Zezwii yɛ'ɛ ɔnyɩ 'ɔ ‑gänɩwaa 'ylimö tulanɩ
21
Zezwii 'wlʋä glu 'wëë,
ylɩ ‑mɛmɛɛ 'mö'ɛ,
‑mä Tibeliadɩ a 'nyu 'kɔdʋʋa yɔwʋ,
'n ɔ yiɛ ‑mä 'ɔ ‑gänɩwaa ɔnyɩ 'ylimö tulanɩ.
Sɛ yɩ 'plɩɛ 'wʋʋ,
‑sɩbhä ma‑a dɛ'ɛ.
2 'Ylɩ ‑bhlʋ 'mö,
Simɔɔ Piɛlɩ mɔ,
Tomaa wa laa Pʋwayu mɔ,
Galilee‑bhölɩɩ 'mö a ‑glɔɔ wa laa Kanaa,
‑mä a nɩkpɛɛ Natanaɛlɩ mɔ,
Zebedee ‑yowluwa muë 'n Zezwii a ‑gänɩwa ‑mumuë 'sɔ 'yɛ,
wa 'wuë wa glɩ ‑lɛ.
3 'N Simɔɔ Piɛlɩ yuëë 'dɩ 'nyɛ,
ɔ lɛ naa:
«N yɛɛ ‑dɛda ‑pää mö.»
Wa lɛ naa:
«‑A yi 'mämö.»
'N wa yiɛ 'wʋ ‑sɔ 'n wa yiɛ mö.
Wa möä,
'n wa yiɛ 'gɔlʋ 'wʋ 'libhï,
‑maa ‑lɛ a sabʋ 'la,
wa 'pää,
wa'aa ‑lu 'lɩbhä.
4 ‑Maa zlɩzɩdɔ'wʋ,
wa lɛ zʋ a sɛ'ɛ cuu,
Zezwii 'nɩgbö ‑lɛ 'nyu nuë 'wʋ.
Wa 'yo 'ylɩmö,
‑maa wa 'nɔɔ yɩbhlɩnɩ.
5 Ɔ lɛ naa:
«Na 'yuënyɩ,
a 'lɩbhä ɔ ‑lu ‑a?»
Wa lɛ naa:
«N'nn,
‑aaa ‑lu 'lɩbhä.»
6 Ɔ lɛ naa:
«A nɩ 'pänɩ ‑mä gɔlʋʋ a luukɛ 'wʋ 'a ‑dɛdaa,
‑maa a yi ‑lu 'lɩbhä.»
'N wa yeaa ‑mä 'pä.
‑Maa wa 'kaa'a jli wa 'ka ‑mä ‑sɛɛ yii,
zibhï a zunɔɔ a za,
wa 'naa bhɛnɩ.
7 ‑Maa Zezwii 'a ‑gänɩwaa a gla'mö a ‑nɔɔ ‑ɔ ‑glɛɛ tenyii Zezwii dlɩ 'wʋʋ,
ɔ 'yiɛ ‑sɩbhä 'ylɩmöö,
ɔ lɛ:
«Piɛlɩ,
‑Alowli mɔaa.»
Ɔ 'nyɛɛ Piɛlɩ sa'a 'dɩɩ,
Piɛlɩ 'nɩɛ a 'ɔ ‑bänaa 'mö ‑pla zaa,
'n ɔ yeaa 'mö päla,
'n ɔ yiɛ ‑lɛ 'nyu 'klʋ bhlinɩ.
8 Piɛlɩ bhlinɩɛ ‑lɛ 'nyu 'klʋ 'wëë,
‑muë'la wabhlɩ wa ‑wʋ ‑mä 'gɔlʋ 'mö,
‑dɛdaa yie zibhï 'wʋ,
wa ‑waa jli dɔ'wʋ,
'n wa yiɛ ‑mä 'kïkë 'wlu mö,
wa'aa a 'yuku ‑wʋ.
'Bhöö ‑lɛ 'kïkë 'wlu,
'mɛtile a gwlɩ ngbï 'wʋ a sɛ wa ‑wʋ a‑a.
9 Wa köbhää kïkëa,
wa kwliɛ,
wa lɛ 'bhöö'ɛ,
‑lɛ 'kïkë 'wlu,
‑kosu ganɩɩ ‑lɛ,
zibhï ‑ngu ‑mä,
'fɔlɔ ‑wʋmö'ɛ ‑lɛ.
10 'N Zezwii yuëë 'dɩ 'nyɛ nɩɩ:
«Zibhïï a 'lɩbhää da'aa,
a nɩ ‑laa ‑ka yɩ 'yɛya.»
