2 Piɛlɩ 2

Lagɔwɛlɩɩ a 'cɩawazokuu

Bhla'mö a dɔ'wʋ,

‑mä Lagɔ a ‑nʋa a jijo'wʋ,

yiowaa ‑wa nʋä nɩɩ,

Lagɔ a 'möbhïlanɩwaa wa glɩnɩɩ,

wa 'wlʋnɩ a ‑mä 'yli.

Sɛ ‑bhʋlʋ ‑kpɔ 'la,

‑sɩbhä nɩkpa a ‑muë 'cɩaa wɛlɩɩ ‑yi ‑nyɛ Lagɔ a ‑nɩɩ 'nɩ mönɩɛ yɔwʋʋ,

wa 'kää ‑a'a ‑sɩkaa a 'tɛnyɩ nɩ 'mö ‑mä a jijo'wʋ 'yli 'wlʋnɩmö.

Nɩkpa 'la,

‑Alowli Zezwii ‑ɔ zetiuëë,

'mö wa 'kää ‑gömö panɩ.

Wɛlɩ a ‑mii ‑nyɛ Lagɔ 'a wɛlɩɩ 'nɩ mönɩɛ yɔwʋ,

nɩkpɛ ‑kä ‑gänɩ 'n ɔ 'kää 'yli bhɩɛɛ,

'mö wa 'kää ‑mä a jijo'wʋ ylʋsɛ päla.

'Wa sa'a ‑sɩbhä ma‑a 'kää 'nglɩ ‑kä 'n Lagɔ 'kʋää ‑pa 'yli bhɩa.

2 ‑Maa nɩkpa a ‑bɛ yi 'wa wɛlɩzoku 'la ‑gänɩ wa 'kä wa saa 'zokwësɛ nɛmö.

Wa za nɩkpa 'kää ‑wa ‑gänɩɛ Lagɔ 'a ‑tiamö a wɛlɩɩ a 'nglɩ nyima.

3 ‑Lɛ a yiowa 'la,

gugwaguguu mʋʋ 'kää ‑mä wa dila zɛmö su.

'Wa wɛlɩɩ wa sɛɛ 'wlumöö,

wa ‑kaanyi 'nyɛ dɔ'wʋ ‑wʋʋ,

wa 'kanyɩ kä'mö kplɛ,

'mö wa 'kää sɛ tɛlɩ.

‑Maa sɛ'ɛ n gbää nɩɩ,

Lagɔ ‑ɔ 'kʋää 'wa ‑lizokuu a 'pɛna 'nyɛɛ,

ɔ ‑wʋ 'kwädlɩ ‑lɛ 'yize,

ɔ'ɔɔ ngämö.

Ɔ yuëa'a ‑pa 'yli bhɩa.

4 Lagɔzuzukuu a'bhï ‑yɩ ‑sɛ a‑a bhlagɔgɔ'mö Lagɔ 'klʋkpamöö,

Lagɔ 'niɛ ‑sɩbhä 'yi 'tatinɩ.

‑Maa 'bhʋkwa 'käda ‑a 'bhʋɔ 'möö,

mää guylukwëa ‑wʋä,

‑mä ɔ 'pɩɛ,

‑mä yɩ ‑gwanɩɛ 'gogwi.

‑Mä yɩ 'kää ‑wʋ ‑këë 'ɔ ‑zijle 'kädaa a zlɩɩ 'kä ghlɛ.

5 Sɛ ‑bhʋlʋ ‑kpɔ 'la ‑sɩbhä bhlagɔgɔ'mö,

Lagɔnɩkpɛ Nowee a 'tɛnyɩ 'mö a nɩkpa ‑wa ‑sɛ a‑a Lagɔ 'klʋkpamöö,

ɔ 'nuë a‑a ‑sɩbhä 'yi 'tatinɩ,

‑maa 'nyizakwë 'käda 'käda ɔ lɩbhaa,

'n nyuu yiɛ saa 'wuë 'wʋ yie,

'n wʋ yiɛ 'kpʋkpʋwa 'la 'yli bhɩa.

