2 Piɛlɩ 1

'Sɔnabɔgʋʋ

Piɛlɩ

'cɛlɩɛ

Bhälɩwɛlɩɩ

‑Amö Zezwii Kliisɩ a 'yliwʋnyɔ Simɔɔ Piɛlɩ,

‑amöö glɩnɩɛ ɔ tietienyɔɔ,

abhʋa 'tɛɛnɩɛ ‑aa saa Lagɔ dlɩɩ,

abhʋa n 'pää 'bɔgʋ nɩ 'wʋ.

Dlɩtɛɛnɩtɛnɛ 'la,

‑aa dɩba Lagɔ ‑nyɛ ‑aa Puënyɔ Zezwii Kliisɩ 'sɔ a ‑kpöö'wʋwʋza a 'ghïlee.

2 Sɛ n bhibhee a dɛ ‑aa dɩba Lagɔ,

‑sɩbhä ma‑a nɩɩ:

Ɔ'bhë,

ɔ ‑nyɛ ‑Alowli Zezwii 'sɔ,

a nɩ yɩbhlɩnuë sasɛ,

nzɩɩ 'tɩɩglɩglɛɛ ‑nyɛ 'nyupälɩɩ 'sɔ ‑yɩ 'bhöönuëë 'möö,

yɩ 'kanyɩ 'wlu 'mänanɩ.

Lagɔ mɔɔ ‑sanyɩɛ ‑lɛ

3 Sɛ'ɛ n gbää nɩɩ,

‑Alowli Lagɔ mɔɔ zʋʋnyɩɛ 'ɔ 'mötɛɛnɔɔ ‑gömö,

nza ‑a bhɛnɩa'aa ‑a 'kä ‑tiamö a ‑bhölɩbhölɛ ghlɩ,

‑a 'kɔ'ɛ sasɛ ‑gänɩ.

Mɔɔ gbää,

Zezwii Kliisɩ,

‑ɔ 'ghïliɛ ‑ɔ 'tɛɛ 'mö,

‑ɔ ‑sanyɩɛ ‑lɛ ‑a 'kɔ 'wʋ ‑glɛɛ,

a‑a yoo yɩbhlɩnɩ.

4 ‑A yɩbhlɩnɔɔ a dɛsɛkälii ɔ nʋä nɩɩ ɔ yi ‑aa dɛ 'yli 'wälanɩɩ,

yɩ'ɩɛ ‑sɩbhä a sɛ ‑wʋ,

miɛ nɩɩ,

mä'ä 'pɩwʋ a nɩkpaa ‑wa 'kää 'yli bhɩɛ 'lɩlɩlɩ ‑lii a 'tʋzokwëa a za‑a,

‑a 'naa 'kä wa saa 'yli bhɩɛmö,

‑maa Lagɔ,

'ɔ ‑wʋwʋsaa ‑sɩbhä ‑a 'kää 'mö yinɩ.

5 ‑Sɩbhä a za,

abhʋaa 'tɛɛnɩɛ Lagɔ dlɩɩ,

a nɩ 'tɛmanɩ 'yli yɔwʋ,

'a nɛmönɛmösaa 'wuë 'kä Lagɔsɛ ‑wʋ.

‑Sɩbhä ma‑a 'kää 'ylimö tulanɩ nɩɩ a ‑yi ‑tiamö Lagɔ.

6 A nɩ ‑yi'ɛ 'a dilaa a 'wʋpɩɛnɩsɛ.

Dɛ a kää sɛ,

a nɩ nyɔnʋ ‑lɛ kɛ,

a 'kä Lagɔ 'wʋ ‑glɛɛ 'tɩɩ.

7 ‑Mä 'a Lagɔgänɩgänɛ 'wuë 'mö,

a nɩ ‑wa a 'bhɩa Lagɔgänɩwaa.

A nɩ kä'ɛ 'gämö nɩkpa 'wuë a ‑wawʋ dlɩ zɛmö.

8 Sa'a ‑sɩbhä a kää a 'kä ‑wʋ.

‑Li a ‑li 'la 'wuë 'mö a dɔ'wʋ,

a ‑kä 'yukusɛ mö 'yizee,

yɩ yi 'nglɩ ‑kä a yi 'kwädlɩ sasɛ ‑Alowli Zezwii Kliisɩ yɩbhlɩnɩ.

9 ‑Maa ‑ɔ 'nɩ ‑sɩbhä nɛmöö,

Lagɔ 'a wɛlɩɩ 'mö a dɔ'wʋ,

'kukwlekänyɔ a sɛ bhöbhlɩnɩ ɔ bhöbhlɩnɩɛ.

Sɛɛ Lagɔ yɛɛ 'ɔ bhla'mö a 'nyinylolii a gbʋʋ 'yi 'tatinɩ a dɔ'wʋ,

‑dlʋ ɔ ‑dlʋä.

10 ‑Atʋayuënyɩ,

nɩkpa a ‑muë Lagɔ ‑sɛɛ ‑lɛ 'n wa yiɛ ɔ ‑nʋä 'zʋʋ,

'mö a glɩnɩɛ zaa,

dɛ a kää da'a sɛ,

a nɩ nyɔnʋ ‑lɛ kɛ a tɩa Lagɔ 'a 'yioo 'wʋ 'bhöö.

‑Lɛ a dɔ'wʋ,

11 ‑Alowli Zezwii Kliisɩ,

‑aa Puënyɔ,

'pɩwʋ mä ɔ 'kämanɩɛ,

mää 'naa 'kää 'yli bhɩɛɛ,

a yi ‑mä 'tɩɩ ghlɛ.

