɔ zɛluä 'mö 'wëë,

'n ɔ yiɛ Pɔɔlʋ nimï 'yɩbhä,

ɔ lɛ naa:

«Bhlɩ ‑mɛ 'mö a nɩkpɛ ‑n glɩnɩ bhä?»

Ɔ lɛ naa:

«Silisii‑bhölɩɩ 'mö a nɩkpɛ n glɩnɩɛ.»

Pɔɔlʋ gbää sa'aa,

35 ɔ lɛ naa:

«N kɩ nʋ,

‑maa ‑wa kälamöä,

wa 'maa 'kä yi 'wë,

'n n 'kää ‑na'a wɛlɩɩ 'ylɩmö.»

'N ɔ yiɛ nɩkpa 'dɩ 'nyɛ nɩɩ,

wa nɩ 'zʋ ‑bhlɛ Pɔɔlʋ ‑mä ‑gɔmlaligbë 'mö wa 'kɔ ‑kʋ.

'Ligbë 'la,

'bhlɩlowli 'kɔdɔ Eloodɩ mɔɔ 'sɩbha a‑a.