Kamaꞌahiꞌ
13
Kehapiꞌ kubuku molaluita i lalu básá malaꞌeka ba básá tauna to tiꞌara kuisá,
agáiáná ane tiꞌara ara kamaꞌahiꞌkuꞌ,
mbero-mbero peá katueꞌkuꞌ.
Upu-upu kapánde iti nodo peá pokániꞌ ndóngi ba timbóngá to maoniꞌ.
Tiꞌara mobunduꞌ.
2 Kehapiꞌaꞌ molámbiꞌ kapánde mopahaweꞌ laluita to hangko i Pueꞌ Ala,
hai molámbiꞌaꞌ upu-upu kapánde haneꞌi kuisá upu-upu to tewuniángi,
hai ane maróhó pepoináláingkuꞌ haneꞌi kubuku molimbá buluꞌ,
agáiáná ane tiꞌara ara kamaꞌahiꞌkuꞌ,
mbero-mbero peá katueꞌkuꞌ.
3 Ane upu-upu párewángkuꞌ kugáláꞌ-gáláꞌáheꞌ tauna to meahiahiꞌ,
hai kuhuhuꞌ woꞌo wátángkuꞌ bona raintu,
agáiáná ane tiꞌara ara kamaꞌahiꞌkuꞌ,
mbero-mbero peá katueꞌkuꞌ.
4 Apa lempóna to rauliꞌ kamaꞌahiꞌ?
Ane mampokaꞌahiꞌkeꞌ hángká rángántaꞌ,
hangaa-ngaa:
sabaraꞌkeꞌ
hai maroꞌa laluntaꞌ,
tiꞌara taisá mahiniꞌ,
tiꞌarakeꞌ maꞌángkáꞌ,
tiꞌarakeꞌ mampepemahile,
5 tiꞌarakeꞌ mobábehi apa to tiꞌara moisá ádá,
tiꞌarakeꞌ mopasimbuku peundeꞌántaꞌ haduduántaꞌ i tauna ntániꞌna,
tiꞌarakeꞌ hawiáꞌ mabukoꞌ,
hai tiꞌarakeꞌ mepailalu.
6 Ane maꞌahiꞌkeꞌ i hángká rángántaꞌ,
lempóna:
tiꞌara taundeꞌ apa to kadake,
agáiáná to taundeꞌ,
apa to maroꞌa,
7 mokádipurákeꞌ hangaꞌ tauna,a
mepoináláikeꞌ oaꞌ,
mehárungákeꞌ oaꞌ,
hai sabaraꞌkeꞌ oaꞌ kehapiꞌ ba apa miꞌi to morampekeꞌ.
8 Ahiꞌ tiꞌara ina mokahópóꞌá,
agáiáná kapánde ina mokahópóꞌá.
Ane ara to mapánde mopahaweꞌ laluitana Pueꞌ Ala,
ba molaluita i lalu básá to hangko i Inao to Magasaꞌ,
ina haweꞌ tempóna kapánde iti tiꞌara piꞌi raparaluu,
9 láwiꞌ deꞌe-deꞌe makuraꞌ mani upu-upu kapánde,
hai tauna to mopahaweꞌ laluita to hangko i Pueꞌ Ala,
makuraꞌ woꞌo kamapánderaꞌ.
10 Agáiáná ane haweꞌ miꞌi tempóna Pueꞌ Ala mampopeawaꞌ upu-upuna,
upu-upu to ara mani kamakuraꞌna,
tiꞌara piꞌi ina ara.
11 Rápáꞌna,
tempóngkuꞌ mani ánángkóiꞌ,
polaluitangkuꞌ maꞌánángkóiꞌaꞌ mani;
noꞌonoꞌ woꞌo pekiringkuꞌ hai pambiárángkuꞌ.
Agáiáná deꞌe-deꞌe manginaomoꞌ,
onoꞌ haneꞌi kukábáhá miꞌi apa to kubábehi hangkoia.
12 Deꞌe-deꞌe,
nodokeꞌ tauna to mepampewaio to tiꞌara makaaꞌ,
láwiꞌ tiꞌara mani taisá upu-upuna i katoꞌu-toꞌuána.
Agáiáná i alo to ina haweꞌ,
ina taisá miꞌi upu-upuna,
láwiꞌ ina mampombelindoꞌákeꞌ Pueꞌ Ala.
Deꞌe-deꞌe,
makuraꞌ mani kakuisána Pueꞌ Ala,
agáiáná i alo to ina haweꞌ,
ina kuisá ntepuꞌu Pueꞌ Ala nodo woꞌo Ia moisáꞌaꞌ.
13 Mewaliꞌ deꞌe-deꞌe,
ara tálu pákáꞌna to hangaa-ngaa tabábehi:
mepoináláikeꞌ i Pueꞌ Ala,
mehárungákeꞌ i dándina Pueꞌ Ala,
hai maꞌahiꞌkeꞌ i hángká rángántaꞌ.
Agáiáná hangko i tálu pákáꞌna iti,
to melumbuꞌ ntepuꞌu kamaroꞌana ia miꞌi kamaꞌahiꞌ.