Galatii a ‑nʋa 4

Sɛ'ɛ n gbää nɩɩ,

'yu a ‑mɔɔ 'kää ɔ dɩba a gugbë 'wʋ 'libhïï,

'n ɔ 'nɩ ‑bhlɛ 'ghlimanɩ,

ɔ yea abhlɩ zɩla'a 'wʋ 'libhïë yi oo,

‑maa sɛɛ gïyi 'nɩɛ ɔ 'bhidɩba a ‑li ‑gömö 'kïbhë ‑kää,

ɔ'bhë,

‑sɩbhä ɔ'ɔɔ ‑mä ɔ dɩba a ‑li ‑gömö 'kïbhë ‑kä.

2 Käbönɩkpaa 'kɔɔ ‑su,

mʋa 'kää 'ɔ ‑lii 'yli ‑wʋnɩ ‑këë,

'tɛnyɩ ɔ dɩba ‑dɩɛ 'kä ghlɛ.

3 ‑Abhʋa nɩkpa 'wuë,

sɛ ‑bhʋlʋ ‑kpɔ 'la,

‑sɩbhä ‑a ‑nyɛ Lagɔ 'sɔ a wɛlɩɩ ‑wʋmöä.

Dɛ ‑a ‑wʋ a‑a ‑bhlɛ 'yuë 'tikïyie a sɛɛ,

mä'ä 'pɩwʋ a 'mötɛɛnɔ 'wuë mʋʋ 'kämanɩnyɩ a‑a gasɛ ‑gömö.

4 ‑Maa 'tɛnyɩ Lagɔ a'bhë ‑dɩ a‑a,

ɛ ghlɛɛ,

'n ɔ yiɛ 'ɔ Yuu ‑bhʋlʋ ‑kpɔ mä'ä dʋdʋ 'wʋ tie.

Nglɔɔ gwälɔɔɔ.

Moyizɩ 'a Gböö 'kämanɔɔ ‑gömö.

5 'Fʋ Lagɔ 'nɔɔ ‑sɩbhä tie,

‑maa ‑abhʋa Gbö 'la 'kämanɩ a‑a sa'a gasɛ ‑gömöö,

ɔ ‑kanyɩ ‑mä yɩ galɛɛ 'mö ‑sɛ,

nzɩɩ,

ɔ za,

Lagɔ ‑kanyɩ ɔ 'yuë 'wʋ 'zʋa.

6 Zaa,

‑sɩkaa a dɔ'wʋ,

Lagɔ a yuë ‑a glɩnɩa'aa.

Lagɔ a'bhë,

ɔ ‑kanyɩ ‑sɩbhä 'ylimö tulanɩ a za,

nza ɔ zʋʋnyɩɛ ɔ Yowli Zezwii 'a 'Wugɔmʋʋ ‑gömö.

'Ɔ 'Wugɔmʋ 'la mɔɔ kää 'nglɩ,

‑a ‑kä Lagɔ bhibhee,

sɛɛ 'yu 'winɩ'ɛ ɔ dɩba 'mö 'n ɔ nʋ'ɛ:

«‑Atʋ aa,»

a‑a nʋä ‑sɩbhä.

7 ‑Sɩbhä a za n gbää nɩɩ,

‑nn ‑bhöa'a gïyi,

‑maa Lagɔ a yu ‑n glɩnɩɛ.

Zaa,

sɛ ‑n glɩnɩɛ ɔ 'yu a za,

‑lii 'wuë ɔ gbä a‑a ɔ 'kä 'ɔ yuëa 'nyɛɛ,

ɔ ‑yimi 'nyɛmö.

Pɔɔlʋ a dlɩ klɛ 'yli Galatii a ‑nʋa a za

8 Abhʋa Galatii a ‑nʋa,

bhla'mö a dɔ'wʋ,

a'a a Lagɔ ‑yi.

Zaa,

'fʋ a ‑lagwɩ a göwa a glɩnɩ a‑a.

