Pueꞌ Iesu ia miꞌi Tadulako Menómbá Mahile to mopakaróhó dándina Pueꞌ Ala
8
Ntóáꞌna paturoꞌkiꞌ deꞌe ia miꞌi:
ara mpuꞌu miꞌi Tadulako Menómbá Mahile to mehoda tándáꞌ i kuánána pehodaꞌána Pueꞌ Ala i surugáꞌ.
2 Ia mewaliꞌ Tadulako Menómbá Mahile to mobágóꞌ i katoroꞌá to magasaꞌ i lalu bambaruꞌ penómbáꞌá to toꞌu to tiꞌara naꞌaró tauna,
agáiáná naꞌaró Pueꞌ Ala i surugáꞌ.
3 Upu-upu Tadulako Menómbá Mahile raꞌángkáꞌ bona mohuhuꞌ binataꞌ hai popenómbá to ntániꞌna i Pueꞌ Ala.
Noꞌonoꞌ woꞌo,
Iesu Tadulako Menómbá Mahile hangaa-ngaa mohuhuꞌ popenómbáNa i Pueꞌ Ala,
ia miꞌi wátáNa haduduáNa.
4 Ane rápáꞌna ara mani Iesu i duniáꞌ,
Ia tiꞌara ina mewaliꞌ tadulako menómbá,
láwiꞌ aramoheꞌ tadulako menómbá to mohuhuꞌ popenómbá i Pueꞌ Ala mouláꞌ Paturoꞌna Musa.
5 Tadulako menómbá iti mobágóꞌheꞌ i lalu támbi penómbáꞌá to i duniáꞌ deꞌe.
Támbi penómbáꞌá iti ara kahibaliána hai apa to ara i surugáꞌ.
Onoꞌ miꞌi haneꞌi hangkoia,
hangko tiꞌara mani Musa moaró Bambaruꞌ Penómbáꞌá,
Pueꞌ Ala mongkóráꞌ i hia,
Nauliꞌ,
“Nupailalu!
Upu-upu iti hangaa-ngaa nubábehi hibali hai apa to Kupopaitaꞌákoꞌ i wongko buluꞌ!”a
6 Agáiáná deꞌe-deꞌe Pueꞌ Ala mampoweꞌi Iesu bágóꞌ to melumbuꞌ ntepuꞌu kamaroꞌana hangko i pobágóꞌraꞌ tadulako menómbá i duniáꞌ deꞌe,
noꞌonoꞌ woꞌo maróhó mani pototowi to woꞌu to natangaꞌ-tangaꞌi Iesu hangko i pototowi to hangkoia to napahaweꞌ nabiꞌ Musa,
láwiꞌ ntóáꞌna ia miꞌi dándina Pueꞌ Ala to melumbuꞌ kamaroꞌana.
7 Ane rápáꞌna tiꞌara ara kamakuraꞌna pototowiNa to rungu-runguna,
ia miꞌi Paturoꞌna Musa,b
ketiꞌara piꞌi paraluu Pueꞌ Ala mopaꞌara pototowi to karongkánina.
8 Agáiáná Pueꞌ Ala mosalaꞌiheꞌ taunáNa ánti katiꞌárána rabuku mouláꞌ dándiNa to rungu-runguna iti,
onoꞌ miꞌi haneꞌi Nahángáꞌáꞌáheꞌ node:
“Nipehádingi!
Hangkani tempó ina Kupaꞌara pototowi to woꞌu
i toSáráeliꞌ hai toIudá.
9 Tiꞌara nodo podándiNgkuꞌ to Kupaꞌara i toioruraꞌ hangkoia
i kaKuántiraꞌ mesuwuꞌ hangko i tampoꞌ Másiriꞌ.
Ánti katiꞌáráraꞌ tetidaꞌ i podándiNgkuꞌ iti,
onoꞌ miꞌi haneꞌi Kusapuákaheꞌ.
10 Mewaliꞌ,
deꞌe miꞌi podándiNgkuꞌ to ina Kupaꞌara
hai toSáráeliꞌ i alo to ina haweꞌ:
HawaꞌKuꞌ ina Kuwoli i lalu pekiriraꞌ
hai ina Kuꞌukiꞌ i laluraꞌ.
Kódóꞌ ina mewaliꞌAꞌ Pueꞌ Alaraꞌ,
hai hira ina mewaliꞌheꞌ taunáNgkuꞌ.
11 I tempó iti,
tiꞌarapoheꞌ paraluu mopaturoꞌ
halaluraꞌ ba hángká rángáraꞌ
bona hira moisáꞌAꞌ,
láwiꞌ hira upu-upu ina moisáꞌAꞌ,
maroꞌa to i reá tueꞌraꞌ,
maroꞌa to i wóiꞌ tueꞌraꞌ.
12 I tempó iti,
ina Kuámpungi dósáraꞌ,
hai tiꞌara piꞌi ina Kubuhinao salaꞌraꞌ.” (Ieremia 31:31-34)
13 Mewaliꞌ i lalu ngkóráꞌna Pueꞌ Ala iti,
Ia mampolaluita kana i dándiNa to woꞌu,
hai mouláꞌ laluitaNa,
dándi to rungu-runguna hangaa-ngaa rapaháwángi,
tiꞌara piꞌi mobunduꞌ láwiꞌ liu miꞌi tempóna.