Nowee ‑ɔ pä a‑a wɛlɩ nɩɩ wa nɩ 'zʋ Lagɔ 'klʋkpamöö,

ɔ ‑nyɛ nɩkpa ‑mumuë ngbi'sɔ 'sɔ,

wa 'yize 'mö Lagɔ 'pʋaa nyuu ngli.

6 'Tɛnyɩ ‑mɛmɛɛ 'mö 'yɛ,

Sodɔɔmö a ‑glɔɔ mu,

Gomɔɔlʋ a ‑glɔɔ mu,

‑gwlɩ 'la 'sɔ ‑kpɔ 'mö a nɩkpaa ‑wa nʋä ‑lizoku a 'yizee,

'n Lagɔ yuëë yɩ 'pɛna 'nyɛ,

'n ɔ yuëë 'wa ‑gwlɩɩ sianɩ.

Sɛ yɩ 'plɩɛ da'a 'wʋʋ,

‑sɩbhä ma‑a nyɛɛ nɩkpa 'dɩ nɩɩ,

‑waaa 'yɩbhä wa 'kä Lagɔ 'klʋkpamö zʋʋ,

wa 'wuë wa yi ‑sɩbhä 'yli bhɩɛmö.

7‑8 Sɛ'ɛ n gbää nɩɩ,

‑mä ‑gwlɩ 'la 'sɔ ‑kpɔ 'mö a nɩkpaa,

'yli wa bhɩɛɛ,

nɩkpɛ ‑bhlʋ ‑kpöö 'mö Lagɔ 'pʋa a‑a ‑kosuu ngli,

Lagɔnɩkpɛ Lɔɔtɩ mɔɔ.

Nɩkpɛ 'la Lagɔ 'mö ɔ zʋ a‑a 'klʋkpamö zaa,

nɩkpa ɔ glɩ a‑a da'a jijo'wʋʋ,

sɛɛ zila zɩɛ 'yize,

‑lizokuu 'wa dilaa 'pänuëë 'wʋ ɔ ‑kɩɩ 'wʋ yɩlɩ,

ɔ ‑kä 'wa wɛlɩzokuu wa bhïlaa 'yukwli ‑pʋnɩɩ,

dlɩ 'yli yɩ sioo tenyii.

‑Maa ‑lɛ a 'klɩyɩyɛ 'la,

Lagɔ ‑sɔnyɩ a ngli.

9 Nza n gbää nɩɩ,

Lagɔ,

nɩkpa ‑wa ‑gänɩɛ 'ɔ wɛlɩɩ,

wa ‑kä 'klɩyɩyɛ 'mö ‑wʋʋ,

ɔ ‑yi sɛ ɔ 'kʋä ‑mä ‑sɛ.

‑Maa 'saa 'nɔɔ dlɩ yɔwʋ nɛnɩ ‑wa nwiɛ,

'ɔ ‑zijle 'kädaa a zlɩɩ,

'mö ɔ ‑kuanuëë,

ɔ 'kʋä 'wa ‑lizokuu a 'pɛna 'nyɛ.

10 Wɛlɩ 'la,

'nyinylolinʋwaa 'wuë a ‑liɛ,

‑maa ‑wa nʋä lizokuu wanyɩ a ‑wʋwʋsɛzokwëa 'pänuëë 'wʋʋ,

‑wa flanɩɛ ‑Alowli 'a 'kämanɔɔ 'ylimöö,

mʋa ‑këliɛ tɛɛ.

Nɩkpa 'la,

wa'a la nɩkpɛ a wɛlɩ wɛlɩ,

wa'a ‑lu a nganɔ ku 'mö ‑kä.