11 Ɔ gbää sa'aa,
'n Simɔɔ Piɛlɩ yiɛ ‑mä 'gɔlʋ 'mö ‑gbälɛ,
'n ɔ yiɛ ‑dɛdaa gbɩsɩ,
zibhïi a yiee 'wʋʋ,
yɩ 'kädɩ 'kädɩ,
wa zeliɛ,
yɩ ‑bhli zibhï a gwlɩ ngbi'sɔ zibhïya kʋgbä ta,
‑maa ‑sɩbhä yɩ ‑wʋ 'mö,
‑dɛdaa 'nɩɛ 'kpɔ do.
12 Wa zeliɛ 'wëë,
Zezwii lɛ naa:
«A nɩ yi,
a 'kä li.»
‑Maa wa 'wuë wa yɩbhlɩnɔɔ,
wa ‑yi sɛ nɩɩ,
wa ‑lowli mɔɔ zaa,
wa gla'mö a ‑nɔ ‑bhlʋ a'bhë 'nɔɔ nimï 'yɩbhä nɩɩ:
«‑Mɔ ‑n glɩnɩ bhä?»
13 'N Zezwii yiɛ 'fɔlɔɔ 'wʋ 'libhï 'n ɔ yuënyɩɛ dilanɩ,
'n ɔ yuë'ɛɛ zibhïï dilanɩmö.
14 ‑Maa sɛɛ Lagɔ 'maa 'kä a Zezwii gäla,
ɔ 'kɔ glu ‑sɛ 'wëë,
ɔ 'wʋ tanadɔ'wʋ ɔ tulanɩɛ da'a ɔnyɩ 'ɔ ‑gänɩwaa 'ylɩmö.
Sɛ'ɛ Zezwii 'nyɛɛ Piɛlɩ 'dɩ
15 Wa liɛ 'wëë,
'n Zezwii yiɛ Simɔɔ Piɛlɩ nimï 'yɩbhä,
ɔ lɛ naa:
«Zaa ‑yowli Simɔɔ,
‑muë nɩ 'wuë a dɔ'wʋ,
n ‑glamö bhä tenyii dlɩ 'wʋ ‑a?»
Ɔ lɛ naa:
«Nn,
‑Alowli,
‑n ‑yi sɛ nɩɩ n ‑wamö.»
Zezwii lɛ naa:
«Zaa,
'zʋnɩ 'na wïlaa 'yli.»
16 'N ɔ yo'ɛɛ 'wʋ 'sɔ nimï 'yɩbhänɩ,
ɔ lɛ naa:
«Zaa ‑yowli Simɔɔ,
n ‑glamö bhä tenyii dlɩ 'wʋ ‑a?»
Ɔ lɛ naa:
«Nn,
‑Alowli,
‑n ‑yi sɛ nɩɩ n ‑wamö.»
Zezwii lɛ naa:
«Zaa,
'zʋnɩ 'na wïlaa 'yli!»
17 'N ɔ yo'ɛɛ 'wʋ tanadɔ'wʋ nimï 'yɩbhä,
ɔ lɛ naa:
«Zaa ‑yowli Simɔɔ,
‑n ‑waa bhä ‑a?»
Zezwii 'yɩbhänɔɔ sa'a 'wʋ tanadɔ'wʋ nimï nɩɩ:
«‑N ‑waa bhä ‑a?»
'N swɩ yoo yɔwʋ 'kunɩ,
ɔ lɛ naa:
«'Ɔ!
‑Alowli,
‑nmö ‑yiɛ ‑lii 'wuë,
‑n ‑yi sɛ nɩɩ n ‑wamö.»
Zezwii lɛ naa:
«Zaa,
'zʋnɩ 'na wïlaa 'yli!»
18 ‑Tiamö n nyɩamöä dɛ'ɛ 'dɩ nɩɩ,
'tɛnyɩ 'mö dɛɛ ‑n glɩnɩ a‑a nyɛgbayuu,
‑nanyɩgäsɛ n‑n nyɔlanɩ a‑a yɔwʋ,
mää ‑n yɩbhää,
n‑n mö a‑a ‑mä.
‑Maa ‑n ‑kä gɔɔ,
‑na'a swɩɩ mö ‑n 'kää 'mö lɛlɩ ‑mɔmɔɔ ‑kamö yɔwʋ nyɔlanɩ,
dɛ ‑nn‑ä yɩbhää,
ɔ ‑kamö ‑lɛ kwä.
