2 Piɛlɩ 3

‑Alowli Zezwii Kliisɩ yi ‑tiamö yi

Na dlɩsɛkäwanyɩ,

n kanyɩ a tɛkäbɔgʋ 'wʋ 'pä 'wë,

'n n ‑wʋanyɩ'ɛɛ dɛ'ɛ 'sɔnʋ 'wʋ 'cɛlɩ dɔ'wʋ.

‑Mä yɩ 'sɔ ‑kpɔ 'mö,

Lagɔwɛlɩɩ a ‑yiɛ 'kɩ,

'mö n ligbananyɩɛ 'wʋ,

a tia käböwɛlɩ 'dʋanɩ.

2 ‑Maa Lagɔ 'a bhla'mö a 'möbhïlanɩwaa,

'wa Lagɔwɛlɩɩ wa 'cɛlɩ a‑a mi,

'n ‑Alowli Zezwii Kliisɩ,

‑aa Puënyɔ,

sɛɛ 'ɔ tietiewaa 'nyanyɩɛ ɔ 'nglɩ 'mö 'dɩ ma,

a nɩ ti 'kwädlɩ 'wʋ dlʋ.

3 A nɩ ‑yi sɛ nɩɩ,

'pɩwʋ a 'ylibhɩɛdaa ‑kä ghlɛɛ yii,

nɩkpa ‑mumuë yi 'yli 'wlʋ.

'Saa 'wa dilazokuu 'pänuëë 'wʋ a 'yize 'mö wa 'kää nʋ.

Nɩkpa 'la,

nɛpɔ wa 'kanyɩɛ nɛpɔ.

4 Sɛ'ɛ wa 'kää nɩɩ:

«A lɛ,

Zezwii mɔɔ gbä a ɔ yi 'wʋ 'sɔ mä'ä dʋdʋ 'wʋ yinɩ.

Zaa,

‑zlɩmɛ ɔ 'kä bhäa'a yi a'bhë 'nɩ?

‑Aa dɩbawaa 'wuë wa yɛ 'ku 'wë,

ɔ'ɔ yia'a.

'Pɩwʋ a ‑lii 'wuë,

sɛ yɩ 'maa 'kä a 'wlʋ a sɛɛ zɩkpaa ‑wʋ a‑a,

sɩbhä a ‑wʋä dɛ'ɛ 'yize.»

5 Wa ‑kä sa'a nʋ dɔ'wʋ ‑wʋʋ,

'saa wa dlʋä 'wʋ muä nɩɩ:

Bhlagɔgɔ'mö a dɔ'wʋ,

Lagɔ,

'ɔ bhïlawɛlɩɩ 'mö ɔ 'wälanɩɛ zlɩ ‑nyɛ dʋdʋʋ 'sɔ 'mö.

Saa 'wuë 'nyu a 'yize ‑wʋ a‑a ‑sɩbhä.

'N ɔ yiɛ bhïla,

n dʋdʋ yiɛ 'wʋ 'wlʋ 'n wʋ ‑nyɛ nyuu yiɛ 'ylimö ‑sɛnɩ.

6 ‑Lɛ a zɩkpa 'la,

Lagɔ 'kaa 'yli bhɩaa yii,

nyuu 'mö ɔ bhɩanaa 'mö 'yli.

'Nyizakwë 'käda 'käda ɔ lɩbhaa 'n zɩkpaa yiɛ 'yli bhɩɛ.

7 Sɛ ‑bhʋlʋ ‑kpɔ 'la ‑sɩbhä zɩkpaa ‑a ‑wʋä dɛ'ɛ 'wʋ,

a 'kää ‑lɛ ‑wʋ ‑këë,

'tɛnyɩɩ Lagɔ a'bhë ‑dɩɛ,

ɛ ‑kä ghlɛ ɔ 'ka 'yli bhiamö.

‑Kosuu 'mö ɔ 'kaa 'mö 'yli bhɩanɩ.

Nɩkpaa 'wuë,

‑waaa 'yɩbhää wa 'kɔ 'klʋkpamö zʋʋ,

‑lɛ a zlɩ 'la,

'mö ɔ ‑kuanuëë ɔ 'kʋä ‑zijli tu,

ɔ 'kʋä 'yli bhiamö.

