Nʋnʋlii 9

Sɔɔlʋ yɛ Zezwii a ‑nɔ 'zʋ

‑Lɛ a 'tɛnyɩ 'la 'mö,

Sɔɔlʋ,

Zezwii 'a ‑gänɩwaa,

‑gblɩ ɔ ‑gbluë a‑a tenyii.

Ɔ lɛ naa:

«N yuë 'yli bhɩa.»

'N ɔ yiɛ Lagɔbʋbɔnyɔ 'kɔdɔɔ ‑mä ghlɩ.

2 'N ɔ yoo 'bɔgwɩ 'yɩbhänɩ,

ɔ 'kä ‑mä Damasɩ mö,

ɔ 'kɩ ‑mä a Zwiiföwaa a Lagɔbïdii a 'kifiea yowʋ 'nyɛ,

nzɩɩ ‑wa ‑gänɩɛ Zezwii 'a wɛlɩɩ,

wa ‑kʋä gla'mö ‑wʋʋ,

ɛ yi nyɩbhɛlɩ oo,

ɛ yi ngwlɩ oo,

Lagɔbïdii a 'kifiea 'kɔ 'yi 'tatinɩ ɔ 'kʋä köbhä,

ɔ ‑nyʋä 'kä ‑mä Zeluzalɛɛmö yi.

3 Ɔ ‑wʋ mö dɔ'wʋ,

ɔ lɛ 'kä Damasɩ glɔ ghlɛɛ yi cuu,

‑mä zlɩ 'mö,

'ylʋväla a sɛ a 'dɛlɩ,

'n yɩ yiɛ ‑mä 'bhöönɩ,

'n yɩ yoo 'wʋ ngäla.

4 'N ɔ yiɛ bhli.

Ɔ pö ‑lɛ dʋdʋ 'wʋ,

'n ɔ yiɛ wɛlɩ 'nʋ,

yɩ lɛ naa:

«Sɔɔlʋ,

sɛ yɩ ‑wʋ ɔ 'mö,

n‑n ‑gblɩɩ bhä 'nɩ?»

5 Ɔ lɛ naa:

«‑Atʋ,

‑a 'yɩ bhä ‑na 'nglɩ?»

Wɛlɩɩ lɛ naa:

«‑Amö Zezwii ‑n ‑gblɩɛ,

‑amöä.

6 ‑Maa ‑sɔ 'wʋ ‑n 'kä ‑mä glɔ 'mö mö.

‑N ‑kä ‑mä ghlɛɛ,

sɛ ‑n 'kää zʋʋ,

wa ‑yimö ‑sɩbhä sʋlʋnɩ.»

7 Nɩkpa ‑wa ‑gänɔ a‑a,

wa 'nɩgbö ‑lɛ.

Wa 'nʋmö wɛlɩ 'la,

‑maa wa'aa nɩkpɛ 'ylɩmö zaa,

yɩ 'nuë gbʋdɩdɛ 'nyɛ.

8 ‑Maa Sɔɔlʋ ‑sɔɔ 'wʋʋ,

ɔ lɛ lɩa a yilaa,

ɔ'ɔa'a sɛ yɩlɩ.

'N wa yoo sɔ köbhänɩ,

'n wa ‑nyɔɔ yiɛ ‑mä Damasɩ glɔ 'mö mö.

9 'Ylɩ ta,

ɔ'ɔɔ sɛ yɩlɩ,

ɔ'ɔɔ li,

ɔ'ɔɔ 'nɩmä.

10 ‑Mä Damasɩ glɔ 'mö,

nɩkpɛ ‑bhlʋ ‑wʋ a ‑mä.

Zezwii a ‑gänɩnyɔ ɔ glɩnɩɛ.

Ɔ nglɩɛ Ananiasɩ.

Nɩkpɛ 'la,

'n ɔ yilaa yiɛ do,

'n ɔ yiɛ ‑Alowli Zezwii 'ylɩmö,

'n ɔ yoo 'dɩ 'nyɛ,

ɔ lɛ naa:

«Ananiasɩ.»

Ananiasɩ lɛ:

«‑A'a,

‑Atʋ!»

11 Ɔ lɛ naa:

«‑glɔ nɩ 'mö a 'yio wa laa ‑wʋ zlɔnɩ 'möö,

‑sɔ 'wʋ ‑n 'kʋ bhli.