9 ‑Maa ‑sɩkaa a dɔ'wʋ,

a ‑yi Lagɔ,

n bhɛnɩ'ɛ n 'kä nɩɩ,

Lagɔ yeanyɩ nʋ.

Zaa,

sɛ yɩ ‑wʋ bhäa'a 'mö,

'n 'fʋ a ‑li 'la ‑yɩɩɛ 'mötɛɛnɔ ‑kä 'lɩlɩlɩɩ,

'n a kwɩ bhä'ɛ ‑mä anyɩ 'nɩ?

A yɩbhä bhä'ɛ a 'kä 'wʋ 'sɔ yɩ göwa glɩnɩ ‑a?

10 Zila ‑mimii mi,

cwɩ ‑mimii mi,

'ylʋba a 'tɛnyɩ ‑mɛmɛɛ mɛ 'n 'ylʋbö ‑mimii,

yɩ 'klʋkpamözʋgbʋ mʋʋ planyɩɛ tenyii.

11 Abhʋa Galatii a ‑nʋa,

a dɔ'wʋ na dlɩ 'yli ɛ klɛɛ.

Ɛ'ɛ ‑bhö nyɩasɛ,

‑maa a dɔ'wʋ,

ɛ 'kä ‑bhɩɛ 'fʋ n yɛ yɔlɔ.

12 ‑Atʋayuënyɩ,

a ‑yaya,

Gböö 'wuë a wɛlɩɩ,

n kɩ kɛ'mö ‑sɛ,

abhʋaa 'nɩɛ Zwiiföwa glɩnɩɩ,

'n n yiɛ a sɛ a ‑nɔ 'zʋ.

Zaa,

a nɩ ‑gänɩ 'na gbäpöö.

'Lɩlɩlɩ a dɔ'wʋ,

a ‑nɩɩɛ ‑bhlɛ tɛkäsɛ 'kïbhëzokwë 'wlu nʋ.

13 Sɛ n ‑wʋä 'n n yeanyɩɛ tɛkädɔ'wʋ Zezwii 'a 'Mänatɩtɩɩ 'nyɛɛ,

a ‑yi ‑sɩbhä.

Gu ‑wʋʋ lɩbhä dɔ'wʋ 'n n yeanyiɛ 'nyɛ.

14 ‑Lɛ a 'tɛnyɩ 'la 'mö,

n'n a ‑yɛ,

‑maa ‑sɩbhä yɩ ‑wʋ 'mö,

n 'nanyɩɛ ‑nyɛnɩ 'wʋ bhömanɩ.

A ‑nɩɩɛ kpëti.

‑Maa Sɛ wa 'kä'ɛ Lagɔ a tietienyɔ pälaa,

‑sɩbhä a pälaaa,

ɛ 'kä ‑bhɩɛ sɛ'ɛ Zezwii Kliisɩ a'bhë mɔɔ kanyɩ 'wʋ plɛɛ yi.

15 N ‑yi sɛ nɩɩ n yi a 'dɩ a dɩ ‑sɛ.

‑Lɛ a 'tɛnyɩ 'la 'mö,

'n a ‑kä a bhɛnɩ a 'kä 'a yilaa 'kʋkʋ 'mö ‑sɛ a ‑ka'mi 'nyɛɛ,

a ‑yii a 'a yilaa 'nyɛ.

Na 'mäna a kä a‑a dlɩ zɛmöö tenyii,

‑maa 'mäna 'la,

dɛ a ‑wʋ bhäa'a ‑sɩkaa 'nɩ?

16 Lagɔ 'a ‑tiamö a wɛlɩɩ,

sɛ n 'nyanyiɛ gbëaa a za,

nza a 'zʋ bhäa'a na ‑gblɩwa ‑a?

