‑Ɔ 'kää ‑mä Lagɔ a 'yila 'klʋ ‑aa dɛ bhïlaa
2
Na 'yuënyɩ,
a tɩa 'nyinyloli nʋ a za,
nza n cɛlanyɩɛ dɛ'ɛ 'wʋ.
‑Maa 'n nɩkpɛ ‑kä 'nyinyloli nʋʋ,
ɔ nɩ yɩbhlɩnɩ sɛ nɩɩ,
‑ɔ 'kää ‑mä ‑aa dɩba Lagɔ a 'yila 'klʋ ɔ dɛ bhïlaa,
ɔ ‑bhölɩ.
Zezwii Kliisɩ ‑ɔɔɔ tɛkäsɛ 'nyinyloli nʋʋ,
mɔɔ.
2 Mɔɔ bʋbɔnɩɛ ɔnyɩ Lagɔ,
nzɩɩ ‑a'a 'nyinylolii a gbʋʋ ‑kanyɩ ‑gömö 'bhöö.
‑A 'yize 'a 'nyinylolii a za ɔ'ɔɔ 'ku,
‑maa 'bhlɩbhë 'wuë a 'nyinyloli a za ɔ 'kuä.
3 A‑a ‑kä Lagɔ 'a wɛlɩɩ 'klʋkpamö zʋʋ,
‑lɛ a dɔ'wʋ ‑a ‑yi sɛ nɩɩ,
‑a yoo.
4 ‑Maa ‑ɔ ‑kä nɩɩ ɔ ‑yi Lagɔ nʋʋ,
'n ɔ 'nɩ 'ɔ wɛlɩɩ 'klʋkpamö zʋʋ,
ɛ nɩkpɛ 'la,
widɩsɛnyɔ ɔ glɩnɩɛ,
ɔ'ɔɔ gbëaa ngli ‑kä.
5 ‑Maa ‑ɔ ‑kä Lagɔ 'a wɛlɩɩ 'klʋkpamö zʋʋ,
‑lɛ a nɩkpɛ 'la,
nɩkpɛ a ‑mɔɔ ‑waa ‑tiamö Lagɔ 'mö ɔ glɩnɩɛ,
sa'a ‑sɩbhä ‑a yɩbhlɩnɩɛ sɛ nɩɩ,
‑a ‑gälɔɔ 'wʋ.
6 Zaa,
‑ɔ ‑kä nɩɩ Lagɔ 'mö ɔ ‑nyɛ ‑wʋnɩɛ 'wʋ nʋʋ,
sɛɛ Zezwii 'a nɛmönɛmösaa ‑wʋ a‑a,
'ɔ nɛmönɛmösaa nɩ ‑wʋmö ‑sɩbhä.
Gbalele
7 Na dlɩsɛkäwanyɩ,
dɩɩ ‑yɩnyɩ za n ‑wʋanyɩɛ dɛ'ɛ 'wʋ 'cɛlɩ dɔ'wʋʋ,
a dɔ'wʋ,
ɛ'ɛ ‑bhö 'dɩlili,
‑maa bhla'mö a dɩɩ wa 'nyanyɩ a‑a tɛɛtɛɛdɔ'wʋʋ,
miɛ.
Lagɔwɛlɩɩ a 'nʋ a‑a tɛkädɔ'wʋ 'mö n gaa.
8 ‑Maa n yi nɩɩ,
'dɩliliɛ nʋ.
Ɛ'ɛ ‑bhö nyɩasɛ,
‑maa Zezwii mɔɔ 'wälaniiɛ 'yli 'n a zwiɛ 'klʋkpamö.
Nza n gbää nɩɩ,
'yuylukwëa ‑wʋ 'plɩ dɔ'wʋ,
zlɩ pä ‑nieniee.
9 Zaa,
‑ɔ ‑kä nɩɩ ‑mä ɔ ‑bhölɩnɩɛ ‑gägäzlɩɩ 'mö nʋ,
'n ɔ ‑kä ɔ ‑daayu ‑gblɩɩ,
‑mä ɔ ‑bhölɩnɩɛ ‑bhlɛ 'yuylukwëa 'mö.
10 ‑Maa ‑ɔ ‑kä ɔ 'lilɛ ‑waa,
‑mä ɔ ‑bhölɩnɩɛ ‑gägäzlɩɩ 'mö.
‑Lu a ‑muu 'kää 'nglɩ ‑kä ɔ 'kä gozo ɔ 'kä bhlii,
wʋ'ʋä ‑bhölɩ.
11 ‑Maa ‑ɔ ‑kä ɔ 'lilɛ ‑gblɩɩ,
'yuylukwë 'mö ɔ ‑wʋä,
bhöbhlɩnɩ ɔ bhöbhlɩnɩɛ,
'yuylukwëa a za,
ɔ'ɔɔ 'yioo 'wʋ yɩlɩɩ.
