Tɩ ‑na lilagɔgänɩnyɔ nuë 'wʋ kwä 'ɔ 'saa ɔ liɛ a za
14
Nɩkpɛɛ ‑ɔnyɩ dlɩ'wʋkänɔɔ 'nɩɛ ‑bhlɛ nyɔnʋʋ,
a nɩ köbhɔ pɛɛpɛ.
‑Mi ɔ 'kää nʋ 'n ‑mi ɔ 'naa 'kää nʋ a dɔ'wʋ,
a ‑nyɔɔ nɩ tɩ kpɛnɩ.
2 A yɩɛ,
‑mɔmɔɔ lɛ ɔ bhɛnɩ ɔbhlɩ ɔ 'kä ‑li 'wuë li.
‑Mɔmɔɔ ɔbhlɩ 'ɔ dlɩ'wʋkänɔɔ 'nɩɛ ‑nyɔnʋ zaa,
ɔ'ɔ li nɩma.
3 Zaa,
‑wa liɛ ‑lii a kii 'wuë,
wa nɩ tɩ ‑waa liɛ nɩma 'ylimö fälanɩ.
‑Waa li'ɛɛ wabhlɩ nɩmaa,
wa nɩ tɩ ‑muë'la nuë 'wʋ kwä.
Ɛ'ɛ ‑bhö nyɩasɛ,
‑maa wa ‑wʋ ‑sɩbhä,
'n Lagɔ yuëë 'wʋ nglu.
4 ‑Na 'bhɩa Lagɔgänɩwa 'la,
Lagɔ mɔɔ glɩnɩɛ wa 'bhidɩba.
‑Mɔ ‑n glɩnɩ bhä ‑naa zaa,
n‑n 'kʋä bhä nuë 'wʋ kwä 'nɩ?
'Wa nɛmönɛmösaa yi 'mö zlɔnɩ oo,
‑sɩbhä 'nɩ 'mö zlɔnɩ oo,
wa 'bhidɩba a 'yize 'mö yɩ yɩlɩɛ 'wʋ,
ɛ'ɛ ‑bhö ‑na gbʋ.
‑Maa Lagɔ,
'mö ɔ tɛɛ zaa,
ɔ yuë kwänɩ 'wa nɛmönɛmösaa yi 'mö zlɔmanɩ.
5 A gla'mö a ‑mumuë sɛ'ɛ wa pää dlɩ nɩɩ,
zila ‑mimii kä dɛsɛ,
yɩ zi ‑mimii 'wʋ,
‑mumuë a dɔ'wʋ,
zilaa 'wuë ‑bhʋlʋ yɩ glɩnɩɛ.
Yɩ 'wuë 'mö a dɔ'wʋ,
sɛ'ɛ n gbää nɩɩ,
‑na'a sɛ ‑n pää ‑lu a dɔ'wʋ dlɩɩ,
‑sɩbhä nɩ tɩ gʋgɔgʋgʋ 'mö ‑kä.
6 ‑Ɔ gbäzɩɛ zila ‑mimii 'möö,
‑Alowli a 'nglɩ ɔ 'ghlimanɩɛ.
‑Ɔ liɛ ‑li a kii 'wuë,
‑Alowli a 'nglɩ ɔ 'ghlimanɩɛ.
Ɛ'ɛ ‑bhö nyɩasɛ,
‑maa Lagɔ 'mö ɔ bhälɩɛ lile 'la a za.
‑Ɔɔ liɛ lilili a ki ‑mimii,
‑Alowli a 'nglɩ ɔ 'ghlimanɩɛ.
Ɛ'ɛ ‑bhö nyɩasɛ,
‑maa ɔ bhälɩmö'ɛ ɔbhlɩ Lagɔ lile 'la a za.
7 Yɩ 'wuë 'mö a dɔ'wʋ,
‑bɛ 'nɩɛ ɔnyɩ a za ‑bhölɩ,
‑bɛ 'nɩ 'ku ɔnyɩ a za.
