Ghlɔɔmö a ‑nʋa 8

Lagɔ 'a 'Wugɔmʋʋ mɔɔ nyɛɛ zɩkpalele

Zaa,

‑sɩkaa a dɔ'wʋ,

nɩkpaa 'wuë ‑wa ‑glɛɛ Zezwii Kliisɩ 'wʋʋ,

‑lu a ‑muu 'kää 'nglɩ ‑kä Lagɔ 'kʋä gbʋ köbhaa,

wʋ'ʋa'a ‑bhölɩ 'lɩlɩlɩ.

2 Ɛ'ɛ ‑bhö nyɩasɛ,

‑maa 'Wugɔmʋʋ 'Wlɩlɩ 'a gbaa,

‑a nyɛɛ 'pɩwʋʋ ‑mää Zezwii Kliisɩ 'möö,

a ‑kaa 'nyinyloli ‑nyɛ 'kwie 'sɔ a gbaa ngli ‑sɛ 'wë.

3 Lagɔ 'a Gböö ɔ ‑lɛmöä,

yɩ'ɩɛ libho 'la bhɛmanɩ.

Ɛ'ɛ ‑bhö nyɩasɩ ‑maa,

nɩkpɛ 'nɩɛ 'mötɛɛnɔ ‑kä ɔ 'kɩ 'klʋkpamö 'zʋ.

'Saa Gböö 'nɩɛ bhɛmanɩɩ,

'mö Lagɔ ‑bhɛɛ,

miɛ nɩɩ,

ɔ'bhë 'ɔ yuu 'mö ɔ tiee.

‑Aa sɛ a nɩkpɛ ɔ 'zooo 'wʋ.

'Mö Lagɔ 'zʋä nɩkpaa 'wuë 'a 'nyinylolii a gbʋʋ ‑gömö,

'n ɔ yiɛ yɩ za 'ku.

Sa'a ‑sɩbhä Lagɔ bhɩaa 'nyinylolii a 'mötɛɛnɔɔ 'yli.

4 Mɩɩ kää 'nglɩ sɛɛ Lagɔ 'a Gböö yɩbhää nɩɩ ‑a nɩ nɛmöö,

a‑a bhɛnɩa'aa ‑a 'kä ‑sɩbhä nɛmö.

Ɛ'ɛ ‑bhö nyɩasɛ,

‑maa ‑sɩkaa a dɔ'wʋ,

‑anyɩgäsɛ ‑a'a nɩkpɛglɩnɩsaa,

‑maa ‑nɩnyɩa'a ‑su,

‑maa Lagɔ 'a 'Wugɔmʋʋ a'bhë mɔɔ ‑sunyɩɛ.

5 Nɩkpaa,

'wa nɩkpɛglɩnɩsaa ‑suää,

'wa 'saa wa yɩbhää,

wʋ gbʋʋ mʋʋ plɛnuëë cuu,

‑maa nɩkpɛ a ‑mɔɔ Lagɔ 'a 'Wugɔmʋʋ ‑suä,

'saa Lagɔ 'a 'Wugɔmʋʋ yɩbhää,

wʋ gbʋʋ mʋʋ plɛnɔɔ.

6 ‑Na'bhë 'saa ‑na'a nɩkpɛglɩnɩsaa yɩbhää,

wʋ gbʋʋ mʋʋ ‑kamö plɛnɩɩ,

mɩɩ ‑kamöä 'kwie 'mö kwä.

‑Maa Lagɔ 'a 'Wugɔmʋʋ mɔɔ ‑kamö ‑suu,

‑tiamö a ‑bhölɩbhölɛ ‑nyɛ 'tɩɩglɩglɛ 'sɔ mö ‑n 'kää ghlɩ.

7 Ɛ'ɛ ‑bhö nyɩasɛ,

‑maa nɩkpɛ,

'ɔ nɩkpɛglɩnɩsaa 'wuë 'mö,

Lagɔ a ‑gblɩnyɔ ɔ glɩnɩɛ.

‑Sɩbhä a za,

ɔ'ɔɔ 'yɩbhä ɔ 'kä Lagɔ 'a Gböö 'klʋkpamö zʋ.

'Ɔ nɩkpɛglɩnɩsaa a za,

ɔ'ɔɔ bhɛnɩ a'bhë 'lɩlɩlɩ.