12 Na 'yuënyɩ,
Zezwii 'a nglɩɩ a bɔɔmö a za,
Lagɔ yɛ 'a 'nyinylolii a gbʋʋ 'yi 'tatinɩ,
nza n cɛlanyɩɛ 'wʋ.
13 ‑Lowluwanyɩ,
‑ɔ ‑bhölɩ a‑a tɛɛtɛɛdɔ'wʋ ‑këë zɩ'ɛ,
sɛ a ‑yooo a za,
nza n cɛlanyɩɛ 'wʋ.
Nyɛgbayuënyɩ,
a yɛ Sataa 'wlu 'plɩ,
nza n cɛlanyɩɛ 'wʋ.
14 Na 'yuënyɩ,
a ‑yi sɛ nɩɩ,
Lagɔ,
a dɩba ɔ glɩnɩɛ,
nza n cɛlanyɩɛ 'wʋ.
‑Lowluwanyɩ,
‑ɔ ‑bhölɩ a‑a tɛɛtɛɛdɔ'wʋ ‑këë zɩ'ɛ,
sɛ a ‑yooo a za,
nza n cɛlanyɩɛ 'wʋ.
Nyɛgbayuënyɩ,
Lagɔ 'a 'mötɛɛnɔɔ,
wʋ ‑wʋanyɩ ‑gömö,
'n a zʋä 'ɔ wɛlɩɩ dlɩ zɛmö,
'n a yiɛ Sataa 'wlu 'plɩ,
nza n cɛlanyɩɛ 'wʋ.
15 'Pɩwʋ mä ‑a ‑wʋä dɛ'ɛɛ,
a nɩ tɩ ‑mä 'a dilaa yowʋ 'nyɛ,
‑mä a ‑lii a 'tʋ nɩ tanyɩ 'wlumö köbhänɩ.
‑Maa nɩkpɛ a ‑mɔ ‑waa mä'ä 'pɩwʋ a ‑lii,
ɔ'ɔɔ ‑aa dɩba Lagɔ a ‑wawʋʋ dlɩ zɛmö ‑kä.
16 Ɛ'ɛ ‑bhö nyɩasɛ,
‑maa ‑ɔ glɩnɩɛ mä'ä 'pɩwʋ a ‑nɔ,
ɔnyɩ ɔ tɛlɩnɩɛ 'wʋ sɛ.
'Saa sɔɔ dlɩ 'mlɩ 'wuë,
ɔ yɩbhä ɔ 'kɩ ghlɩ klɩpaa.
Tɛkpɔ ɔ tɛkpɔɔ 'ɔ lɩɩ a za.
‑Mi'la 'wuë,
‑mä yɩ'ɩɛ Lagɔ 'mö 'bhöönɩ,
‑maa mä'ä 'pɩwʋ a ‑li yɩ glɩnɩɛ.
17 'N ‑maa,
'yli yɩ 'kää bhɩɛ.
‑Maa sɛɛ Lagɔ yɩbhää,
nɩkpɛ a ‑mɔɔ zʋä ‑sɩbhää,
ɔ yi 'kwädlɩkwädlɩnɩ ‑bhölɩ 'yize.
‑Ɔ ‑gblɩɛ Kliisɩ
18 Na 'yuënyɩ,
'pɩwʋ a 'ylibhɩɛdaa,
‑lɛ yɛ tenyii 'dio.
A yɛ a ‑pa 'wʋ 'nʋ nɩɩ,
‑ɔ ‑gblɩ Kliisɩ,
ɔ yi 'yli 'wlʋ.
‑Sɩkaa a nɩkpa a ‑bɛ,
wa yɛ ‑sɩbhä a nɩkpa 'zʋ.
Mɩɩ nyɩanyɩɛ ‑tiamö 'dɩ nɩɩ,
'pɩwʋ a 'ylibhɩɛdaa,
‑lɛ yɛ tenyii 'dio.
19 Nɩkpa 'la,
‑abhʋa Zezwii a ‑nʋa a gla'mö ‑mä wa ‑wʋmö a‑a.
‑Maa wa'aa la ‑tiamö Zezwii a ‑nʋä glɩnɩ.
Wa ‑kä a ‑tiamö ɔ ‑nʋä glɩnɩ laa,
wa ‑nyɛ ‑abhʋa 'naa 'kä a 'ylimö ‑sɛnɩ.
‑Maa sɛ wa ‑nyɛ ‑abhʋa ‑sɛnɩɛ da'a 'ylimöö,
‑sɩbhä ma‑a tulanɩɛ nɩkpabhë 'ylimö nɩɩ,
wa gla'mö a nɩkpɛ ‑bhlʋ a'bhë 'nɩ ‑bhö a ‑tiamö Zezwii a ‑nɔ.
20 ‑Maa abhʋa abhlɩ,
Kliisɩ,
mɔɔ 'zʋanyɩɛ Lagɔ 'a 'Wugɔmʋʋ ‑gömö.
Nza a ‑yiɛ ‑yɩ ‑wʋä gbëaa.