17 A gla'mö a nɩkpa ‑mumuë a ‑bɛ,

a ‑kʋä 'wʋ yɩlɩɩ,

sɛ wa yɔlɔɔ a za‑a,

a yi nɩɩ a gbʋʋ plʋä tenyii nʋ,

‑maa 'wa dlɩpäsaa 'nɩɛ nɛnɩ.

'Wa 'saa wa tɛlɩɛ sɛ cuu,

miɛ nɩɩ,

a nɩ 'dionɩɩ gwë,

nzɩɩ wa 'yize a gbʋ 'kanyɩ plɛnɩ.

18 A ‑kä ku 'mö ‑su ‑li a ‑li a nʋnʋza‑a,

mɩɩ nɛnɩɛ.

‑Maa ɛ nɩ tɩ n ‑kaanyɩ 'gbamö ‑wʋ a 'yize glɩnɩ.

19 Na 'yuënyɩ,

sɛɛ gbadɩnglɔ ‑kä'ɛ ‑sɩbhä 'bhööä yi 'n ɔ ‑gbapö'ɛɛ,

‑sɩbhä n ‑gbapöä dɛ'ɛ 'wʋ 'sɔ a za.

Sa'a ‑sɩbhä yɩ 'kää 'mö ‑wʋ ‑këë 'tɛnyɩɩ Kliisɩ 'kää ‑mä a 'mö ‑bhölɩnɩɛ yii,

ɛ 'kä ghlɛ.

20 Na dlɩ yɩbhä tenyii nɩɩ,

‑mä a jijo'wʋ ‑mä n nɩ ‑wʋ dɛ'ɛ,

n 'kanyɩ ngli 'dɩ 'nyɛnɩ,

a 'kɩ sasɛ 'mö 'nʋ.

A dɔ'wʋ,

n'n‑a'a sɛ n 'kä zʋä ‑yi.

Pɔɔlʋ yɛ Agaa ‑nyɛ Salaa 'sɔ a wɛlɩɩ 'wʋ pälɩ

21 Galatii a ‑nʋänyɩ,

abhʋaa yɩbhää a 'kä Moyizɩ 'a Gböö a wɛlɩɩ ‑gänɩɩ,

a nyɩaa ‑ka 'dɩ:

Moyizɩ 'a Gböö a 'bɔgʋʋ 'mö a wɛlɩɩ,

sɛ yɩ gbää,

a'a bhä ‑sɩbhä ‑yi ‑a?

22 Sɛ'ɛ yɩ cɛlɩ ‑mä nɩɩ,

Ablaamö ghlɩ 'yuë 'sɔ.

Ganglɔɔ wa laa Agaa,

ɔ ‑nyɔɔ ghlɩ 'yu ‑bhlʋ,

'n 'ɔ 'ligbëlɛnglɛ a'bhë wa laa Salaa,

ɔ ‑nyɔɔ ghlɩ 'yu ‑bhlʋ.

23 Yuu ɔ ‑nyɛ ganglɔɔ ghlɩɛ a dɔ'wʋ,

wanyɩ 'a 'slɛlɛ wa 'pää 'n wa yoo gwälɩ.

‑Maa Salaa ɔbhlɩ,

yuu ɔ ‑nyɛ Ablaamö ghlɩ a dɔ'wʋ,

wɛlɩɩ Lagɔ 'nyʋä a‑a mɩɩ 'wlʋnɩɛ 'yli.

24 Yuë 'la 'sɔ ‑kpɔ ‑nyɛ wa ‑dawa 'sɔ a wɛlɩɩ,

yɩ kä zɛmö.

Wa ‑dawa a wɛlɩ,

mɛnɩnɔ a 'ki 'sɔ,

'mö yɩ pälɩɛ 'wʋ.

Tɛkämɛnɩnɔɔ ‑mä ‑gägaa wa laa Sinayii 'wlu,

‑mä wʋ 'bhɛnɔɔ.

Agaa 'a wɛlɩɩ 'mö wʋ pälɩɛ 'wʋ.