8 Zaa,

nɩkpa a ‑muëë 'wa nɩkpɛglɩnɩsaa ‑suä,

wa'aa wa 'kä Lagɔ dlɩ yɔwʋ nɛmanɩ.

9 ‑Maa abhʋa abhlɩ,

sɛɛ Lagɔ 'a 'Wugɔmʋʋ ‑wʋanyɩɛ ‑gömö a za,

'a nɩkpɛglɩnɩsaa ma‑a 'nanyɩa'a ‑gömö 'kämanɩ,

‑maa Lagɔ 'a 'Wugɔmʋʋ mɔɔ ‑soanyɩɛ.

‑Maa 'lɩlɩlɩ a dɔ'wʋ,

Lagɔ 'a 'Wugɔmʋʋ Zezwii Kliisɩ zʋä nɩkpɛ ‑gömöö,

nɩkpɛ 'nɔ ‑gömö ‑kää,

ɔ'ɔɔ Zezwii a ‑nɔ glɩnɩ.

10 ‑Maa 'n Kliisɩ ‑kaanyɩ 'mö ‑wʋʋ,

'nyinylolii a za,

a yi abhlɩ kpökpasɛ a dɔ'wʋ 'ku,

‑maa sɛ Lagɔ 'a 'Wugɔmʋʋ ‑wʋanyɩɛ ‑gömö 'n ɔ yeanyɩɛ 'mö zlɔmanɩ a za,

'pɩwʋ mää 'naa 'kää 'yli bhɩɛɛ,

a yi ‑mä ghlɩ.

11 Sɛ'ɛ n gbää nɩɩ,

Lagɔ ‑ɔ gälaa Zezwii 'n ɔ yoo glu ‑sɛ,

sɛɛ 'ɔ 'Wugɔmʋʋ ‑wʋanyɩɛ ‑gömö a za,

a yi kpökpasɛ a dɔ'wʋ 'ku 'wë ‑kë,

'ɔ 'Wugɔmʋ 'la,

‑ɔ ‑wʋanyɩɛ ‑gömöö,

'mö ɔ 'kanyɩɛ 'mö gälanɩ ɔ 'kanyɩ glu ‑sɛmö.

12 ‑Atʋayuënyɩ,

sɛ'ɛ n gbää nɩɩ,

‑sɩkaa a dɔ'wʋ,

‑aaa'a 'wlumö ‑köbhänɩ ‑a 'kä sɛɛ ‑a'a nɩkpɛglɩnɩsaa yɩbhää 'klʋkpamö zʋ.

13 Nyɩasɛ n'n‑ä ‑sɩbhä gbä,

‑maa sɛɛ 'a nɩkpɛglɩnɩsaa 'yɩbhää,

a ‑kä ‑sɩbhä ‑bhölɩɩ,

'yli a 'kää bhɩɛ.

‑Maa Lagɔ 'a 'Wugɔmʋʋ a 'mötɛɛnɔɔ 'mö,

'saa 'a nɩkpɛglɩnɩsaa 'yɩbhää,

a ‑kʋʋ kɛ'mö ‑sɛɛ,

a yi ‑bhölɩ.

14 Sɛ'ɛ n gbää nɩɩ,

nɩkpaa 'wuë ‑wa ngluä 'wʋ Lagɔ 'a 'Wugɔmʋʋ 'kʋä ‑suu,

mʋa glɩnɩɛ Lagɔ a 'yuë.

15 Zaa,

'Wugɔmʋʋ Lagɔ zʋanyɩɛ ‑gömöö,

ɔ 'nanyɩɛ göwa 'wʋ 'zʋa,

ɔ 'nanyɩ'ɛ nganɔ 'ku 'mö zʋ.

‑Maa Lagɔ a 'yuë ɔ 'zʋanyɩɛ 'wʋ.

Mɔɔ kää 'nglɩ,

a‑a 'winɩɛ Lagɔ 'mö,

a‑a nʋä:

«‑Atʋ aa.»

16 'Ɔ 'Wugɔmʋʋ 'la a'bhë mɔɔ bhïlanɩnyɩɛ dila zɛmö nɩɩ,

Lagɔ a yuë ‑a glɩnɩɛ ‑tiamö.

