1 Kolɛɛtɩ a ‑nʋa 10

Yizlaɛɛlɩ a yuëa yɛ ‑mä 'muse 'klʋ Lagɔ 'klʋkpamö ‑sɛ

‑Atʋayuënyɩ,

‑aa dɩbawa a dɩbawaa,

'saa ghïluë a‑a,

a nɩ 'päniɛ ‑ka dlɩ kɛ.

Wa 'wuë 'n wa yi a‑a 'nyu 'kɔdʋʋ wa laa gïnyɛzlɛ 'tʋ.

Sɛ wa nɛmöä 'yize,

‑sɩbhä gbeylokwëgbɛlʋ ‑gënuë a‑a 'yuku.

2 Sɛ wa wɔlʋanyɩɛ 'nyu 'mö 'wlu a 'kä Zezwii 'wʋ ‑glɛɛ,

‑sɩbhä wa 'wuë gbeylokwëgbɛlʋʋ ‑gënuë a‑a 'yuku 'n wa yi a‑a nyu 'la 'mö ghlɛnɩ,

wa 'kä 'wa 'yukugänɩnyɔɔ Moyizɩ 'wʋ ‑glɛ.

3 Wa 'wuë Lagɔlilea ‑bhʋlʋ ‑kpɔ 'mö wa li a‑a.

4 Wa 'wuë,

Lagɔnyuu ‑bhʋlʋ ‑kpɔ 'mö wa nɩmä a‑a.

Lagɔkpiyi ‑bhlʋ mɛɛ ‑gënuë a‑a,

ɛ 'mö ‑mä nyuu 'bhöönɩ a‑a 'n wa nɩmä a‑a.

Lagɔkpiyi 'la,

Kliisɩ mɔɔ.

5 Wa 'wuë,

‑sɩbhä wa ‑lii ‑wʋ a‑a.

‑Maa ‑sɩbhä yɩ ‑wʋ 'mö,

wa gla'mö a nɩkpa a ‑bɛ,

sɛɛ 'wa nʋnʋlii 'nɩɛ Lagɔ dlɩ yɔwʋ nɛnɩ a za,

'n ɔ yuë a‑a ‑mä 'muse 'klʋ 'yli bhɩanɩ.

6 'Saa ghïluëë da'aa,

mɩɩ nyɩanyɩɛ 'dɩ nɩɩ,

‑aaa ‑kä ‑a 'kä wa saa 'zokwësɛ dlɩ 'pä.

7 Sɛɛ wa gla'mö a ‑mumuë 'zʋ a‑a 'fʋ a ‑lagwɩɩ a bʋbɔbʋbɔwaa,

a nɩ tɩa'ɛ ‑sɩbhä 'zʋ.

Sɛ'ɛ yɩ cɛlɩɛ wa dɛ ‑mä Lagɔbɔgʋʋ 'mö nɩɩ:

Lagɔ a ‑nʋa,

'fʋ a ‑lagɔ 'mö wa bhlɛɛ 'n wa yiɛ ‑lɛ wʋ yɔwʋ linɩ,

'n wa yiɛ 'nɩmä,

'n wa yiɛ 'bhli.^a

8 Sɛɛ wa gla'mö a ‑mumuë 'zʋ a 'yɛɛ 'väkajɛnɩwa ‑nyɛ pɩtɛyɛleyijɛnɩngwlɩ 'sɔɔ,

a nɩ tɩa ‑sɩbhä 'zʋ.

‑Maa 'wa sɛ wa 'zʋ a‑a da'a a za,

nɩkpa a mila a glʋ ‑bhlʋ mila ta (23.000) mʋa 'ku a‑a 'ylɩ ‑bhlʋ 'mö.

9 Wa gla'mö a ‑mumuë,

sɛ'ɛ wa nʋ a‑a nɩɩ,

'n Lagɔ ‑kä bhɛnɩ ɔ nɩ tulanuë 'ɔ 'mötɛɛnɔɔ 'ylimö.