‑Maa ‑mä Zwidaa a 'ligbë 'mö,

nɩkpɛ ‑bhlʋ wa laa Taasɩ a Sɔɔlʋ,

ɔ ‑wʋ ‑mä.

'Yɩbhä nimï wa ‑kamɔ 'pänɩ.

Nɩkpɛ 'la ɔ'ɔɔ sɛ yɩlɩ.

Ɔ ‑wʋ bhibhe dɔ'wʋ,

12 'n nɩkpɛ ‑bhlʋ wa laa Ananiasɩ yoo 'yila 'klʋ yi,

'n ɔ yoo nimï plɛnɩ,

'n ɔ yoo kätɩkpö 'wlu zʋ,

ɔ 'kä sɛ yɩlɩmanɩ.»

13 Ananiasɩ lɛ naa:

«‑Atʋ,

n 'kɩ nʋ,

‑maa nɩkpɛ 'la,

‑lizokuu ɔ nʋnɩ a‑a ‑mä Zeluzalɛɛmö ‑na ‑nʋa 'wluu,

‑zu yɩ ‑zuä tenyii.

Saa 'wuë,

wa bhïla ‑sɩbhä yɩ dɛ.

14 ‑Sɩkaa a dɔ'wʋ,

ɔ yiɛ mä'ä Damasɩɩ,

Zwiiföwaa a Lagɔbʋbɔwaa a 'kifiea mʋa tioo,

nzɩɩ ‑wa 'ghlimanɩɛ ‑na'a nglɩɩ,

wa 'wuë ɔ 'kʋä köbhä.»

15 ‑Maa Zezwii lɛ naa:

«Ananiasɩ,

mä n tieamöä,

mö ‑mä.

‑Maa nɩkpɛ 'la,

n kɔ ‑sɛ,

n 'kɔ tie ɔ 'kä na libho nʋ.

'Bhlɩbhëa 'wuë ‑nyɛ 'wa 'bhlɩlowluwaa 'sɔ,

'n Yizlaɛlɩ a ‑nʋa,

wa 'wuë a 'yila 'klʋ,

ɔ 'kä 'na nglɩɩ bia.

16 Sɛ ɔ 'kää na za 'zwɩ a ‑bɛ zii,

na'bhë n yo ‑sɩbhä 'dɩ 'nyɛ.»

17 'N Ananiasɩ yia'aa mö.

Ɔ ghlɛɛ ‑lɛ 'ligbë 'möö,

'n ɔ yiɛ ‑mä ‑budu 'mö plɛ 'n ɔ yiɛ Sɔɔlʋ kätɩkpö 'wlu zʋ.

Ɔ lɛ naa:

«‑Atʋayu Sɔɔlʋ,

‑Alowli Zezwii ‑n ‑nyɛɛ gbanɩ a‑a 'wʋʋ,

mɔɔ tieaa.

Ɔ yɩbhä ‑na'a yilaa nɩ do,

'n ɔ yɩbhä'ɛ 'Wugɔmʋʋ 'Wlɩlɩ nɩ yiimö ‑gömö.

Nza ɔ tieaa.»

18 Ɔ gbää sa'a cuu,

‑lii ‑yɩ 'wlʋä ‑mä Sɔɔlʋ 'yila 'möö,

yɩ ‑bhɩɛ 'takwɩ,

'n 'ɔ yilaa yiɛ lɩ.

'N ɔ yiɛ 'wʋ ‑sɔ,

'n wa yoo 'wlu wɔlʋ.

19 'N ɔ yiɛ li,

'n nyɛmʋ yoo mö yi.

‑Mä Damasɩ,

Zezwii 'a ‑gänɩwaa gla'mö,

Sɔɔlʋ ‑sɛ ‑mä 'ylɩya.

20 ‑Lɛ a 'tɛnyɩɩ ‑bhʋlʋ ‑kpɔ 'mö,

'n ɔ yiɛ ‑mä a Lagɔbïdii 'mö mö,

'n ɔ bhïlanɩɛ ‑mä nɩkpabhë a 'yila 'klʋ nɩɩ:

Zezwii,

Lagɔ 'a yuu ‑bhʋlʋ ‑kpɔ 'mö ɔ glɩnɩɛ.

