1 Kolɛɛtɩ a ‑nʋa 9

Pɔɔlʋ lɛ wa nɩ ‑gänɩ 'ɔ gbäpöö

‑Atʋayuënyɩ,

'na sɛ n yɩbhää n'n ɔ ‑kä n 'kä ‑sɩbhä 'zʋ ‑a?

‑Alowli Zezwii,

n 'nɔ bhä 'ylɩmömö ‑a?

Ɔ tietienyɔ n'n‑ä bhä glɩnɩmö ‑a?

'Ɔ libhoo,

sɛ n nuä ‑sɩbhä ma‑a 'nɩɛ bhä 'nglɩ ‑kä 'n a 'nɩɛ bhä zɩ'ɛ ɔ ‑nʋä 'zʋ ‑a?

2 ‑Tiamö abhlɩ,

‑mumuë lɛ naa,

Zezwii a tietienyɔ n'n‑ä glɩnɩmö.

‑Maa abhʋa abhlɩ,

a'aa ‑kä a 'kä sa'a nʋ.

Zezwii 'a libhoo n nʋä ‑mä a gla'möö,

mʋʋ kää 'nglɩ 'n a yiɛ ɔ ‑nʋä 'zʋ.

Mɩɩ tulanɩɛ 'ylimö nɩɩ,

ɔ tietienyɔ n glɩnɩmöä ‑tiamö.

3 ‑Wa nyimaa 'na nglɩɩ,

sɛ'ɛ n nyʋää 'dɩ nɩɩ:

4 Libhoo n nʋä ‑mä a gla'mö a dɔ'wʋ,

n'n bhä ‑kä n 'kä nɩɩ,

n kä n 'kä li,

n kä n 'kä 'nɩmä,

n'n ɔ ‑kä n 'kä ‑sɩbhä nʋ ‑a?

5 Piɛlɩ ‑nyɛ ‑Alowli Zezwii 'a tietiewa ‑muë'la 'sɔ,

Zezwii a ‑daayuë kökä,

sɛ wa kwää 'wa Lagɔgänɩngwlɩ,

'n wa ‑suëë 'bɩwʋʋ,

n'n a bhä ‑kä n 'kä ‑sɩbhä Lagɔgänɩnglɔ kwämö ‑a?

6 Sɛ a pää dlɩ a dɔ'wʋ,

n ‑nyɛ Banabasɩ 'sɔ,

‑a 'yize ‑abhʋa kä bhä ‑abhlɩ ‑a 'kä Zezwii 'a libho nʋ dɔ'wʋ ‑wʋ ‑a 'kä ‑anyɩ lia ‑a?

7 A yɛ bhä tɛkäsɛ 'nʋ nɩɩ,

'slʋjeyi ‑kä 'slʋjalibho nʋ dɔ'wʋ ‑wʋʋ,

ɔnyɩ ɔ lia ‑a?

Nɩkpɛ ‑kä 'lagblɛ glʋ,

ɔ'ɔ bhä ‑kä ɔ 'kä ɛ 'mö a lile li ‑a?

'Bhila a 'ylizʋnɩnyɔ 'nɩ ɔ ‑kä ɔ 'kä 'ɔ bhilaa a lɩbhʋʋ 'nɩmä ‑a?

8 Wɛlɩ 'la 'wuë sɛ yɩ plɩɛ ‑mä nɩkpa jijo'wʋ 'wʋʋ,

‑sɩbhä n päliɛ abhlɩ da'a 'wʋ.

‑Maa Moyizɩ 'a Gbö a'bhë,

‑sɩbhä yɩ gbämöä.

9 Sɛ'ɛ Moyizɩ 'cɛlɩɛ nɩɩ:

Bhilii ‑ɛ yʋä ‑na'a lileaa,

tɛ nuë 'wʋ gwa.^a

Lagɔ ‑kä ‑sɩbhä gbää,

sɛ'ɛ yɩ sɛ bhä zɛmö nɩɩ,

‑tiamö a bhilaa 'mö ɔ yɩbhä wa nɩ 'zʋnɩ 'yli ‑a?

10 ‑Maa ‑abhʋa 'ɔ libhonʋwaa wa ‑kanyɩ 'yli 'zʋnɩ a za ɔ'ɔɔ bhä ‑sɩbhä gbä ‑a?

‑Tiamö,

wɛlɩ 'la,

‑abhʋa 'ɔ libhonʋwaa a dɛ yɩ bhïlaa.

‑Sɩbhä a za n gbää nɩɩ,

‑ɔ glʋä 'lagblɛ ‑nyɛ ɛ ‑dɩdɩnyɔ 'sɔ,

wa ‑kä libho nʋ dɔ'wʋ ‑wʋ,

wa ‑kä sɛ ‑yi nɩɩ,

wa yi 'wa libhoo a 'ylimö a ‑lu ghlɩɩ,

mɩɩ nɛnɩɛ.

