Matie 19

Sɛ'ɛ Zezwii gbää 'nglɔ ‑nyɛ 'luwli 'sɔ a dɛ

(Maakö 10.1‑12)

Zezwii 'nyʋää sa'a 'dɩ 'wëë,

'n ɔ yiɛ ‑mä Galilee‑bhölɩɩ 'mö 'bhöö.

Zwidee‑bhölɩɩ a pɩɔ ‑wʋ ‑wʋnɩɛ ‑mä Zludɛɛ ‑gömöö,

'n ɔ yiɛ ‑mä mö.

2 Nɩkpa 'kɔkɔmlɛ ‑gänɔɔ,

'n ɔ yiɛ 'wa guzuwaa yɛmanɩ.

3 Ɔ ‑wʋ ‑mä,

Falizɩɛwaa a gla'mö a ‑mumuë,

'n wa yoo ‑mä ghlɩ wa 'kɔ ‑mä 'pä.

Wa lɛ naa:

«Nyɩanyɩɛ ‑ka 'dɩ,

sɛɛ wɛlɩkïbhë ‑kä 'mö ‑wʋ ‑kë,

a za,

nɩkpɛ kä bhä ɔ 'kä ɔ 'lɛnglɛ 'suë 'mö ‑sɛ ‑a?»

4 Zezwii lɛ naa:

«Sɛ'ɛ yɩ cɛlɩɛ ‑mä Lagɔbɔgʋʋ nɩɩ:

Tɛɛtɛɛdɔ'wʋ,

dɛɛ Lagɔ ‑bhɛɛ mä'ä 'pɩwʋ a ‑lii 'wuë,

nyɩbhɛlʋ ‑nyɛ 'nglɔ 'sɔ ɔ ‑bhɛɛ.^a

Wɛlɩkïbhë 'la,

a 'na bhä ‑zɩ 'mö zɛlɩ ‑a?

5 'N ɔ yi'ɛɛ nɩɩ:

‑Sɩbhä a za nɩkpɛ kää ɔ 'kä ɔ dɩba ‑nyɛ ɔ ‑da 'sɔ yɔwʋ 'bhöö,

ɔ ‑nyɛ ɔ 'lɛnglɛ 'sɔ,

wa 'kä yɔwʋ 'diodionɩ wa 'kä nɩkpɛ ‑bhlʋ zʋ.^b

6 Sɛ'ɛ yɩ sɛɛ zɛmö nɩɩ,

Nɩkpɛ ‑nyɛ ɔ 'lɛnglɛ 'sɔ,

wa'aa'a nɩkpa 'sɔ ‑bhli,

‑maa nɩkpɛ ‑bhlʋ wa glɩnɩa'aa.

Zaa,

Lagɔ ‑kä nyɩbhɛlʋ ‑nyɛ 'nglɔ 'sɔ nɩkpɛ ‑bhlʋ 'wʋ 'zʋa 'wëë,

‑bɛ 'nɩɛ ‑kä ɔ 'kʋä 'ylimö ‑sɛnɩ.»

7 Zezwii gbää sa'aa,

Falizɩɛwaa lɛ naa:

«‑A kɩ 'nʋ,

‑maa sɛ yɩ ‑wʋ ɔ 'mö 'n Moyizɩ yi bhä nɩɩ nɩkpɛ ‑kä ɔ 'kä 'ɔ 'lɛnglɛ 'suë 'mö ‑sɛɛ,

ɔ nɩ 'nyɔ 'suëmösɛbɔgʋ 'nɩ?^c»

8 Zezwii lɛ naa:

«Nyɩasɛ Moyizɩ 'nɩɛ a yɩ sa'a gbä,

‑maa 'a dilaa 'mö yɩ 'tuuä nza ɔ 'cɛlɩɛ a za kïbhë 'laa.

‑Maa 'pɩwʋ a tɛɛnɩdɛ 'wʋ,

sa'a ‑sɩbhä Lagɔ 'niɛ a 'zʋ.

9 ‑Maa sɛ'ɛ n nyanyɩɛ 'dɩ nɩɩ:

Nɩkpɛ a ‑mɔɔ ‑ɔnyɩɩ nglɔɔ 'nɩɛ gbɩ sɛ tɛlɩ,

‑ɔ sɔɔ 'suë 'mö,

'n ɔ kwää käbönɔ,

'nyinyloli ɔ nʋä Lagɔ a 'yila 'klʋ a dɔ'wʋ.»

10 Zezwii 'nyʋää sa'a 'dɩɩ,

'ɔ ‑gänɩwaa lɛ naa:

«'Ɔɔ!

Zaa,

yɩ ‑kä sa'a 'nglɔ ‑nyɛ 'luwli 'sɔ a dɛ ‑wʋʋ,

nɩkpɛ 'naa 'kä a yɩ 'kpʋsɛ 'nglɔ kwä.»

11 Zezwii lɛ naa:

«Nn,

‑maa nɩkpa 'wuë mʋa 'nɩɛ bhɛnɩ wa 'kɩ ‑sɩbhä 'mö 'nʋ.

