Pampetudeꞌána
Iesu Kerisitu i Iohane
Laluita to mopakanótó óntóꞌna sura
Óntóꞌ sura deꞌe mopahaweꞌ apa to napetudeꞌá Iesu Kerisitu i Iohane, topeguruNa (1:1). Rungu-runguna Iohane moita Iesu nodo Ánáꞌ Mánusiá to molumao i oloꞌna pamboliá huluꞌ to pitu wuaꞌna (1:12-18). Naita woꞌo nodo Tadulako to mesaweꞌ i dárá to bulá (19:11-16). Hai ia moita woꞌo Iesu nodo Ánáꞌ Dimbá to mehoda i pehodaꞌá kadatuána Pueꞌ Ala i surugáꞌ (5:6-14; 21:22-23; 22:1-5).
Sura deꞌe naukiꞌ Iohane i tempóraꞌ toSarani rapopeahiahiꞌ ánti pepoináláiraꞌ i Iesu. I tempó iti, upu-upu tauna i kadatuá Roma rahuoꞌheꞌ menómbá i datu i Roma to rauliꞌ Datu Mahile (Kaisar). Araheꞌ toSarani to rapapate ánti pepoináláiraꞌ, láwiꞌ tiꞌaraheꞌ mau menómbá i Datu Mahile. Araheꞌ woꞌo to mosuliꞌ hangko i pepoináláiraꞌ láwiꞌ malááꞌheꞌ. Mewaliꞌ óntóꞌ sura deꞌe mopakaróhó laluraꞌ toSarani, bona ineeꞌheꞌ mosuliꞌ hangko i pepoináláiraꞌ i Iesu.
Óntóꞌ sura deꞌe rapahaweꞌ i lalu bahangapa pákáꞌna pampetudeꞌá. Ara ngkóráꞌ pándiriꞌ to rapakeꞌ i lalu sura deꞌe to tiꞌara mani manótó lempóna i kitaꞌ. Agáiáná kehapiꞌ noꞌonoꞌ, pentóáꞌána paturoꞌ i lalu sura deꞌe manótó miꞌi: i lalu duniáꞌ deꞌe, kitaꞌ toSarani ina rapopeahiahiꞌ, agáiáná ineeꞌkeꞌ mosuliꞌ hangko i pepoináláintaꞌ, láwiꞌ i kahópóꞌána duniáꞌ, Pueꞌ Iesu ina monangi upu-upu ewáliNa, hai mepárentá duuꞌna i rue-ruena (11:15). Hai kitaꞌ to meuláꞌ i Hia ina mepárentá hingkakani hai Ia.
Óntóꞌna
1. Pantepuꞌuána laluita hai tabeá (1:1-8)
2. Pampetudeꞌá to rungu-runguna (1:9–3:22)
a. Iesu raita nodo Ánáꞌ Mánusiá to molumao i oloꞌna pamboliá huluꞌ to pitu wuaꞌna (1:9-20)
b. Paturoꞌ i toSarani to toroꞌ i pitu wuaꞌna kótá (2:1–3:22)
3. Pampetudeꞌá to kaduá (4:1–16:21)
a. Iesu raita nodo Ánáꞌ Dimbá to meángkáꞌ i hintáiꞌna pehodaꞌá kadatuána Pueꞌ Ala i surugáꞌ (4:1–5:14)
b. Ánáꞌ Dimbá mobungkáhi petándái to pitu wuaꞌna (6:1–8:5)
c. Tamburuꞌ to pitu wuaꞌna ratawueꞌ (8:6–11:19)
d. Pitu tandaꞌ to mopatongawaꞌ apa to ina mewaliꞌ i alo to ina haweꞌ (12:1–16:21)
4. Pampetudeꞌá to katálu (17:1–21:8)
a. Hadua towawine to metitidiꞌi ntepuꞌu bábehiána. Hangaꞌna Bábeli. (17:1–19:10)
b. Iesu raita nodo Toposaweꞌi dárá to lao mombeala (19:11–21:8)
5. Pampetudeꞌá to kaꞌiba (21:9–22:5)
Hadua towawine to napotoina Ánáꞌ Dimbá. Hangaꞌna Ierusale to Woꞌu.
6. Laluita to kahópóꞌána (22:6-21)