Zuzukuu ‑yɩ 'ghïliɛ,

wa'a yɩ nganɔ ku 'mö ‑kä,

‑maa wɛlɩzokuu wa bhïlaa yɩ dɛ.

11 Lagɔzuzukuu a'bhë ‑yɩ 'tɛɛ 'mö ‑yɩ ziɛ yiowa 'la ‑wa 'cɩaa a 'fʋ a wɛlɩɩ 'wʋʋ,

yɩ'ɩ bhïla yɩbhlɩ ‑sɩbhä zuzuku 'la a dɛ wɛlɩzoku Lagɔ a 'yila 'klʋ.

12 ‑Maa yiowa 'la wabhlɩ,

nɩma a sɛ,

wa'aa 'cɛlɩ a ‑cɛlɩ 'wlumö ‑kä.

Sɛɛ nɩmɛ ‑wʋ'ɛ ‑lɛ wa 'kɛ köbhä wa 'kɛ 'lɩbhä a za‑a,

‑sɩbhä wa ‑wʋä.

'Saa wa'aa ‑yii a dɛ wa bhïlaa wɛlɩzoku.

Lagɔ yuë 'ylɩ ‑bhlʋ 'mö 'yli bhɩa.

13 'Wa ‑lizokuu wa nʋä,

yɩ 'pɛnaa Lagɔ 'kʋää 'nyɛɛ,

ma‑a da'a.

‑Lizokuu 'wa dilaa 'pänuëë 'wʋ,

wa 'kɩ nɩkpabhë a 'yila 'klʋ nʋnɩ mɩɩ nɛnuëë dlɩ yɔwʋ.

Wa 'wʋlinɩlinɛ 'zʋ 'wʋ ɛ ‑bhöä 'wa ‑lizokuu wa nʋä a za.

Wa 'kanyɩ dula mɩɩ ‑bhuëë 'mäna 'wʋ.

14 Wa ‑kä 'nglwɩ 'ylɩmöö,

wa 'kʋä sɛ tɛlɩ a dlɩ wa pää cuu.

Wa'a yɔlɔnɩ 'nyinyloli 'wʋ.

‑Waaa ‑bhlɛ sasɛ 'yli yɔwʋ 'tɛmanɩ Lagɔ 'a wɛlɩɩ 'mö a dɔ'wʋʋ,

'mö wa nyimaa 'wlumö.

‑Mä 'wa dilaa zɛmö,

moni a tʋ a 'yize mʋʋ suä ‑mä.

Wa ‑bhätlɩnɩ 'kɩ Lagɔ a 'yila 'klʋ.

15 Wa yɛ Lagɔ 'a 'yioo 'wʋ 'bhöö,

wa yɛ tʋʋ.

Bhla'mö a Lagɔnɩkpɛɛ Balaamö,

Bosɔɔ ‑yowli,

'ɔ ‑gbuduu,

'mö wa bhliɛ.

Nɩkpɛ 'la,

moni a tʋ a za ɔ yɩbhä a ɔ 'kä ‑lizoku nʋ.

16 'N Lagɔ yoo 'ɔ 'klʋkpamösɛsʋ a za 'lʋnɩ.

‑A ‑yi sɛ nɩɩ,

‑sʋkʋfanɩ 'nɩ bhïla,

‑maa ‑sɩbhä yɩ ‑wʋ 'mö,

'n Lagɔ yiɛ ‑sʋkʋfanɩ 'mö ghlɛnɩ 'n ɛ yiɛ bhïla 'n ɛ yiɛ Balaamö 'dɩ 'nyɛ,

ɔ 'kä 'ɔ ‑ɔɔ'nɛɛnɩli 'la kɛ'mö ‑sɛ.

17 Sa'a a nɩkpaa,

sɛɛ 'nyibhë ‑kä'ɛ 'mö yɛ 'n a 'nɩɛ dɛsɛ ‑kää,

‑sɩbhä wa ‑wʋä.