Mɛnɩnɔ 'la a yuëa,

göwa wa glɩnɩɛ.

25 N ‑kä Agaa nʋʋ,

‑mä Alabii a ‑gägaa wa laa Sinayii,

'mö n gaaa.

‑A'a 'tɛnyɩ nɩ 'mö a ‑glɔɔ wa laa Zeluzalɛɛmö 'mö n gaamö'ɛɛ.

Ɛ'ɛ ‑bhö nyɩasɛ,

‑maa wʋ ‑nyɛ wʋ 'mö a ‑nʋa 'wuë 'sɔ,

Moyizɩ 'a Gböö a göwa wa glɩnɩɛ.

26 ‑Maa ‑glɔlulu Zeluzalɛɛmö ‑wʋ ‑wʋä ‑mä Lagɔ yɔwʋ,

'mö n pälɩɛ Salaa ‑ɔɔɔ ganglɔ glɩnɩ 'wʋ.

Mʋʋ glɩnɩɛ ‑aa ‑da.

27 Sɛ'ɛ yɩ cɛlɩɛ wʋ dɛ ‑mä Lagɔ 'a wɛlɩɩ a Lagɔbɔgʋʋ 'mö nɩɩ:

‑Nmö wa laa ‑ɔɔgwälɩnglɔ,

'mäna nɩ lɩbhamö.

‑Nn‑ä abhlɩ ‑bhlɛ 'yu gwälɩ,

‑maa nʋ 'mäna 'käda.

Ɛ'ɛ ‑bhö nyɩasɛ,

‑maa sɛ'ɛ Lagɔ gbää nɩɩ:

Nglɔɔ wa'a yɩlɩ a‑a ‑ɔɔgwälɩza 'klʋʋ,

ɔ yi 'yuë a ‑bɛ ghlɩ,

ɔ yi ‑mɔ ɔ 'luwli yɩlɩɛ 'klʋ 'wʋ zi.^a

28 ‑Atʋayuënyɩ,

abhʋa abhlɩ,

sɛɛ Lagɔ 'a bhïlawɛlɩɩ 'wlʋnɩ a‑a 'yli 'n Salaa a yowli Yizaakö yi a‑a gwëlioo,

‑sɩbhä a ‑wʋmöä.

Lagɔ 'a bhïlawɛlɩɩ mɩɩ 'wlʋnɩɛ 'yli 'n a yiɛ ɔ 'yuë zʋ.

29 Bhla'mö a dɔ'wʋ,

Agaa a yowli ‑ɔ gwëlioo nɩkpɛsɛ a 'yizee,

mɔɔ 'yɩa a‑a Yizaakö ‑ɔ 'bhöönɩɛ Lagɔ 'a 'Wugɔmʋʋ kä'mö 'klɩ.

Sa'a ‑sɩbhä yɩ ‑wʋmöä dɛ'ɛ ‑a'a 'tɛnyɩ nɩ 'mö.

30 ‑Maa yɩ dɔ'wʋ,

sɛɛ Lagɔbɔgʋʋ gbä bhä?

Sɛ'ɛ wʋ gbää nɩɩ:

Ablaamö,

‑sɛ ganglɔɔ 'suë 'mö ɔ ‑nyɛ ɔ yowli 'sɔ wa 'kä mö!

‑Maa ɔ yowli 'nɩɛ ‑kä ɔ 'kä 'ligbëlɛnglɛ a yuu a saa ɔ dɩba 'a ‑lii gugbë 'mö 'wʋ 'libhïmö.^b

31 Zaa,

‑atʋayuënyɩ,

yɩ 'wuë a 'wlusɛnɩdaa a dɔ'wʋ,

sɛ'ɛ n gbää nɩɩ:

Ganglɔɔ 'a yuëa a saa,

‑sɩbhä ‑aaa ‑wʋ,

‑maa 'ligbëlɛnglɛɛ 'a yuëa a saa,

‑sɩbhä ‑a ‑wʋä.