Pampetudeꞌá to kaduá (4:1–16:21)
Petóiá i surugáꞌ
4
Roo onoꞌ,
ara wopiꞌi pampetudeꞌá to kuita.
Kódóꞌ Iohane moitaꞌaꞌ babaꞌ to tebungkáhi i surugáꞌ,
hai kuhádi wopiꞌi wambaꞌ nodo to kuhádi rungu-runguna.a
Pokániꞌna nodo tamburuꞌ.
Molaluita,
nauliꞌ,
“Mengkaheꞌmokoꞌ mai!
Ina Kutudeꞌákoꞌ apa to hangaa-ngaa mewaliꞌ i alo to ina haweꞌ.”
2 I tempó iti woꞌo,
nakuasaꞌimoꞌ Inaona Pueꞌ Ala,
hai kuita hambuaꞌ pehodaꞌá datu i surugáꞌ.
Ara Hadua to mehoda i pehodaꞌá iti.
3 Lindoꞌna mewangkaꞌ ntepuꞌu nodo watu mpisiꞌ hai watu sardis to malei.
Hai mpárágiá nodo watu samburuꞌ to makodaraꞌ motolelingi pehodaꞌá datu iti.
4 Hai pehodaꞌá kadatuá iti natolelingi rompuloꞌ hai iba pehodaꞌá ntániꞌna.
Pehodaꞌá iti rapehodai totosae to rompuloꞌ hai iba,
to mewaruꞌheꞌ to bulá hai metataliheꞌ buláwá.
5 Hangko i pehodaꞌá datu iti,
mesupaꞌ oaꞌ kiláꞌ hai gumpataꞌ.
I lindoꞌna pehodaꞌá iti,
ara pitu wuaꞌna huluꞌ to tueꞌ.
Huluꞌ iti,
lempóna pitu pákáꞌna bágóꞌna Inaona Pueꞌ Ala.b
6 Ara woꞌo i lindoꞌna pehodaꞌá iti,
daula to nodo tahiꞌ kamaeláꞌna,
hai malino ntepuꞌu nodo watu mpewaoꞌ.
Pehodaꞌá kadatuá iti natolelingi woꞌo iba ngáána pinatueꞌ.c
Handaꞌ ntepuꞌu mátáraꞌ.
Upu-upu wátáraꞌ nakaꞌarai mata,
maroꞌa i lindoꞌraꞌ,
maroꞌa i taleuꞌraꞌ.
7 Pinatueꞌ to kaꞌisáꞌ nodo lenggeꞌ singá.
Karombáꞌána nodo gapiꞌ laki.
Lindoꞌna pinatueꞌ to katálu nodo lindoꞌ tauna.
Kaꞌibána kuita nodo koꞌaaꞌ to tangaꞌna membara.
8 Upu-upu pinatueꞌ iti mokapi ini wuaꞌna,
hai upu-upu wátáraꞌ momata.
Mogalo i wóiꞌ kápiraꞌ,
pomata woꞌo.
Maroꞌa mabaa ba káindi,
tiꞌaraheꞌ oaꞌ mengkangkaroo monani,
rauliꞌ:
“Magasaꞌ!
Magasaꞌ!
Magasaꞌ mpuꞌu Pueꞌ Ala!
Ia miꞌi to melumbuꞌ kuasaꞌNa hangko i upu-upuna,
Ia to ara miꞌi ami hangko i rungu-runguna,
to ara deꞌe-deꞌe,
hai to ina ara oaꞌ duuꞌna i rue-ruena!”
9 Pinatueꞌ itiheꞌ manguliꞌ handaꞌ kamaroꞌana,
mobiláꞌ hai mampomahileheꞌ hangaꞌna Hadua to mehoda i pehodaꞌá kadatuá hai to tueꞌ oaꞌ duuꞌna i rue-ruena.
I popahaweꞌraꞌ petóiáraꞌ,
10 totosae to rompuloꞌ hai iba mopalumbáheꞌ menómbá i lindoꞌna Hadua to tueꞌ oaꞌ duuꞌna i rue-ruena to mehoda i pehodaꞌá kadatuá.
Motelángaheꞌ tataliraꞌ i lindoꞌna pehodaꞌáNa iti,
tandaꞌ pebiláꞌraꞌ.
Roo onoꞌ,
rauliꞌ:
11 “Pueꞌ Ala Pueꞌkiꞌ!
Io miꞌi to hintotoꞌ ratóiá hai rabiláꞌ.
Io peá to makuasaꞌ,
láwiꞌ Io to mampopewaliꞌ hinángkáꞌna.
Ánti peundeꞌáMu,
Nupopewaliꞌ hai Nupatueꞌ upu-upuna to ara.”