'N ɔ yuë a‑a ‑sɩbhä a za tɩma 'wʋ ‑lɛnɩ,

'n yɩ yuë a‑a nimï,

'n wa yi a‑a 'ku.

'Wa sɛ wa 'zʋä da'aa,

a nɩ tɩa ‑sɩbhä 'zʋmö.

10 Wa gla'mö a ‑mumuë,

wa 'ngungwanɩ a‑a Moyizɩ zɛmö.

Lagɔzuzukwëa ‑a ‑suä 'kwie 'n a yuë a‑a ‑sɩbhä a za 'yli bhɩa.

Zaa,

a nɩ tɩa'ɛ wa saa 'zʋ.

11 ‑Abhʋaa ‑wʋä dɛ'ɛ ‑mä 'pɩwʋ a 'gbëbhlenɩtɛnyɩɩ 'möö,

‑li 'la 'wuë,

yɩ ‑kanyɩa 'nɛmanɩ a za,

nza yɩ ghïluë a‑a ‑sɩbhä,

yɩ ‑kanyɩa ‑fɩa 'yukwli 'mö ‑sɛ,

nza wa 'celiɛ.

12 Nza n gbää nɩɩ,

‑nmöö pää dlɩ nɩɩ,

Lagɔsɛ a dɔ'wʋ ‑n 'tɛɛ 'yli yɔwʋʋ,

'nɛmanɩa ‑nanyɩ 'wʋ,

‑n tɩa bhli.

13 ‑Mäpäpʋʋ ‑wʋ ghïlanyɩɛ,

‑mäpäpʋ a ‑muu ghlɩɛ nɩkpa 'wuë,

muä.

Lagɔ,

sɛ ɔ yɛ gbä 'wë,

‑sɩbhä ɔ zʋä,

zaa,

‑mäpäpʋ a ‑mu a 'naa 'kää bhɛnɩɩ,

ɔ 'naa 'kʋ 'yi 'tatinɩ wʋ 'kanyɩ ghlɩ.

Zaa,

‑mäpäpʋ ‑kaanyɩ ghlɩɩ,

sɛ a 'kää 'zʋ a 'kʋ ngli 'pʋʋ,

ɔ yeanyɩ ‑lɛ a 'mötɛɛnɔ 'nyɛ a yu 'wlu 'plɩ.

Pɔɔlʋ yɛ 'wʋ 'sɔ nɩmaa wa bʋbɔnɩɛ 'fʋ a ‑lagwɩɩ a dɛ bhïla

14 Na dlɩsɛkäwanyɩ,

yɩ 'wuë 'mö a dɔ'wʋ,

sɛ'ɛ n gbää nɩɩ:

'Fʋ a ‑lagwɩɩ a bʋbɔbʋbʋʋ,

a nɩ 'dionuu gwë.

15 Nɩkpa a ‑muëë 'nɛɛ 'mö a glɩnɩɛ zaa,

wɛlɩɩ n 'kää dɛ'ɛ bhïlaa,

a'bhï a nɩ 'päni dlɩ kɛ,

a 'kɩ 'mö 'nʋ.

16 A nɩ 'pänɩ Lagɔlilea dlɩ kɛ.

‑Lɛ a nʋʋ ‑wʋnyɩɩ za ‑a bhälɩɛ Lagɔ 'wë,

a‑a 'nɩmanuä 'gämöö,

sɛ'ɛ wʋ sɛɛ zɛmö nɩɩ:

Zezwii Kliisɩ,

‑ɔnyɩɩ dluu kwli a‑a,

mö ‑a ‑glɛɛ ‑tiamö 'wʋ.

‑Lɛ a 'fɔlɔ ‑a ‑dɩdɩnɩɛ 'mö,

a‑a linuä 'gämöö,

sɛ'ɛ wʋ sɛ'ɛɛ zɛmö nɩɩ,

Zezwii Kliisɩ ‑ɔ 'wlʋä 'ɔ kpökpaa 'möö,

mö ‑a ‑glɛɛ ‑tiamö 'wʋ.