'Nyizakwë a ‑maa ‑kä'ɛ 'ylimö köbhä 'wë 'vuu ‑nyɛɛ plɩ'ɛɛ,

'mö wa ‑nyɛɛ 'wlʋnɩɛ,

'yli wa 'kää bhɩɛ.

Dɛ ‑bhlʋ dɛɛ guylukwëa ‑wʋä,

‑lɛ Lagɔ 'kʋää 'zʋ.

18 Wa bhïla ‑këkëkë,

‑maa 'wa bhïlawɛlɩɩ 'wuë 'nɩɛ zɛmö ‑kä 'lɩlɩlɩ.

'Zʋ'wʋbhölii,

'wa dlɩpäsɛzokwëa 'pänuëë 'wʋʋ,

'mö wa libhïä 'wʋ,

nɩkpaa ‑wa ‑sɛɛ 'lili 'wʋ 'wa ‑lizokuu kɛ'mö wa 'kä Lagɔ ‑gänɩɩ,

'n wa nyimuëë 'wlumö.

19 Sɛ'ɛ wa nyʋää 'dɩ nɩɩ,

'wa wɛlɩɩ,

nɩkpɛ ‑kɩɩ ‑gänɩɩ,

‑lu 'naa 'kɔa'a 'wlumö ‑känɩ.

‑Maa ‑tiamö a dɔ'wʋ,

wa'bhï,

'nyinylolii,

‑yɩ bhɩaa nɩkpɛ 'ylii,

mɩɩ ‑känuëë 'wlumö.

Zaa,

nɩkpa 'la,

‑lizokuu wa nʋä a göwa wa glɩnɩɛ.

Nyɩasɛ n'n‑ä ‑sɩbhä gbä,

‑maa ‑lu a ‑muu ‑känɩɛ nɩkpɛ 'wlumöö,

wʋ gïyi ɔ glɩnɩɛ.

20 ‑Maa nɩkpɛ ‑kä ‑Alowli Zezwii Kliisɩ ɔ Puënyɔ 'mö yɩbhlɩnɩɩ,

mä'ä 'pɩwʋ a ‑lizokuu 'n Zezwii ‑kɔnyɩ ngli 'pʋa 'wë,

'n ɔ ‑kä'ɛ 'wʋ 'sɔ 'ɔ bhla'mö a daa nimï yi,

‑lizoku 'la ‑kɔɔ'ɛ ‑gömö 'kämanɩɩ,

‑sɩbhä a nɩkpɛ 'la,

'ɔ wɛlɩɩ,

'mö yɩ 'tɛɛa'a tenyii,

yɩ zi tɛkänɩɩ 'wʋ.

21 Sɛ'ɛ n gbää nɩɩ,

nɩkpɛ ‑kä Lagɔ 'a ‑tiamö a wɛlɩɩ yɩbhlɩnɩ 'wë,

ɔ ‑kɩɩ ‑gömö panɩ,

wɛlɩɩ Lagɔ a'bhë 'nyɔ a‑a,

ɔ 'nia'a 'klʋkpamö 'zʋʋ,

‑sɩbhä a nɩkpɛ 'la,

ɔ ‑nɩɩ 'mö yɩ 'tɛɛ tenyii.

Ɔ 'nɩ a tɛkäsɛ Lagɔ 'a wɛlɩɩ yɩbhlɩnɩ 'lɩlɩlɩ a'bhëë,

yɩ nɛnɩ a.

22 ‑Sɩbhä a nɩkpɛ 'la,

'ɔ ninea wa 'kɔɔ 'pänɩ,

ma‑a nɩɩ:

Gwɩ,

‑ɔ ‑kä 'mëti 'wë ‑ɔ li ɔnyɩ a 'mëtili.^a

'N nine ‑mämaa nʋ'ɛɛ nɩɩ:

Kokoti,

wa ‑kä bida 'wë ‑ɔ bhli ‑bädɩ.