8 Na dlɩsɛkäwanyɩ,

a nɩ ‑yi sɛ nɩɩ Lagɔ a dɔ'wʋ,

'ylɩ ‑bhlʋ,

'ylʋbö a milɩ ‑bhlʋ a sɛ ɛ ‑wʋä,

'n 'ylʋbö a milɩ ‑bhlʋ,

'ylɩ ‑bhlʋ a sɛ yɩ ‑wʋä.

9 Sɛ'ɛ ‑mumuë nʋä nɩɩ:

‑Alowli Zezwii ‑ɔ gbä a‑a ɔ yi ‑pa yii,

'tɛnyɩ ‑a ‑tɔnɩ a‑a ɔ 'kä 'mö yii,

ɔ kɛ 'wʋ 'mɩɛ zaa,

yi ɔ'ɔa'aa yi.

‑Maa 'wa sɛ wa pää da'a dlɩɩ,

ɛ'ɛ ‑bhö ‑sɩbhä ma.

‑Maa ‑Alowli Zezwii ɔ'ɔɔ 'yɩbhä nɩɩ,

a gla'mö a ‑nɔ ‑bhlʋ a'bhë nɩ bhɩɛ 'yli,

‑maa ɔ yɩbhä nɩɩ,

nɩkpa 'wuë nɩ ligba wa 'kä 'wa ‑lizokuu kɛ'mö ‑sɛ ɔ 'kʋä puë,

‑sɩbhä a za ɔ ‑kpaanɩɛ dlɩ 'mö 'n ɔ 'nɩɛ ‑bhlɛ yi.

10 Miɛ abhlɩ,

‑maa ‑Alowli Zezwii Kliisɩ 'a yiyizlɩɩ,

sɛɛ 'winyɔ yi'ɛ zɛmövusɛɛ,

‑sɩbhä ɛ 'kää nɩkpa zɛmö ‑vu.

‑Lɛ a 'tɛnyɩ 'la 'mö,

zlɩ 'wuë ‑jiji 'kädɛ ɛ 'kää ‑sɛ,

ɛ 'kä 'kpɔtɔ 'gboo,

ɛ 'kä 'mö ghälɔghlɔnɩ.

‑Mä zlɩ 'mö a ‑lii 'wuë yɩ 'kä si,

yɩ 'kä 'yli bhɩɛ.

Dʋdʋkpäta ‑nyɛ a 'klʋ a ‑lii 'wuë 'sɔ,

yɩ yi 'yli bhɩɛmö.

11 ‑Atʋayuënyɩ,

‑lii 'wuë sa'a yɩ 'kää 'plɩ.

Zaa,

'a sɛ a 'kää zʋʋ,

a nɩ ‑yi 'kwädlɩ ‑sɩbhä.

'A nɛmönɛmösaa 'wuë nɩ ‑wʋ Lagɔsɛ,

a nɩ glɛ anyɩ Lagɔ 'wʋ.

12 A nɩ ‑ligba a 'kä 'ɔ yiyizlɩɩ ‑kʋnɩ,

sɛ a bhɛnɩɛ a 'kä zʋʋ,

a nɩ 'zʋ ‑sɩbhä nzɩɩ ɔ 'käa ‑pa yi.

Sɛ'ɛ n gbää nɩɩ,

‑lɛ a 'tɛnyɩ 'la 'mö,

zlɩɩ,

'yi ɛ 'kää do ɛ 'kä si,

ɛ 'mö a ‑lii 'wuë kɔslʋ 'kɩ 'yli bhɩa.

13 ‑Maa Lagɔ lɛ naa,

yɩ ‑kä sa'a 'plɩ 'wëë,

ɔ yi zlɩlele ‑nyɛ dʋdʋlulu 'sɔ 'wäla.

‑Mä a nɩkpaa,

'saa zlɔnɩɛ 'mö a 'yize 'mö wa 'kää nʋ.

‑Lɛ a pɩwʋ 'la,

mö ‑a ‑kʋnɩɛ.