8 Ɛ'ɛ ‑bhö nyɩasɛ,
‑maa a‑a ‑kä ‑bhölɩ oo,
‑Alowli a za ‑a ‑bhölɩ.
A‑a ‑kä 'ku oo,
‑Alowli a za ‑a 'kuä.
A‑a ‑kä ‑bhölɩ oo,
A‑a ‑kä 'ku oo,
‑Alowli a ‑nʋä ‑a glɩnɩɛ 'yize.
9 Ɛ'ɛ ‑bhö nyɩasɛ,
‑maa nɩkpaa 'wuë,
‑wa ‑bhölɩɛ oo,
‑wa yɛɛ 'ku oo,
Kliisɩ 'kä wa ‑lowli glɩnɩ,
nza ɔ 'kuä 'n Lagɔ yoo glu ‑sɛ.
10 Sɛ'ɛ n gbää nɩɩ,
‑nmö ‑naa,
‑mɔɔ ‑n glɩnɩ bhä n‑n kwä bhä ‑na ‑daayu 'nuë 'wʋ,
n‑n fälanɔ bhä 'yli 'mö 'nɩ?
‑Nn bhä sɛ ‑yi nɩɩ,
Lagɔ ‑yinyɩ 'ylɩ ‑bhlʋ 'mö ‑lɛ ɔ 'yila 'klʋ wäzɩnɩ,
ɔ ‑kanyɩ bhʋlʋbhlʋ ‑a'a nʋnʋlii 'wʋ 'yɩbhänɩ ‑a?
11 ‑Mä Lagɔbɔgʋʋ 'mö,
sɛ'ɛ yɩ cɛlɩɛ ‑mä nɩɩ:
‑Alowli Lagɔ lɛ naa:
‑Amö Lagɔ,
n ‑bhölɩ.
Nɩkpaa 'wuë yi ‑lɛ na dlɩ 'mö ‑kokomïladigbï glu 'pä wa yi na 'nglɩ 'ghlimanɩ.a
12 Nza n gbää nɩɩ,
Lagɔ,
ɔ ‑yinyɩ bhʋlʋbhlʋ ‑a'a nʋnʋlii 'wʋ 'yɩbhänɩ.
Tɩ ‑na lilagɔgänɩnyɔ 'nyinyloli 'mö sɛ bhlɩ
13 A‑a nɩ tɩ nuë 'wʋ kwäkwänɩ,
‑maa sɛ a 'kää 'zʋ,
sɛɛ nɛnɩɛ,
‑sɩbhä ma‑a nɩɩ:
‑Lu ‑bhlʋ a'bhë ‑wʋ 'kää a lilagɔgänɩnyɔ 'nyinyloli 'mö sɛ bhlɩɩ,
a nɩ tu nʋ 'lɩlɩlɩ.
14 ‑Alowli Zezwii,
'na sɛ n ‑gälɔɔɔ 'wʋ a za,
'na dlɩ 'wuë zɛmö n ‑yi sɛ nɩɩ,
lililu a ‑muu 'kää nɩkpɛ fɩ pälaa Lagɔ a 'yila 'klʋ a dɔ'wʋʋ,
wʋ'ʋä ‑bhölɩ 'lɩlɩlɩ.
‑Maa ɔ pää dlɩ nɩɩ,
fɩ wʋ pälaa,
ɔ dɔ'wʋ wʋ pälaa fɩ.
15 Zaa,
lililu a za,
n‑n ‑kä ‑na lilagɔgänɩnyɔ dlɩ yilaa,
‑n 'nɔɔ da'a ‑wa.
Nɩkpɛ a ‑mɔnyɩ za Kliisɩ 'kumöä,
‑na'a lilea nɩ tɩ 'nglɩ ‑kä ɔ nɩ tɩ tʋʋ.
16 'Saa ‑n gbää ‑wʋ nɛnɩɩ ‑na dɔ'wʋʋ,
wʋ nɩ tɩ 'nglɩ ‑kä wa nɩ tɩ ‑na 'dɩzoku ‑sɛ.
