Nɩmaa wa bɔbʋnɩɛ 'fʋ a ‑lagwɩɩ
8
Nɩmaa wa bʋbɔnɩɛ 'fʋ a ‑lagwɩ a dɔ'wʋ,
sɛ'ɛ n gbää nɩɩ:
A lɛ a 'wuë Lagɔ 'a ‑lii a ‑yiwa a glɩnɩɛ.
Miɛ abhlɩ ‑tiamö,
‑maa ‑lii 'wuë a ‑yiyee bhabhʋ 'mö ɛ kwää.
‑Wawʋ wʋbhlɩ 'saa 'kää ‑na 'li swɩ nyɛmʋ 'mö 'pää,
'mö wʋ tɛlɩɛ sɛ.
2 ‑Ɔ pää dlɩ nɩɩ,
ɔ ‑yi ‑luu,
sɛɛ ‑lu a ‑yiyee sɛɛ ‑tiamö zɛmöö,
ɔ'ɔɔ ‑bhlɛ ‑sɩbhä yɩbhlɩnɩ.
3 ‑Ɔ ‑kä Lagɔ ‑wa,
Lagɔ ‑yoo.
4 Nɩmaa ‑yɩ ‑bʋbɔnɩɛ 'fʋ a ‑lagwɩɩ a lilidɔ'wʋ,
sɛ'ɛ n gbää nɩɩ:
‑A 'wuë ‑a ‑yi sɛ nɩɩ,
‑tiamö a dɔ'wʋ ‑lagwɩ ‑mimii 'nɩɛ mä'ä 'pɩwʋ ‑bhölɩ,
'n ɛ 'nɩ ‑bhö ‑tiamö a Lagɔ ‑bhʋlʋ ‑kpɔ mɔɔ.
5 ‑Tiamö abhlɩ,
nɩkpa,
‑mä zlɩ 'mö a ‑lii ‑nyɛ mä'ä dʋdʋ 'wʋ a ‑lii 'sɔ wa laa 'wa ‑lagwɩɩ,
yɩ'ɩɛ muënɩ.
Mɩɩ glɩnɩɛ ‑tiamö 'wa ‑lagwɩɩ,
mɩɩ 'kämanuëë ‑gömö.
6 ‑Maa ‑a ‑yi sɛ nɩɩ ‑aa dɩba Lagɔ,
‑lii 'wuë 'bhöönɩɛ kä'mö,
‑a 'kää kä'mö 'wlu ‑sɛnɩ,
ɔ 'yize mɔɔ glɩnɩɛ ‑tiamö a Lagɔ.
‑A ‑yi'ɛ sɛ nɩɩ,
Zezwii Kliisɩ Lagɔ
ghlɛnɩɛ 'mö 'n ɔ yiɛ ‑lii 'wuë 'wäla,
‑ɔnyɩ za ‑a ‑bhölɩɛ,
ɔ 'yize mɔɔ glɩnɩɛ ‑Alowli.
7 ‑Maa wɛlɩ 'la,
nɩkpaa 'wuë mʋa 'niɛ ‑sɩbhä ‑yi.
Zezwii a ‑nʋä ‑mumuë,
sɛ wa bʋbɔ a‑a 'fʋ a ‑lagwɩɩ a za,
nɩma a ‑mii ‑bʋbɔnɩɛ 'fʋ a ‑lagwɩɩ,
wa ‑kä wa 'kɩa'a ‑sɩkaa lii,
wa dɔ'wʋ,
ɛ 'kä ‑bhɩɛ ‑lagwɩ 'la 'mö wa bʋbɔmö ‑bhlɛ 'yize.
Wa'aa ‑bhlɛ Lagɔ 'a wɛlɩɩ 'mö a dɔ'wʋ 'yli yɔwʋ 'tɛmanɩ zaa,
sɛ'ɛ wa pää dlɩ nɩɩ,
wa ‑kä sa'a a nɩma lii,
wanyɩ wa plaa fɩ Lagɔ a 'yila 'klʋ a dɔ'wʋ.
8 'Lɩlɩlɩ a dɔ'wʋ,
lilili a ‑mi ‑n ‑kä li n‑n 'kää Lagɔ dlɩ yɔwʋ nyimonɩɩ,
yɩ'ɩɛ ‑bhölɩ,
‑mi ‑n ‑kä'ɛ li n‑n 'kɔɔ dlɩ yɔwʋ nɛmanɩɩ,
yɩ'ɩɛ ‑bhölɩ.
Zaa,
‑n ‑kä lililii a kii 'wuë lii,
yɩ nɛnɩ,
‑n 'nɩɛ'ɛ yɩ ki ‑mimii lii,
yɩ nɛnɩ'ɛ.
9 Zaa,
'saa ‑n ‑kä 'yɩbhä ‑kë,
‑n yu li.
Miɛ abhlɩ,
‑maa 'nɛmanɩa ‑nanyɩ 'wʋ,
nzɩɩ ‑na'a 'zʋzʋsaa tɩa 'nglɩ ‑kä,
‑ɔɔɔ ‑bhlɛ Lagɔ 'a wɛlɩɩ 'mö a dɔ'wʋ 'yli yɔwʋ 'tɛmanɩɩ,
ɔ tɩa 'nyinyloli nʋ.
10 ‑Nmöö pää dlɩ nɩɩ,
‑n ‑yi sasɛ Lagɔ zaa,
'fʋ a ‑lagwɩɩ a ‑bïdii 'mö,
‑n 'kä ‑mä mö,
nɩma wa bʋbɔniɛ,
‑n 'kɩ li a dɔ'wʋ,
‑na gbʋ 'nɩɛ ‑mä ‑wʋʋ,
‑n ‑kɩɩ ‑mä linɩ dɔ'wʋ ‑wʋʋ,
'n Zezwii a ‑nɔ ‑ɔɔɔ ‑bhlɛ ‑mä Lagɔ 'a wɛlɩɩ 'mö a dɔ'wʋ ‑jɩbhɛɛ,
'n ɔ ‑kamö ‑mä 'ylɩmöö,
‑na'a sɛ ‑n zʋä da'a ‑sɩbhä ma‑a 'kɔɔ swɩ yɔwʋ päla ɔ 'kɩ li.
11 ‑Lɛ a dɔ'wʋ,
‑na lilagɔgänɩnyɔ ‑ɔɔɔ ‑bhlɛ ‑jɩbhɛ Lagɔwɛlɩɩ 'mö a dɔ'wʋ,
‑ɔnyɩɩ za Zezwii Kliisɩ 'kuä,
‑na'a sɛ gbää ‑n ‑yi ‑lii 'wuë a za,
‑sɩbhä ma‑a 'kää 'nglɩ ‑kä ɔ 'kä tʋʋ.
12 ‑N ‑kä sa'a 'nglɩ ‑kä ‑na 'bhɩa Lagɔgänɩwaa ‑mumuë,
'saa glɩnɩɛ wa dɔ'wʋ 'nyinyloli wa ‑kɩɩ nʋʋ,
‑lizoku ‑n kʋää da'a 'wlu nʋ.
‑Lizoku 'la,
Kliisɩ a'bhë mö ‑n kɩɛ da'a 'wlu nʋmö.
13 ‑Sɩbhä a za n gbää nɩɩ,
'na lilili n liɛ mɩɩ ‑kä 'nglɩ ‑kä 'n na lilagɔgänɩnyɔ ‑mɔmɔɔ ‑kä 'nyinyloli nʋʋ,
'naa 'käa'a 'kwädlɩ ‑lɛ a lile 'la li,
ɔ tɩa na za 'nyinyloli 'mö bhlinɩ.