Filemɔɔ 1

'Bɔgʋʋ Pɔɔlʋ 'cɛlɩɛ

Filemɔɔ

'wʋʋ

Bhälɩwɛlɩɩ

Filemɔɔ,

‑Amö Pɔɔlʋ,

‑amöö ‑wʋä dɛ'ɛ Zezwii Kliisɩ 'a libhoo a za ‑jie 'möö,

n ‑nyɛ ‑aa ‑daayu Timotee 'sɔ,

‑abhʋa cɛlɩmöä 'wʋ.

‑Nmö ‑aa bheyi Filemɔɔ,

‑nmö ‑a ‑nyɛɛ 'sɔ ‑a nʋä Lagɔ 'a libhoo,

2 ‑n ‑nyɛ ‑aa nglʋdaayu Apia 'sɔ,

Alɩsiipö ‑a ‑nyɛɛ 'sɔ ‑a yɔlɔɔ tenyii Lagɔ 'a libho a za kökä,

'n Zezwii a ‑nʋa ‑wa 'yɩbhänɩɛ ‑mä ‑na'a 'ligbë 'mö 'wluu,

a 'wuë,

‑a bhälanyɩ.

3 ‑Aa dɩba Lagɔ ‑nyɛ ‑Alowli Zezwii Kliisɩ 'sɔ,

'tɩɩglɩglɛɛ ‑nyɛ 'nyupälɩɩ 'sɔ ‑yɩ 'bhöönuëë 'möö,

yɩ nɩ ghlanyɩ 'wʋ.

Pɔɔlʋ bhälɩ Lagɔ Filemɔɔ 'a Zezwii a dlɩtɛɛnɩtɛnɛɛ a za

4 Filemɔɔ,

n ‑kä 'kwädlɩ Lagɔ bhibhee,

‑na 'wlumö n bhibhemɔɔ,

'n n bhälɔɔ ‑na za.

5 'Fʋ n'n‑ä ‑sɩbhä Lagɔ bhälɩ,

‑maa ‑na'a sɛ ‑n 'tɛɛnɩɛ tenyii ‑Alowli Zezwii dlɩ,

'n sɛ ‑n ‑waa tenyii ɔ ‑nʋa 'wuë,

‑sɩbhä a 'dɩ n 'nʋä.

6 Sɛ n bhibhee ‑na 'wlumö Lagɔ,

‑sɩbhä ma‑a nɩɩ,

sɛ ‑n ‑nyɛ ‑na 'bhɩa Lagɔgänɩwaa 'wuë ‑wʋnɩɛ 'wʋʋ,

‑sɩbhä 'kä 'yli 'wlʋnɩ,

miɛ nɩɩ,

‑li a ‑li a kii 'wuë ‑a bhɛnɩɛ ‑a 'kä 'wlu nʋnʋnɩ Kliisɩ a za‑a,

‑n 'kɩ yɩbhlɩnɩ,

‑n 'kɩ nʋ.

7 ‑Atʋayu,

sɛ'ɛ n gbää nɩɩ,

‑na'a sɛ ‑n ‑waa tenyii ‑na 'bhɩa Lagɔgänɩwaa 'n swɩ yuëë ‑sɩbhä a za nyɛmʋ 'mö 'pɔɔ,

‑sɩbhä ‑bhöö tenyii 'mäna 'wʋ,

‑sɩbhä 'pämöö swɩ nyɛmʋ 'mö.

Pɔɔlʋ bhibhee Oneziimö a 'wlumö Filemɔɔ yɔwʋ

8 Filemɔɔ,

Kliisɩ a za,

n bhɛnɩ a n ‑kamö 'wlumö köbhänɩ,

sɛ ‑n 'kää zʋʋ,

n ‑kamö ‑sɩbhä 'dɩ 'nyɛ,

9 ‑maa ‑wawʋ a 'nglɩ 'mö,

yɔwʋbhibhesɛ n ‑kamöä dɛ'ɛ 'dɩ 'nyɛ.

Sɛ'ɛ n gbää nɩɩ,

‑amö Pɔɔlʋ,

n yɛ gɔ,

'n n ‑wʋ'ɛɛ dɛ'ɛ Zezwii Kliisɩ 'a libhoo a za ‑jie 'mö.

10 N ‑wʋä mä'ä ‑jie 'mö a nɩkpɛ ‑bhlʋ n 'nyɛɛ Lagɔ 'a wɛlɩɩ,

‑ɔ 'zʋä na yuu,

ɔ za n bhibheamöä dɛ'ɛ yɔwʋ,

Oneziimö mɔɔ.

11 Bhla'mö a dɔ'wʋ Oneziimö^a,

ɔ'ɔɔ a dɛsɛ ‑kä.

‑Maa ‑sɩkaa dɔ'wʋ,

ɔ ‑kanyɩ ‑a 'sɔ ‑kpɔ dɛsɛ.

