Zezwii a ‑gänɩwa ta yɛ 'ɔ 'ghlinɔɔ 'ylɩmö
17
Zezwii 'nyʋä sa'a 'dɩ 'wëë,
'ylɩ gbʋplʋ 'plɩɛ,
'n ɔ yiɛ 'ɔ ‑gänɩwaa a gla'mö a nɩkpa 'wʋ 'libhï,
Piɛlɩ mɔ,
Zaakö mɔ 'n ɔ ‑daayu Zaa,
'n ɔ ‑nyʋä yiɛ ‑gäga 'käda ‑bhlʋ 'klʋ mö.
Wa 'yize wa glɩ ‑mä.
2 Wa 'yila 'klʋ,
'n Zezwii yiɛ zʋzlɔnɩ.
'N 'ɔ klʋʋ yiɛ tenyii 'mö lɩ 'ylʋväla a sɛ.
'N 'ɔ ‑banɩɩ yiɛ tenyii buu plɛ,
'n yɩ yiɛ 'mö lɩmö.
3 Wa lɛ zʋ a sɛ'ɛ,
‑lɛ ɔ yɔwʋ,
nɩkpa 'sɔ 'nɩgbö ‑lɛ.
Wa ‑nyɔɔ ‑wʋ 'dɩ ‑sɛ dɔ'wʋ,
Moyizɩ ‑nyɛ Elii 'sɔ,
muëë.
4 Piɛlɩ 'yuëë 'ylɩmöö,
ɔ lɛ naa:
«‑Alowli,
yɩ nɛnɩ ‑a 'käa'a mä'ä glɩ.
‑N ‑kä 'yɩbhää,
n 'kä ‑gligbï ta 'sɩbhä,
‑na ‑na ‑bhlʋ,
Moyizɩ a ‑na ‑bhlʋ 'n Elii a ‑na ‑bhlʋ.»
5 Ɔ kɩ ngli cuu,
'n ‑kpu yuëë 'wlu yi.
‑Kpu 'la,
'mö wʋ lɩɛ,
‑mä wʋ 'mö 'n wɛlɩ yiɛ ‑mä 'bhöönɩ,
yɩ lɛ naa:
«‑Mɔ nɩ 'dɛɛ,
mɔɔ glɩnɩɛ 'na ‑wawayuu.
Mɔɔ ‑glaa dlɩ 'wʋ.
A nɩ ‑pʋnɔɔ 'yukwli.»
6 Wɛlɩ nʋä sa'aa,
Zezwii 'a ‑gänɩwaa ta ‑kpɔ,
'n nganɔ yuëë tenyii 'lɩbhä,
'n wa yiɛ 'klʋ glu 'pä.
7 'N Zezwii yuëë yɔwʋ 'dio,
'n ɔ yuëë kɛ 'wʋ köbhä,
ɔ lɛ naa:
«A ‑sɔ 'wʋ!
Nganɔ nɩ tanyɩ 'lɩbhä.»
8 ‑Maa wa 'libhïä 'wluu,
wa'aa'a ‑bɛ 'wʋ yɩlɩ,
'n ɛ 'nɩ ‑bhö Zezwii a 'yize mɔɔ.
9 'N wa yiɛ 'wʋ ‑sɔ 'n wa yiɛ mö.
Wa ‑wʋ ‑gägaa kwli dɔ'wʋ,
'n Zezwii yuëë 'dɩ 'mö zʋ,
ɔ lɛ naa:
«'Saa a 'yɩɛ da'a 'ylɩmöö,
'n Nɩkpɛ a 'Yu 'nɩɛ 'ku ɔ 'kä glu 'wlʋ 'wëë,
a nɩ ti ‑sɛ.»
10 Ɔ gbää sa'a 'wëë,
'n wa yoo 'kïbhë ‑bhlʋ 'wʋ 'yɩbhänɩ,
wa lɛ naa:
«Moyizɩ 'a Gböö a 'cɩawaa,
sɛ'ɛ wa nʋä nɩɩ:
Elii mɔɔ 'kää yi 'wë,
'saa kä ɔ 'nglɩ?a»
11 Zezwii lɛ naa:
«Nn!
‑Tiamö wa gbää Elii a dɛ nɩɩ,
mɔɔ 'kää yi tɛɛ,
ɔ 'kä ‑lii 'wuë 'wlu gïganɩ.
12 Miɛ,
‑maa n nyanyɩ 'dɩ nɩɩ,
Elii yɛ a yi 'wë,
‑maa wa 'nɔɔ yɩbhlɩnɩ,
'saa wa yɩbhää,
'mö wa noo 'wlu.
