Ghlɔɔmö a ‑nʋa 7

Gböö mɩɩ 'nanyɩa'a ‑sɩkaa ‑gömö 'kämanɩ

‑Atʋayuënyɩ,

Gböö,

a ‑yii 'kɩ zaa,

a ‑yi sɛ nɩɩ,

nɩkpɛ a ‑mɔɔ ‑bhölɩɛ ‑bhlɛ,

ɔ 'yize 'mö yɩ bhɛnɩɛ ‑gömö,

‑maa ɔ ‑käa'a 'ku 'wëë,

yɩ 'nɔa'a ‑gömö bhɛnɩ 'lɩlɩlɩ.

2 Sɛ ‑bhʋlʋ ‑kpɔ 'la,

‑sɩbhä Gböö gwanɩɛ 'nglɔ ɔ 'luwli yɔwʋ 'n ɔ ‑kä ‑bhlɛ ‑bhölɩɩ.

‑Maa 'n 'luwlii mɔɔ ‑käa'a 'kuu,

Gböö 'nɩa'a dɛsɛ ‑kä ɔ dɔ'wʋ.

3 Zaa,

ɔ 'luwli ‑kä ‑bhlɛ ‑bhölɩ 'n ɔ ‑kä käböghlɩ möö,

'nyinyloli ɔ yɛɛ da'a nʋ.

‑Maa 'n ɔ 'luwli mɔɔ ‑käa'a 'kuu,

‑lɛ a 'tɛnyɩ 'la 'mö,

Gböö mɩɩ 'nɔa'a ‑gömö 'kämanɩ.

Zaa,

ɔ ‑kä käböghlɩ möö,

ɛ'ɛ ‑bhö 'nyinyloli.

4 ‑Atʋayuënyɩ,

‑sɩbhä a ‑nɩɩ ‑wʋmöä.

Zezwii Kliisɩ ‑ɔ 'kunɩɛ ‑lɛ su 'klʋʋ,

'mö a ‑glɛɛ 'wʋ zaa,

gbö 'la a dɔ'wʋ,

a'bhï a yɛ 'ku a yɛ ‑lowlilolo ghlɩ.

Zezwii Kliisɩ Lagɔ gälaa 'n ɔ yoo glu ‑sɛɛ,

mɔɔ glɩnɩa'aa a ‑lowli.

Mɩɩ kää 'nglɩ,

'saa ‑bhöä Lagɔ 'mäna 'wʋʋ,

a‑a nwiɛ.

5 ‑A'bhï,

dɛɛ ‑a 'zʋnɩ a‑a sɛ ‑a ‑kä 'yɩbhää,

‑lɛ a 'tɛnyɩ 'la 'mö,

‑li a 'tʋzokwëa ‑a ‑wʋä ‑mä ‑aa dila zɛmöö,

ma‑a ‑känɩnyɩ a‑a tenyii 'wlumö.

Gböö,

mɩɩ vʋvlanɩnyɩ a‑a,

‑lizokuu ‑yɩ 'kää 'nglɩ ‑kä,

a‑a 'kää 'yli bhɩɛɛ,

a‑a nwi a‑a.

6 ‑Maa ‑sɩkaa,

yɩ dɔ'wʋ ‑a yɛ 'ku zaa,

yɩ ‑nɩnyɩa'a ‑gömö bhɛnɩ 'lɩlɩlɩ.

‑Maa Lagɔ 'a 'Wugɔmʋʋ a'bhë mɔɔ ‑wʋnyɩa'aa ‑gömö,

mɔɔ 'zʋanyɩɛ nɩkpalili 'wʋ,

mɔɔ kää 'nglɩ,

a‑a ‑wʋa'aa Lagɔ 'yli.

‑Maa Gböö mɩɩ ‑nɩnyɩa'a gasɛ 'wlumö ‑känɩ.

Gböö ‑nyɛ 'nyinylolii 'sɔ a wɛlɩɩ

7 Zaa,

n ‑kä sa'a nʋʋ,

sɛ'ɛ yɩ sɛ bhä zɛmö nɩɩ,

Gböö,

'nyinyloli yɩ glɩnɩɛ,

‑sɩbhä yɩ sɛ bhä zɛmö ‑a?