21 ‑Maa ‑wa ‑pʋnɔɔ 'yukwlii,

wa 'wuë nglii yʋää 'n wa nʋä:

«'Ɔ!

Zezwii a ‑nʋa ‑wa 'ghlimanɩ a‑a ɔ 'nglɩ ‑mä Zeluzalɛɛmöö,

nɩkpɛɛ ‑ɔ bhɩʋä a‑a 'wlu ɛ'ɛ ‑bhö bhä da'a mɔ ‑a?

Ɔ 'kä mä'ä a ‑nʋa köbhä,

ɔ 'kʋä Lagɔbʋbɔwaa a 'kifiea kä'mö plɩnɩ,

nza ɔ'ɔɔ bhä mä'ä yi ‑a?»

22 Wa ‑kä sa'a nʋʋ,

'n Sɔɔlʋ a ‑lii ‑suä 'mö,

'n ɔ sɛsɛnɩɛ sasɛ Damasɩ a Zwiiföwaa dlɩ ‑gömö nɩɩ:

«Puënyɔɔ Lagɔ ‑sɛɛ ‑lɛ,

'mö Zezwii glɩnɩɛ.»

‑Maa wa'aa sɛ wa 'kä gbää ‑yi.

23 'Ylɩya 'plɩɛ,

'n wa yiɛ ylɩ plɛ wa 'kɔ 'lɩbhä ɔ 'kä 'ku.

24 ‑Sɩbhä a za ɛ yi sabʋ oo,

ɛ yi zlɩ ‑gä oo,

Zwiiföwaa,

'kpakwëa ‑a ‑binɩɛ ‑glɔɔ a ngloluu,

'mö wa ‑kʋä wa 'kä Sɔɔlʋ köbhä,

wa 'kɔ 'lɩbhä ɔ 'kä 'ku.

Wɛlɩ 'la,

'n Sɔɔlʋ yiɛ 'nʋ.

25 ‑Maa sɛ'ɛ sabʋsɛ,

'n Sɔɔlʋ 'a ‑gänɩwaa yiɛ ‑mä ‑glɔɔ a 'kpakwëa 'wlu ‑gbälɛ 'n wa yoo ‑käka 'käda ‑bhlʋ 'mö 'gïla,

'n wa yoo ‑mä 'kpakwëa nimï 'likpï 'mö 'kwïlanɩ.

Sɔɔlʋ yɛ ‑mä Zeluzalɛɛmö mö

26 Sɔɔlʋ ghlɛɛ ‑mä Zeluzalɛɛmöö,

ɔ yɩbhä a ɔ 'kä Zezwii 'a ‑gänɩwaa gla'mö plɛ,

‑maa ‑gu wa goo.

Wa ‑kʋä 'dɩ 'nyɛ nɩɩ,

ɔ yɛ Zezwii 'a ‑gänɩnyɔ 'zʋʋ,

wa 'niɛ dlɩ 'wʋ ‑kä.

27 ‑Maa wa gla'mö a nɩkpɛ ‑bhlʋ wa laa Banabasɩ,

'n ɔ yiɛ Sɔɔlʋ 'wʋ 'libhï,

'n ɔ ‑nyɔɔ yiɛ ‑mä Zezwii 'a tietiewaa ghlɩ.

Wa ghlɛɛ ‑mä,

'n Banabasɩ yuëë 'tɩtɩ 'nyɛ.

Ɔ lɛ naa:

«Sɔɔlʋ,

ɔ ‑wʋ ‑mä Damasɩ mö dɔ'wʋʋ,

‑Alowli Zezwii a'bhë 'n ɔ yoo ɔnyɩ 'ylimö tulanɩ,

'n ɔ yoo 'dɩ 'nyɛ.

‑Mä damasɩ glɔ 'mö,

Sɔɔlʋ yɛ ‑mä nɩkpabhë a 'yila 'klʋ nyɩbhɛlʋsɛ Zezwii 'a wɛlɩɩ bhïlanɩ.»

28 'Bhöönɩa'a ‑lɛ Sɔɔlʋ,

ɔ ‑nyɛ Zezwii a ‑nʋa 'sɔ,

'wʋ wa ‑bhlinɩa'aa 'kwädlɩ.

‑Mä Zeluzalɛɛmö,

'n ɔ bhïlanɩɛ ‑mä nɩkpabhë a 'yila 'klʋ Zezwii a 'nglɩ 'mö.