14 Na dlɩsɛkäwanyɩ,

‑lɛ a zlɩ 'la 'mö a ‑kʋnɩmöä zaa,

a nɩ 'tɛmanɩ 'yli yɔwʋ,

a ‑nyɛ Lagɔ 'kä 'kwädlɩ ‑wanɩ,

ɔ 'yila 'klʋ a dɔ'wʋ,

a 'kä 'wlɩlɩ ‑wʋ,

Zezwii ‑kä yi ɔ tanyɩa ‑maa yɔwʋ ghlɩ.

15 A nɩ yɩbhlɩnɩ sɛ nɩɩ,

‑Alowli Zezwii,

ɔ ‑kä dlɩ 'mö ‑kpaanɩ,

ɔ 'nɩ ‑bhlɛ yii,

ɔ yɩbhä nɩɩ nɩkpa 'wuë nɩ yɩbhlɩnɔɔ ɔ 'kʋä puë,

nza ɔ'ɔɔ ‑bhlɛ yi.

Wɛlɩ nɩ,

sɛ n cɛlanyiɛ dɛ'ɛ 'wʋʋ,

‑aa dlɩsɛkädaayu Pɔɔlʋ,

‑sɩbhä ɔ 'cɛlɩmanyiɛ 'wʋ.

Lagɔ mɔɔ 'nyɔɔ ‑lɛ a 'nɛɛnɔɔ 'n ɔ yeanyiɛ 'wʋ 'cɛlɩ.

16 'Ɔ 'bɔgwɩɩ 'wuë ɔ 'panyɩɛ 'wʋʋ,

ɔ ‑kä ‑mä yɩ 'mö kïbhë nɩ kɛ zɩɩ,

sɛ n gbää dɛ'ɛ,

‑sɩbhä ɔ gbämöä.

‑Maa ‑tiamö abhlɩ,

‑mä 'ɔ 'bɔgwɩɩ 'mö,

wɛlɩkïbhï ‑mimii ‑wʋ ‑mä,

nɩkpɛ 'kɩ ‑pa 'mö 'nʋ a dɔ'wʋ,

'mö yɩ 'tɛɛ.

Nɩkpa ‑mumuë ‑waaa sasɛ Lagɔ 'a wɛlɩɩ ‑yi,

‑wa kää pamɩɩ nglii,

‑sɩbhä a za wa cɩcɛɛ Pɔɔlʋ 'a wɛlɩɩ 'la 'mö,

'n wa sɩɛ 'wa käbösɛ zɛmö.

Lagɔ 'a wɛlɩɩ Lagɔnɩkpa ‑muë'la 'cɛlɩ a‑a,

‑sɩbhä wa 'zʋmi'ɛɛ.

'Wa sɛ wa zʋä da'aa,

‑sɩbhä a za Lagɔ 'kʋä 'yli bhɩa.

17 ‑Maa abhʋa abhlɩ,

abhʋaa ‑kaaa dlɩsɛɛ,

wɛlɩɩ 'wuë sɛ yɩ 'kää 'wʋ 'plɩɩ,

a yɛ ‑sɩbhä 'mö 'nʋ 'wë.

Zaa,

a nɩ 'nɛmanɩ anyɩ 'wʋ,

nzɩɩ sa'a a nɩkpazoku 'la,

'wa yiowɛlɩɩ tanyɩa dula,

yɩ tanyɩa Lagɔ 'a 'yioo 'wʋ ‑sɛ,

‑mä Lagɔ 'a wɛlɩɩ 'mö a dɔ'wʋ,

a 'käa glu ‑nyɔnʋ.

18 ‑Alowli Zezwii Kliisɩ,

‑aa Puënyɔ,

sɛɛ zila zɩɛ 'kwädlɩɩ,

a nɩ yɩbhlɩnɔɔ sasɛ 'yize,

sɛɛ Lagɔ 'pää ɔ bɔɔmö a za ‑aa ngäzɩdlɩɩ,

a nɩ yɩbhlɩnɩ'ɛ ‑sɩbhä sasɛ 'yize.

'Ɔ nglɩɩ,

yɩ nɩ 'ghlimanɩ 'kwädlɩkwädlɩnɩ.

‑Amɛɛ!