N'nn,

ɛ'ɛ ‑bhö sa'a ma 'lɩlɩlɩ.

‑Maa sɛ'ɛ n gbää nɩɩ,

Gböö,

mɩɩ ‑dɩɩɛ 'yila,

'saa glɩnɩɛ 'nyinylolii,

'n n yɩbhlɩniɛ.

'N Gböö ‑nɩɩ a 'dɩ 'nyɛ nɩɩ:

‑Na 'lilɛ a ‑li a 'tʋ nɩ ‑tɩmö 'zokwësɛ 'lɩbhää,^a

n 'naa 'kä a sɛ yɩbhlɩmanɩ nɩɩ,

‑lɛ a tʋ 'la,

wʋ su ‑mä na dlɩ zɛmö.

8 Sa'a ‑sɩbhä Gböö 'nyɛɛ 'nyinylolii 'tɛnyɩ,

'n ‑li a kii 'wuë a 'tʋzokwëa ‑yiiɛ dlɩ zɛmö yi.

Nza n gbää nɩɩ,

Gböö 'nɩ ‑bhölɩɩ,

'nyinyloli 'nɩɛ ‑bhölɩ.

9 Bhla'mö a dɔ'wʋ,

sɛɛ Gböö gbää n nɩ 'zʋʋ,

n'n a ‑sɩbhä ‑yi.

‑Bhölɩ n ‑bhölɩ a‑a cuu.

‑Maa dɛ n yɩbhlɩnɩa'aa Gböö,

‑lɛ 'nyinyloli a tʋ zumanɩɛ ‑mä na dlɩ zɛmö.

10 'N n yiɛ sɛ yɩbhlɩmanɩ nɩɩ,

Lagɔ a 'yila 'klʋ a dɔ'wʋ,

n yɛ 'ku.

Gböö ‑yɩ ‑kaa a‑a 'lɩlɩlɩ a dɔ'wʋ ‑tiamö a ‑bhölɩbhölɛ 'nyɛɛ,

sa'a yɩ 'zʋa'aa na dɛ 'kwie.

11 Sɛ'ɛ n gbää nɩɩ,

‑mä Gböö 'mö,

‑mä 'nyinylolii ghlɛnɩɛ 'n yɩ ‑yiiɛ dula,

'n n yiɛ 'kwie ghlɩ.

12 Zaa,

Gböö,

Lagɔsɛ yɩ ‑wʋä,

Lagɔ 'mö yɩ 'bhöönɩɛ 'mö,

'mö yɩ zlɔnɩɛ,

nɛnɩ yɩ nɛnɩɛ.

13 Gböö,

‑yɩ glɩnɩɛ sa'a ‑li a ‑lii,

mɩɩ ‑lɛnɩɩ bhä 'kwie 'wʋ ‑a?

N'nn,

ɛ'ɛ ‑bhö sa'a ma 'lɩlɩlɩ.

‑Maa 'nyinylolii mɩɩ ghlɛnɩɛ ‑mä Gböö ‑yɩ 'nɛnɩɛ 'mö 'n yɩ ‑yiiɛ 'kwie 'wʋ ‑lɛnɩ.

Nyɩasɛ yɩ'ɩɛ ‑sɩbhä 'wʋ 'plɩ ‑maa,

‑mi Lagɔ gbää nɩkpa nɩ nʋʋ,

‑mä yɩ 'mö,

sɛɛ 'nyinylolii ‑wʋä 'tɩɩ,

‑sɩbhä 'kä zɩkpa bhli nza yɩ 'plɩɛ ‑sɩbhä 'wʋ.

Nɩkpɛ 'nyinyloli bhɛnɔɔ ‑gömö

14 ‑A 'wuë ‑a ‑yi sɛ nɩɩ,

Gböö,

Lagɔ 'mö ‑mä yɩ 'bhöönɩɛ.

‑Maa ‑amö na a,

nɩkpɛsɛ n ‑wʋä.

Sɛ wa plɩ'ɛ gïyii,

‑sɩbhä n plɩnɩɛ ‑mä 'nyinylolii kä'mö.

15 ‑Sɩbhä a za 'na nʋnʋlii a'bhë,

n ‑kɩɩ 'wʋ yɩlɩɩ,

n'n‑ä 'saa n nʋä ‑yi.