12 Ɔ ‑glaa tenyii dlɩ 'wʋ,

‑maa ‑nmö n sɩbhɔɔ yɔwʋ 'wlu.

13 'Lɩlɩlɩ a dɔ'wʋ,

mä n ‑wʋä dɛ'ɛ Lagɔ 'a 'Mänatɩtɩɩ a za ‑jie 'möö,

n yɩbhä a nyɩasɛ ɔ nɩ gölɩɩɩ yɔwʋ ɔ ‑kaa ‑na 'nglɩ 'mö kwänɩ.

14 ‑Maa n'n‑ä 'yɩbhä n ‑kamö 'wlumö köbhänɩ ‑n ‑kaa ‑li a ‑li 'wlu nʋ.

N yɩbhä nɩɩ,

sɛɛ ‑na'a dlɩɩ yɩbhää,

‑sɩbhä ‑n nɩ 'zʋ.

15 Oneziimö 'dionɩmöä da'a 'tikïyie 'wʋ gwëë,

sɛ n pää dlɩ a dɔ'wʋ,

ɔ 'kä ‑kamä nɩkpɛ a ‑mɔ ‑n ‑nyɛɛ 'käa'aa 'kwädlɩ 'wʋ ‑wʋnɩ 'zʋ,

nza yɩ 'plɩɛ ‑sɩbhä 'wʋ.

16 Yɩɛ,

‑na gïyi a 'yize ɔ'ɔa'a ‑sɩkaa glɩnɩ,

‑na dlɩsɛkädaayu ɔ glɩnɩmöa'aa 'gämö.

Ɔ ‑kaa dlɩsɛ.

‑Na'bhë,

ɔ ‑yimö'ɛ tenyii dlɩsɛ ‑kämö.

Ɛ'ɛ ‑bhö 'ɔ nɩkpɛglɩnɩsaa a 'yize a za,

‑maa 'ɔ sɛ ɔ ‑gänɩɛ ‑Alowli Zezwii,

‑sɩbhä a za n gbämöä ‑sɩbhä.

17 Filemɔɔ,

‑na bheyi n glɩnɩɛ zaa,

n ‑kä ‑mä ‑na'a mä'a yi a sɛ ‑n ‑kaa sasɛ pälaa,

Oneziimö ‑kä yii,

pälɔɔ ‑sɩbhä.

18 'N ‑lizoku ɔ ‑kamö a 'wlu nʋ oo,

‑na gɔgbʋ ɔ ‑kä a ‑kä oo,

‑li 'la 'wuë,

‑amö ‑n nɩ 'pɩ 'wlumö.

19 N ‑nɩmöä ligba nɩɩ ‑na'bhë ‑n ‑kämö na gɔgbʋ.

‑Maa 'na 'saa ‑n kää,

‑na'a zɩkpaa ma‑a.

‑Maa,

‑amö Pɔɔlʋ,

na'bhë ‑amöö cɛlɩɛ dɛ'ɛ nɩɩ,

Onezimö ‑kä ‑na gɔgbʋ ‑kä,

‑amöö 'kʋä ‑sɛ.

20 ‑Atʋayu,

‑Alowli Zezwii Kliisɩ a za,

‑daayuë ‑a glɩnɩɛ zaa,

ɔ za,

'saa n 'yɩbhänɩmöä dɛ'ɛ Oneziimö a dɛɛ,

nu,

'na dlɩɩ 'kä 'yli kpɔlɔ.

21 N ‑wʋmöä dɛ'ɛ 'wʋ 'cɛlɩ dɔ'wʋʋ,

n ‑yi sɛ nɩɩ,

'saa n 'yɩbhänɩmöä ‑n yu nʋ,

‑n yi ‑lɛ yɛ'mö 'plɩ a'bhë.

22 Sɛ'ɛ n nyɩamö'ɛɛ 'dɩ nɩɩ,

gïganɩ ‑bhlɛ na 'bhle 'wlu,

‑maa 'a sɛ a bhibhee na 'wlumö Lagɔ a za,

n pä dlɩ nɩɩ,

wa ‑yii ‑jie 'mö ‑sɛ,

n yi ‑mä 'a mä'a yi.

23 Epaflasɩ n ‑nyɛɛ 'sɔ ‑a ‑wʋä mä'ä ‑jie 'mö Zezwii Kliisɩ 'a libhoo a za‑a,

ɔ lɛ ɔ bhälɩmö.

24 'Na 'wʋ‑bhlinɩwa ‑mumuë,

Maakö mɔ,

Alitaakö mɔ,

Demaasɩ mɔ,

'n Lwiikö,

wa 'wuë,

wa lɛ wa bhälɩmö.

25 ‑Alowli Zezwii Kliisɩ nɩ 'panyɩ 'nyu!