11 Sɛɛ glʋglʋnyɔ glʋ'ɛ lilee 'n ɔ de'ɛɛ,

n ‑nyɛ 'na ‑gänɩwaa 'sɔ,

‑sɩbhä ‑a ‑lɛmanyɩɛ Lagɔ 'a 'pʋpʋɛ a wɛlɩɩ.

Zaa,

‑a'a libho 'la a 'wlumö,

‑a ‑kä a nɩɩ,

a nɩ nyɩanyɩ mä'ä 'pɩwʋ a ‑li 'tikïyie ‑a 'kä li nʋʋ,

‑lizoku a bhä ‑a?

12 ‑Mumuë,

wa lɛ a nɩ 'pɛnuë libho wa nʋä a 'wlumö,

'n a yiɛ 'wʋ nglu.

Zaa,

wa ‑kä ‑sɩbhä nʋʋ,

mɛɛ 'kä zi'e,

‑abhʋa 'naa 'kä a bhä ‑sɩbhä nʋmö ‑a?

‑A yi a ‑sɩbhä nʋmö.

‑Maa ‑aaa ‑bhlɛ tɛkäsɛ ‑sɩbhä nʋ.

‑Maa ‑a'bhï,

wʋ ‑a ngluä a‑a ylɔɔ tenyii,

‑a 'kä ‑anyɩ ‑su,

‑a tɩa 'nglɩ ‑kä,

Kliisɩ 'a 'Mänatɩtɩɩ,

nɩkpa tia 'yukwli yɔwʋ ‑sɛ.

13 A ‑yi sɛ nɩɩ,

‑wa nʋä ‑mä Lagɔbudu 'Kɔdʋʋ 'mö a libhoo,

wa 'wuë,

‑lii wa kwää ‑mä wa 'kɩ Lagɔ 'nyɛɛ,

yɩ daa ‑lɛ wa sɛɛ 'n wa liɛ.

Wa gla'mö a ‑muë kää Lagɔbʋbɔlibhoo,

nɩma wa bʋbɔnɩɛ,

yɩ daa ‑lɛ wa sɛ'ɛɛ,

'n wa liɛ.

14 Sɛ ‑bhʋlʋ ‑kpɔ 'la ‑sɩbhä ‑Alowli Zezwii 'yɩbhää nɩɩ,

‑wa biaa 'ɔ 'Mänatɩtɩɩ,

wa kä wa 'kä 'wa libho 'la a 'pɛna ghlɩ,

wa 'kä li.

15 ‑Maa ‑amö na a,

'saa wa kä a‑a wa ‑kaa 'na Lagɔlibhoo a za 'nyɛɛ,

n 'nuä ‑bhlɛ tɛkäsɛ nɩkpɛ 'yɩbhänɩ.

N ‑kaanyɩ'ɛ dɛ'ɛ wɛlɩ 'la a za 'wʋ 'cɛlɩɩ,

ɛ'ɛ ‑bhö nɩɩ,

a ‑kaaa'a ‑sɩkaa libho 'la a 'pɛna 'nyɛ a za.

'Na Lagɔlibhoo n nʋä a dɔ'wʋ,

n'n‑ä 'yɩbhä nɩkpɛ nɩ ‑saa 'nglɩ ‑gömö.

Zaa,

n 'kä 'ku,

yɩ nɛnɩ yɩ zi na 'nglɩ 'kä nyimo 'wʋ.

‑Lɛ a dɔ'wʋ ‑bɛ 'nɩɛ bhɛnɩ ɔ ‑kaa 'nglɩ 'la ‑gömö ‑sɛ.

16 Zezwii 'a 'Mänatɩtɩɩ a biabiuu n'n‑ä ‑kä n 'kʋ 'mö tɛkpɔnɩ.

Lagɔ a'bhë mɔɔ ‑saaa ‑lɛ n 'kä 'ɔ libho 'la nʋ klɩpaa.

'N n 'nu nʋʋ,

kplee ‑kaa köbhä.

17 Na'bhë 'n n ‑kä a dlɩ glu ghlɛɛ,

'n n nɩ ‑kʋʋ a nʋʋ,

wa ‑yii a ‑kamä wʋ 'wlumö 'pɛnɩ.

‑Maa libhoo Lagɔ nyɩaaa muä zaa,

n kä n 'kʋ nʋ,

nza n nuä cuu.

18 Sɛ'ɛ n gbää nɩɩ,

n kä a n 'kä nɩkpa 'na libhoo a 'pɛna 'yɩbhänɩ.

‑Maa n'n‑ä ‑sɩbhä 'zʋ 'n n nyʋää Zezwii 'a 'Mänatɩtɩɩ.

'Na sɛ n zʋä da'aa,

‑sɩbhä ma‑a ‑bhööä 'mäna 'wʋ tenyii.

‑Lɛ a 'mäna 'la,

'na libhoo a 'ylimö a ‑luu muä.

Pɔɔlʋ yɛ ɔnyɩ nɩkpa 'wuë a gïyi 'wʋ 'zʋä Zezwii a za

19 'Lɩlɩlɩ a dɔ'wʋ n'n‑ä nɩkpɛ a 'gë ‑gömö ‑kä.