17 ‑A 'wuë,

‑abhʋaa glɩnɩɛ Lagɔ a 'yuëë,

'saa ɔ gbä a‑a ɔ 'kä 'ɔ ngëyii ɔ ‑sɛɛ ‑lɛ 'mö a ‑nʋa 'nyɛɛ,

‑aa ‑li yɩ glɩnɩmöä.

‑A ‑nyɛ Zezwii Kliisɩ 'sɔ,

a‑a 'kɩɛ 'wʋ ‑gbɔ.

Sɛ ɔ ziɛ mä'ä dʋdʋ 'wʋ 'zwɩ,

a‑a ‑kä ‑sɩbhä 'zwɩ zimö,

‑a ‑nyɔɔ 'sɔ,

‑a yi 'nglɩ mö.

Lagɔ 'a 'ghïlinɔɔ ‑wʋ 'kää 'yli 'wlʋnɩɩ

18 N ‑yi sɛ nɩɩ,

zwɩɩ a kii 'wuë ‑a ‑wʋä dɛ'ɛ zi dɔ'wʋʋ,

yɩ'ɩɛ ‑lu glɩnɩ Lagɔ 'a 'ghïlinɔɔ ɔ ‑kanyɩɛ 'ylɩ ‑bhlʋ 'mö 'ylimö tulanɩ a dɔ'wʋ.

19 Zlɩ Lagɔ 'kää 'ɔ yuëa a 'ghïlinɔɔ 'mö 'yli 'wälanɩɩ,

Lagɔ 'a ‑bhɛbhɛlii 'wuë 'kä zlɩ 'la 'ylɩmö a 'tʋ lɩbhɩ tenyii.

20 Ɛ'ɛ ‑bhö nyɩasɛ,

‑maa Lagɔ 'a ‑bhɛbhɛlii 'wuë,

mä'ä 'pɩwʋ a 'mötɛɛnɔɔ ‑wʋʋä ‑lu 'ylimö ‑kää,

mʋʋ 'kämaniɛ ‑gömö.

Yɩnyɩgäsɛ mɩɩ 'nɩɛ yɩnyɩ ‑sɩbhä 'zʋ.

‑Maa Lagɔ,

‑ɔ 'zwiɛ ‑sɩbhää,

mɔɔ 'yɩbhɩɛ ‑sɩbhä.

‑Maa ‑aa dila 'tɛɛ 'wʋ.

21 Miɛ nɩɩ,

ɔ yi 'ylɩ ‑bhlʋ 'mö 'kwie a 'mötɛɛnɔ 'la ‑wʋ 'kämaniɛ ‑gömö ngli ‑sɛ,

yɩ yi 'tɩɩglɩglɛ ghlɩ.

'Ghïlinɔɔ Lagɔ 'kää 'ɔ yuëa 'nyɛɛ,

'ɔ ‑bhɛbhɛli 'la 'wuë yu ghlɩmö.

22 Sɛ ‑bhʋlʋ ‑kpɔ 'la,

sɛɛ gbadɩnglɔ ‑kä'ɛ gwälɩɛ yi 'n ɔ ‑gbapö'ɛɛ,

‑a ‑yi sɛ nɩɩ,

‑sɩbhä Lagɔ 'a ‑bhɛbhɛlii 'wuë ‑wʋä ‑bhlɛ ‑sɩkaa klu dɔ'wʋ 'n yɩ yɩɛ 'klɩ.

23 Lagɔ 'a ‑bhɛbhɛli ‑mi 'la 'wuë,

yɩ 'yize mɩɩ 'nɩɛ ‑sɩbhä ‑gbapö,

‑maa ‑a'bhï,

‑sɩbhä ‑a ‑gbapömöä ‑mä ‑aa dila zɛmö tenyii.

'Saa Lagɔ 'yɩbhää ɔ 'kä 'ɔ yuëa 'wʋ 'zʋaa,

mɩɛ nɩɩ,

ɔ 'kä 'wa 'ylibhɩɛkpökpaa 'mö zigbanɩ,

mö ‑a ‑kʋnɩɛ.

Miɛ abhlɩ ‑maa,

'ɔ 'Wugɔmʋʋ ɔ zʋʋnyɩɛ ‑gömö,

'saa 'wuë ɔ gbää ɔ ‑kanyɩ 'nyɛɛ,

'mö ɔ tɛɛ ‑bhlɛ da'a.