Sɛ ‑bhʋlʋ ‑kpɔ 'la,
Nɩkpɛ a 'Yu,
‑sɩbhä wa 'kɔɔ 'klɩ 'yɩa.»
13 Zezwii gbää sa'aa,
'n wa yia'aa sɛ yɩbhlɩmanɩ nɩɩ,
ɔ ‑kä Elii nʋʋ,
Zaa Batisɩ 'mö ɔ gaaa.
Zezwii yɛ ‑sukusukulɩbhäyu yɛmanɩ
14 Zezwii ‑nyɛ 'ɔ ‑gänɩwaa 'sɔ,
wa ghlɛɛ ‑lɛ nɩkpa a ‑bʋbʋ yɔwʋʋ,
'n nɩkpɛ ‑bhlʋ yiɛ Zezwii yinɩ,
'n ɔ yiɛ ‑lɛ ɔ dlɩ 'mö ‑kokomïladigbï glu 'pä.
Ɔ lɛ naa:
15 «‑Atʋ,
'pä na yuu a ngäzɩdlɩ.
‑Sukusukuu lɩbhɔɔ,
yɔlɔ ɔ ylɔɔ tenyii.
Zlɩ ‑mɛmɛɛ 'mö,
ɔ bhlinɩ ‑kosu 'mö.
Zlɩ ‑mɛmɛɛ 'mö,
ɔ bhlinɩ 'nyu 'mö.
16 Nza n ‑nyɔɔ yiɛ,
'n n yoo ‑na'a ‑gänɩwaa yowʋ 'nyɛ,
wa 'kɔ yɛmanɩ.
‑Maa wa'aa bhɛmanɩ.»
17 Nɩkpɛɛ 'nyɔɔ sa'a 'dɩɩ,
Zezwii lɛ naa:
«‑Ɔɔɔ!
Nɩkpazokunyɩ,
'a Lagɔ a dlɩtɛɛnɩtɛnɛɛ 'nɩɛ ‑zu 'lɩlɩlɩ.
'Ylɩ ‑zɩmö n 'kanyɩ bhä ‑bhlɛ ‑sɩkaa jijo'wʋ ‑sɛ 'nɩ?
'Ylɩ ‑zɩmö n 'kanyɩ bhä ‑bhlɛ ‑sɩkaa kɛ yɔlɔnɩ 'nɩ?
Bhee n kɩ 'nʋ,
‑maa a ‑laa yuu.»
18 Wa ‑nyɛ yuu yiɛ,
zuzukwëzokwëa ‑anyɩ za ‑sukusuku lɩbhɔɔ,
'n Zezwii yeaa yɔwʋkanɩsɛ 'dɩ 'nyɛ nɩɩ:
«'Bhöö yu nɩ ‑gömö.»
Ɔ nʋä ‑sɩbhä cuu,
'n a yoo ‑gömö 'bhöö 'n ɔ yiɛ yɛmanɩ.
19 Zezwii ‑nyɛ 'ɔ ‑gänɩwaa 'sɔ,
wa 'yize wa glɩa'a ‑lɛ,
'n wa yoo nimï 'yɩbhä,
wa lɛ naa:
«Zuzukwëzokwë 'la,
sɛ yɩ ‑wʋ ɔ 'mö a‑a yea sɩɛnɩ 'nɩ?»
20 Zezwii lɛ naa:
«Ɛ'ɛ ‑bhö nyɩasɛ,
‑maa 'a Lagɔ a dlɩtɛɛnɩtɛnɛɛ 'nɩɛ ‑zu.
‑Tiamö n nyanyɩɛ dɛ'ɛ dɩ nɩɩ,
suyeyii wa laa mutaadɩ,
ɛ 'tikëtikëyi.
‑Maa 'a sɛ a 'tɛɛnɩɛ Lagɔ dlɩɩ,
‑sɩbhä ‑kä a sa'a 'tikëyi 'wʋ ‑wʋ,
‑gäga nɩ ‑a ‑wʋä dɛ'ɛɛ,
a yea 'dɩ 'nyɛ nɩɩ,
‑Gäga nɩmä,
'bhöö dɛ'ɛ ‑n 'kä da'a mö.
Sɛ a gbää da'a a nɩ 'zʋʋ,
a yi a ‑sɩbhä 'zʋ.