17 'Pɩwʋ mää Lagɔ 'kämanɩɛ a wɛlɩɩ 'nɩ ‑bhö lile ‑nyɛ 'nɩmänɩmʋ 'sɔ a gbʋʋ.
‑Maa 'mözlɔnɩzlɔnɛ,
'tɩɩglɩglɛ 'n 'mäna 'Wugɔmʋʋ 'Wlɩlɩ nyɛɛ,
yɩ wɛlɩɛ.
18 ‑Li 'la a gbʋʋ mʋʋ ‑kä nɩkpɛ plɛnɩɩ,
ɔ 'kä ‑sɩbhä Kliisɩ 'a libhoo nʋʋ,
mɩɩ nɛnɩɛ Lagɔ dlɩ yɔwʋ,
‑sɩbhä yi'ɛ 'nglɩ ‑kä nɩkpa yi ɔ 'dɩ a dɩ ‑sɛ.
19 Zaa,
sɛ ‑a 'kää 'zʋ ‑a 'kä ‑wanɩ,
‑a 'kä swɩ nyɛmʋ 'mö 'päpänɩ,
nzɩɩ ‑a 'kä 'gämö 'yukusɛ möö,
a‑a nɩ tɛlɩ ‑sɩbhä sɛ.
20 ‑Maa lilili a za,
tɩ Lagɔ 'a libhoo nyima.
Lilili a kii 'wuë,
'wlɩlɩ yɩ ‑wʋä,
miɛ abhlɩ,
‑maa 'n nɩkpɛ ‑kä lile li,
'n ‑mɔmɔɔ ‑kä ɛ za 'nyinyloli 'mö bhlinɩɩ,
yɩ'ɩɛ nɛnɩ.
21 Zaa,
‑na'a nɩmalile ‑nyɛ na'a nʋnɩmänɩmʋ 'sɔ,
'n ɛ ‑kä'ɛ käböli ‑mimii a'bhë ‑kë,
mɩɩ ‑kä ‑na lilagɔgänɩnyɔ 'nyinyloli 'mö sɛ bhlɩɛ yii,
‑n kä ‑n 'kä yɩ 'wuë kɛ'mö ‑sɛ.
22 ‑Mi'la 'wuë a dɔ'wʋ,
‑na'a sɛ ‑n kää da'a dlɩ 'wʋʋ,
tɩ ‑sɩbhä 'yi 'tatinɩ,
‑maa ‑sɩbhä nɩ ‑wʋmö ‑na 'yize dlɩ zɛmö Lagɔ a 'yila 'klʋ.
Nɩkpɛ a ‑mɔɔ ‑kä ‑lu nʋ dɔ'wʋ ‑wʋ,
‑ɔnyɩ dlɩ zɛmöö ‑wʋä ‑pälɛpälɛ Lagɔ a 'yila 'klʋʋ,
'mäna nɩ 'lɩbhɔ.
23 Miɛ abhlɩ,
‑maa nɩkpɛ a ‑mɔ ‑ɔnyɩ dlɩɩ ‑kiɛ 'mö lile a ke ‑mämaa a dɔ'wʋʋ,
'n ɔ ‑kaa lii,
ɔnyɩ ɔ yɛɛ da'a gbʋ köbha Lagɔ a 'yila 'klʋ a dɔ'wʋ.
Ɛ'ɛ ‑bhö nyɩasɛ,
‑maa ɔ 'kää ‑sɩbhä 'zʋä yii,
ɔ 'niɛ dlɩ'wʋkänɔ 'mö nʋnɩ.
'Lɩlɩlɩ a dɔ'wʋ,
‑n ‑kä ‑lu nʋä yii,
n‑n 'nɩ Lagɔ dlɩ 'tɛɛnɩ,
'n ‑na'a dlɩɩ ‑kä 'mö ‑ki ‑n ‑kʋʋ nʋʋ,
'nyinyloli ‑n yɛɛ da'a nʋ.