'Saa n yɩbhä a‑a 'lɩlɩlɩ a dɔ'wʋ n 'kä nʋʋ,

'mö n 'nɩɛ nʋ,

‑maa 'saa n'n‑ä 'yɩbhä 'lɩlɩlɩɩ,

'mö n nʋä.

16 ‑Maa,

'saa n'n‑ä 'yɩbhä 'mö n ‑kä nʋʋ,

mɩɩ tulanɩɛ 'ylimö nɩɩ,

Gböö,

nɛnɩ yɩ nɛnɩɛ.

17 Zaa,

na'bhë n ‑kä sa'a ‑lizoku nʋʋ,

ɛ'ɛ ‑bhö ‑amö,

‑maa 'na ‑wʋwʋsɛzokwëa,

'mö 'nyinyloli a 'mötɛɛnɔ ghlɛnɩɛ 'mö,

'n wʋ nʋnɩɩɛ ‑lizoku 'la 'mö.

18 ‑Mä 'na nɩkpɛglɩnɩsaa 'mö,

'saa nɛnɩɛ,

wʋ'ʋä ‑mä ‑wʋ 'lɩlɩlɩ.

Miɛ nɩɩ,

'saa nɛnɩɛɛ,

wʋ nʋnʋtʋʋ ‑wʋʋ abhlɩ ‑tiamö dlɩ zɛmö,

‑maa n 'kʋa'a nʋ a dɔ'wʋ,

n'n‑ä bhɛnɩ.

19 Sɛ'ɛ n gbää nɩɩ,

'saa nɛnɩɛ n yɩbhää n 'kä nʋʋ,

mö n 'nɩɛ nʋ,

‑maa ‑lizokuu n'n‑ä 'yɩbhää,

mö n nʋä.

20 ‑Sɩbhä a za n gbää nɩɩ,

'saa n'n‑ä 'yɩbhä n ‑kʋʋ nʋʋ,

nanyɩgäsɛ nanyɩ n'n‑ä ‑su,

‑maa 'nyinyloli a 'mötɛɛnɔɔ mʋʋ ‑sunɩɩɛ 'wlumö.

21 Zaa,

‑mä 'na zɩkpaa 'mö,

'saa nɛnɩɛ,

n ‑kä n 'kʋ nʋ nʋʋ,

‑wʋʋä nɛnɩ 'mö n nʋä.

'Na sɛ n ‑wʋä ‑sɩbhä ma‑a da'a.

22 'Lɩlɩlɩ a dɔ'wʋ,

Lagɔ 'a Gböö nɛnɩɩ dlɩ yɔwʋ,

23 ‑maa n ‑kä ‑mä nanyɩ 'mö 'wʋ yɩlɩɩ,

n ‑yi sɛ nɩɩ,

'mötɛɛnɔɔ ‑känɩɩɛ 'wlumö.

'Mötɛɛnɔ 'la,

Lagɔ 'a Gböö ‑yɩ nɛnɩɛɛ,

'mö wʋ ‑nyɛɛ gwɩɛ tʋ,

mʋʋ kää 'nglɩ,

'n n glɩnɩɛ 'nyinyloli a ‑jienyɔ.

24 ‑Aaa‑a!

'Na gbʋʋ,

ngäzɩ 'wʋ wʋ ‑bhöä.

'Mötɛɛnɔ 'la,

‑wʋ jlinɩɩɛ ‑mä 'kwie 'möö,

‑ɔ ‑ka'mu bhä ngli ‑sɛ 'nɩ?

25 Lagɔ a 'nglɩ nɩ 'ghlimanɩ.

‑Alowli Zezwii Kliisɩ,

ɔ 'yize mɔɔ bhɛnɩɛ ɔ ‑kaa ‑mä ‑sɛ.

Sɛ'ɛ n gbää nɩɩ,

nanyɩgäsɛ,

ɛ ‑kä a na 'yize a dɔ'wʋʋ,

n yɩbhä a nyɩasɛ n 'kä Lagɔ 'a Gböö 'klʋkpamö zʋ,

‑maa 'na nɩkpɛglɩnɩsaa ma‑a kää 'nglɩ,

'n n zʋä 'kwädlɩ 'nyinylolii a 'mötɛɛnɔɔ 'klʋkpamö.