1 Kolɛɛtɩ a ‑nʋa 5

Zezwii a ‑nʋa a ‑zɩkpaa 'mö a 'kpʋkpʋlii

Sɛ'ɛ n 'nʋä nɩɩ,

‑mä a jijo'wʋ,

nglʋsɛtɛlɩgbɩɩ ‑wʋä ‑mä.

'Kïbhë ‑bhlʋ a'bhë ‑a ‑bhöä tenyii zʋ 'wʋʋ,

wlɛ ma‑a ‑wʋanyɩɛ jijo'wʋ.

Miɛ nɩɩ,

a gla'mö a ‑nɔ ‑bhlʋ,

ɔ dɩba a nglɔɔ 'mö ɔ ‑nyɛ pöä sɛ.

Sa'a a ‑lizokuu,

nɩkpaa ‑waaa Lagɔ ‑yi a'bhë,

wa ‑yi sɛ nɩɩ,

yɩ'ɩɛ nʋnʋsɛ ‑wʋ.

2 Mɩɩ ‑wʋanyɩɛ abhlɩ jijo'wʋ,

'n a bhaa.

A kä a a 'kä anyɩ 'wʋ 'winɩ a'bhë.

Nɩkpɛ 'la ‑ɔ nʋä sa'a a ‑lizokuu,

a kä a a 'kɔ ‑mä a jijo'wʋ ‑sɛ.

3 ‑Amö na a,

n 'nanyɩ ‑sɩkaa dɛ'ɛ jijo'wʋ ‑wʋ ‑kë,

'na dlɩ ‑wʋ ‑mä a yɔwʋ.

Zaa,

n ‑kä a ‑lɛ ‑wʋ a sɛ n 'kä a‑a nɩkpɛ 'la a wɛlɩɩ 'wlu ‑dɩɩ,

n kɩ Zezwii Kliisɩ a 'nglɩ 'mö ‑sɩbhä 'wlu ‑dɩ 'wë.

4 Zaa,

a 'wuë a nɩ 'yɩbhä 'wlu,

‑Alowli Zezwii a 'nglɩ 'mö 'n 'ɔ 'mötɛɛnɔɔ 'mö,

5 a 'kä nɩkpɛ 'la Sataa kä'mö plɩnɩ,

'ɔ kpökpaa ma‑a 'kä 'yli bhɩɛ ‑kë,

ɔ'bhë ɔ 'kä ‑Alowli Zezwii 'a ‑zijle 'kädaa a zlɩ 'mö Lagɔ 'a 'pʋpʋɛ ghlɩ.

6 'Saa kää 'nglɩ 'n a tɛkpɔɔ,

wʋ'ʋä nɛnɩ.

‑A'a bhä sɛ ‑yi nɩɩ,

levii ‑bhʋbhʋ a 'tikïyie 'n wʋ 'pulaa falinɩkwë 'käda ‑a?

7 A nɩ ‑sɛ ‑mä a gla'mö 'nyinylolii,

‑yɩ ‑bhɩɛɛ leviigɔgɔɔ,

nzɩɩ a 'kä 'wlɩlɩ plɛ,

falinɩkwë a ‑ma 'nɩɛ levii 'mö ‑kä a saa.

A'bhï,

‑sɩbhä a ‑wʋä.

Nyɩasɛ n'n‑ä ‑sɩbhä gbä ‑maa Kliisɩ,

mɔɔ 'zʋä ‑a'a 'bhlawadɩgbaa 'n ɔ yiɛ ‑aa 'wlumö 'ku.

8 Zaa,

‑a'a Galɛ'möwlʋfɛtɩɩ,

sɛ ‑a 'kɛɛ ‑sɛɛ,

‑sɩbhä ma‑a nɩɩ,

sɛ wa sɛnɛɛ 'fɔlɔ ‑wʋʋä levii 'mö ‑kää,

a‑a nɩ ‑sɛ ‑sɩbhä 'kpʋkpʋlii kɛ'mö,

'nyinylolii 'wuë,

a‑a nɩ ‑sɩɩ kɛ'mö,

‑a'a dila 'wuë zɛmö ‑a 'kä gbëaa 'mö Lagɔsɛ nɛmö.

9 'Na 'bɔgʋʋ n 'cɛlanyɩ a‑a tɛkädɔ'wʋ 'wʋʋ,

‑mä wʋ 'mö,

sɛ'ɛ n gbä a‑a nɩɩ,

nyɩbhɛlɩɩ ‑wa ‑sɛsɛnɩɛ ngwlɩɩ,

'n ngwlɩɩ ‑wa ‑sɛsɛnɩɛ nyɩbhɛlɩɩ,

a nɩ 'dionuë gwë.

10 N ‑kä ‑sɩbhä nʋʋ,

a gla'mö a nyɩbhɛlɩɩ ‑wa sɛsɛnɩɛ ngwlɩɩ 'n ngwlɩɩ ‑wa sɛsɛnɩɛ nyɩbhɛlɩɩ,

'mö n gaa.

N ‑kä'ɛ nɩɩ,

gugwagugwawaa muë,

'wiwaa muë,

'fʋ a ‑lagwɩɩ a bʋbɔbʋbɔwaa muë,

a nɩ 'dionuë gwë nʋʋ,

a gla'mö a ‑nʋa ‑wa nʋä sa'a a ‑lii,

'mö n gaa.

'N ɛ 'nɩ ‑bhö a ‑sɩbhä,

mä'ä 'pɩwʋ ‑mä a 'kä a‑a 'kpʋsɛ 'bhöö.

11 ‑Maa nɩkpaa ‑wa laa wanyɩ Zezwii a ‑nʋä 'wë ‑wa glɩnɩɛ nglʋsɛtɛlɩwa,

‑wa glɩnɩɛ gugwagugwawa,

‑wa bʋbɔɔ 'fʋ a ‑lagwɩ,

‑wa bhïlanɩɛ nɩkpa wɛlɩzoku,

‑wa glɩnɩɛ nʋnɩmäwa,

‑wa glɩnɩɛ 'wiwa,

'mö n gaaa.

Sa'a a nɩkpa,

a nɩ 'dionuë gwë,

a nɩ ‑nyʋä nɩ tɩ tɛkäsɛ a'bhë 'wʋ linɩ.

12 Nɩkpaa ‑waaa Lagɔ ‑yii,

n 'kä nanyɩ Lagɔ a 'bhle 'mö zʋ n 'kʋä 'wa 'nyinylolii a ‑zijli tu,

nza n'n‑ä ‑lɛ ‑wʋ.

A gla'mö a ‑lizokunʋwaa,

a kä a 'kä 'wa wɛlɩɩ 'mö yɩlɩ.

13 Nɩkpaa ‑waaa Lagɔ ‑yii,

Lagɔ a'bhë mɔɔ 'kʋää ‑zijli tu.

Sɛ'ɛ Lagɔwɛlɩɩ nʋä nɩɩ:

A nɩ ‑sɛ ‑mä a jijo'wʋ 'kpʋkpʋwaa.^a