'N ɛ 'nɩ ‑bhö ‑muë Lagɔ 'nyɛɛ 'mötɛɛnɔɔ muëë.

12 Kïbhïï ‑yɩ kää 'nglɩ 'n nɩkpa ‑mumuë 'nɩ kwää 'ngwlɩɩ,

bhʋlʋbhlʋ yɩ ‑wʋä.

Nɩkpa ‑mumuë ‑sɩbhä wa 'wlʋä wabhlɩ.

‑Mumuë,

nɩkpa 'lɛluëë.

‑Maa ‑mumuë wabhlɩ,

wa bhɛnɩ 'wë,

‑maa wa 'käa Lagɔ 'a libhoo sasɛ nʋ a za,

nza wa'aa 'yɩbhä wa 'kä 'ngwlɩ kwä.

Wɛlɩ 'la,

‑ɔ ‑kä bhɛnɩ ɔ 'kɩ 'mö 'nʋʋ,

ɔ nɩ 'nwi 'mö.»

Zezwii yɛ 'yuë 'tikïyiea 'nyu 'pä

(Maakö 10.13‑16; Lwiikö 18.15‑17)

13 'Ylɩ ‑bhlʋ 'mö,

nɩkpa ‑mumuë mʋa ‑lɛmöä Zezwii 'yuë 'tikïyie,

ɔ 'kʋä kätɩkpö 'wlu zʋ,

ɔ 'kä wa 'wlumö bhibhe.

'Ɔ ‑gänɩwaa 'yɩɛ nɩkpa 'la 'ylɩmöö,

'n wa yuëë 'lʋnɩ.

14 ‑Maa Zezwii lɛ naa:

«A nɩ ‑sɛ yuëa kɛ yɔwʋ,

wa ‑kaa yɔwʋ yi,

‑maa a nɩ tuë 'yio 'wʋ ‑sɛ.

Ɛ'ɛ ‑bhö nyɩasɛ,

‑maa nɩkpa a ‑muë ‑wʋä wa saa,

'pɩwʋ mää Lagɔ 'kämanɩɛ,

mʋa 'kää ‑mä 'bhle ghlɩ.»

15 Ɔ gbää sa'a 'wëë,

'n ɔ yuëë kätɩkpö 'wlu zʋ,

'n ɔ yiɛ mö.

Nyɛgbayuu ‑ɔ wʋlʋä a wɛlɩɩ

(Maakö 10.17‑31; Lwiikö 18.18‑30)

16 'Ylɩ ‑bhlʋ 'mö,

nɩkpɛ ‑bhlʋ mɔɔ ghlɩɛ ‑mä Zezwii,

ɔ lɛ naa:

«‑Atʋ,

‑li ‑mi nɛnɩ ɔ,

n 'kä bhä nʋ,

nzɩɩ n 'kä 'pɩwʋ mää 'naa 'kää 'yli bhɩɛ ghlɩ?»

17 Zezwii lɛ naa:

«Sɛ yɩ ‑wʋ ɔ 'mö,

n‑n 'yɩbhänɩ bhä ‑li ‑mi nɛnɩɛ 'wʋ 'nɩ?

Lagɔ a 'yize mɔɔ ‑gää kɛ.

N‑n ‑kä ‑n 'kä 'pɩwʋʋ mää 'naa 'kää 'yli bhɩɛ ghlɩɩ,

'zʋ 'ɔ Gböö 'klʋkpamö.»

18 Nɩkpɛɛ lɛ naa:

«'Ɔ Gböö ‑mi bhä?»

Zezwii lɛ naa:

«Sɛ'ɛ Lagɔ gbää nɩɩ:

Tɩ 'ku 'lɩbhä.

Tɩ ‑na 'li a 'nglɔ sɛ tɛlɩ,

tɩ ‑na 'li a 'luwli sɛ tɛlɩ.

Tɩ ‑na 'li a ‑lu 'wi ghli.

Tɩ ‑na 'lilɛ gbʋ ‑gömö 'pä.

19 'Zʋ ‑na dɩba ‑nyɛ ‑na ‑da 'sɔ 'klʋkpamö.

Sɛ ‑n ‑waa ‑nanyɩ ‑wa ‑sɩbhä ‑na 'lilɛ.^d»

20 Zezwii 'nyɔɔ sa'a 'dɩɩ,

ɔ lɛ naa:

«‑Mi'la 'wuë ‑n gaaa da'a,

n kɩ 'klʋkpamö zʋ 'wë.

‑Maa 'saa tʋʋ bhä'ɛ ‑mä n 'kä bhä'ɛ nʋ?»

21 Zezwii lɛ naa:

«‑N ‑kä nɩɩ ‑n 'kä ‑kpöö 'wʋ ‑wʋ nʋʋ,

mö,

‑lii 'wuë ‑n kää,

‑n 'kɩ 'pɛlʋ 'pä,

‑n 'kä yɩ moni 'pʋäwa dilanɩ,

‑maa ‑mä Lagɔ yɔwʋ ‑n yi ‑mä wʋlʋnɔ ghlɩ.