‑Maa,

nanyɩgäsɛ n ngulu 'wʋ n 'kä nɩkpaa 'wuë gïyi a sɛ 'yli ‑wʋ n 'kʋä Lagɔ 'a wɛlɩɩ 'nyɛ,

nzɩɩ nɩkpa a ‑bɛ 'käa 'wʋ nglu,

wa 'kä Zezwii a ‑nʋä 'zʋ.

20 N ‑kä Zwiiföwa jijo'wʋ ‑wʋʋ,

wa saa,

‑sɩbhä n ‑bhölɩɛ,

nzɩɩ wa 'käa Kliisɩ 'a 'wɛlɩɩ 'wʋ nglu.

'Lɩlɩlɩ a dɔ'wʋ,

'wa sɛ wa zʋä Moyizɩ 'a Gböö 'klʋkpamö 'tɩɩ,

n'n‑ä 'wlumö ‑köbhänɩ n 'kä ‑sɩbhä 'zʋmö,

‑maa n ‑kʋä jijo'wʋ ‑wʋʋ,

wa saa ‑sɩbhä n 'zʋmiɛ 'klʋkpamö,

nzɩɩ wa 'käa Kliisɩ 'a wɛlɩɩ 'wʋ nglu.

21 Nɩkpaa ‑waaa Moyizɩ 'a Gböö ‑yi,

n ‑kʋä jijo'wʋ ‑wʋʋ,

nɩkpɛ a ‑mɔɔ 'nɩ 'zʋä gbö 'la 'klʋkpamö a saa ‑sɩbhä n nɛmöä,

nzɩɩ wa 'käa'ɛ wabhlɩ Kliisɩ 'a wɛlɩɩ 'wʋ nglu.

N ‑kä ‑sɩbhä 'zʋʋ,

ɛ'ɛ ‑bhö sɛ n sɛ Lagɔ 'klʋkpamö a sɛ.

‑Maa Kliisɩ,

sɛ ɔ nyɩaaa 'dɩɩ,

‑sɩbhä n zʋä.

22 Nɩkpaa ‑waaa ‑bhlɛ Lagɔ 'a wɛlɩɩ 'mö a dɔ'wʋ 'yli yɔwʋ 'tɛmanɩɩ,

n ‑kʋä jijo'wʋ ‑wʋʋ,

sɛ wa ‑bhölɩɛ ‑sɩbhä n ‑bhölɩɛ nzɩɩ,

wa 'käa 'na 'dɩmözʋwɛlɩɩ 'wʋ plɛ.

Nzɩɩ n 'käa klɩpaa ‑lɛ a ‑nʋä ‑mumuë 'kwlɛ 'mö ‑sɛ.

23 ‑Li 'la 'wuë,

'Mänatɩtɩɩ a za n nwiɛ,

‑li a ‑lii yɩ kää 'möö,

n 'kɩa ghlɩmö.

24 ‑Atʋayuënyɩ,

‑a'a bhä sɛ ‑yi nɩɩ,

guëguëwaa ‑wa möä ‑mä guëguëbhëlea 'klʋʋ,

wa 'wuë,

guë wa guëë,

‑maa nɩkpɛ ‑bhlʋ 'tɩɩ mɔɔ plɩɛ 'wlu,

'mö wa nyɛɛ ‑lɛ a 'ylimö 'pɛna.

Zaa,

guëguënyɔ a sɛ,

a nɩ 'tɛmanɩ 'mö a 'kä 'wlu 'plɩnɩ,

a 'käa ‑lɛ a 'ylimö a 'pɛna ghlɩ.

25 Guëguëwaa 'wuë,

‑li a ‑bɛ wa tɩaa wanyɩ wa 'kä gözɩdɔkɔ a ‑mu 'kää 'yli bhɩɛ ghlɩ a za.

‑Maa ‑abhʋa Zezwii a ‑nʋa ‑abhlɩ,

‑a ‑kä ‑anyɩ ‑li a ‑bɛ tɩaa,

gözɩdɔkɔ a ‑muu 'naa 'kää 'yli bhɩɛ a za‑a.

26 Zaa,

‑amö na a,

mää 'na dlɩɩ göä 'yii,

‑mä n mönɩɛ cuu.

Gwɩgwɩnyɔ a ‑mɔɔ ‑nyɛ ɔ 'li ‑wʋ gwɩ dɔ'wʋ,

‑ɔɔ 'pää nyɩasɛbɛyɩ ‑kätlɩɩ,

ɔ saa ‑sɩbhä n zʋä.

27 Miɛ nɩɩ,

na'bhë 'na nɩkpɛglɩnɩsaa sɛɛ 'nɩ 'yɩbhää a 'kä Lagɔ 'klʋkpamö zʋʋ,

'mö n kää n 'kä 'wlu 'plɩ,

nza n tɩaa nanyɩ ‑li a ‑bɛ.

Nzɩɩ,

n tɩa ‑mumuë 'Mänatɩtɩɩ 'nyɛ 'wë na'bhë n tɩa tʋʋ.