29 ‑Maa Zwiiföwaa ‑wa bhïlaa Glɛkögbʋ ɔ 'nyɛmö'ɛɛ 'dɩɩ,

wa ‑nyɔɔ 'sɔ 'n wa yiɛ kpɛnɩ.

Nɩkpa 'la,

wa yɩbhä a wa 'kɔ 'lɩbhä ɔ ‑kä 'ku.

30 Zezwii a ‑nʋa 'nwiɛ,

'n wa yiɛ Sɔɔlʋ ‑mä Sezalee glɔ 'mö 'yio 'wʋ kwä,

'n wa yoo 'dɩ ‑nyɛ nɩɩ,

ɔ nɩ mö ɔ 'bhele Taasɩ,

'n ɔ yiɛ ‑mä mö.

31 ‑Lɛ a 'tɛnyɩ 'la 'mö,

Zezwii a ‑nʋa ‑zɩkpöö 'wuë,

ɛ yi ‑mä Zwidee‑bhölɩɩ 'mö a ‑nɩɩ mi oo,

ɛ yi ‑mä Galilee‑bhölɩɩ 'mö a ‑nɩɩ mi oo,

ɛ yi'ɛ ‑mä Samalii‑bhölɩɩ 'mö a ‑nɩɩ mi oo,

yɩ 'wuë 'mö a ‑nʋa,

wa glɩ ‑pälɛpälɛ,

'n wa 'tɛmanɩɛ 'kwädlɩ 'yli yɔwʋ 'yize 'n wa zʋä Lagɔ 'klʋkpamö 'tɩɩ.

'Wugɔmʋʋ 'Wlɩlɩ mɔɔ pʋä swɩ nyɛmʋ 'mö 'n wa zumanɩɛ 'yize.

Piɛlɩ yɛ Zezwii a 'nglɩ 'mö Enee yɛmanɩ

32 ‑Maa Piɛlɩ ɔbhlɩ,

bhlɩɩ 'wuë 'mö ɔ biɛ 'wʋ.

'Ylɩ ‑bhlʋ 'mö,

glɔ ‑bhlʋ wa laa Lidaa,

Zezwii a ‑nʋa ‑wa ‑wʋä ‑mä,

'n ɔ yuëë 'ylɩmöä mö.

33 Ɔ ghlɛɛ ‑mä,

ɔ ghlɩ ‑mä nɩkpɛ ‑bhlʋ,

'mö wa laa Enee.

Nɩkpɛ 'la,

kpälɛkpälɛnyɔɔ,

gu kɔɔ ‑bhlɛ 'ylʋbö ‑gbʋäta 'lɩbhänɩ.

Zaa,

‑sɩsɛlɛ 'wʋ ɔ pöä 'kwädlɩ.

34 Piɛlɩ ghïloo ‑lɛɛ,

'n ɔ yoo 'dɩ 'nyɛ,

ɔ lɛ naa:

«Enee,

Zezwii Kliisɩ ‑kamö yɛmanɩ.

Zaa,

‑sɔ 'wʋ ‑n 'kä ‑na'a ‑sɩsɛlɛɛ göglɩna.»

Ɔ gbää ‑sɩbhä cuu,

'n ɔ yiɛ yɛmanɩ,

'n ɔ yiɛ 'wʋ ‑sɔ.

35 ‑Mä Lidaa a ‑nʋa 'wuë,

wa ‑nyɛ ‑lɛ a bhlɩ wa laa Salɔɔ 'mö a ‑nʋa 'wuë 'sɔ,

wa 'yɩɛ nɩkpɛ 'la a yɛmanɔɔ 'ylɩmöö,

'n wa yiɛ ligba,

'n wa yiɛ Zezwii 'a wɛlɩɩ 'wʋ nglu 'n ɔ yiɛ wa ‑lowli 'zʋ.

Piɛlɩ yɛ Dɔkasɩ ɔ 'ku a‑a gäla

36 ‑Glɔɔ ‑bhlʋ wa laa Zopee,

‑mä wʋ 'mö,

'nglɔ ‑bhlʋ ‑wʋ a ‑mä.

Zezwii a ‑nɔ ɔ glɩnɩɛ.

Ɔ nglɩɛ Tabitaa.