12 Nza n ligbananyɩɛ 'kwädlɩ kïbhï nɩ 'wʋ.

N ‑yi abhlɩ sɛ nɩɩ,

Lagɔ 'a ‑tiamö a wɛlɩɩ wa 'nyanyɩɛ,

a ‑yii 'tɩɩ,

‑mä yɩ 'mö a dɔ'wʋ,

a ‑nyɔnʋ glu.

13 ‑Sɩbhä yɩ ‑wʋ 'mö,

‑maa n ‑kä ‑bhlɛ ‑bhölɩmöö,

n kä n 'kanyɩ 'kwädlɩ 'dɩ 'nyɛ,

a 'kä ‑ligba a 'kä ‑lɛ glɩ.

14 Nyɩasɛ n'n‑ä ‑sɩbhä gbä,

‑maa n ‑yi sɛ nɩɩ,

n yia'a ‑pa 'pɩwʋ 'bhöö.

‑Alowli Zezwii Kliisɩ a'bhë mɔɔ tulanɩ'miɛ 'yli'mö.

15 Nza n tɩtaa yɛ'mö,

'n n 'cɩanyɩɛ wɛlɩ nɩ,

nzɩɩ n ‑käa 'pɩwʋ 'bhöö 'wëë,

a 'kɩa 'wʋ ligbanɩ.

‑Wa 'yɩɛ Zezwii 'a 'ghïlinɔɔ 'ylɩmöö

16 ‑Alowli Zezwii Kliisɩ,

sɛ ɔ 'kää 'ɔ 'mötɛɛnɔɔ 'kɔdʋʋ 'mö mä'ä dʋdʋ 'wʋ 'bɩwʋ yi a wɛlɩɩ ‑a 'nyanyɩɛ,

nyɩasɛwɛlɩɩ nɩkpa sɛɛ 'slɛlɛsɛ 'wlumöö,

mö ‑a 'nɩɛ 'wʋ 'libhï ‑a 'kanyi 'nyɛ.

‑Maa ‑a'bhï,

'ɔ 'ghïlinɔɔ,

‑a kʋ tɛkäsɛ 'ylimö 'ylɩmönɩ,

nza ‑a 'nyanyɩɛ ‑lɛ a wɛlɩ 'la.

17 ‑Zlɩ ‑aa dɩba Lagɔ 'zʋä Zezwii Kliisɩ a wɛlɩɩ kɛ ‑gömö 'n ɔ yiɛ ɔ 'nglɩ 'ghlimanɩɩ,

‑lɛ a zlɩ 'la 'mö,

‑a ‑wʋ a ‑lɛ Zezwii yɔwʋ,

n wɛlɩ yiɛ ‑mä ghäyɩ 'wʋ 'bhöönɩ.

Sɛ'ɛ yɩ gbää Zezwii a dɛ nɩɩ:

«‑Mɔ nɩ 'dɛɛ,

mɔɔ glɩnɩɛ 'na ‑Wawayuu,

mɔɔ ‑glaa dlɩ 'wʋ.»

18 Sɛ'ɛ n gbää nɩɩ,

‑mä Lagɔgägaa 'wlu,

‑a ‑nyɔɔ 'sɔ ‑a ‑wʋ ‑mä,

a‑a yiɛ wɛlɩ 'la ‑bhʋlʋ kpɔ 'nʋ,

yɩ 'bhöönɩ ‑mä ghäyɩ.

19 Nza wɛlɩɩ Lagɔ 'a 'möbhïlanɩwaa 'wuë bhïla a‑a,

‑a kɩɛ tenyii dlɩ 'wʋ.

'Wa Lagɔwɛlɩ 'la,

sɛɛ 'wapɛ lɩ'ɛ 'yuylukwë 'möö,

‑sɩbhä yɩ ‑wʋä mä'ä 'pɩwʋ,

yɩ 'kanyɩ 'wʋ ngäla.

Zaa,

a ‑kɩɩ sasɛ 'yli köbhaa,

‑li a ‑liɛ.

A nɩ ti kɛ 'mö ‑sɛ ‑këë,

Lagɔ 'a zlɩ 'kädɛɛ 'kä zɩ,

‑Alowli Zezwii Kliisɩ wa laa 'zɔkpɔzeliyii,

ɔ 'kä yi,

ɔ'bhë ɔ 'kanyɩ 'wʋ ngäla a 'kä 'ɔ 'ghïlinɔɔ 'ylɩmö.

20 ‑Atʋayuënyɩ,

a ‑pʋnɩ sasɛ 'yukwli,

n nɛ naa:

Lagɔ 'a 'möbhïlanɩwaa a wɛlɩɩ 'wuë ‑yɩ cɛlɩɛ ‑mä 'wa Lagɔbɔgwɩɩ 'möö,

sɛ yɩ sɛɛ ‑tiamö zɛmöö,

nɩkpɛ 'nɩɛ bhɛnɩ ɔ 'kä ‑sɩbhä ɔnyɩgäsɛ a 'nɛɛnɔɔ 'mö yɩbhlɩnɩ.

21 Ɛ'ɛ ‑bhö nyɩasɛ,

‑maa wa'bhï mʋa 'niɛ 'wlumö ‑sɛ wa 'kɩ bhïla,

‑maa 'Wugɔmʋʋ 'Wlɩlɩ mɔɔ ‑wuëë ‑gömö,

mɔɔ 'nyʋää 'dɩ,

wɛlɩɩ ‑yɩ 'bhöönɩɛ Lagɔ a'bhë nglii,

'n wa yiɛ bhïla.