‑N ‑kä ‑sɩbhä 'zʋ 'wëë,

yi ‑n ‑kaa ‑gänɩ.»

22 Zezwii 'nyɔɔ sa'a 'dɩɩ,

'n ɔ yiɛ kɔmanɩ,

'n ɔ yiɛ mö.

Ɛ'ɛ ‑bhö nyɩasɛ,

‑maa 'ɔ lɩɩ ɔ kää,

tenyii yɩ ‑zuä.

23 Nɩkpɛ möä 'wëë,

'n Zezwii yiɛ 'ɔ ‑gänɩwaa 'yi gö,

ɔ lɛ naa:

«‑Tiamö n nyanyɩɛ dɛ'ɛ 'dɩ nɩɩ,

nɩkpɛ a ‑mɔɔ wʋlʋä,

'pɩwʋ mää Lagɔ 'kämanɩɛ,

ɔ 'kä ‑mä 'bhle ghlɩ a dɔ'wʋ,

'mö yɩ 'tɛɛ.

24 Sɛ'ɛ n gbää nɩɩ,

n nɩmɛgwli ‑kä bhɛnɩ ɛ 'kä 'sayi a ‑dʋ 'mö ghlɛnɩɩ,

'pɩwʋ mää Lagɔ 'kämanɩɛ,

wʋlʋnɩnyɔ yi ‑mä 'bhle ghlɩ.»

25 Zezwii 'a ‑gänɩwaa 'nʋä wɛlɩ 'laa,

'n ngli yuëë yɛ,

wa lɛ naa:

«'Ɔ!

Zaa,

yɩ ‑kä sa'a 'mö ‑wʋʋ,

‑ɔ 'kä bhä 'pʋ?»

26 'N ɔ yuëë ‑gömö yɩlɩ,

ɔ lɛ naa:

«Nɩkpɛ 'nɩɛ bhɛnɩ ɔ 'kä ɔnyɩ puë.

‑Maa Lagɔ a dɔ'wʋ,

‑lu a ‑muu 'tɛɛ 'möö,

wʋ'ʋä ‑bhölɩ.»

27 Zezwii 'nyʋää sa'aa 'dɩɩ,

'n Piɛlɩ yiɛ gbʋ ‑dɩ,

ɔ lɛ naa:

«‑Atʋ,

yɩɛ,

‑na za ‑a yɛ ‑abhlɩ ‑a'a ‑lii 'wuë kɛ'mö ‑sɛ,

a‑a ‑nyɛmö ‑bhlinɩa'aa 'wʋ.

'Saa a'bhë ‑a ‑kamä bhä 'bɩwʋ ghlɩnɩ 'lɩlɩlɩ?»

28 Zezwii lɛ naa:

«‑Tiamö n nyanyɩɛ dɛ'ɛ 'dɩ nɩɩ,

Nɩkpɛ a 'Yu,

'pɩwʋ mää Lagɔ 'kämanɩɛ,

ɔ ‑kä ‑mä 'ɔ 'nglɩmöklikpë 'kädaa 'mö sɛ glɩ 'wëë,

a kʋgbä'sɔ ‑kpɔ 'yɛ abhlɩ,

a yi 'kämanɩklikpï kʋgbä'sɔ mö sɛ glɩ,

a yiYizlaɛlɩ a ‑gligbï kʋgbä'sɔ ‑kpɔ ‑zijli tu.

29 ‑Maa nɩkpɛ a ‑mɔɔ ‑kä 'ɔ 'ligbëa ‑nyɛ 'ɔ 'lagbïlea 'sɔ kɛ'mö ‑sɛ,

‑ɔ ‑kä 'ɔ ‑kosu yɔwʋ a ‑nʋa yɔwʋ 'bhöö,

ɛ yi ɔ nyɩbhɛlʋdaayuë muë oo,

ɛ yi ɔ nglʋdaayuë muë oo,

ɛ yi ɔ dɩba ‑nyɛ ɔ ‑da 'sɔ muë oo,

ɛ yi 'ɔ yuëa muë oo,

‑li 'la ‑nyɛ nɩkpa 'la 'sɔ,

nɩkpɛ a ‑mɔɔ ‑kɩɩ na za kɛ'mö ‑sɛ,

ɛ nɩkpɛ 'la,

ɔ yi ‑li a ‑bɛ ghlɩ,

yɩ yi tɛkänɩɩ ɔ ‑sɛɛ kɛ'mö tenyii 'wʋ zi.

'Wë,

Lagɔ yo'ɛ 'pɩwʋ mää 'naa 'kää 'yli bhɩɛ 'nyɛ.

30 Nɩkpaa a ‑bɛ ‑wa ‑gää zɩ'ɛ 'yukuu,

wa yi nimï 'plɩ,

'n ‑wa ‑gää zɩ'ɛ nimïï,

wa yi 'yuku 'plɩ.