24 Ɛ'ɛ ‑bhö nyɩasɛ,

‑maa ‑mä dlɩ a 'wʋtɛɛnɔɔ 'mö,

‑mä ‑a ‑yinɩɛ sɛ nɩɩ,

‑a yɛ 'pʋ 'wë.

Miɛ abhlɩ ‑maa,

dlɩ a 'wʋtɛɛlu 'la ‑n yɩlɩɛ 'wʋʋ,

‑n 'nuëa'a ‑bhlɛ dlɩ 'tɛɛnɩ.

'Saa ‑n yɩlɩɛ 'wʋʋ,

‑n yu bhä ‑bhlɛ dlɩ 'tɛɛnɩ 'yize ‑a?

25 Zaa,

‑abhʋa ‑abhlɩ,

'saa ‑a 'tɛɛnɩɛ dlɩ ‑aaa 'wʋ yɩlɩɩ,

dlɩ mö ‑a ‑kpaanɩɛ 'n ‑a kʋnuuä.

26 ‑Maa ‑a 'yize a dɔ'wʋ,

‑aaa bhɛnɩ zaa,

Lagɔ 'a 'Wugɔmʋʋ mɔɔ yiinyɩɛ 'wʋ.

‑A'bhï,

‑a 'kä Lagɔ bhibhe a'bhë a dɔ'wʋ,

sɛ ‑a 'kää nʋʋ,

‑aaa ‑sɩbhä ‑yi,

a‑a sluä nyɛmʋ.

‑Sɩbhä a za,

Lagɔ 'a 'Wugɔmʋʋ a'bhë,

mɔɔ bhibhee ‑aa 'wlumö.

‑Maa 'ɔ sɛ ɔ bhïlanɩnyɩɛ dila zɛmöö,

‑mä ‑a'a ngli a wɛlɩɩ 'mö,

‑aaa bhɛnɩ ‑a 'kä ‑sɩbhä 'mö ‑sɛsɛnɩ.

27 ‑Maa Lagɔ ‑ɔ yɩlɩɛ ‑mä ‑aa dila zɛmö 'wʋʋ,

mɔɔ ‑yiɛ sɛɛ 'Wugɔmʋʋ yɛ gbää.

Ɛ'ɛ ‑bhö nyɩasɛ,

‑maa 'Wugɔmʋʋ ‑kä Lagɔ a ‑nʋa a 'wlumö bhibhee,

'saa nɛnɩɛ Lagɔ dlɩ yɔwʋ 'mö ɔ 'yɩbhänɔɔ.

28 Yɩ 'wuë 'mö a dɔ'wʋ,

‑wa ‑waa Lagɔ,

Lagɔ ‑sɛɛ ‑lɛ wa 'kä 'saa ɔ yɩbhää nʋʋ,

‑lii 'wuë ‑yɩ ghluëë,

'zoku oo,

‑nɩ a ‑nɩ oo,

Lagɔ gbä 'n yɩ zʋä wa ‑li a ‑li.

29 Nɩkpaa 'wuë Lagɔ ‑sɛ a‑a 'kɩ ‑lɛ,

'saa ɔ 'yɩbhää wa dɔ'wʋ miɛ nɩɩ,

wa 'kä ɔ Yowli Zezwii a 'wlʋna glɩnɩ.

Nzɩɩ Zezwii 'kä ‑daayuë 'kɔkɔmlɛ a 'yukuga glɩnɩ.

30 Nɩkpaa 'wuë Lagɔ ‑sɛ a‑a 'kɩ ‑lɛ,

wäzɩ ɔ wäzuëë.

‑Muë ɔ wäzɩɛ,

'mözlɔnɩwa 'wʋ ɔ 'zuëë,

‑muë ɔ 'zʋaa 'mözlɔnɩwa 'wʋʋ,

'nglɩ 'kädɩɩ ɔ 'nyʋää.

‑Aa ‑wawʋ 'kɔdʋʋ Lagɔ kää dlɩ zɛmö

31 Yɩ 'wuë mö ‑a 'bhööä da'a bhïlaa,

zaa Lagɔ a'bhë ‑kanyɩ nimï ‑wʋʋ,

‑ɔ bhɛnɩ bhä ɔ ‑kanyɩ ‑gblɩ 'nɩ?

