1 Zaa 5

‑A bhɛnɩ ‑a 'kä mä'ä 'pɩwʋ a ‑lii 'wuë 'wlu 'plɩ

‑Ɔ ‑kɩɩ dlɩ 'wʋ ‑kä nɩɩ,

Zezwii mɔɔ glɩnɩɛ Puënyɔ Lagɔ ‑sɛɛ ‑lɛ,

Lagɔ a 'yu ɔ glɩnɩɛ.

‑Ɔ ‑wa ‑dɩbaa,

'ɔ yuëa 'mö ɔ ‑wamöä.

2 ‑Sɩbhä a za n gbää nɩɩ,

n‑n ‑kä ‑na dɩba Lagɔ ‑wa,

n‑n ‑kä 'ɔ wɛlɩɩ 'klʋkpamö zʋʋ,

‑lɛ a dɔ'wʋ ‑n ‑yi sɛ nɩɩ,

‑n ‑wamö 'ɔ yuëa.

3 Sɛ'ɛ n gbää nɩɩ,

‑ɔ ‑kä Lagɔ 'mö ɔ ‑waa nʋʋ,

ɔ kä ɔ 'kä 'ɔ wɛlɩɩ 'klʋkpamö zʋ.

'Ɔ wɛlɩɩ a 'klʋkpamözʋzwɛ a'bhë,

ɛ'ɛɛ 'mö 'tɛɛ.

4 Ɛ'ɛ ‑bhö nyɩasɛ,

‑maa ‑ɔ glɩnɩɛ Lagɔ a 'yuu,

ɔ yi mä'ä 'pɩwʋ a ‑lii 'wlu 'plɩ.

‑A'a sɛ ‑a 'tɛɛnɩɛ Zezwii dlɩɩ,

‑sɩbhä ma‑a 'kää 'nglɩ ‑kä,

a‑a 'kɩɛ 'wlu 'plɩ.

Zezwii mɔɔ glɩnɩɛ ‑tiamö Lagɔ 'a Yuu

5 ‑Bɛ 'nɩɛ bhɛnɩ ɔ 'kä mä'ä 'pɩwʋ a ‑lii 'wlu 'plɩ,

'n ɛ 'nɩ ‑bhö nɩkpɛ a ‑mɔɔ kɩɛ dlɩ 'wʋ nɩɩ,

Zezwii,

Lagɔ a Yuä.

6 Zezwii Kliisɩ yiɛ mä'ä dʋdʋ 'wʋʋ,

'nyu 'mö wa wɔlʋnɔɔ 'wlu.

Ɔ 'kunɩɛ ‑lɛ suu 'klʋʋ,

'ɔ dluu kwli.

Nyuu wa wɔlʋnɔɔ 'wluu,

wʋ 'yize muu 'nɩɛ dɛsɛ ‑kä,

‑maa 'ɔ dluu ‑wʋ kwliɛ,

wʋ ‑kämö'ɛ dɛsɛ.

Lagɔ 'a 'Wugɔmʋʋ,

‑ɔ kää gbëaa a 'yize nglii,

mɔɔ nyɩanyɩɛ ‑sɩbhä 'dɩ zaa,

‑tiawɛlɩɛ.

7 Zaa,

‑li ta mɩɩ nyɩanyɩɛ Zezwii a dɛ gbëaa 'dɩ.

8 Lagɔ 'a 'Wugɔmʋʋ mɔ,

nyuu mu,

'n dluu,

yɩ ta ‑kpɔ,

sɛ ‑bhʋlʋ yɩ nyɩanyɩɛ 'dɩ.

9 Nɩkpa ‑kanyɩ wɛlɩ 'nyɛɛ,

‑a kɩ'ɛ dlɩ 'wʋʋ,

mɛɛ 'kä zi'e Lagɔ a'bhë.

Zaa,

wɛlɩɩ ɔ nyɩanyɩɛ 'ɔ Yuu a dɛɛ,

‑tiawɛlɩɛ.

10 ‑Ɔ ‑kä Lagɔ 'a Yuu dlɩ 'wʋ ‑kää,

'ɔ dlɩɩ yo 'dɩ 'nyɛ nɩɩ:

Wɛlɩɩ Lagɔ 'nyɔɔ da'aa,

‑tiamö a wɛlɩɛ.

‑Maa nɩkpɛ a ‑mɔɔ 'nɩ Lagɔ dlɩ 'wʋ ‑kää,

wɛlɩɩ Lagɔ 'nyɔɔ 'ɔ Yuu Zezwii a dɛɛ,

sɛ ɔ 'niɛ 'wʋ nglu a za,

Lagɔ 'mö ɔ 'libhïä widɩsɛnyɔ 'mö 'wʋ.

11 Sɛ'ɛ Lagɔ nyɩanyɩɛ 'dɩ nɩɩ,

ɔ'bhë mɔɔ kää 'nglɩ,

a‑a yiɛ zɩkpaa ‑a 'naa 'kää 'yli bhɩɛ ghlɩ.