Ɛ'ɛ ‑bhö ɔ mi ‑a?

17 'Fɔlɔbhë ‑bhlʋ 'tɩɩ ‑abhʋa Zezwii a ‑nʋa,

‑a 'wuë,

mö ‑a ‑dɩdɩnɩɛ 'mö,

mö ‑a linɩɛ 'gämö.

Mɩɩ sɛɛ zɛmö nɩɩ,

kpökpaa ‑bhlʋ a sɛ,

‑sɩbhä ‑a ‑wʋä.

18 Yizlaɛlɩ 'a ngëyii 'mö a ‑nʋa,

wa ‑kä Lagɔ nɩma bʋbɔnɩ,

sɛ yɩ sɛɛ zɛmöö,

a nɩ 'pänɩɛ ‑ka ‑sɩbhä dlɩ kɛ.

Nɩma 'la,

wa ‑kɩɩ lii,

sɛ'ɛ yɩ sɛɛ zɛmö nɩɩ,

‑tiamö a Lagɔ wa bʋbɔniɛ,

ɔ'bhë,

'mö wa ‑glɛɛ 'wʋ.

19 N ‑kä ‑sɩbhä gbää,

sɛ'ɛ yɩ sɛ bhä zɛmö nɩɩ,

'fʋ a ‑lagwɩ ‑nyɛ nɩmaa wa bʋbɔniɛ 'sɔ,

'mötɛɛnɔ yɩ kä ‑a?

20 N'nn,

‑maa nɩmaa wa bʋbɔniɛ,

zuzukuzokuu 'mö wa nyɩɛ,

Lagɔ 'mö wa 'niɛ 'nyɛ.

‑Maa abhʋa abhlɩ,

n'n‑ä 'yɩbhä a 'kä anyɩ zuzukuzoku 'wʋ glɛ.

21 ‑Sɩbhä a za n gbää nɩɩ,

nɩmaa wa bʋbɔnɩɛ 'fʋ a ‑lagwɩɩ,

wa ‑kɩɩ lii,

a nɩ tɩ limö.

Ɛ'ɛ ‑bhö nyɩasɛ,

‑maa a'aa ‑kä a 'kä sa'a zuzukuzokuu a lilea li 'wë,

a 'kä'ɛ Lagɔlilea ‑a liɛ ‑Alowli Zezwii a 'nglɩ 'mö limöä yi.

A'aa'ɛ ‑kä a 'kä yɩ nʋ 'nɩmä 'wë,

a 'kä nʋʋ ‑a 'nɩmänɩɛ Zezwii a 'nglɩ 'mö 'wʋ 'nɩmämöä yi.

22 ‑Atʋayuënyɩ,

a‑a nɩ tɩ ‑anyɩ 'fʋ a ‑lagwɩɩ 'wʋ glɛ,

‑a tɩa ‑Alowli Lagɔ 'klɛ 'mö päla.

A ‑kä ‑sɩbhä 'zʋ a dɔ'wʋ,

a ‑tɔnɩ bhä nɩɩ,

‑abhʋa nɩkpa ‑a ‑nyɛ Lagɔ 'sɔ ‑a yi yɔwʋ vanɩ ‑a?

'Saa a ‑kä nʋ ‑kë wʋ nɩ 'ghlimanɩ Lagɔ a 'nglɩ

23 A lɛ nɩɩ:

«'Saa n ‑kä 'yɩbhä ‑kë n yu nʋ.»

Miɛ abhlɩ,

‑maa yɩ 'wuë ‑sɩbhä yɩ'ɩɛ ‑aa ‑li a ‑li 'mö ‑kä,

‑sɩbhä yɩ'ɩɛ ‑a'bhɩa 'yukusɛ kwä.

24 Zaa,

'saa a ‑kä nʋ ‑kë,

anyɩ a gbʋ nɩ tanyɩ plɛnɩ,

‑maa a 'bhɩa a gbʋʋ mʋʋ nɩ plɛnanyɩ.