32 Lagɔ ‑ɔɔɔ ɔnyɩ 'a yuu 'wʋ gwɩ,

‑maa ‑ɔ 'wʋlɔɔ 'mö 'n ɔ yiɛ ‑a 'wuë a 'wlu 'mö 'kuu,

sɛ ɔ 'naa ‑kanyɩ bhä ‑mä 'ɔ 'yu 'la 'mö ‑lii 'wuë 'nyɛnɩ 'nɩ?

33 Lagɔ a ‑nʋa ɔ ‑sɛɛ ‑lɛ,

Lagɔ a'bhë lɛ naa,

wa yɛ 'mö zlɔmanɩ ɔ 'yila 'klʋ a dɔ'wʋ.

Zaa,

‑ɔ 'kʋä bhäa'a gbʋ 'wlumö 'pä 'nɩ?

34 Sɛ'ɛ n gbää nɩɩ,

Zezwii Kliisɩ,

‑aa 'wlumö ɔ 'kuä 'n ɔ yiɛ glu 'wlʋ.

'N ɔ yi'ɛɛ ‑mä Lagɔ a luukɛ 'wʋ sɛ glɩɛ mö ɔ 'käa'a 'kwädlɩ ‑aa 'wlumö bhibhe.

Zaa,

‑ɔ ‑kanyɩa'aa gbʋʋ köbhaa,

ɔ'ɔɔ ‑bhölɩ.

35 ‑A yi zwɩɩ a kii 'wuë zi oo,

‑a 'nɩa'a sɛ a'bhë ‑a 'kä 'zʋä ‑yi oo,

wa ‑kanyɩ ‑gblɩ oo,

ngɔmʋ ‑yinyɩ 'wʋ yi oo,

'pʋa ‑yinyɩ 'lɩbhä oo,

‑a yi 'kwie 'mö ‑wʋ oo,

wa ‑yinyɩ 'lɩbhä ‑a yi 'kuä yi a'bhë oo,

'klɩyɩyɛ a kii 'la 'wuë,

mɩɩ 'naa 'kä 'nglɩ ‑kä,

‑a 'kä dlɩ 'pä nɩɩ,

Zezwii Kliisɩ,

ɔ ‑nɩnyɩa'a ‑wa nʋ.

36 Ɛ'ɛ ‑bhö nyɩasɛ,

‑maa sɛ'ɛ yɩ cɛlɩɛ 'kɩ ‑mä Lagɔbɔgʋʋ 'mö nɩɩ:

Sɛ ‑a glɩnɩɛ ‑na ‑nʋä a za,

‑mä 'kwie 'mö,

‑mä ‑a ‑wʋä 'yize.

Wïla a ‑mi wa 'kä 'wlu ‑dɩɩ,

yɩ saa,

‑sɩbhä wa libhïnyɩɛ 'wʋ.^a

37 Zaa,

‑mi'la 'wuë,

yɩ ‑kanyɩ ghlɩɩ,

Lagɔ ‑ɔ tulanɩnyɩɛ 'ɔ ‑wawʋ 'ylimöö,

mɔɔ kää 'nglɩ a‑a pïliɛ 'wlu 'lɩlɩlɩ.

38 Na dlɩ 'tɛɛ 'wʋ nɩɩ,

ɛ yi kwiea ma oo,

ɛ yi ‑bhölɩbhölɛɛ mɛɛ oo,

ɛ yi Lagɔzuzukuu mi oo,

ɛ yi ‑mä Lagɔ 'wʋ a 'mötɛɛnɩzuzukuzoku ‑mimii mi oo,

ɛ yi ‑lii ‑yɩ ‑bhölɩɛ ‑sɩkaa mi oo,

ɛ yi ‑mii lɛ 'kää bhäla yi mi oo,

39 ɛ yi 'mötɛɛnɩlii ‑yɩ ‑wʋä ‑mä ghäyɩ 'wʋ mi oo,

ɛ yi ‑yɩ ‑wʋä ‑mä 'kudu 'wʋ mi oo,

Lagɔ,

‑ɔ tulanɩnyɩɛ ‑mä ‑Alowli Zezwii Kliisɩ 'mö 'ɔ ‑wawʋʋ 'ylimöö,

‑bhɛbhɛlu ‑mumuu 'nɩɛ bhɛnɩ wʋ ‑kanyɔ yɔwʋ ‑sɛ.