Sɛ'ɛ n gbää nɩɩ,
a ‑kä a Lagɔ dlɩ 'tɛɛnɩ,
‑lu ‑bhlʋ a'bhë 'naa 'kanyɩ a kɛ'mö 'tɛɛnɩ. [
21 ‑Maa 'lɩlɩlɩ a dɔ'wʋ,
sa'a a zuzukuzoku,
‑n ‑kä ‑n 'kɩ nɩkpa ‑gömö kpëti nʋʋ,
plɛ su ‑n 'kä Lagɔ bhibhe 'wë.
‑Maa 'n 'ɛ 'nɩ ‑bhö ‑sɩbhä,
nyɩasɛliɛ.]»
Zezwii yɛ'ɛ 'ɔ kwiea ‑nyɛ 'ɔ gluwlʋwlɛɛ 'sɔ a dɛ bhïla
22 'Ylɩ ‑bhlʋ 'mö,
Zezwii ‑nyɛ 'ɔ ‑gänɩwaa 'wuë 'sɔ,
wa ‑wʋ ‑mä Galilee‑bhölɩɩ 'mö,
'n ɔ yuëë 'dɩ 'nyɛ,
ɔ lɛ naa:
«Nɩkpɛ a 'Yu,
wa yoa'a ‑pa nɩkpa kä'mö plɩnɩ.
23 Wa yo 'lɩbhä ɔ yi 'ku.
‑Maa ɔ ‑kä 'ku 'wëë a ylɩ a tanɛɛ 'mö,
ɔ yi glu 'wlʋ.»
Ɔ 'nyʋää sa'a 'dɩɩ,
'n yɩ yuëë tenyii swɩ yɔwʋ 'kuanɩ.
Zezwii yɛ Lagɔbudu 'Kɔdʋʋ a lapoo 'pɛnɩ
24 Zezwii ‑nyɛ 'ɔ ‑gänɩwaa 'sɔ,
'n wa yiɛ ‑mä Kapɛnaɔmö ghlɛ.
‑Mä a nɩkpaa ‑wa bhliɛ lapoo Zwiiföwaa 'pɛnɩɛ Lagɔligbëa a 'wlumö 'wʋʋ,
'n wa yiɛ ‑mä Piɛlɩ ghlɩ 'n wa yoo nimï 'yɩbhä wa lɛ naa:
«Lapoo nɩkpa 'wuë 'pɛnɩɛ Lagɔbudu 'Kɔdʋʋ a 'wlumöö,
a 'bhidɩba 'pɛnɩmu bhä?»
25 Piɛlɩ lɛ naa:
«Nn!
Ɔ 'pɛnɩmu.»
Wa 'yɩbhɔɔ nimï 'wëë,
'n Piɛlɩ yiɛ 'ligbë 'mö mö.
Ɔ plɛ'ɛ ‑mä 'ligbë cuu,
Zezwii mɔɔ ‑dɩɛ tɛɛ gbʋ,
ɔ lɛ naa:
«Piɛlɩ,
n ‑kamöä ‑ka nimï 'yɩbhä.
Mä'ä 'pɩwʋ a dɔ'wʋ,
'bhlɩlowluwaa,
‑ɔ 'pɛnuë bhä lapoo kä'mö?
‑Glɔlowluwaa muë bhä,
‑maa lɛgäwaa muë bhä?»
26 Ɔ lɛ naa:
«Lɛgäwaa muëë.»
Zezwii lɛ naa:
«Nn ‑sɩbhä ma‑a ‑tiamö,
‑Glɔlowluwaa a'bhï,
mʋa 'nɩɛ 'pɛnɩmö.
27 ‑Maa nɩkpa 'la,
‑a tuëa 'klɛ 'mö päla zaa,
nza n nyɩamöä dɛ'ɛ 'dɩ nɩɩ:
'Libhï ‑gwɛ 'wʋ,
‑n 'kä ‑mä 'nyu yɔwʋ mö.
‑N ‑kä möö,
‑n ‑kä ‑mä ‑gwɛɛ 'nyu 'mö 'pä a tɛkäzibhiyii ‑n 'kää 'lɩbhää,
'libhe 'wʋ,
‑n 'kä ‑mä ɛ ngli yɩlɩ.
‑Maa ‑n yi ‑mä moni ghlɩ.
Moni 'la,
ɛ yi 'na lapoo 'pɛnɩ,
ɛ yi ‑na ‑nʋʋ 'pɛnɩ.
Mö ‑n nɩ 'libhï 'wʋ ‑n 'kʋänyɩ ‑mä kwä.»