19 Zezwii gbää sa'aa,
sɛɛ Piɛlɩ 'kää 'ku,
'ɔ kwie 'kä Lagɔ a 'nglɩ 'ghlimanɩɩ,
‑sɩbhä ɔ tulanɔɔ ‑bhlɛ 'ylimö.
Ɔ gbää ‑sɩbhä 'wëë,
ɔ lɛ naa:
«‑Sɔ 'wʋ ‑n ‑kaa ‑gänɩ!»
Sɛ'ɛ Zezwii gbää 'ɔ ‑gänɩnyɔɔ ɔ ‑waa tenyii a dɛ
20 Zezwii 'nyɛɛ sa'a Piɛlɩ 'dɩɩ,
wa ‑wʋ mö dɔ'wʋ 'n Piɛlɩ yiɛ nimï 'lɛ,
Zezwii 'a ‑gänɩwaa a gla'mö a ‑nɔɔ ‑ɔ ‑glɛɛ tenyii Zezwii dlɩ 'wʋʋ,
'n ɔ yoo 'ylɩmö.
‑Zlɩ wa ‑wʋ a‑a li dɔ'wʋʋ,
'n Zezwii yi a‑a nɩkpɛɛ ‑ɔ 'kɔɔ 'ɔ ‑gblɩwaa kä'mö plɩnɩ a dɛ bhïlaa,
‑lɛ a nɩkpɛɛ 'la ‑ɔ 'ngungwanɩ a‑a Zezwii nɩɩ,
‑Alowli,
‑mɔ ‑n gaa bhä 'nɩ,
‑lɛ a nɩkpɛ 'la mɔɔ.
21 Ɔ 'yoo 'ylɩmöö,
'n ɔ yiɛ Zezwii nimï 'yɩbhä,
ɔ lɛ naa:
«‑Alowli zaa,
‑mɔ nɩ ɔbhlɩ 'naa,
sɛɛ ɔ ‑nɩɩ 'kä bhä 'mö ‑wʋ?»
22 Zezwii lɛ naa:
«N ‑kä nɩɩ,
ɔ nɩ tɩ 'ku,
‑maa ɔ nɩ ‑bhölɩ ‑këë,
n ‑kä mä'ä dʋdʋ 'bɩwʋ yii,
yɩ yɩlɩmö ɔ 'wʋ ‑a?
‑Maa sɛ'ɛ n gbää nɩɩ,
‑nmö ‑naa ‑gänɩɩ.»
23 'Bhöönɩa'a ‑lɛ,
‑lɛ a wɛlɩ 'la mɩɩ gbɔlɔnɩɛ ‑mä Zezwii a ‑nʋa gla'mö,
wa lɛ naa:
«Sɛ'ɛ Zezwii nʋä nɩɩ,
nɩkpɛ 'la ɔ 'naa 'kä 'ku.»
‑Maa ‑tiamö a dɔ'wʋ,
sa'a Zezwii 'nɩɛ a ɔbhlɩ gbä.
‑Maa sɛ'ɛ ɔ nʋ a‑a nɩɩ:
«N ‑kä nɩɩ,
ɔ nɩ tɩ 'ku,
‑maa ɔ nɩ ‑bhölɩ ‑këë,
n ‑kä mä'ä dʋdʋ 'wʋ 'bɩwʋ yii,
yɩ yɩlɩmö ɔ 'wʋ ‑a?»
24 ‑Lɛ a nɩkpɛ 'la Zezwii gaa a‑a da'aa,
wɛlɩɩ ‑yɩ cɛlɩɛ mä'ä 'bɔgʋ nɩ 'möö,
mɔɔ 'yiɛ 'ylɩmö,
mɔɔ 'celiɛ.
‑A'bhï ‑a ‑yi sɛ nɩɩ,
sɛ ɔ 'celiɛ dɛ'ɛɛ,
yɩ 'wuë gbëaa yɩ glɩnɩɛ.
25 Zezwii nʋ'ɛ ‑li ‑mimii a ‑bɛ.
Yɩ'ɩɛ mä'ä 'bɔgʋ nɩ 'mö cɛlɩ.
‑Maa 'lɩlɩlɩ a dɔ'wʋ,
sɛ ɔ nwiɛ,
yɩ 'wuë ‑sɩbhä yɩ ‑kä a 'celioo,
sɛ n pää dlɩ a dɔ'wʋ,
‑lɛ a 'bɔgwɩɩ wa 'kä a‑a 'cɛlɩɩ,
yɩ 'naa 'kä a mä'ä 'bhlɩbhë nɩ 'mö 'zʋdɛ ghlɩ.