25 Nɩma wa pää 'pɛlʋʋ,

a ‑kɩɩ ghlɩ a nɩ li cuu,

‑maa a nɩ tɩ yɩ 'bhöönɩda sɛ tɛlɩ,

'a dilaa tanyɩa tunɩ.

26 Ɛ'ɛ ‑bhö nyɩasɛ,

‑maa dʋdʋkpäta ‑nyɛ a 'wʋ a ‑lii 'wuë 'sɔ,

‑Alowli Lagɔ mɔɔ ‑këliɛ.^b

27 ‑Ɔɔɔ Zezwii a ‑nɔ glɩnɩ,

'n ɔ ‑kaanyɩ liliza wäzɩɩ,

a ‑kä 'wʋ nglu a 'kä lie möö,

'saa ɔ ‑kaanyɩ 'nyɛ ‑kë,

a nɩ li cuu,

‑maa a nɩ tɩ yɩ 'bhöönɩda sɛ tɛlɩ,

'a dilaa tanyɩa tunɩ.

28 ‑Maa ‑mɔmɔɔ ‑kamö 'dɩ 'nyɛ nɩɩ,

nɩmɛɛ ‑ɛ ‑bʋbɔnɩɛ 'fʋ a ‑lagɔ 'mö wa piaa,

ɔ ‑kä ‑sɩbhä nʋʋ,

te li ‑na dlɩ zɛmö 'käa ‑pälɛpälɛ ‑wʋ.

29 N ‑kä ‑sɩbhä gbää,

ɛ'ɛ ‑bhö 'a sɛ a pää dlɩ a za,

‑maa sɛɛ ‑mɔ'la pää dlɩ a za‑a.

Sɛ'ɛ ‑mɔmɔɔ 'kää ‑kamä nɩɩ:

«'Saa bhä,

sɛɛ ‑mɔmɔɔ pää dlɩ a za 'saa n 'kää nʋʋ,

'n n'n‑ä bhäa'a bhɛnɩ n 'kʋ nʋ 'nɩ?

30 N ‑kä lililu lie yi n ‑kä wʋ za Lagɔ bhälɩ 'wë,

n ‑kʋʋ lii,

sɛ yɩ ‑wʋ ɔ 'mö 'n ‑mɔmɔɔ ‑kaa bhäa'a wʋ za nuë 'wʋ kwä 'nɩ,

n yɛ'ɛ wʋ za Lagɔ bhälɩ 'wëë?»

31 Miɛ abhlɩ,

‑maa 'saa kää dɛsɛ miɛ nɩɩ,

ɛ yi lile a wɛlɩ oo,

ɛ yi 'nɩmänɩmʋ a wɛlɩɩ oo,

‑na'a nʋnʋlii 'wuë 'mö a dɔ'wʋ,

'saa 'ghlimanɩɛ Lagɔ 'a nglɩɩ,

yɩ 'yize mö ‑n nɩ nʋ.

32 ‑Lu a ‑muu 'kää nɩkpa 'nyinyloli 'mö sɛ bhlɩɩ,

ɛ yi Zwiiföwaa muë oo,

ɛ yi ‑waaa Zwiiföwa glɩnɩ muë oo,

tu nʋ.

Ɛ yi Lagɔ a ‑nʋa a ‑zɩkpa 'käda 'wuë ma oo,

tu nʋ.

33 ‑Amö na a,

dɛ n ‑kä ghlɛɛ,

'saa kää na ‑li a ‑li 'möö,

'mö n 'nɩɛ sɛ tɛlɩ,

‑maa nɩkpa 'wuë,

'saa kää wa ‑li a ‑li 'möö,

'mö n tɛlɩɛ sɛ,

nzɩɩ n 'kʋäa 'kwlɛ 'mö ‑sɛ,

wa 'kä Lagɔ 'a 'pʋpʋɛ ghlɩ.

Zaa,

a nɩ ‑gänɩ 'na gbäpöö.