Zezwii a ‑nʋa kä wa 'kä wanyɩgäsɛ 'wa ‑zijli plɛ
6
Abhʋa Zezwii a ‑nʋa,
a gla'mö a ‑nʋä 'sɔ ‑kä wɛlɩ ‑kä 'n wa 'ni ‑mä a jijo'wʋ zʋ,
wa ‑kɩɩ ‑zijlituwaa ‑waaa Lagɔ ‑yi ‑mä kwää,
yɩ nɛnɩ bhä da'a ‑a?
2 A'a bhä sɛ ‑yi nɩɩ,
abhʋa Zezwii a ‑nʋa,
abhʋa 'kää mä'ä 'pɩwʋ a ‑nʋa ‑zijli tu ‑a?
Zaa,
abhʋa 'kä'ɛ abhlɩ mä'ä 'pɩwʋ a ‑nʋa ‑zijli tuu,
a'a bhä bhɛnɩ wɛlɩyie ‑kaanyɩ jijo'wʋ ‑wʋ,
a 'kɩ anyɩgäsɛ 'mö ‑sɛnɩ ‑a?
3 A'a bhä sɛ ‑yi nɩɩ,
‑abhʋaa 'kää Lagɔzuzukuu a'bhï ‑zijli tu ‑a?
Zaa,
'saa bhä 'n a 'nɩ bhä bhɛnɩ a 'kä mä'ä dʋdʋ 'wʋ a wɛlɩ 'mö ‑sɛnɩ?
4 ‑Maa wɛlɩ ‑kaanyɩ jijo'wʋ ‑wʋʋ,
nɩkpa a ‑muëë 'nɩɛ Lagɔ ‑yi,
‑wanyɩ wɛlɩɩ 'nɩɛ ‑mä a jijo'wʋ dɛsɛ ‑kä,
'mö a ‑kä a ‑zijlituwa 'wʋ 'zʋaa,
mɩɩ nɛnɩ bhä ‑a?
5 'A sɛ a zʋä da'a,
‑sɩbhä 'nanyɩ ‑bhä zʋ 'wʋ ‑bhö ‑a?
Nɩkpɛ ‑bhlʋ a'bhë ‑ɔ 'kää 'nɛɛ,
wɛlɩ ‑kä a gla'mö a ‑nʋä 'sɔ jijo'wʋ ‑wʋʋ,
‑ɔ 'kɩɛ 'mö ‑dɩnɩɩ,
ɔ'ɔ bhä ‑mä a gla'mö ‑wʋ ‑a?
6 Sɛ'ɛ n gbää nɩɩ,
nɩkpa a ‑muëë 'zʋä Zezwii Kliisɩ a za ‑daayuë,
wa ‑kä wɛlɩ ‑kä,
'n wa ‑kä yɩ za 'klɛklɛnɩɩ,
nɩkpaa ‑waaa Lagɔ ‑yi a'bhë a 'yila 'klʋ,
wa ‑kɩɩ ‑mä kwää,
yɩ'ɩɛ nɛnɩ.
7 ‑Atʋayuënyɩ,
'a sɛ a glɩnɩɛ Lagɔ a ‑nʋä 'wë 'n a 'klɛklɛnɩɛ,
‑sɩbhä ma‑a tulanɩɛ 'ylimö nɩɩ a'aa Lagɔsɛ nɛmö.
Nɩkpɛ ‑kaanyɩ ‑lizoku 'wlu nʋʋ,
a kä a yɩ a 'kä a 'mlɩ 'kunɩ nɩɩ.
‑Ɔ ‑kä ɔ 'kanyɩ ‑bi 'wlumö lii,
a kä a yɩ a 'kɔ 'yi 'tatinɩ nɩɩ.
8 A'a 'zʋ abhlɩ ‑sɩbhä.
‑Maa a'bhï abhʋaa nʋä nɩkpa ‑lizoku 'wlu,
abhʋaa luë ‑bi 'wlumö.
A 'bhɩa Lagɔgänɩwaa a'bhï 'mö a nʋä sa'a a ‑li 'wlu.
9 A ‑yia sɛ nɩɩ,
‑lizokunʋwaa 'wuë,
'pɩwʋ mää Lagɔ 'kämanɩɛ,
wa'aa ‑mä 'bhle ‑kä.
A nɩ tɩa anyɩ dula,
‑maa 'nyinylolinʋwaa 'wuë,
ɛ yi nyɩbhɛlɩɩ ‑wa sɛsɛnɩɛ ngwlɩɩ muë oo,
ɛ yi ngwlɩɩ ‑wa sɛsɛnɩɛ nyɩbhɛlɩɩ muë oo,
nɩkpaa ‑wa ‑nyɛ wa 'bhɩa a ngwlɩɩ pöä sɛ,
ɛ yi muë oo,
‑wa ‑nyɛ wa 'bhɩanyɩbhɛlɩɩ pöä 'ngwlɩ a sɛ sɛ,
ɛ yi muë oo,
ɛ yi 'fʋ a ‑lagwɩɩ a bʋbɔbʋbɔwaa muë oo,
10 'wiwa oo,
gugwagugwawa oo,
nʋnɩmäwa oo,
nɩkpa a 'nglɩnyimawa oo,
‑glasɛ a 'wighliwa oo,
sa'a a nɩkpa 'wuë,
'pɩwʋ mää Lagɔ 'kämanɩɛ,
wa'aa ‑mä 'bhle ‑kä.