21 Lagɔ 'a ‑tiamö a wɛlɩɩ,
n 'kanyi 'nyɛ a za,
nza n 'nanyɩɛ dɛ'ɛ 'wʋ 'cɛlɩ.
A'bhï a ‑yii 'kɩ.
'N a ‑yi'ɛ sɛɛ nɩɩ,
‑ɔ ‑yiɛ Lagɔ 'a ‑tiamö a wɛlɩɩ,
ɔ 'naa 'kɩ widɩ 'mö ‑sɛnɩ 'lɩlɩlɩ.
22 ‑Maa ‑ɔ sɛnɩɛ Lagɔ 'a wɛlɩɩ widɩ 'möö,
'mö n 'kanyɩɛ dɛ'ɛ sʋlʋnɩ.
Nɩkpɛ a ‑mɔɔ nʋä nɩɩ,
Zezwii,
mɔɔ 'nɩɛ Puënyɔɔ Lagɔ ‑sɛɛ ‑lɛ glɩnɩ.
‑Ɔ cɛlɩɛ dɩbaa 'n ɔ cɛlɩ'ɛɛ 'ɔ Yuu,
mɔɔ glɩnɩɛ ‑ɔ ‑gblɩ Kliisɩ.
23 ‑Ɔ nʋä nɩɩ,
Zezwii 'nɩ ‑bhö Lagɔ 'a Yuu mɔɔ,
ɛ nɩkpɛ 'la,
ɔ ‑nyɛ dɩbaa 'nɩɛ 'wʋ ‑wʋnɩ.
‑Maa ‑ɔ nʋä nɩɩ,
Zezwii,
mɔɔ glɩnɩɛ Lagɔ 'a Yuu,
ɛ nɩkpɛ 'la,
mɔɔ ‑nyɛ dɩbaa ‑wʋnɩɛ 'wʋ.
24 Zaa,
abhʋa abhlɩ,
Lagɔwɛlɩɩ a 'nʋ a‑a tɛkädɔ'wʋ,
a 'zʋ a‑a dlɩ zɛmöö,
a nɩ ti kɛ'mö ‑sɛ.
'N a 'ni kɛ'mö ‑sɛɛ,
‑aa dɩba Lagɔ ‑nyɛ 'ɔ Yuu Zezwii 'sɔ,
a ‑nyʋä yi 'wʋ ‑wʋnɩ.
25 'Wʋwʋnɩwʋnɛ 'la,
mɛɛ glɩnɩɛ 'pɩwʋ mää 'naa 'kää 'yli bhɩɛ.
'Mö Zezwii Kliisɩ gbää ɔ ‑kanyɩ 'nyɛ.
26 ‑Wa yɩbhää wa 'kanyɩ 'wlumö nyima a za,
wɛlɩɩ n 'nyanyɩɛ,
miɛ da'a.
27 ‑Maa abhʋa abhlɩ,
Lagɔ 'a 'Wugɔmʋʋ Kliisɩ 'zʋanyɩɛ ‑gömöö,
ɔ ‑wʋanyɩ 'kwädlɩ ‑gömö 'yize.
Mɔɔ sɛnanyɩɛ Lagɔ 'a wɛlɩɩ 'wuë zɛmö.
Ɔ'ɔ ‑sɛ widɩ,
‑maa wɛlɩɩ 'wuë ɔ nyanyɩɛ,
‑tiawɛlɩɛ.
‑Sɩbhä a za,
nɩkpa ‑wa 'kanyɩ'ɛɛ Lagɔ 'a wɛlɩɩ a zɛmö sʋlʋnɩɩ,
a tuëa'a sɛ tɛlɩ 'lɩlɩlɩ.
‑Maa sɛɛ Lagɔ 'a 'Wugɔmʋʋ 'nyanyɩɛ 'dɩ nɩɩ,
a nɩ ‑glɛ 'kwädlɩ Kliisɩ 'wʋʋ,
a nɩ 'zʋ ‑sɩbhä 'klʋkpamö.
28 Na 'yuënyɩ,
sɛ'ɛ n gbää nɩɩ,
a nɩ ‑glɛ 'kwädlɩ Kliisɩ 'wʋ.
‑Lɛ a dɔ'wʋ,
'ɔ yiyizlɩɩ ‑kä ghlɛɛ,
‑aa dila zɛmö yi ‑pälɛpälɛ ‑wʋ,
zʋ 'naa ‑kanyɩ 'lɩbhä ɔ 'yila 'klʋ.
29 A ‑yi sɛ nɩɩ nɩkpɛ a ‑mɔɔ nɛnɩɛ Lagɔ dlɩ yɔwʋ 'mö ɔ glɩnɩɛ.
‑Sɩbhä a za,
a nɩ yɩbhlɩnɩ'ɛ sɛ nɩɩ,
nɩkpɛ a ‑mɔɔ nʋä 'saa nɛnɩɛ Lagɔ dlɩ yɔwʋʋ,
mɔɔ glɩnɩɛ Lagɔ a 'yu.