Zɩkpa 'la,

'ɔ Yuu 'mö a 'bhöönɩɛ 'mö.

12 Nza n gbää nɩɩ:

‑Ɔ ‑kä 'ɔ Yuu 'wʋ ‑kä,

ɔ yɛ ‑tiamö a ‑bhölɩbhölɛ ghlɩ.

‑Maa ‑ɔ 'nɩ 'ɔ Yuu 'wʋ ‑kä,

ɔ 'nɛɛ ghlɩ.

Zɩkpaa ‑aa bhɩɛ 'ylii

13 Nyɩasɛ n 'nanyɩɛ ‑sɩbhä 'wʋ 'cɛlɩ,

‑maa abhʋaa 'tɛɛnɩɛ Lagɔ 'a Yuu Zezwii dlɩɩ,

a 'kä sɛ ‑yi nɩɩ,

zɩkpaa ‑a 'naa 'kää 'yli bhɩɛ,

a ka ghlɩ,

nza n cɛlanyɩɛ 'wʋ.

14 Sɛ ‑a 'tɛɛnɩɛ Lagɔ dlɩɩ,

‑sɩbhä ma‑a nɩɩ:

‑A ‑kɔɔ bhibhee,

'saa ‑a ‑kɔɔ 'yɩbhänɩ ‑kë,

'n ‑lu 'la ‑kɔɔ dlɩ yɔwʋ nɛnɩɩ,

‑a ‑yi sɛɛ nɩɩ,

ɔ ‑pʋnɩnyɩ 'yukwli.

15 Sɛ ɔ ‑pʋnɩnyɩɛ da'a 'yukwli a za,

‑a ‑yi'ɛ sɛɛ nɩɩ:

'Saa ‑a 'yɩbhänɔɔ da'aa,

ɔ ngulu 'wʋ ɔ ‑kanyu 'nyɛ.

16 ‑Sɩbhä a za,

‑n ‑kä sɛ yɩbhlɩmanɩ nɩɩ,

‑na 'lilagɔgänɩnyɔ ‑bhlʋ,

'nyinyloli ɔ nʋä,

bhibhe ɔ 'wlumö Lagɔ.

‑Lɛ a dɔ'wʋ Lagɔ yi gbä,

nɩkpɛ 'la,

ɔ yi zɩkpaa ‑a 'naa 'kää 'yli bhɩɛ ghlɩ.

‑Maa 'nyinyloli a 'ke ‑bhlʋ ‑wʋ ‑lɛ,

ma‑a kwää 'kwie 'mö.

Nɩkpɛ a ‑mɔɔ ‑kaa nʋʋ,

ɔ 'wlumö n'n‑ä wa nɩ bhibhe nʋ.

‑Maa ‑mi'la 'wuë a dɔ'wʋ,

wa yi bhibhe.

17 ‑Lii 'wuë ‑yɩɩɛ Lagɔ dlɩ yɔwʋ nɛnɩɩ,

'nyinyloliɛ.

‑Maa 'nyinyloli ‑mimii ‑wʋ ‑lɛ,

mɩɩ 'nɩ kwää 'kwie 'mö.

18 Sɛ'ɛ n gbää nɩɩ,

nɩkpɛ a ‑mɔɔ 'zʋä Lagɔ a 'yuu,

'nyinylolii 'mö ɔ sɛɛ kɛ'mö.

Lagɔ 'a Yuu,

mɔɔ kpëtoo 'wʋ zaa,

Sataa 'nɔɔ bhɛnɩ.

19 Mä'ä 'pɩwʋ a nɩkpa 'wuë,

Sataa mɔɔ 'kämanuëë ‑gömö.

‑Maa ‑abhʋa ‑abhlɩ ‑a ‑yi sɛɛ nɩɩ,

Lagɔ a ‑nʋä ‑a glɩnɩɛ.

20 ‑A ‑yi'ɛ sɛɛ nɩɩ,

Lagɔ 'a Yuu mɔɔ yiɛ mä'ä dʋdʋ 'wʋ,

mɔɔ ‑dɩnyɩɛ 'yila,

‑ɔ glɩnɩɛ ‑tiamö a Lagɔ,

a‑a yoo yɩbhlɩnɩ.

‑Ɔ glɩnɩɛ ‑tiamö a Lagɔ,

‑a ‑nyɔɔ 'sɔ,

‑a ‑käa'a 'wʋ ‑wʋnɩɩ,

'ɔ Yuu,

Zezwii Kliisɩ mɔɔ kää 'nglɩ.

Ɛ'ɛ ‑bhö nyɩasɛ,

‑maa Zezwii Kliisɩ a'bhë mɔɔ glɩnɩɛ ‑tiamö a Lagɔ.

'N wa ‑kä'ɛ zɩkpaa ‑a 'naa 'kää 'yli bhɩɛ nʋʋ,

'mö wa gaaa.

21 Na 'yuënyɩ,

a nɩ 'nɛmanɩ anyɩ 'wʋ a tɩa nyɩasɛlagwɩɩ bʋbɔ.