11 A gla'mö a ‑nʋä ‑mumuë,
sa'a a nɩkpa wa glɩnɩ a‑a bhla'mö.
‑Maa ‑sɩkaa a dɔ'wʋ,
Lagɔ kanyɩ 'a 'nyinylolii a gbʋʋ ‑gömö ‑sɛ,
a yɛ 'wlɩlɩ plɛ.
‑Alowli Zezwii Kliisɩ a 'nglɩ 'mö 'n Lagɔ 'a 'Wugɔmʋʋ a za,
nɩkpa a ‑muë zlɔnɩ 'mö Lagɔ a 'yila 'klʋ a dɔ'wʋ 'mö a glɩnɩa'aa.
A nɩ 'tatinɩ anyɩ 'yi Lagɔ 'kanyɩ ‑gömö 'kämanɩ
12 A lɛ nɩɩ:
«'Saa n ‑kä 'yɩbhä ‑kë n yu nʋ.»
Miɛ abhlɩ ‑tiamö,
‑maa yɩ 'wuë,
‑sɩbhä yɩ'ɩɛa ‑na ‑li a ‑li 'mö ‑kä.
‑Lii 'wuë n yi abhlɩ nʋ,
‑maa 'naa 'kää 'wʋ nglu,
‑lu ‑bhlʋ a'bhë ‑kaa gasɛ 'wlumö ‑känɩ.
13 A lɛ nɩɩ:
«Lilili,
nɩkplaa a za yɩ ‑wʋä,
nɩkplaa,
lilili a za a ‑wʋ'ɛɛ.»
Yɩ 'sɔ ‑kpɔ 'plɩplɩli Lagɔ 'kää 'ylɩ ‑bhlʋ 'mö 'yli bhɩa 'mö yɩ glɩnɩɛ.
Miɛ abhlɩ,
‑maa ‑nn‑ä ‑kä ‑n 'kä ‑sɩbhä a za nɩɩ,
‑na'a kpökpaa,
nglʋsɛtɛlɩlibho a za a ‑wʋä ‑lɛ nʋ.
‑Maa ‑na'a kpökpaa ‑Alowli Zezwii a za a ‑wʋä ‑lɛ,
ɔ 'ka ‑kälɩ,
ɔ 'ka 'kwädlɩ ‑su.
14 Zaa,
sɛɛ Lagɔ ‑sɛɛ ‑Alowli Zezwii 'a kpökpaa gluu,
‑sɩbhä ɔ 'kää ‑aa ‑naa 'ɔ 'mötɛɛnɔɔ 'mö glu ‑sɛmö.
15 A ‑yi sɛ nɩɩ,
sɛɛ nɩkpɛ a yɔwʋ a nɩma ‑gälɔɔ'ɛ 'wʋʋ,
‑sɩbhä ‑a ‑glɛɛ Kliisɩ 'wʋ,
'ɔ yɔwʋ a nɩmaa,
mö ‑a glɩnɩɛ.
Zaa,
yɩ ‑kä ‑sɩbhä 'mö ‑wʋʋ,
‑n yi bhä Zezwii a 'kïbhë 'wʋ 'libhï,
‑n yea 'tutunglɔ 'wʋ glɛ ‑a?
N'nn,
‑sɩbhä 'nɩɛ nɛnɩ.
16 Lagɔwɛlɩɩ lɛ naa:
Nɩkpɛ ‑nyɛ 'nglɔ ‑kä ‑lɛ ‑wʋʋ,
ɔ ‑nyɛ nglɔ 'la 'sɔ nɩkpɛ ‑bhlʋ wa zʋä.a
A'a bhä sɛ ‑yi ‑a?
Zaa,
‑n ‑nyɛ 'tutunglɔ ‑kä sɛ pöö ‑n ‑nyɔɔ 'sɔ nɩkpɛ ‑bhlʋ a zʋä.
17 ‑Maa ‑ɔ ‑kä ɔnyɩ ‑Alowli yowʋ 'nyɛɛ,
ɔ ‑nyɔɔ 'sɔ ‑bhlʋ wa zʋä.
18 A nɩ ‑gu 'ngwlɩ a ‑sɛsɛnɩsɛsɛnɛ,
a nɩ ‑gu nyɩbhɛlɩ a ‑sɛsɛnɩsɛsɛnɛ.
'Nyinyloli ‑mimii nɩkpɛ nʋä,
yɩ'ɩɛ 'ɔ kpökpaa kɛ zɩ.
‑Maa ‑ɔ ‑kä 'ngwlɩ ‑sɛsɛnɩ ‑ɔ ‑kä nyɩbhɛlɩ ‑sɛsɛnɩɩ,
'ɔ kpökpaa a'bhë 'mö ɔ nʋä da'a 'nyinyloli 'wlu.
19 A'a bhä sɛ ‑yi nɩɩ,
'a kpökpaa,
'Wugɔmʋʋ 'Wlɩlɩ Lagɔ 'zʋanyɩɛ ‑gömö a ‑budu a glɩnɩɛ,
zaa abhʋa 'nɩɛ anyɩ ‑kälɩ ‑a?
20 Nyɩasɛ n'n‑ä ‑sɩbhä gbä ‑maa,
Lagɔ kanyɩ zeti 'wë.
Zaa,
a nɩ 'libhï 'a kpökpaa 'wʋ,
nzɩɩ a 'kä ɔ 'nglɩ 'ghlimanɩ.