4
Kómu to rapepueꞌi,
hangaa-ngaa niweꞌi hawiꞌmi apa to maroꞌa hai to hintotoꞌ,
láwiꞌ niꞌisá miꞌi ara woꞌo Pueꞌmi to i surugáꞌ.
Paturoꞌ kana i pekakae hai bábehiántaꞌ i tauna to tiꞌaraheꞌ toSarani
2 Mekakaekou oaꞌ,
hai ane mekakaekou,
hangaa-ngaa hangko i lalumi ntepuꞌu,
hai hangaa-ngaa niuliꞌ handaꞌ kamaroꞌana i Pueꞌ Ala.
3 Hai nipekakaeáꞌangkaiꞌ woꞌo,
bona Pueꞌ Ala mampobungkáhiáꞌangkaiꞌ rárá mopahaweꞌ ngkóráꞌNa mokana i tunggáiáNa to tewuniángi hangkoia,
to deꞌe-deꞌe nabukeki miꞌi Kerisitu.
Hai kódóꞌ ratarungkuaꞌ ánti popahaweꞌkuꞌ bámbári iti.
4 Kupembiáꞌ bona nipekakaeáꞌaꞌ wongkódóꞌá,
bona kubuku mopakanótó ntepuꞌu bámbári kana i Kerisitu iti,
láwiꞌ iti miꞌi to hangaa-ngaa kupobágóꞌ.
5 Ane arakou hingkakani hai tauna to tiꞌara mepoinálái,
hangaa-ngaa katueꞌmi nipakaroꞌa-roꞌa,
hai tempómi nipopobunduꞌ ntepuꞌu mopahaweꞌáheꞌ rárá katehómpóꞌ.
6 Ane molalaluitakou hai tauna to tiꞌara mepoinálái,
hangaa-ngaa nipamaꞌálusuꞌ laluitami hai nipolaluitaꞌáheꞌ maroꞌa bona tediiꞌ laluraꞌ.
Nipekiri maroꞌa noumbá rárána mohániki pekuneꞌraꞌ.
Laluita to kahópóꞌána hai tabeá
7 Kuhuoꞌ miꞌi halaluntaꞌ Tikikua lao i kómu,
bona napahaweꞌákou noumbá katueꞌkuꞌ ieneꞌ {i Roma}.
Tikiku iti ia miꞌi halaluntaꞌ to tapokaꞌahiꞌ hai rángángkuꞌ mobágóꞌ to tetidaꞌ mampopolumao bágóꞌna Pueꞌ.
8 Tunggáiángkuꞌ mohuoꞌ Tikiku lao moweoꞌkou,
bona niꞌisá noumbá katueꞌkiꞌ hai bona maróhó lalumi.
9 Kuhuoꞌ miꞌi woꞌo Onesimub lao hingkakani hai Tikiku.
Onesimu iti woꞌo halaluntaꞌ,
hai ia hangka toKolosemi.
Onesimu iti to tapokaꞌahiꞌ,
hai to peisá rapoinálái.
Hira rodua to ina mopahaweꞌákou upu-upu to mewaliꞌ ieneꞌ.
10 Aritaku to hingkakani hai kódóꞌ i lalu tarungku,
mopahaweꞌ tabeána i kómu.
Marakusi to mohalalu hai Baranaba,
ia woꞌo mopahaweꞌ tabeána.
Nibuhinao apa to kupembiáꞌ hangkoia bona ane haweꞌi Marakusi i kómu,
hangaa-ngaa nitarima maroꞌa!
11 Tabeá hangko i Iesu,
to rauliꞌ woꞌo Iustu.
To táluheꞌ iti toIahudiꞌheꞌ,
hai pakaheꞌ mopakaróhó lalungkuꞌ.
I rawa hangko i hira,
tiꞌara ara ntaniꞌ toIahudiꞌ to mobágóꞌ hingkakani hai kódóꞌ mopahaweꞌ bámbári kana i popárentána Pueꞌ Ala.
12 Tabeá woꞌo hangko i Epara,
huoꞌána Kerisitu Iesu,
hadua to hangko i jemaꞌami.
Napekakaeákou hangko i laluna ntepuꞌu,
bona maróhó pepoináláimi hai bona niꞌisá ntepuꞌu apa peundeꞌána Pueꞌ Ala.
13 Kuisá Epara iti to mobágóꞌ ntepuꞌu motulungikou to i kótá Kolose,
hai motulungiheꞌ woꞌo halaluntaꞌ to i kótá Laodikia hai i kótá Hierapoli.
14 Tabeá woꞌo hangko i sando Lukasi to tapokaꞌahiꞌ,
hai hangko i Dema.c
15 Kupembiáꞌ bona nipahaweꞌ woꞌo tabeángkiꞌ i halalu hampepepoináláintaꞌ to i kótá Laodikia.
Tabeángkiꞌ woꞌo i Nimpa hai i toSarani to mamingguheꞌ i támbina.
16 Ane roo miꞌi nibásá sura deꞌe i lindoꞌna jemaꞌa,
kupembiáꞌ bona nipakatuáheꞌ jemaꞌa-jemaꞌa to ara i Laodikia,
bona rabásá woꞌo i lindoꞌraꞌ jemaꞌa iti.
Hai surangkuꞌ to kupakatuáheꞌ toLaodikia,d
kupembiáꞌ bona ara to mobásá woꞌo i lindoꞌmi.
17 Nipahaweꞌ laluitangkuꞌ i Akipu bona ia mampopolumao maroꞌa bágóꞌna to napoináláiá miꞌi Pueꞌ i hia!
18 Tabeá to kahópóꞌána deꞌe,
kuꞌukiꞌ hai taengkuꞌ haduduángkuꞌ.
Kupembiáꞌ bona nibuhinaoaꞌ hai nipekakaeáꞌaꞌ wongkódóꞌá,
láwiꞌ ratarungku maniaꞌ.
Pueꞌ Ala mowátiꞌkou.
Hangko i kódóꞌ,
PAULU