Glɛkögbʋ 'mö a dɔ'wʋ,

'mö wa laa Dɔkasɩ,

mɩɩ sɛɛ zɛmö nɩɩ,

‑jɛnglɔ.

Nglɔ 'la,

‑li a ‑li ɔ nʋ a‑a 'kwädlɩ 'n ɔ nyɛ a‑a 'pʋäwa.

37 'Ylɩ ‑bhlʋ 'mö 'n gu yoo 'lɩbhä,

'n ɔ yiɛ 'ku.

Wa bidaa ɔ ‑gäzɛ 'wëë,

‑budu ‑bhlʋ a ghäyɩ 'wʋ a kïbhëa 'mö,

'n wa yee ‑mä sɛ 'pïla.

38 Zezwii 'a ‑gänɩwaa ‑wa ‑wʋ a‑a ‑mä Zopee,

'n wa yiɛ 'nʋ nɩɩ,

Piɛlɩ ‑wʋ ‑mä Lidaa.

Lidaa a ‑glɔ ‑nyɛ Zopee a ‑nʋʋ 'sɔ,

yɩ'ɩɛ dɛ ‑tlʋtlʋnɩ.

Zaa,

'n wa yiɛ ‑mä nɩkpa 'sɔ tie wa 'ka Piɛlɩ kie mö,

ɔ 'kä ‑sɩkaa ‑sɩkaa yi.

Wa möä,

'n wa yoo 'dɩ 'nyɛ.

39 'N Piɛlɩ yiɛ 'wʋ ‑sɔ,

ɔ ‑nyʋä 'sɔ,

'n wa yiɛ ‑sɩkaa ‑sɩkaa yɔwʋ yinɩ.

Wa ghlɛɛ glɔ,

‑mä ‑buduu 'mö mää ‑gäzɛɛ pöä,

'n wa yiɛ ‑mä Piɛlɩ kwä.

'Kuzlengwlɩ a ‑bɛ nglɔ 'la nʋ a‑a ‑li a ‑li 'wluu,

wa ‑wʋmö a ‑mä.

Wa ‑wʋ 'wi dɔ'wʋ 'n wa yiɛ Piɛlɩ yɔwʋ yi.

‑Banɩɩ nglɔ 'la 'kplʋä a‑a 'wʋʋ,

'n wa tulaniɛ Piɛlɩ 'ylimö.

40 'N Piɛlɩ yiɛ nɩkpa 'wuë 'dɩ 'nyɛ 'n wa yiɛ zɛmö 'wlʋ.

'N ɔ yiɛ ‑kokomïladigbï glu 'pä,

'n ɔ yiɛ Lagɔ bhibhe.

'N ɔ yiɛ ‑gäzɛ a 'bɛyɩ yi gö,

ɔ lɛ naa:

«Tabitaa,

‑sɔ 'wʋ.»

Ɔ gbää ‑sɩbhä cuu 'n nglɔ yiɛ yilaa lɩa.

Ɔ 'yɩɛ Piɛlɩ 'ylɩmöö,

'n ɔ yiɛ gwë glɩnɩ.

41 'N Piɛlɩ yoo sɔ köbhänɩ 'n ɔ yoo 'wlu 'libhï,

'n ɔ yiɛ ghäyɩ 'nɩgbönɩ.

'Kuzlengwlɩ 'la ‑nyɛ Zezwii a ‑nʋä ‑muë'la 'sɔ,

'n Piɛlɩ yuëë wäzɩ,

ɔ lɛ naa:

«Tabitaa yɛ gɔlɔ,

mɔɔ da'a.»

42 ‑Lɛ a wɛlɩ 'la,

'n yɩ yiɛ ‑glɔɔ 'wuë 'mö gbɔlɔnɩ.

Nɩkpa a ‑bɛ,

wa 'nwiɛ,

'n wa yiɛ 'wʋ nglu Zezwii 'kä wa ‑lowli 'zʋ.

43 ‑Lɛ a 'tɛnyɩ 'la 'mö,

Piɛlɩ gwälɛ ‑mä Zopee.

Nɩkpɛ ‑bhlʋ wa laa Simɔɔ,

ɔ 'ligbë 'mö ‑lɛ ɔ glɩɛ.

Nɩkpɛ 'la,

nɩmakwïbhɔtɔnyɔ ɔ glɩnɩɛ.